August

Jehovah raetem nem blo olketa wea toktok blo olketa showimaot olketa fraet lo hem and tinghae lo nem blo hem insaed “wanfala buk fo rimembarem olketa.” Toktok blo iumi savve showimaot wanem hem stap insaed heart blo iumi. And Jesus sei: “Samting wea man tingting tumas abaotem nao bae hem storyim.” (Matt. 12:34) Jehovah laekem olketa wea lovem hem for stap insaed niu world. Jehovah acceptim nomoa worship blo olketa wea talem gudfala toktok. (Jas. 1:26) Samfala wea no lovem God savve tok raf, tok praod, and no tok kaen. (2 Tim. 3:​1-5) Iumi no laek olsem olketa. Iumi laekem tumas for Jehovah hapi lo toktok blo iumi. Bat waswe, bae Jehovah hapi lo iumi sapos iumi story kaen lo olketa brata and sista lo meeting and pipol lo ministry, bat lo haos iumi tok raf lo olketa famili member blo iumi?—1 Pet. 3:7. w22.04 5 ¶4-5

God hem mekem datfala tenfala horn and wild animal for garem tingting for distroem Bigfala Babylon. Datwan showimaot hao Jehovah bae mekem olketa gavman for garem tingting for iusim United Nations (datfala wild animal wea kala blo hem red) for attakim olketa false religion and finisim olketa. (Rev. 18:​21-24) Hao nao diswan affectim iumi? Worship blo iumi hem mas “klin and stret long tingting bilong God wea hem Dadi bilong iumi.” (Jas. 1:27) Bigfala Babylon mekhae lo olketa laea teaching and olketa celebration wea againstim Bible and sei hem olraet for pipol durong and for duim spiritism. Bat iumi mas stap klia lo evri samting hia. And iumi gohed for warnim pipol for “go aot” from Bigfala Babylon mekem olketa no join witim hem lo sin blo hem.—Rev. 18:4. w22.05 11 ¶17-18

Olketa parents, iusim evri chance for teachim pikinini abaotem Jehovah and olketa gud samting wea hem duim for iu. (Diutronomi 6:​6, 7, SIPB) Diswan barava important if wanfala parents no insaed truth, and hem stopem nara parents wea insaed truth for study witim olketa pikinini. Wanfala sista wea nem blo hem Christine sei: “From hasband blo mi no laekem mi for storyim olketa spiritual samting lo olketa pikinini, mi iusim eni chance wea mi garem for duim datwan.” Nara samting, storyim olketa gud samting abaotem organization blo Jehovah and olketa brata and sista. No tok spoelem olketa elder, bikos datwan savve mekem pikinini for hol bak for askem help lo olketa. Keepim peace insaed famili. Hem gud for talem hasband and olketa pikinini iu lovem olketa. Taem iu story abaotem hasband blo iu showimaot iu respectim hem, and trainim pikinini for duim sem samting. Diswan bae mekem famili garem peace and bae hem isi for iu helpem pikinini for lane abaotem Jehovah.—Jas. 3:18. w22.04 18 ¶10-11

Message blo Jesus for kongregeson lo Ephesus showimaot olketa gohed strong for worshipim Jehovah, nomata olketa kasem staka nogud samting. Nomata olsem, love wea olketa garem firstaem hem nomoa nao. Sapos olketa no strongim bak datfala love, Jehovah bae no hapi lo worship blo olketa. Distaem tu, iumi need for gohed strong bat iumi need for duim datwan for stretfala reason. God hem interest lo wanem iumi duim and hem interest tu lo why iumi duim datwan. Jehovah laekem iumi for worshipim hem from iumi lovem hem and tinghae lo hem. (Provebs 16:​2, SIPB; Mark 12:​29, 30.) Iumi mas gohed wekap and lukaot. Problem wea kongregeson lo Sardis garem hem difren from kongregeson lo Ephesus. Bifor olketa duim staka samting for Jehovah, bat gogo olketa no duim nao. Jesus talem olketa for “wekap.” (Rev. 3:​1-3) Iumi savve, Jehovah bae no forgetim waka wea iumi duim.—Heb. 6:10. w22.05 3 ¶6-7

