September

From iumi worshipim Jehovah, evritaem iumi laek for talem gudfala toktok. Datwan bae helpem olketa narawan for luksavve ‘olketa stretfala pipol wea obeim God barava deferen from olketa nogud pipol.’ (Malakae 3:​18, SIPB) Datwan nao samting wea happen lo wanfala sista wea nem blo hem Kimberly. Lo hae skul, hem and nara classmate waka tugeta lo wanfala assignment. Gogo, datfala classmate luksavve Kimberly hem difren from olketa nara student. Kimberly no tok spoelem narawan, hem tok kaen, and hem no savve swear. Datfala classmate tinghae lo wei blo Kimberly, and gogo hem start for studyim Bible. Masbi Jehovah hem hapi tumas taem toktok blo iumi mekem pipol interest for lanem truth! Iumi tu laekem toktok blo iumi for mekhae lo Jehovah. w22.04 5-6 ¶5-7

Jesus raosem from Mary Magdalene sevenfala demon wea mekem hem safa tumas. From hem tinghae lo datwan, hem kamap follower blo Jesus and hem sapotim ministry blo Jesus. (Luke 8:​1-3) Nomata Mary barava tinghae lo wanem Jesus duim, maet hem no savve hao Jesus bae duim wanfala big samting for hem. Jesus duim datwan taem hem givim laef blo hem for “mekem evriwan wea showimaot faith long hem” bae kasem laef olowe. (John 3:16) Bat from Mary gohed loyal datwan showimaot hem tinghae lo Jesus. Taem Jesus safa lo post, Mary standap klosap wea datwan showim hem lovem Jesus, and for comfortim olketa narawan lo there tu. (John 19:25) Bihaen Jesus dae, Mary and nara tufala woman tekem olketa samting wea smel naes for putim lo body blo Jesus wea stap lo wanfala cave. (Mark 16:​1, 2) Mary garem spesol privilege for meetim Jesus and story witim hem bihaen hem resurrect. Staka disaepol no kasem datfala privilege.—John 20:​11-18. w23.01 27 ¶4

Iumi shud no tingse from iumi duim staka samting for Jehovah bifor iumi savve relax distaem. Iumi need for gohed busy lo “waka bilong Lord” and gohed wekap and lukaot go kasem end, nomata laef blo iumi maet hem no isi. (1 Cor. 15:58; Matt. 24:13; Mark 13:33) Iumi mas worshipim Jehovah lo full heart blo iumi. Message blo Jesus for kongregeson lo Laodicea showimaot olketa garem difren problem. Hem sei worship blo olketa hem “no cold” and hem “no hot tu,” and datwan mekem olketa for “no hapi.” Olketa need for worshipim Jehovah lo full heart blo olketa. (Rev. 3:​16, 17, 19) Wat nao iumi lanem from datwan? Sapos iumi start for hafhaf lo worship blo iumi, iumi need for tinghae moa lo olketa samting wea Jehovah and organization blo hem provaedem for iumi. (Rev. 3:18) Iumi no laek for busy for aftarem olketa material samting, gogo iumi no tinghae nao lo olketa spiritual samting. w22.05 3-4 ¶7-8

For staka thousand year Jehovah raetem nem blo olketa raeteous pipol blo hem insaed wanfala spesol buk, and first nem wea stap insaed nao hem datfala faithful witness, Abel. (Luke 11:​50, 51) Start lo datfala taem, Jehovah addim go olketa nem insaed datfala buk, and distaem hem garem staka million nem insaed. Bible kolem datfala buk, “buk fo rimembarem olketa,” “buk bilong laef,” and “scroll bilong laef.” (Malakae 3:​16, SIPB; Rev. 3:5; 17:8.) Nem blo evriwan wea worshipim Jehovah and wea tinghae lo nem blo hem nao insaed datfala spesol buk. Olketa hia garem chance for kasem laef olowe. Nem blo iumi tu fit for stap insaed datfala buk, sapos iumi fren gud witim Jehovah and garem faith lo ransom sakrifaes blo Son blo hem, Jesus Christ. (John 3:​16, 36) Iumi evriwan laekem nem blo iumi for stap insaed datfala buk, nomata iumi garem hope for go lo heven or for stap lo earth. w22.09 14 ¶1-2

