July

Nambawan present wea Jehovah givim lo iumi, hem for savve hao for toktok. Bat samfala no iusim gud datfala present. Satan laea lo Eve, and from datwan iumi evriwan sin and no perfect. (Jenesis 3:​1-4, SIPB) Adam iusim nogud datfala present taem hem blamem Eve and Jehovah for sin wea hemseleva duim. (Jenesis 3:​12, SIPB) And bihaen Cain killim dae brata blo hem Abel, hem laea lo Jehovah. (Jenesis 4:​9, SIPB) Distaem staka movie garem olketa nogud toktok insaed. Lo skul and lo waka ples tu staka pipol savve tok swear. From staka taem iumi savve herem pipol iusim nogud toktok, sapos iumi no careful maet iumi start for iusim olketa toktok olsem tu. Iumi olketa Christian laek for mekem Jehovah hapi, so bae iumi no laek for talem eni nogud toktok. Iumi laek for iusim datfala present for toktok lo gudfala wei, olsem for praisem God. w22.04 4-5 ¶1-3

Jesus garem balance tingting abaotem material samting. Hem enjoyim naes kaikai and gudfala wine. (Luke 19:​2, 6, 7) First mirakol wea hem duim, hem changem wata for kamap gudfala wine. (John 2:​10, 11) And Bible sei lo day wea hem dae, hem werem kaleko wea barava expensive. (John 19:​23, 24) Bat material samting no barava important lo laef blo Jesus. Hem sei sapos Kingdom hem first samting lo laef blo iumi, Jehovah bae provaedem wanem iumi needim. (Matt. 6:​31-33) Staka kasem gud samting from olketa followim advaes lo Bible abaotem selen. Tingim example blo Daniel, wanfala singol brata. Hem sei: “Taem mi teenager mi disaed for iusim laef blo mi for Jehovah.” Daniel mekem laef blo hem simpol, so hem garem taem for duim staka samting lo waka blo Jehovah. Daniel sei tu: “Selen hem no savve mekem mi hapi olsem olketa blessing wea mi kasem from Jehovah.” w22.05 21-22 ¶6-7

Iumi savve showimaot iumi tinghae lo truth taem iumi studyim Bible and olketa Bible pablikeson evritaem. Nomata iumi stap longtaem lo truth, iumi savve gohed lanem moa samting. Hem tru, hem hard waka for study, bat iu savve kasem gud samting from datwan. Maet iumi no laek for reading or for duim study. Bat Jehovah laekem iumi for “traehad fo lukaotem” olketa tru teaching lo Bible mekem iumi minim gud olketa teaching hia. (Provebs 2:​4-6, SIPB) Taem iumi readim and studyim Bible, datwan bae helpem iumi. Corey sei taem hem duim Bible reading, hem readim wanfala verse, then hem chekim olketa footnote and cross-reference wea join witim datfala verse, and duim eni extra research lo hem. Then hem readim next verse and duim sem samting. Hem sei: “Disfala wei for study helpem mi for lanem staka samting!” Nomata iumi followim disfala idea for study or nara idea, iumi showimaot iumi tinghae lo truth from iumi spendem taem and waka hard for duim study.—Sams 1:​1-3, SIPB. w22.08 17 ¶13; 18 ¶15-16

Taem Jesus stap lo earth, hem iusim creation for teachim olketa disaepol blo hem abaotem Jehovah. Tingim wanfala example wea hem iusim. Jehovah showimaot love lo evriwan. Lo Sermon lo Maunten, Jesus storyim sun and rain lo olketa disaepol, wea staka taem pipol no savve ting abaotem. Bat iumi barava needim tufala samting hia for stap laef. Jehovah savve stopem olketa samting hia from pipol wea no worshipim hem, bat hem willing for provaedem datwan for evriwan. (Matt. 5:​43-45) Jesus storyim datwan for helpem olketa disaepol for luksavve hao Jehovah laekem iumi for showim love lo evriwan. Taem iumi enjoyim naes sunset or rain wea mekem iumi feel gud, iumi savve tingim hao Jehovah lovem evriwan. Olsem Jehovah, iumi savve showimaot semkaen love taem iumi preach lo evriwan. w23.03 17 ¶9-10