Solomon sei hapi wea iumi kasem from hard waka blo iumi hem ‘present from God.’ (Eklesiastes 5:​18, 19, SIPB) Solomon savve diswan hem tru, bikos hem man for waka hard. Hem buildim olketa haos and olketa taon, plantim olketa grape planteison, and wakem olketa garden and olketa pool for watarem garden. (Fas Kings 9:19; Eklesiastes 2:​4-6, SIPB) Datwan hem big waka and masbi hem hapi from wanem hem kamaot from datwan. Bat Solomon luksavve for hem barava hapi hem need for duim olketa spiritual samting tu. For example, hem leadim waka for buildim wanfala nambawan temple for Jehovah, wea datfala project hem gohed for sevenfala year! (Fas Kings 6:38; 9:​1, SIPB) From Solomon duim staka difren samting lo laef blo hem, gogo hem luksavve samting wea important nao hem for duim wanem Jehovah laekem. Hem sei: “Yu bin herem evri toktok nao, an las toktok nomoa hemi olsem, Yumi mas tinghae long God, an mas obeim toktok blong hem.”—Eklesiastes 12:​13, SIPB. w22.05 22 ¶8

Bible storyim staka pipol wea Jehovah willing for forgivim olketa. Maet iu tingim King Manasseh wea duim olketa barava nogud samting and sin againstim Jehovah. Hem worshipim olketa false god and encouragem olketa narawan for duim sem samting. Hem sakrifaesim tu olketa pikinini blo hem for olketa false god. Hem even tekem wanfala idol and putim lo holy temple blo Jehovah. Bible sei: “[Manasseh] duim plande samting wea hemi barava nogud tumas long ae blong [Jehovah], so hemi mekem [Jehovah] fo kros tumas.” (Mektu Kronikols 33:​2-7, SIPB) Nomata olsem, taem Manasseh barava sorre and repent, Jehovah willing for forgivim hem. (Mektu Kronikols 33:​12, 13, SIPB) Narawan wea iu maet tingim tu hem King David wea duim samfala bigfala sin, olsem hem duim adultery and killim man dae. Bat taem David luksavve lo sin blo hem and barava sorre and repent, Jehovah forgivim hem tu. (Mektu Samuel 12:​9, 10, 13, 14, SIPB) So iumi savve sure Jehovah laekem tumas for forgivim iumi. w22.06 3 ¶7

Samfala taem maet iumi start for lus hope. Maet iumi no patient nao for weit lo God. Bat, bikos Jehovah stap for olowe, maet wat iumi tingse hem longtaem lo iumi, hem short taem nomoa lo Jehovah. (2 Pet. 3:​8, 9) Hem bae duim wat hem promisim lo taem wea hem disaedem wea barava fitim, bat no lo taem wea maet iumi expectim. Wat nao savve helpem iumi for no lus hope taem iumi patient for weit lo God for mekem olketa promis blo hem kamap tru? (Jas. 5:7) Gohed fren gud witim God, bikos hem nao bae mekem hope blo iumi kamap tru. Bible sei for iumi garem hope, iumi mas garem faith hao Jehovah stap and biliv hao hem bae “givim gud samting long olketa wea barava lukaotem hem.” (Heb. 11:​1, 6) Sapos iumi bilivim Jehovah stap, iumi bae barava sure hem bae mekem olketa promis blo hem kamap tru. For iumi strongim hope blo iumi, iumi mas prea lo Jehovah and readim Bible. Iumi savve fren gud witim Jehovah nomata iumi no lukim hem. Iumi savve story lo hem lo prea, and trustim hao hem lisin lo iumi.—Jeremaea 29:​11, 12, SIPB. w22.10 26 ¶11-13

Tingim diswan. Job hem sidaon lo asis and body blo hem pain tumas. (Job 2:​8, SIPB) Thrifala false fren talem Job hao hem wanfala nogud man and evri samting hem duim hem iusles nomoa. Olketa hard taem wea kasem Job hem barava tumas nao, and hem sorre tumas for olketa pikinini blo hem wea dae. Firstaem, Job stap kwaet nomoa. (Job 2:​13, SIPB) Bat sapos olketa man hia tingse Job bae lusim Jehovah from Job no talem eni samting, olketa rong. Maet Job luk stret lo feis blo olketa false fren hia taem hem sei: “Go kasem taem mi dae mi bae gohed faithful!” (Job 27:5 ) Wat nao helpem Job for gohed faithful? Nomata taem hem barava discourage from hem safa tumas, hem no lus hope hao gogo God bae finisim olketa nogud samting wea kasem hem. Hem savve nomata hem dae, Jehovah bae mekem hem laef bak.—Job 14:​13-15, SIPB. w22.06 22 ¶9