Bible buk Revelation storyim “wanfala big snek wea body bilong hem red.” (Rev. 12:3) Datfala snek faet againstim Jesus and olketa angel blo hem. (Rev. 12:​7-9) Hem attakim pipol blo God and givim paoa lo olketa gavman blo man. (Rev. 12:17; 13:4) Hu nao datfala snek? Hem nao “datfala snek bilong bifor kam, wea nem blo hem Devil and Satan.” (Rev. 12:9; 20:2) Hem nao bihaenem and kontrolem evri nara enemy blo Jehovah. Wat nao bae happen lo datfala snek? Revelation 20:​1-3 sei wanfala angel bae torowem Satan insaed hol wea deep tumas. Datwan minim Satan bae no garem paoa for duim eni samting. Lo datfala taem, Satan bae no savve “laea moa long olketa pipol long evri kantri long world go kasem taem datfala 1,000 year hem finis.” Gogo, wanfala angel bae torowem Satan and olketa demon “insaed long datfala lake bilong fire and salfa,” wea minim olketa bae finis for olowe. Lo niu world, Satan and olketa demon blo hem bae no stap nao. Datwan bae hem gud tumas! w22.05 14 ¶19-20

Jesus hem man for waka. Taem hem young hem duim carpenter waka. (Mark 6:3) From Jesus insaed big famili, masbi parents blo Jesus tinghae lo hem from hem givim samfala selen for sapotim famili. And tu, from Jesus hem perfect, olketa samting wea hem wakem hem mas barava gud so staka pipol bae laek for peim! Nomata Jesus enjoyim and busy lo waka blo hem, hem markem taem for duim olketa spiritual samting. (John 7:15) Taem hem duim ministry blo hem, hem sei lo olketa wea lisin lo hem: “Iufala mas no waka for kaikai wea savve rotten, bat iufala mas waka for kaikai wea no savve rotten and wea mekem man laef olowe.” (John 6:27) And lo Sermon lo Maunten Jesus sei: “Hipimap riches long heven.” (Matt. 6:20) Taem iumi followim advaes lo Bible, datwan bae helpem iumi for garem balance tingting abaotem waka for selen. Bible sei olketa Christian “mas garem waka” and duim gud datfala waka. w22.05 22 ¶9-10

Eunice showimaot gudfala example for Timothy. Masbi Timothy lukim hao wanem mami blo hem duim showimaot hem lovem Jehovah and hem hapi for worshipim Jehovah. Distaem tu, staka mami helpem olketa pikinini for worshipim Jehovah from gudfala example wea olketa showimaot. (1 Pet. 3:​1, 2) Hao nao iu savve duim sem samting? Pikinini shud luksavve iu lovem Jehovah. (Diutronomi 6:​5, 6, SIPB) Mami savve duim staka samting for lukaftarem pikinini. Hem iusim taem and selen blo hem, maet hem wekap lo naet for lukaftarem olketa, and hem busy tu lo olketa nara samting. Bat iufala mami shud no busy tumas lo olketa samting hia gogo iufala no garem taem for duim olketa spiritual samting. Hem gud for markem taem for prea, duim study seleva, and attendim olketa meeting. Diswan bae helpem iufala for fren gud witim Jehovah and bae iufala showimaot gud example for famili and olketa narawan tu. w22.04 16 ¶1; 19 ¶12-13