Wat nao aposol John sapraes tumas lo hem? Hem lukim wanfala woman wea sidaon antap lo wild animal wea kala blo hem red. Bible sei hem wanfala “jury woman wea garem bigfala paoa,” and nem blo hem “Bigfala Babylon.” Hem “durong” witim “olketa king long earth.” (Rev. 17:​1-5) Hu nao “Bigfala Babylon”? Datfala jury woman hem no stand for olketa gavman bikos Bible sei hem durong witim olketa king, wea minim olketa bigman lo gavman. (Rev. 18:9) Bible sei hem sidaon antap lo datfala wild animal, wea showimaot hem trae for kontrolem olketa gavman. And tu, hard for datfala jury woman stand for olketa bigfala bisnis blo world blo Satan bikos Revelation kolem olketa hia “olketa bisnisman long earth.” (Rev. 18:​11, 15, 16) Lo Babylon bifor hem ples wea false worship hem start. So Bigfala Babylon hem stand for evri false religion lo world.—Rev. 17:​5, 18. w22.05 11 ¶14-16

Samfala taem maet olketa mami tingting abaotem sapos pikinini blo olketa bae disaed for worshipim Jehovah. Parents savve pikinini feisim staka challenge lo world blo Satan. Nara samting wea mekem hem no isi for mami teachim pikinini abaotem Jehovah, hem from hem no garem hasband for helpem hem, or hasband no worshipim Jehovah. Distaem, nomata mami or dadi nomoa insaed lo truth, or tufala evriwan insaed truth, olketa evriwan feisim olketa challenge for teachim pikinini for lovem Jehovah and gohed faithful lo hem. Sapos datwan nao situation blo iu no wari tumas, bikos Jehovah bae helpem iu. Feel free for askem olketa parents wea iusim olketa tul wea stap for eni gud idea wea iu savve traem lo famili worship. (Provebs 11:​14, SIPB) Jehovah savve helpem iu tu for story gud witim pikinini. Prea lo Jehovah for helpem iu iusim olketa gudfala kwestin wea bae mekem pikinini for no hol bak for talem tingting and feeling blo hem.—Provebs 20:​5, SIPB. w22.04 17 ¶4, 7; 18 ¶9

Jesus barava followim olketa wei blo Dadi blo hem, Jehovah. So taem iu savve gud lo Jesus, bae iu barava lovem Jehovah. (Heb. 1:3) Best wei for savve gud lo Jesus hem for studyim fofala Gospel. Sapos hem no wei blo iu for readim Bible evriday, iu savve start distaem. Taem iu read abaotem Jesus, ting raonem olketa wei blo hem. Pipol feel free for kam story lo hem. Olsem example, olketa pikinini hapi for kam lo hem. (Mark 10:​13-16) Olketa disaepol no fraet lo Jesus. Olketa feel free for talemaot tingting blo olketa lo hem. (Matt. 16:22) Jesus barava showimaot wei blo Dadi blo hem, bikos Jehovah tu laekem pipol for story lo hem. Iu savve prea and storyim tingting and feeling blo iu lo hem. Iu sure hem bae no judgem iu. Hem lovem iu and kea for iu.—1 Pet. 5:7. w22.08 3 ¶4-5

From Jehovah creatim iumi, hem savve lo evri samting abaotem iumi and abaotem evri nara pipol lo earth tu. (Sams 139:​15-17, SIPB) Hem luksavve sapos iumi tekem samfala nogud wei from parents blo iumi. And tu, hem savve lo evri samting wea happen lo laef blo iumi. From Jehovah savve lo olketa samting hia, datwan helpem hem for showimaot mercy and laek for forgivim olketa sin blo iumi. (Sams 78:39; Sams 103:​13, 14, SIPB) Jehovah duim samting wea showimaot hem laekem tumas for forgivim iumi. Hem savve hao samting wea Adam duim nao hem mekem iumi evriwan sin and dae. (Rome 5:12) Iumi no fit for duim eni samting for sevem iumiseleva or olketa narawan from sin and dae. (Sams 49:​7-9, SIPB) Bat from God lovem and sorre lo iumi, hem duim samting for sevem iumi. John 3:16 storyim hao Jehovah sendem kam spesol Son blo hem for dae for iumi.—Matt. 20:28; Rome 5:19. w22.06 3 ¶5-6.