Jehovah wea wakem heven and earth givim iumi spesol privilege for prea lo hem. Tingim, iumi savve storyim feeling blo iumi lo Jehovah lo enitaem and lo eni languis. Iumi savve prea nomata iumi stap lo hospital or lo prison, and iumi sure Jehovah bae lisin lo iumi. Iumi tinghae lo datfala privilege. King David tu tinghae lo privilege for prea. Hem sei: “Mi laekem yu fo hapi long prea blong mi olsem wea yu hapi long smok blong insens wea prist hemi bonem go long yu.” (Sams 141:​1, 2, SIPB) Lo taem blo David, olketa priest preparem gud incense wea olketa bonem lo worship blo olketa for Jehovah. (Eksodas 30:​34, 35, SIPB) Taem David storyim incense, datwan showimaot hem laek for tingting gud firstaem abaotem wanem for talem taem hem prea lo Jehovah. Olsem David, iumi tu laekem Jehovah for hapi lo olketa prea blo iumi. w22.07 20 ¶1-2; 21 ¶4

Jehovah nao bae changem bak nogud samting. Jehovah no laekem iumi for changem bak nogud samting wea samwan duim lo iumi. (Rome 12:​20, 21) From iumi no perfect, iumi no fit for judgem samwan lo stretfala wei, olsem God savve duim. (Heb. 4:13) And samfala taem, feeling blo iumi savve mekem hem hard for iumi luksavve lo stret samting for duim. Jehovah iusim James for talem diswan: “Man wea kros no savve duim stretfala samting wea God laekem.” (Jas. 1:20) Iumi sure Jehovah bae duim stret samting, and hem bae stretem evri nogud samting lo future.Taem iumi forgive, iumi showimaot iumi trustim Jehovah for duim stret samting. Taem iumi leavim evri samting lo hand blo Jehovah, datwan showimaot iumi trustim hem for stretem evri nogud samting wea kamaot from sin. Lo niu world, iumi bae no tingim moa evri nogud samting wea happen lo iumi distaem, and ‘evrisamting wea hemi hapen bifoa, bae pipol fogetem nao.’—Aesaea 65:​17, SIPB. w22.06 10-11 ¶11-12

From pipol heitim iumi, datwan pruvim iumi followim example blo Jesus and duim waka wea Jehovah hapi lo hem. (Matt. 5:​11, 12) Nomata Satan bihaenem pipol wea againstim iumi, Jesus garem bigfala paoa winim Satan! From Jesus leadim preaching waka, gud nius hem kasem pipol lo evri kantri. Nara challenge wea iumi feisim lo preaching waka hem from pipol story lo staka difren languis. Toktok wea Jesus talem lo John lo wanfala vision showimaot hao iumi bae winim datfala challenge. (Rev. 14:​6, 7) Hao nao olsem? Distaem staka pipol garem chance for herem message abaotem Kingdom. From olketa Bible pablikeson lo jw.org website stap lo winim 1,000 languis, pipol evriwea lo world savve readim! Governing Body appruvim transleison blo Enjoyim Laef for Olowe! buk lo winim 700 languis. w22.07 9 ¶6-7

Jesus feel sorre for pipol. Aposol Matthew sei: “Taem hem lukim olketa pipol hem barava sorre tumas long olketa, bikos olketa garekil and stap olobaot olsem olketa sheepsheep wea no garem eni man for lukaftarem olketa.” (Matt. 9:36) Hao nao Jehovah ting lo pipol? Jesus sei: “Dadi bilong mi long heven bae no laekem eniwan long olketa disaepol hia for lus.” (Matt. 18:14) Datwan barava encouragem iumi! Taem iu savve gud lo Jesus, bae iu barava lovem Jehovah. Nara samting, taem iu associate witim olketa mature brata and sista lo kongregeson, bae iu barava lovem olketa. Bae iu lukim hao olketa brata and sista hia barava hapi, and olketa nating regretim disison blo olketa for worshipim Jehovah. Iu savve askem olketa for storyim samfala experience blo olketa. Taem iu garem wanfala important disison for mekem, askem olketa for advaes. Tingim hao “plande advaes” bae mekem iu win. w22.08 3 ¶6-7