Iumi hapi for savve hem no responsibility blo iumi for judgem olketa narawan! Jehovah, wea hem nao best judge, bae duim disfala important waka. (Rome 14:​10-12) Iumi savve trustim hao Jehovah bae judge followim olketa raeteous standard blo hem. (Jenesis 18:​25, SIPB) Hard for Jehovah duim eni samting wea no stret! Iumi barava luk forward for taem wea Jehovah bae finisim evri nogud samting wea kasem iumi. Lo datfala taem, bae iumi healthy lo mind and body blo iumi. (Sams 72:​12-14, SIPB; Rev. 21:​3, 4) Bae iumi no tingim moa olketa nogud samting wea happen lo iumi bifor. Bat go kasem datfala taem, iumi thankiu lo Jehovah bikos iumi savve followim wei blo hem for forgivim narawan. w22.06 13 ¶18-19

Wanfala gud judge mas savve gud lo law. Hem shud savve sapos samting hem stret or nomoa. Wat moa wanfala gud judge need for duim? Hem mas savve lo evri samting abaotem wanfala kot case bifor hem judgem datwan. So Jehovah nao best Judge bikos hem savve lo evri samting wea happen. No eni judge lo earth hem olsem Jehovah wea savve lo evri samting abaotem wanfala nogud samting wea happen. (Jenesis 18:​20, 21, Sams 90:​8, SIPB) Pipol savve judge followim wanem olketa lukim and herem nomoa. Bat Jehovah hem minim reason why pipol duim olketa samting. Hem savve lo wanem hem happen lo laef blo iumi, hao iumi growap, savve wea iumi garem, and hem luksavve lo feeling and tingting blo iumi. Jehovah savve lukim tu wat nao insaed lo heart blo iumi. Hem luksavve why iumi duim olketa samting. Jehovah lukim evri samting. (Heb. 4:13) From Jehovah savve lo evri samting wea happen, hem fit for forgivim iumi. w22.06 4 ¶8-9

Hem gud for ting raonem olketa samting wea Satan iusim for trae spoelem Job bikos hem iusim olketa sem samting for trae spoelem iumi distaem. Hem olsem Satan sei iumi no lovem Jehovah and bae iumi lusim hem for sevem laef blo iumi. And hem olsem Satan sei tu God no lovem iumi and nomata iumi waka hard for mekem hem hapi, bae God no tinghae lo datwan. From iumi luksavve lo wanem Satan trae for duim, bae iumi no letem hem for spoelem iumi. Hem gud for tingim hao taem iumi kasem olketa hard taem hem chance for lukluk gud lo olketa wei blo iumiseleva. Taem Job kasem olketa hard samting datwan helpem hem for luksavve hem need for kamap gud lo samfala wei blo hem. For example, hem luksavve hem need for hambol. (Job 42:​3, SIPB) Taem iumi luksavve lo olketa wik point blo iumi, iumi savve waka hard for stretem olketa. w22.06 23 ¶13-14

Jehovah promis for helpem iumi. For example, just bifor Jehovah sei: ‘Yufala nao witnes blong mi,’ hem sei: ‘Taem trabol hemi kasem yufala olsem yufala gotru long dipsi, bae mi stap wetem yufala. An taem yufala garem hadtaem olsem yufala gotru long riva wea ran bikfala, bae hemi no save draonem yufala. Taem trabol hemi kasem yufala olsem yufala gotru long faea, bae hemi no save bonem yufala.’ (Aesaea 43:​2, SIPB) Taem iumi preach lo pipol, samfala taem iumi feisim olketa hard taem wea olsem fire and river wea flood. Nomata olsem, Jehovah bae helpem iumi for gohed preach. (Aesaea 41:​13, SIPB) Staka pipol distaem les lo message blo iumi. Iumi luksavve datwan no minim iumi no duim gud ministry blo iumi. Jehovah hapi from iumi faithful for gohed preach, and datwan encouragem iumi. Aposol Paul sei: “God bae blessim waka bilong man wanwan.”—1 Cor. 3:8; 4:​1, 2. w22.11 4 ¶5-6