Man wea forgivim narawan, bae kasem forgiveness from Jehovah. Iumi lanem datwan from wanem Jehovah talem lo Job. Job hem barava feel nogud tumas lo nogud toktok wea Eliphaz, Bildad, and Zophar talem lo hem. Jehovah talem Job for prea for thrifala hia. Bihaen Job duim datwan, Jehovah blessim hem. (Job 42:​8-10, SIPB) If iumi keepim kros bae iumi spoelem iumiseleva. Jehovah savve bae iumi garem peace sapos iumi no keepim kros. (Eph. 4:​31, 32) Hem encouragem iumi for no gohed kros. (Sams 37:​8, SIPB) Sapos iumi followim advaes hia datwan bae helpem iumi. Taem iumi keepim kros, datwan savve spoelem health and tingting blo iumi. (Provebs 14:​30, SIPB) If iumi keepim kros bae hem no affectim man wea mekem iumi feel nogud, bat hem olsem iumi drinkim poison wea spoelem iumiseleva nomoa. So taem iumi forgivim narawan, hem olsem iumi kaen lo iumiseleva. Bae iumi garem peace lo mind and heart and bae iumi hapi for gohed lo worship blo iumi for Jehovah. w22.06 10 ¶9-10

Hope blo iumi hem olsem helmet bikos hem protectim mind blo iumi and helpem iumi for no tingim iumiseleva, wea datwan savve spoelem frenship blo iumi witim Jehovah. (1 Cor. 15:​33, 34) Hope blo iumi savve protectim iumi tu for no tingse hard tumas for iumi mekem Jehovah hapi. Tingim wanem Eliphaz talem lo Job. Eliphaz sei: “Waswe, eni man hemi save stret fogud?” Then hem sei olsem abaotem God: “Nomata olketa [“holy wan”], God hemi no trastem olketa nomoa.” (Job 15:​14, 15, SIPB) Datwan hem no tru! Tingim, Satan nao laekem iu for tingse iu iusles nomoa. Hem savve if iu garem tingting olsem, hope blo iu bae hem no strong. So rejectim olketa laea blo Satan. Jehovah laekem iu for kasem laef olowe and hem bae helpem iu for kasem datwan.—1 Tim. 2:​3, 4. w22.10 25-26 ¶8-10

Satan laekem Job for tingse Jehovah nao mekem hem for safa bikos hem kros lo hem. For example, Satan iusim strong wind for mekem datfala haos wea tenfala pikinini blo Job kaikai insaed for foldaon antap lo olketa. (Job 1:​18, 19, SIPB) And tu, Satan mekem fire for kam daon from heven for killim dae olketa animal blo hem and olketa wakaman blo hem tu. (Job 1:​16, SIPB) Olketa samting hia no normal, so Job tingse Jehovah nao mekem datwan for happen, and Job tingse hem duim samting wea mekem Jehovah for no hapi lo hem. Nomata olsem, Job no talem eni nogud samting abaotem Jehovah. Job tingim hao for staka year finis Jehovah duim staka gud samting for hem. So hem tingim tu, sapos hem savve acceptim olketa gud samting from Jehovah, hem shud acceptim tu olketa nogud samting. So hem sei: “Mi preisim nem blong [Jehovah].”—Job 1:​20, 21, SIPB. w22.06 21 ¶7

Jesus warnim olketa disaepol blo hem abaotem datwan moa lo John 17:14. Iumi lukim datfala profesi hem kamap tru, especially insaed 100 year wea go pas. Why nao iumi sei olsem? No longtaem bihaen Jesus kamap King lo Kingdom lo 1914, olketa aotem Satan from heven. Distaem hem stap lo earth and hem luksavve hem garem short taem nomoa. (Rev. 12:​9, 12) Bat Satan no weit nomoa for taem wea hem bae distroe. From hem kros tumas hem attakim pipol blo God. (Rev. 12:​13, 17) Dastawe world blo Satan barava heitim iumi. Nomata olsem, iumi shud no fraetem Satan and olketa follower blo hem. Bat iumi savve garem sem tingting olsem aposol Paul wea sei: “Sapos God hem saedem iumi, no eniwan savve againstim iumi.” (Rome 8:31) Iumi savve trustim Jehovah. w22.07 18 ¶14-15