Iumi evriwan bae feisim samfala hard samting lo laef. Bat olsem iumi lanem, Jehovah bae lukaftarem iumi. Olsem wanfala dadi wea lovem iumi, hem bae evritaem tingim iumi, hapi for herem iumi taem iumi ask for help, and bae sapotim iumi. (Aesaea 43:​2, SIPB) Iumi sure iumi savve deal witim olketa hard taem bikos hem provaedem evri samting wea iumi needim for deal witim datwan. Hem givim iumi Bible, staka spiritual kaikai, hem laekem iumi for prea lo hem enitaem, and hem iusim olketa brata and sista for helpem iumi. Iumi hapi for garem wanfala Dadi lo heven wea laek for lukaftarem iumi. Bible sei: “Hemi gohed fo mekem yumi hapi.” (Sams 33:​21, SIPB) Taem iumi iusim gud evri samting wea Jehovah provaedem for helpem iumi, datwan showimaot iumi tinghae lo hem. Iumi need for duim best blo iumi for evritaem obeyim God and duim wanem hem laekem. Taem iumi duim olsem, hem bae lukaftarem iumi for olowe! w22.08 13 ¶15-16

Staka pipol distaem no savve hu nao olketa savve trustim. Olketa no sure sapos pipol wea olketa respectim olsem olketa bigman lo gavman, olketa scientist, and olketa bisnisman bae laek for duim samting for helpem olketa. And tu, olketa no respectim olketa leader blo olketa religion wea sei olketa Christian. So hem fitim nomoa for olketa pipol hia no trustim Bible wea olketa leader hia sei olketa followim. From iumi worshipim Jehovah, iumi bilivim hao hem nao “God blo truth” and hem evritaem laekem iumi for kasem gud samting. (Ps. 31:5; Isa. 48:17) Iumi savve trustim wanem iumi readim lo Bible. Iumi agree witim wanfala savveman wea sei: “Evri samting wea God talem hem tru and hem evritaem kamap tru. Pipol blo God savve trustim wanem hem talem bikos olketa trustim God.” w23.01 2 ¶1-2

Iumi strongim olketa brata and sista blo iumi taem iumi helpem olketa for garem strongfala faith lo Jehovah. Samfala kasem hard taem from olketa wea no insaed truth. Samfala wikdaon bikos olketa kasem big sik or from samwan duim samting wea mekem olketa feel nogud. Hem no isi for samfala Christian wea baptaes for longtaem finis bikos olketa weit longtaem for end hem kam. Olketa samting hia savve testim faith blo olketa. Samfala Christian lo first century feisim olketa semkaen test tu. Aposol Paul iusim toktok blo God for strongim faith blo olketa brata and sista. For example, olketa Jew Christian maet no savve wanem for talem taem olketa famili member wea no Christian sei Jew religion hem winim Christian religion. Masbi leta wea Paul raetem lo olketa Hebrew Christian barava strongim olketa hia. (Heb. 1:​5, 6; 2:​2, 3; 9:​24, 25) Olketa savve iusim wanem Paul talem for ansarem olketa famili member hia. w22.08 23 ¶12-14

Pipol lo world blo Satan no sure hu nao for trustim. Olketa maet feel olsem olketa no savve trustim olketa bisnisman, bigman lo gavman, and leader lo religion bikos olketa savve laea. Olketa no savve trustim samfala fren, neiba, and nomata samfala insaed famili tu. Iumi no sapraes lo diswan bikos Bible sei: “Long olketa last day . . . , pipol bae . . . no faithful, . . . laea for spoelem narawan, . . . [and] spoelem fren bilong olketa.” So staka pipol bae followim wei blo Satan, god blo disfala world, wea no eniwan savve trustim. (2 Tim. 3:​1-4; 2 Cor. 4:4) Samwan wea iumi olketa Christian savve trustim, hem Jehovah. Iumi sure hem lovem iumi and bae “no save lusim” iumi. (Sams 9:​10, SIPB) Iumi savve trustim Christ Jesus tu bikos hem givim laef blo hem for iumi. (1 Pet. 3:18) And iumi luksavve iumi savve trustim olketa advaes lo Bible.—2 Tim. 3:​16, 17. w22.09 2 ¶1-2