Distaem iumi lukim olketa Bible profesi kamap tru bikos Bible sei pipol lo evri kantri “wea langguis blong olketa hemi deferen” bae lanem datfala “pure languis,” wea hem nao truth lo Bible. (Sekaraea 8:​23, SIPB; Zeph. 3:9.) Winim 8,000,000 pipol wea stap lo 240 kantri olketa part lo organization blo Jehovah, and winim 100,000 pipol baptaes evri year! Olketa niu disaepol hia lusim oldfala wei blo olketa and “garem niufala wei.” (Col. 3:​8-10) Staka lo olketa stop for durong, no raf, heitim narawan, and no ting daonem pipol from nara kantri distaem. And olsem profesi lo Aesaea 2:4 (SIPB) talem, olketa “no faetem moa olketa long narafala kantri.” From iumi waka hard for garem niufala wei, pipol laek for kam lo organization blo God, and datwan pruvim iumi followim leader blo iumi Jesus. (John 13:35) Evri samting hia happen bikos Jesus nao helpem iumi. w22.07 9-10 ¶7-8

Taem iumi prea lo Jehovah, iumi shud showimaot bigfala respect. Tingim olketa barava spesol vision wea Isaiah, Ezekiel, Daniel, and John lukim. Olketa vision hia showimaot hao Jehovah hem King wea garem bigfala paoa and glory. Isaiah “lukim Jehovah sidaon lo wanfala throne wea hae tumas.” (Isa. 6:​1-3) Ezekiel lukim Jehovah sidaon lo chariot, wea ‘laet hem saen bikfala raonem wea luknaes tumas olsem olketa kala blong renbo.’ (Esikiel 1:​26-28, SIPB) Daniel lukim “datfala Man from taem bifor kam” hem werem white kaleko, and flame blo fire kamaot from throne blo hem. (Dan. 7:​9, 10) John tu lukim Jehovah sidaon lo throne wea wanfala rainbow wea luk olsem emerald ston stap raonem. (Rev. 4:​2-4) Taem iumi ting raonem bigfala glory blo Jehovah, datwan mekem iumi for tingim hao prea hem nambawan privilege and hao hem important for showimaot respect taem iumi prea. w22.07 20 ¶3

Olketa young wan, Satan bae trae for mekem faith blo iu wik for iu no fren gud witim Jehovah. Wanfala wei hem maet duim datwan, hem bae trae mekem iu daotem samfala samting wea iu lanem lo Bible. For example, maet samfala pipol bae trae for mekem iu bilivim evolution and no bilivim hao God nao creatim iumi. Maet taem iu smol iu nating ting abaotem evolution, bat distaem maet iu lanem datwan lo skul. Maet hao teacher pruvim evolution hem start for mek sense lo iu. Bat hem gud for tingim tu hao maet no enitaem teacher hia tingting abaotem if wanfala Creator stap. Tingim disfala principle lo Provebs 18:17 (SIPB): “Man talem kam toktok fastaem, bae olketa tingse hem toktru go kasem taem nara man hem kam askem olketa kuestin.” So winim for just acceptim nomoa evriting iu lanem lo skul, hem gud for studyim Bible and olketa pablikeson blo iumi. w22.08 2 ¶2; 4 ¶8

Iumi laek for barava minim wat iumi readim lo Bible. If iumi no duim diswan, bae iumi no really kasem gud samting. For example, tingim taem wea Jesus story witim wanfala man wea “savve gud long Law.” (Luke 10:​25-29) Taem datfala man ask abaotem wat hem need for duim for kasem laef olowe, Jesus helpem hem for tingim wat Word blo God talem taem hem sei: “Wanem nao law talem? Long tingting bilong iu, wanem nao Law sei man mas duim?” Datwan mekem man hia givim stretfala ansa bikos hem quotem scripture abaotem wei for lovem God and lovem narawan. (Lev. 19:18; Deut. 6:5) Bat tingim next kwestin blo datfala man: “Hu nao olketa hia wea mi mas lovem?” Datfala kwestin showimaot man hia no minim wanem hem readim. So hem no savve hao for applyim olketa scripture hia lo stretfala wei lo laef blo hem. Iumi needim help blo Jehovah for minim gud Bible, so askem hem for holy spirit for helpem iumi for concentrate, and askem hem for helpem iumi for duim wat iumi readim. w23.02 9 ¶4-5