Lo olketa last day Jesus savve pipol bae willing for duim preaching waka. Hem savve toktok blo man wea raetem disfala psalm bae kamap tru, wea sei: “Bae olketa pipol blong yu i hapi tumas fo kam an joen long ami blong yu.” (Sams 110:​3, SIPB) Sapos iu duim preaching waka, iu sapotim Jesus and datfala faithful wakaman, and iu help for mekem datfala profesi kamap tru. Iumi Olketa Jehovah’s Witness gohed duim datfala waka distaem, bat iumi feisim samfala challenge tu. Wanfala challenge wea iumi feisim nao hem hao pipol againstim preaching waka blo iumi. Olketa apostate and olketa bigman lo religion and lo gavman savve talem olketa samting wea no tru abaotem waka blo iumi. If olketa relative, olketa wea iumi savve, and olketa workmate bilivim olketa false information hia, olketa maet trae for stopem iumi for worshipim Jehovah and for no preach. Lo samfala kantri pipol savve attakim, arrestim, mekem olketa brata and sista for fraet, and putim olketa lo prison tu. w22.07 8 ¶1; 9 ¶5-6

Jehovah laekem iumi for markem taem for studyim Bible evritaem and for ting raonem. Taem iumi followim wanem iumi lanem, datwan bae strongim faith blo iumi and bae iumi fren gud witim Jehovah, and iumi bae fit for deal witim eni hard taem. And tu, Jehovah givim holy spirit lo olketa wea trustim toktok blo hem insaed Bible. Datfala spirit savve givim iumi “strong wea winim strong bilong man” for deal witim eni hard taem. (2 Cor. 4:​7-10) Jehovah iusim “datfala wakaman wea faithful and wise” for producem staka article, video, and music wea savve strongim faith blo iumi, and wea bae helpem iumi for gohed fren gud witim Jehovah. (Matt. 24:45) Jehovah trainim pipol blo hem for showimaot love and for comfortim each other lo olketa hard taem. (2 Cor. 1:​3, 4; 1 Thess. 4:9) Olketa brata and sista barava laek for helpem iumi for gohed faithful taem iumi feisim olketa hard taem. w22.08 12 ¶12-14

Taem iumi storyim olketa gudfala wei blo olketa brata and sista, datwan bae strongim olketa brata and sista for fren gud tugeta, and strongim tu love insaed kongregeson. Samfala taem, olketa mature Christian savve raoa or no agree witim each other. Hem nao samting wea happen lo aposol Paul and fren blo hem Barnabas. Barnabas laek for tekem Mark lo next missionary gogo blo tufala, bat Paul no agree witim datwan. Tufala “barava raoa nao,” then tufala go difren. (Acts 15:​37-39) Bat gogo Paul, Barnabas, and Mark mek peace. Bihaen, Paul talem gud samting abaotem Barnabas and Mark. (1 Cor. 9:6; Col. 4:10) Iumi tu need for mek peace witim eniwan wea iumi raoa witim lo kongregeson, and then gohed for tingim olketa gudfala wei blo hem. Datwan bae mekem kongregeson for garem peace. w22.08 23 ¶10-11

Nomata iumi traem best for followim olketa standard blo Jehovah, iumi mas no judgem narawan and tingse iumi nao raeteous. Jehovah nomoa fit for judgem pipol. (Jenesis 18:​25, SIPB) Jehovah no givim iumi datfala waka for judgem pipol. Tingim example blo datfala raeteous man Joseph. Hem no laek for judgem olketa narawan, nomata olketa wea duim nogud samting lo hem. For example, olketa brata blo hem treatim hem nogud, salem hem for kamap slave, and talem dadi blo olketa hao Joseph dae finis. Staka year bihaen, Joseph meetim moa olketa brata blo hem. Lo datfala taem Joseph kamap wanfala ruler, so hem fit for judgem olketa brata blo hem and pei bak lo olketa. Nomata olketa brata blo Joseph sorre lo wanem olketa duim, olketa warim nogud Joseph pei bak lo olketa. Bat Joseph sei lo olketa: “Yufala no fraet. Mi no save duim wanem God nomoa save duim.” (Jenesis 37:​18-20, 27, 28, 31-35; 50:​15-21, SIPB) Joseph luksavve Jehovah nomoa garem raet for judgem olketa. w22.08 30 ¶18-19