Iumi savve hapi nomata iumi kasem samfala hard taem. Hao nao olsem? Jesus storyim datwan lo Sermon lo Maunten. Hem sei: “Olketa wea luksavve olketa needim God bae hapi.” (Matt. 5:3) Jesus savve Jehovah wakem iumi for laek savve lo hem and for worshipim hem. And from Jehovah hem “datfala hapi God,” olketa wea worshipim hem savve hapi tu. (1 Tim. 1:11) Waswe, iumi savve hapi nomata iumi deal witim olketa hard samting? Ia. Lo datfala sermon, Jesus sei “olketa wea barava sorre bae hapi.” Jesus sei tu “olketa wea nara pipol spoelem olketa from olketa duim samting wea stret,” bae hapi. (Matt. 5:​4, 10, 11) Jesus sei nomata iumi deal witim samfala hard samting, iumi savve hapi sapos iumi savve lo God and fren gud witim hem.—Jas. 4:8. w22.10 6 ¶1-3

Taem wanfala Christian garem gudfala tingting bae hem luksavve lo taem for ‘stap kuaet an taem fo toktok.’ (Eklesiastes 3:​7, SIPB) Lo samfala kantri, olketa savve sei “for toktok hem olsem silver, bat for kwaet hem olsem gold.” Datwan minim samfala taem hem gud for stap kwaet and no story. Tingim disfala example. Wanfala experience elder savve helpem olketa nara kongregeson for deal witim samfala problem. Wanfala elder lo kongregeson blo datfala elder sei: “Hem no savve storyim olketa confidential information abaotem olketa nara kongregeson lo mifala.” From hem garem gudfala tingting, body of elders lo kongregeson blo hem respectim hem. Olketa trustim hao hem bae no storyim olketa confidential information abaotem kongregeson blo olketa lo narawan. Nara samting wea mekem pipol for trustim samwan, hem for honest. Iumi trustim samwan wea honest from hem bae no laea lo iumi.—Eph. 4:25; Heb. 13:18. w22.09 12 ¶14-15

Staka pipol no laek for lisin lo tru wisdom wea “kolaot long bik rod.” (Provebs 1:​20, SIPB) Bible storyim thrifala grup blo pipol wea les lo wisdom: ‘Olketa wea no garem savve,’ ‘olketa wea mekfani lo pipol,’ and ‘olketa wea karangge.’ (Provebs 1:​22-25, SIPB) ‘Olketa wea no garem savve,’ hem olketa wea bilivim nomoa evri samting wea olketa herem and wea isi nomoa for laea lo olketa. (Provebs 14:​15, SIPB) Tingim hao staka million pipol bilivim evri samting wea olketa bigman lo religion and politik talem lo olketa. Samfala hia barava feel nogud taem olketa luksavve hao olketa bigman hia laea lo olketa. Bat olketa wea Provebs 1:22 (SIPB) storyim, hem olketa wea disaed for no laek garem savve. (Jeremaea 5:​31, SIPB) Olketa no laek for lanem wanem Bible talem or obeyim olketa standard lo Bible. Iumi no laek olsem olketa hia wea savve lo stret samting, bat olketa disaed for no duim!—Provebs 1:32; 27:​12, SIPB. w22.10 19 ¶5-7