Iumi laek for savve hao gogo olketa brata and sista blo iumi kam insaed lo truth. And iumi laek for storyim tu wat nao mekem iumi tinghae lo truth. Maet hem gud for askem narawan, “Hao nao gogo iu savve lo Jehovah and disaed for kamap wanfala Jehovah’s Witness?” (Rome 1:11) Olketa story olsem savve helpem iumi for gohed tinghae lo truth. And tu, datwan bae helpem iumi for disaed strong for “gohed followim olketa tru teaching,” wea minim for iumi gohed duim wanem Jehovah hapi lo hem. Iumi garem staka reason for tinghae lo olketa tru teaching. Main reason, hem bikos iumi lovem Jehovah God, wea olketa tru teaching kam from hem. Toktok blo hem insaed Bible helpem iumi for savve hao hem garem bigfala paoa and hem wakem heven and earth, bat hem wanfala Dadi wea lovem iumi and barava tingim iumi tu.—1 Pet. 5:7. w22.08 14 ¶1, 3

Aposol Paul encouragem olketa brata and sista for showimaot love and “duim olketa gudfala samting.” (Heb. 10:24) Paul no just talem olketa nomoa, bat hemseleva duim datwan. For example, taem wanfala big hangere kasem olketa Christian lo Judea, Paul help for tekem go samfala samting wea olketa needim. (Acts 11:​27-30) Nomata Paul busy for duim preaching and teaching waka, hem evritaem lukaotem wei for helpem olketa wea garem need. Datwan helpem olketa for trustim hao Jehovah bae lukaftarem olketa. Sapos iumi iusim taem, strong, and savve blo iumi for duim disaster relief waka, iumi savve strongim tu faith blo olketa brata and sista. Nara samting iumi savve duim tu hem for givim donation for sapotim waka raonem world. Olketa samting hia savve helpem olketa brata and sista for trustim hao Jehovah bae no lusim olketa. w22.08 24 ¶14

Staka profesi lo Bible wea kamap tru olketa raetem staka handred year bifor olketa happen. Wanem happen lo history hem pruvim datwan. Iumi no sapraes lo diswan bikos evri profesi lo Bible hem kam from Jehovah. For example, tingim olketa profesi abaotem taem wea olketa winim taon blo Babylon bifor. Lo mek-eit century B.C.E., profet Isaiah profesi abaotem hao bae olketa tekovarem datfala maeti taon. Hem even talem tu wanfala man wea nem blo hem Cyrus nao bae tekovarem datfala taon and hao bae hem duim. (Isa. 44:27–45:2) Isaiah profesi tu abaotem hao gogo Babylon bae distroe and no eniwan bae stap insaed. (Isa. 13:​19, 20) Lo 539 B.C.E., olketa blo Media and Persia tekovarem Babylon. And tu, ples wea datfala maeti taon stap lo hem bifor hem kamap desert distaem. w23.01 4 ¶10

Jehovah chusim iumi for part lo bigfala famili blo hem. Diswan hem spesol privilege wea savve mekem iumi for kasem staka blessing! (Mark 10:​29, 30) Iumi garem staka brata and sista evriwea lo world wea lovem Jehovah and wea traem best for followim olketa standard blo hem. Maet languis, culture, and kaleko blo iumi hem no semsem, and nomata hem firstaem for iumi meetim each other hem olsem iumi savve gud lo olketa. Iumi laekem tumas for hipap tugeta witim olketa for praisem and worshipim Jehovah, and hem barava important for iumi klos witim olketa. (Sams 133:​1, SIPB) Olketa savve helpem iumi taem iumi kasem hard taem. (Rome 15:1; Gal. 6:2) Olketa savve encouragem iumi tu for gohed strong lo waka blo Jehovah and for gohed fren gud witim hem. (Heb. 10:​23-25) Tingim hao iumi bae feel sapos iumi no garem kongregeson for protectim and helpem iumi for faet againstim enemy blo iumi Satan and nogud world blo hem. w22.09 2-3 ¶3-4