Taem samwan prea lo Jehovah for help, Jehovah savve iusim iumi for ansarem prea blo hem. Jehovah savve iusim wanfala elder, ministerial servant, pioneer, or wanfala pablisa lo kongregeson for helpem samwan. Iumi evriwan savve help tu, nomata olketa young or olketa olo, or wanfala brata or sista. Taem samwan wea lovem Jehovah prea lo hem for help, God savve iusim olketa elder and olketa faithful brata and sista for “comfortim” hem. (Col. 4:11) Hem nambawan privilege for Jehovah iusim iumi for helpem olketa brata and sista! Iumi savve helpem and comfortim olketa brata and sista lo taem blo outbreak blo wanfala sik, disaster, or persecution. Maet iumi laek for helpem olketa narawan, bat hem no isi if olketa lo famili blo iumi tu feisim hard taem. Nomata olsem, iumi laek for helpem olketa brata and sista, and Jehovah hapi taem iumi duim best blo iumi for help.—Provebs 19:​17, SIPB. w22.12 22 ¶1-2

Taem iumi lovem olketa narawan datwan helpem iumi for trustim olketa. Jesus sei tufala barava important law nao hem for lovem Jehovah and for lovem olketa narawan. (Matt. 22:​37-39) From iumi lovem Jehovah, iumi laek for followim example blo hem for pipol trustim iumi. For example, from iumi lovem olketa brata and sista, iumi bae no storyim samting wea olketa no laekem iumi for talem lo narawan. Iumi shud no storyim eni samting wea bae spoelem olketa, mekem olketa shame, or feel nogud. And tu, sapos iumi hambol pipol bae trustim iumi. Samwan wea hambol bae no laek for first wan for storyim eni samting wea happen mekem olketa narawan tingse hem savve tumas. (Phil. 2:3) Hem bae no act olsem hem savve lo olketa important samting and no savve storyim datwan lo olketa narawan. And tu, bae hem no storyim olketa idea blo hemseleva abaotem olketa samting wea Bible or olketa pablikeson blo iumi no storyim. w22.09 12 ¶12-13

Wanfala angel talem Daniel hao pipol blo God bae minim gud toktok blo Hem lo Bible, bat “pipol hu i nogud, bae i no save long olketa samting ya.” (Dan. 12:10) Distaem iumi need for pruvim iumi bae gohed faithful lo Jehovah. (Malakae 3:​16-18, SIPB) Jehovah hem gohed for hipimap olketa “spesol pipol” blo hem. Iumi laek for wanfala lo olketa hia. Iumi stap lo barava interesting taem. Bat olketa nara samting moa hem klosap for happen. Klosap nao bae iumi lukim evri nogud pipol bae finis. Then gogo, bae iumi lukim promis blo Jehovah for Daniel “laef bak moa” bae kamap tru. (Daniel 12:​13, SIPB) Waswe, iu luk forward for taem wea Daniel and olketa wea iu lovem bae “laefbak moa”? Sapos olsem, gohed faithful lo Jehovah distaem, and iumi savve sure Jehovah bae keepim nem blo iumi lo buk blo laef for olowe. w22.09 24 ¶17; 25 ¶19-20

Masbi datfala toktok strongim Ezekiel. Why nao olsem? Bikos hem mas tingim hao Jehovah talem semkaen toktok taem hem chusim Moses and Isaiah for kamap profet blo Hem. (Eksodas 3:10; Aesaea 6:​8, SIPB) Ezekiel savve tu hao Jehovah helpem tufala profet hia for duim samfala assignment wea no isi. So taem Jehovah talem Ezekiel: “Bae mi sendem yu,” datfala profet garem gudfala reason for trustim Jehovah bae helpem hem. Nara samting tu, lo Bible buk blo Ezekiel, iumi lukim disfala toktok: “[Jehovah] hemi talemaot Mesij blong hem long mi.” (Esikiel 3:​16, SIPB) And datfala toktok kamap staka taem lo buk blo Ezekiel. (Esikiel 6:​1, SIPB) So masbi Ezekiel hem barava sure Jehovah nao sendem hem. And tu, from Ezekiel hem son blo wanfala priest, masbi dadi blo hem teachim hem hao Jehovah talem olketa profet blo Hem bifor, Hem bae helpem olketa. Bible showimaot Jehovah talem Isaac, Jacob and Jeremiah, hao hem ‘stap witim’ olketa.—Gen. 26:24; 28:15; Jeremaea 1:​8, SIPB. w22.11 2 ¶3