Organization blo God givim olketa direction wea savve protectim iumi. Evritaem iumi kasem reminder for givim contact information blo iumi lo olketa elder mekem olketa savve contactim iumi taem disaster happen. Maet iumi kasem direction tu for stap lo haos or muv lo nara ples, hao for kasem relief supply, or hao for helpem olketa narawan and wat taem for duim datwan. Sapos iumi no obey, iumi bae putim laef blo iumi and laef blo olketa elder wea lukaftarem iumi lo danger. (Heb. 13:17) Staka brata and sista wea displace bikos lo disaster or pipol riot againstim gavman, duim best blo olketa for deal witim niu laef blo olketa and olketa duim moa samting lo waka blo Jehovah. Olsem olketa Christian lo first century wea go stap lo olketa difren ples bikos lo persecution, olketa brata and sista hia gohed “talemaot gud nius.” (Acts 8:4) Preaching waka helpem olketa for gohed tingim Kingdom and no tingim tumas hard taem wea olketa feisim. From datwan, olketa hapi and garem peace. w22.12 19 ¶12-13

Jehovah tingim each wan lo iumi. Taem Jesus redi for sendem olketa aposol for go preach, hem helpem olketa for no fraetem persecution. (Matt. 10:​29-31) Hem iusim example blo olketa sparrow, wea hem bird wea stap evriwea lo Israel. Lo datfala taem value blo olketa bird hia hem smol tumas. Nomata olsem, Jesus sei lo olketa disaepol: “Dadi bilong iufala hem savve taem wanfala smol bird olsem hem dae.” Then hem sei: “Iufala barava important winim evri smol bird hia.” Jesus showimaot lo olketa disaepol hao Jehovah tingim each wan lo olketa, so olketa no need for fraetem persecution. Masbi taem olketa disaepol go preach lo olketa taon and vilij and lukim olketa sparrow, olketa evritaem tingim toktok blo Jesus. If enitaem iu lukim eni smol bird, remember hao Jehovah tingim iu bikos iu “barava important winim evri smol bird.” Jehovah bae helpem iu for no fraet taem iu feisim persecution. w23.03 18 ¶12

Maet famili againstim iumi or iumi lusim waka blo iumi for selen. If hard taem wea iumi kasem hem gohed for longfala taem, maet datwan savve mekem iumi feel iusles and wikdaon. Satan savve iusim datfala chance for mekem iumi tingse Jehovah no lovem iumi. Hem laekem iumi for tingse Jehovah and organization blo hem nao mekem iumi kasem hard taem. Semkaen samting happen lo samfala Israelite lo Egypt bifor. Firstaem olketa luksavve hao Jehovah nao markem Moses and Aaron for mekem olketa kamap free from Egypt. (Ex. 4:​29-31) Gogo taem Pharaoh mekem laef blo olketa barava hard, olketa blamem Moses and Aaron. (Ex. 5:​19, 20) Olketa shud no blamem tufala faithful wakaman blo God for hard taem wea kasem olketa. If hard taem wea iumi kasem hem gohed for longfala taem, iumi need for storyim feeling blo iumi lo Jehovah lo prea and depend lo hem for helpem iumi. w22.11 15 ¶5-6

Jehovah givim laef lo pipol and hem garem paoa for mekem pipol laef bak tu. Hem givim paoa lo Elijah for resurrectim son blo datfala widow blo Zarephath. (1 Ki. 17:​21-23) God givim paoa lo profet Elisha tu for resurrectim son blo datfala Shunammite woman. (2 Ki. 4:​18-20, 34-37) Olketa resurrection wea Bible storyim pruvim hao Jehovah garem paoa for mekem pipol laef bak. Taem Jesus stap lo earth, hem tu kasem paoa from Dadi blo hem for resurrectim pipol. (John 11:​23-25, 43, 44) Distaem Jesus hem lo heven and “God givim paoa long [hem] ovarem evri samting long heven and earth.” So hem fit for fulfillim datfala promis wea sei “evriwan wea stap insaed long grev” bae laef bak and garem chance for kasem laef olowe.—Matt. 28:18; John 5:​26-29. w22.12 5 ¶10