Nomata Adam and Eve sin and datwan mekem evriwan lo laen blo tufala for sin and dae, Jehovah no changem plan blo hem for iumi olketa man. (Isa. 55:11) And plan blo hem for olketa wea faithful for laef olowe, hem no change. Tingim olketa samting wea Jehovah talem and duim for mekem plan blo hem kamap tru. Jehovah promis for resurrectim olketa wea dae finis and bae olketa garem chance for laef olowe. (Acts 24:15; Titus 1:​1, 2) Datfala faithful man Job sei Jehovah laekem tumas for resurrectim olketa wea dae finis. (Job 14:​14, 15, SIPB) Profet Daniel tu storyim hao pipol wea dae finis garem chance for resurrect and for laef olowe. (Sams 37:​29, SIPB; Daniel 12:​2, 13) And olketa Jew lo taem blo Jesus savve hao Jehovah savve givim “laef olowe” lo olketa wea faithful. (Luke 10:25; 18:18) Staka taem Jesus storyim disfala promis, and Dadi blo hem resurrectim hem tu.—Matt. 19:29; 22:​31, 32; Luke 18:30; John 11:25. w22.12 4-5 ¶8-9

Jehovah laekem iumi for fren gud witim hem. (Jas. 4:8) From hem God, Dadi, and fren blo iumi hem laek for ansarem olketa prea blo iumi and helpem iumi taem iumi kasem hard taem. And hem iusim organization blo hem for teachim and protectim iumi. Iumi savve fren gud witim Jehovah taem iumi prea lo hem and ting raonem wanem iumi readim lo Bible. Diswan bae helpem iumi for barava lovem and tinghae lo hem, and bae iumi laek for obeyim hem and praisem hem. (Rev. 4:11) Taem iumi savve staka samting abaotem Jehovah, datwan bae mekem iumi barava trustim hem and organization blo hem wea hem iusim for helpem iumi. Satan trae for mekem iumi isisi lusim trust blo iumi lo Jehovah and organization blo hem, bat iumi savve againstim hem. Taem iumi garem strong faith and barava trustim Jehovah, iumi bae no lusim God and organization blo hem.—Sams 31:​13, 14, SIPB. w22.11 14 ¶1-3

Staka Christian willing for lusim freedom and laef blo olketa from olketa lovem Jehovah wea hem Haefala Ruler blo olketa. Olketa tru Christian hia disaed strong for gohed faithful lo Jehovah. Olketa olsem thrifala Hebrew wea gohed faithful lo God, and then hem sevem olketa for no dae insaed datfala big fire. David raetem wanfala psalm wea storyim why hem important for gohed faithful lo God. Hem sei: ‘Jehovah, yu nao save jajem evri pipol. Plis yu jajem mi falom wei wea mi stret long ae blong yu, an mi gohed faithful.’ (Sams 7:​8, SIPB) David sei tu: “Mi stap sef from mi gohed faithful and duim stret samting.” (Ps. 25:21) Best samting for iumi duim hem for gohed faithful lo Jehovah! Then iumi bae experiencem wanem disfala psalm storyim: “Pipol wea gohed faithful . . . , and followim law blo Jehovah, olketa nao hapi.”—Ps. 119:​1, footnote, w22.10 17 ¶18-19

Lo full laef blo Job, hem story witim staka pipol, bat wantaem hem garem spesol chance for story witim Jehovah God. Jehovah storyim samfala nambawan samting lo creation. Hem duim datwan for strongim wei wea Job trustim hao Hem wise and savve lukaftarem pipol blo Hem. For example, Jehovah remindim Job hao hem savve provaed for olketa animal, so hem savve lukaftarem Job tu. (Job 38:​39-41; 39:​1, 5, 13-16, SIPB) Taem Job ting raonem olketa samting hia, hem lane abaotem olketa wei blo God. Iumi tu savve gohed lane abaotem God taem iumi lukluk lo creation blo hem. Bat samfala taem maet iumi faendem hem hard for duim datwan. If iumi stap lo wanfala big city, maet evriday iumi no lukim staka creation blo Jehovah. And nomata iumi stap lo rural area, maet iumi no garem taem for lukluk lo creation. Bat hem gud for spendem taem and traem best for duim datwan. w23.03 15 ¶1-2

Jesus sei: “Olketa bigfala earthquake” and olketa nara disaster bae happen bifor end hem kam. (Luke 21:11). Jesus storyim tu hao “plande pipol” bae “duim olketa samting wea no stret,” and iumi lukim diswan gohed happen distaem. For example, iumi lukim crime kamap big, pipol raf tumas, and olketa terrorist attak. (Matt. 24:12) Staka wea faithful lo Jehovah kasem olketa nogud samting and disaster affectim olketa. Jesus no sei if iumi kasem olketa nogud samting olsem, datwan hem bikos Jehovah no kea for iumi. (Isa. 57:1; 2 Cor. 11:25) Jehovah bae no duim mirakol for protectim iumi from olketa disaster, bat hem bae givim help wea iumi needim for no wari tumas and for garem peace. Iumi bae no wari tumas if iumi planim gud firstaem wanem for duim. If iumi duim olsem, waswe, datwan showim iumi no garem faith lo Jehovah? Nomoa. If iumi prepare for disaster, datwan showim iumi trustim hao Jehovah bae lukaftarem iumi, bikos Bible encouragem iumi redi for disaster wea maet happen. w22.12 18 ¶9-10

Taem Joseph insaed prison, Jehovah mekem Pharaoh for lukim tufala dream wea mekem hem wari fogud. Taem hem savve Joseph fit for talem mining blo olketa dream, hem talem samfala man for go kolem Joseph for kam lo hem. Jehovah helpem Joseph for talem mining blo tufala dream hia, and tu, Pharaoh barava tinghae lo olketa gudfala advaes blo Joseph. From Pharaoh luksavve Jehovah stap witim Joseph, hem appointim hem for lukaftarem and givim kaikai for evri pipol lo Egypt. (Gen. 41:​38, 41-44) Gogo bigfala hangere kamap lo Egypt and lo Canaan tu, wea hem kantri wea famili blo Joseph stap. Lo datfala taem Joseph fit for sevem famili blo hem, wea gogo Messiah bae kam from datfala famili laen. Hem barava klia dat Jehovah nao gohed for helpem Joseph. So nomata olketa brata blo Joseph plan for killim hem dae, Jehovah changem situation hia for fulfillim plan blo Hem. w23.01 16-17 ¶11-12

Man wea lukluk gud lo hemseleva hem kwiktaem luksavve lo samting wea bae spoelem frenship blo hem witim Jehovah, and trae for avoidim datwan. Diswan bae helpem hem for gohed fren gud witim God. (Provebs 22:​3, SIPB; Jude 20, 21) Aposol Paul encouragem olketa Christian for lukluk gud lo olketa seleva. For example, hem talem olketa Christian lo Ephesus: “Lukluk gud long samting wea iufala duim, mekem iufala wise and no olsem pipol wea no wise.” (Eph. 5:​15, 16) From Satan laek for spoelem frenship blo iumi witim Jehovah, Bible sei for iumi “gohed for luksavve long samting wea Jehovah laekem [iumi] for duim” mekem iumi savve protectim iumiseleva from Satan. (Eph. 5:17) So for mekem wise disison, iumi need for luksavve lo “samting wea Jehovah laekem [iumi] for duim.” Iumi bae luksavve lo datwan if iumi evritaem studyim Bible and ting raonem. Taem iumi savve gud lo wanem Jehovah laekem and iumi trae for “garem tingting bilong Christ,” iumi bae mekem olketa wise disison nomata no eni rul stap for followim.—1 Cor. 2:​14-16. w23.02 16-17 ¶7-9