Taem pipol hia les for lisin lo Ezekiel, datwan showimaot olketa les for lisin lo Jehovah. Toktok lo text for tuday helpem Ezekiel for luksavve hao nomata pipol les for lisin lo hem, datwan no minim hem no duim gud assignment blo hem. Jehovah talem Ezekiel tu hao taem judgment wea hem talemaot hem happen, pipol bae “save dat wanfala tru profet bin stap kam long midol long olketa.” (Esikiel 2:5; 33:​33, SIPB) Disfala toktok mas barava strongim Ezekiel for gohed duim ministry blo hem. From iumi savve Jehovah chusim iumi for duim preaching waka, datwan strongim iumi tu. Hem nambawan privilege for Jehovah kolem iumi ‘olketa witness’ blo hem! (Aesaea 43:​10, SIPB) Olsem Jehovah talem Ezekiel for “no fraetem” pipol, Jehovah talem iumi tu for “no fraet.” (Ezek. 2:6) Why nao iumi shud no fraetem olketa wea againstim iumi? Olsem Ezekiel, Jehovah nao sendem iumi and bae hem helpem iumi.—Aesaea 44:​8, SIPB. w22.11 3-4 ¶4-5

Distaem iumi tinghae lo olketa elder and ministerial servant. Iumi thankiu lo Jehovah for iusim olketa faithful brata hia for lukaftarem iumi gud! Bat wat nao samfala samting wea iumi savve duim for pipol trustim iumi? Iumi lovem olketa brata and sista blo iumi, and iumi interest for savve lo wanem hem happen lo olketa, bat iumi need for balance. Samfala Christian lo first century olketa savve “gossip and poke nose long bisnis bilong narawan and storyim olketa samting wea olketa shud no storyim.” (1 Tim. 5:13) Iumi no laek for olsem olketa hia. Bat hao sapos samwan talem iumi wanfala samting wea hem no laekem for iumi storyim lo narawan? For example, wanfala sista talem iumi hem kasem wanfala sik or nara hard taem, and hem sei for iumi no storyim datwan. So iumi shud no storyim datwan lo narawan. w22.09 10 ¶7-8

Lo Greek languis, nara wei for talem datfala toktok “changem tingting” hem for “renovatim tingting blo iu.” For renovatim wanfala samting hem no minim for decoratem nomoa. So for changem tingting, hem no minim for just duim samfala gud samting nomoa. Bat iumi mas lukluk gud lo iumiseleva and changem eni samting wea iumi need for changem, for fitim olketa standard blo Jehovah. So iumi shud gohed for duim diswan evritaem, no wanfala taem nomoa. Taem iumi kamap perfect, iumi bae fit for duim evri samting wea Jehovah hapi lo hem. Bat distaem, iumi need for gohed waka hard for duim datwan. Tingim, lo Rome 12:2 Paul sei iumi mas changem tingting blo iumi mekem iumi luksavve lo wanem God laekem iumi for duim. So for iumi no letem wei blo disfala nogud world for affectim iumi, iumi mas lukluk gud lo iumiseleva for luksavve sapos iumi followim tingting blo God or tingting blo world taem iumi markem olketa goal and mekem olketa disison. w23.01 8-9 ¶3-4

Waswe, Jehovah kontrolem evri samting wea happen lo iumi? Waswe, hem bihaenem olketa nogud samting for happen for wanfala gud reason? Nomoa, Bible no teachim datwan. (Eccl. 8:9; 9:11) Bat iumi savve, taem iumi kasem hard taem, Jehovah lukim datwan and hem herem iumi taem iumi krae lo hem for help. (Sams 34:​15, SIPB; Isa. 59:1) And tu, Jehovah savve gohed for helpem iumi for deal witim olketa hard taem wea iumi feisim. Hao nao hem duim datwan? Staka taem Jehovah savve helpem iumi taem hem provaedem comfort and encouragement lo taem wea iumi barava needim. (2 Cor. 1:​3, 4) Waswe, iu savve tingim enitaem wea Jehovah provaedem comfort and encouragement lo taem wea iu barava needim? Staka taem, iumi no luksavve lo hao Jehovah helpem iumi for deal witim wanfala hard taem go kasem taem wea hem finis. w23.01 17-18 ¶13-15

Disfala wild animal hem barava luk olsem datfala wild animal wea garem sevenfala hed bat kala blo hem red. Hem wanfala “karving bilong datfala wild animal” and hem nao “mek-eit king.” (Rev. 13:​14, 15; 17:​3, 8) Bible sei datfala “king” hem stap lo firstaem and then hem no stap, and gogo hem kamap moa. Datwan hem barava fitim United Nations wea sapotim and helpem staka gavman lo world. Firstaem nem blo datfala organization hem League of Nations. Then lo World War II hem no stap, bat gogo hem kamap moa and distaem hem garem nem United Nations. Olketa wild animal wea stand for olketa gavman, iusim olketa laea story for mekem pipol againstim Jehovah and pipol blo hem. John sei “olketa king evriwea long earth” hipap tugeta for datfala war blo Armageddon, wea hem nao “bigfala day bilong Olmaeti God.”—Rev. 16:​13, 14, 16. w22.05 10 ¶10-11

Taem Jesus lane for readim olketa Holy Raeting, datwan helpem hem for savve gud lo olketa Scripture and hem lovem and followim. For example, taem Jesus 12 years hem go lo temple. Olketa teacher wea savve gud lo Law blo Moses “barava sapraes long hao [Jesus] ansarem olketa kwestin and long bigfala savve wea hem garem.” (Luke 2:​46, 47, 52) Iumi tu savve lovem and savve gud lo Bible taem iumi readim evritaem. Bat hao nao iumi savve kasem gud samting taem iumi read? Iumi savve lane from samting wea Jesus talem lo olketa wea savve lo Law, olsem olketa scribe, Pharisee, and Sadducee. Staka taem olketa bigman hia readim olketa Scripture, bat datwan no helpem olketa. Jesus talem thrifala samting wea showimaot olketa nating kasem gud samting from olketa Scripture. Wat hem talem lo olketa bae helpem iumi tu for impruvim hao for (1) minim wat iumi readim, (2) faendem olketa spiritual treasure, and (3) for letem Bible changem laef blo iumi. w23.02 8-9 ¶2-3

Samfala samting wea iumi mas avoidim nao hem for switim samwan wea no marit partner blo iumi, ova tumas for drinkim alcohol, ova tumas lo kaikai, and for tok spoelem narawan. Iumi mas no watchim tu olketa raf entertainment, pornography, and samfala samting olsem. (Sams 101:​3, SIPB) Devil hem gohed lukaotem eni chance for spoelem frenship blo iumi witim Jehovah. (1 Pet. 5:8) If iumi no careful, Satan savve duim samting for mekem iumi for garem mind and heart wea jealous, no honest, greedy, heit, praod, and for keepim kros. (Gal. 5:​19-21) If iumi no duim samting kwiktaem for stopem olketa feeling hia, bae gogo olketa spoelem iumi. (Jas. 1:​14, 15) Wanfala samting wea no isi for iumi luksavve lo hem bat wea savve spoelem iumi, hem nao nogud association. Iumi mas tingim hao olketa wea iumi spendem taem witim olketa bae spoelem gudfala wei blo iumi. (1 Cor. 15:33) If iumi lukluk gud lo iumiseleva, bae iumi no associate witim olketa wea no followim standard blo Jehovah. (Luke 21:34; 2 Cor. 6:15) Bae iumi luksavve lo olketa samting wea savve spoelem frenship blo iumi witim Jehovah and bae iumi avoidim. w23.02 16 ¶7; 17 ¶10-11

Iu barava lovem Jehovah bikos iu lanem staka samting abaotem hem. Masbi iu laek for fren gud witim hem distaem and for olowe, and iu savve duim datwan. Jehovah askem iu for mekem heart blo hem hapi. (Provebs 23:​15, 16, SIPB) Iu savve mekem Jehovah hapi no lo toktok nomoa bat lo wanem iu duim tu. Wanem iu duim lo laef bae showim iu barava lovem Jehovah. Diswan hem best goal wea iu savve chusim. Wat nao iu savve duim for showim iu lovem Jehovah? First samting, insaed lo wanfala spesol prea, iu talem lo God hao iu dedicatem iuseleva lo hem. (Sams 40:​7, 8, SIPB) Then, iu showimaot datwan taem iu baptaes. Baptism blo iu hem wanfala hapi and important taem lo laef blo iu. Iu startim wanfala niu laef, no for iuseleva, bat for Jehovah. (Rome 14:8; 1 Pet. 4:​1, 2) Hem tru, luk olsem datwan hem big disison for iu mekem, bat hem mekem wei for iu enjoyim best laef. w23.03 5-6 ¶14-15