Tingim hao iumi savve klinim olowe haos blo iumi. Maet firstaem iumi muv in lo haos, iumi barava klinim gud. Bat hao sapos iumi klinim lo datfala taem nomoa and iumi no klinim moa enitaem bihaen? Iumi savve, kwiktaem nomoa bae haos hem dirty moa. So for keepim haos klin and tidy, iumi need for klinim olowe. Iumi mas gohed waka hard tu for duim sem samting witim tingting and wei blo iumi. Bifor iumi baptaes, iumi waka hard for mekem samfala change lo laef wea iumi need for duim for mekem iumi klin lo ‘body and tingting blo iumi.’ (2 Cor. 7:1) And tu, iumi mas obeyim kaonsel blo aposol Paul for “gohed . . . garem wanfala niu tingting.” (Eph. 4:23) Nogud wei blo disfala world savve kwiktaem for mekem iumi no klin front lo Jehovah. For mekem Jehovah hapi lo iumi, iumi mas gohed chekim gud tingting, wei, and feeling blo iumi. w23.01 8 ¶1-2

Tingim go sapos iu lo there taem Jesus teach. Staka taem nao bae iu herem hem baeheartim olketa Scripture! Luk olsem taem Jesus baptaes and kasem anointing from holy spirit nao, hem just rememberim laef blo hem lo heven. First toktok wea Jesus talem bihaen hem baptaes, and olketa last toktok hem talem bifor hem dae, hem olketa quote from Scripture. (Deut. 8:3; Sams 31:​5, SIPB; Luke 4:4; 23:46) Insaed thri and haf year wea Jesus duim ministry blo hem, staka taem Jesus readim, quotem, and explainim olketa Scripture lo pipol. (Matt. 5:​17, 18, 21, 22, 27, 28; Luke 4:​16-20) Staka year bifor Jesus startim ministry blo hem, staka taem hem readim and herem Word blo God. Masbi lo haos, hem herem Mary and Joseph quotem olketa Scripture. (Deut. 6:​6, 7) And tu, evri Sabbath Jesus go witim famili lo sinagog. (Luke 4:16) Lo there, masbi hem lisin gud taem olketa readim olketa Scripture. w23.02 8 ¶1-2

Iumi garem staka reason for lovem Jehovah. For example, iu lanem hao hem “mekem evri laef samting” and hem nao givim “evri gud and perfect present.” (Sams 36:​9, SIPB; Jas. 1:17) Evri gud samting wea iu enjoyim hem kam from God wea kaen and lovem iumi. Nambawan present wea Jehovah givim lo iumi hem datfala ransom. Why nao iumi sei olsem? Tingim hao Jehovah and Son blo hem fren gud witim each other. Jesus sei: “Dadi . . . lovem mi” and “mi lovem Dadi.” (John 10:17; 14:31) From tufala stap tugeta for staka billion year tufala barava fren gud. (Provebs 8:​22, 23, 30, SIPB) Tingim hao God mas sorre tumas taem Son blo hem safa and dae. Jehovah lovem tumas pipol, and iu wanfala lo olketa, dastawe hem willing for sendem kam Son blo hem for dae mekem iu and olketa narawan fit for kasem laef olowe. (John 3:16; Gal. 2:20) Datwan hem barava gud reason for lovem God. w23.03 4-5 ¶11-13

Mi mas no followim teaching blo olketa apostate. Jesus kaonselem samfala lo kongregeson lo Pergamum from olketa start for mekhae lo teaching blo samfala man and datwan mekem kongregeson for divaed. (Rev. 2:​14-16) Bat hem praisem olketa lo kongregeson lo Thyatira bikos olketa no followim “olketa laea teaching wea kam from Satan,” and hem encouragem olketa for “hol strong” lo truth. (Rev. 2:​24-26) Jesus sei olketa Christian wea start for followim olketa laea teaching hia need for repent. Waswe, lo iumi distaem? Iumi mas no acceptim eni teaching wea no followim tingting blo Jehovah. Maet “luk olsem [olketa apostate] worshipim God” bat “samting wea olketa duim showimaot olketa nating worshipim hem nomoa.” (2 Tim. 3:5) Samting wea bae helpem iumi for luksavve and no followim olketa laea teaching, hem for studyim gud Bible. (2 Tim. 3:​14-17; Jude 3, 4) Iumi mas mek sure iumi worshipim Jehovah followim hao hem laekem. Sapos iumi duim eni samting wea no stret, iumi need for kwiktaem stretem datwan.—Rev. 2:​5, 16; 3:​3, 16. w22.05 4 ¶9; 5 ¶11