Maet iumi mas careful taem iumi iusim social media, nogud iumi sharem confidential information witim staka pipol. And sapos iumi sendem datfala information online, iumi no savve kontrolem hao nao bae pipol iusim or wat kaen problem nao bae hem kosim. For kontrolem seleva hem bae helpem iumi tu for no storyim olketa information wea bae mekem laef blo olketa brata and sista stap lo danger. Diswan maet happen taem olketa police kwestinim iumi sapos iumi stap lo kantri wea gavman banim waka blo iumi. Lo disfala situation and lo olketa nara situation, hem gud for followim datfala principle lo Bible wea sei for ‘mas no letem maos blong iumi fo mekem iumi sin.’ (Sams 39:​1, SIPB) Iumi laekem famili blo iumi, olketa fren, olketa brata and sista, or olketa narawan for trustim iumi. And for pipol trustim iumi, iumi need for kontrolem seleva. w22.09 13 ¶16

For iumi hapi, iumi mas feedim iumiseleva lo spiritual wei. Iumi need for duim datwan dastawe Jesus sei: “Samting wea mekem man laef nao, hem no kaikai nomoa, bat hem evri toktok wea kamaot from mouth bilong Jehovah.” (Matt. 4:4) So hem important for readim Bible evriday. From Jehovah lovem iumi, hem iusim Bible for talem iumi wanem for duim mekem iumi garem hapi laef. Iumi lanem wat nao plan blo hem for iumi, hao iumi savve fren gud witim hem, and hao for kasem forgiveness for olketa sin blo iumi. And tu, iumi lane abaotem nambawan hope wea hem promisim for iumi lo future. (Jeremaea 29:​11, SIPB) Olketa truth hia wea iumi lanem lo Bible hem mekem iumi hapi! Taem iumi kasem olketa problem wea mekem iumi discourage, spendem moa taem for readim and ting raonem toktok lo Bible. w22.10 7 ¶4-6

Bible encouragem iumi for no olsem olketa wea no laek for garem savve. Iumi kasem wisdom taem iumi followim olketa Bible principle. If iumi duim datwan, bae iumi lukim hao Bible helpem iumi for mekem olketa wise disison and misstim olketa problem. Hem gud for tingim sapos iumi gohed for kamap mature. For example, if iu studyim Bible and go lo olketa meeting, bat iu no dedicate lo Jehovah and baptaes yet, hem gud for ting raonem wanem iu shud duim mekem iu kasem datfala goal. If iumi baptaes finis, waswe, iumi kamap gud lo wei for preach and teachim gud nius lo pipol? Waswe, olketa disison wea iumi mekem hem showimaot iumi followim olketa Bible principle? Waswe, iumi deal witim olketa narawan olsem hao Jesus duim? If iumi need for changem samting lo laef blo iumi, followim olketa reminder blo Jehovah wea “mekem man wea no garem savve for kamap wise.”—Ps. 19:7. w22.10 20 ¶8

Lo wanfala vision Ezekiel lukim hao holy spirit blo God garem bigfala paoa. Hem lukim holy spirit helpem olketa angel and muvim olketa big wheel blo wanfala chariot lo heven. (Esikiel 1:​21, SIPB) Wat nao Ezekiel duim taem hem lukim datwan? Hem seke tumas and hem sei: “Mi leidaon long daon nao wetem fes blong mi long graon.” (Esikiel 1:​28, SIPB) Masbi evritaem hem tingim datfala spesol vision, datwan mekem hem sure holy spirit blo God bae helpem hem for gohed duim ministry blo hem. Jehovah komandim Ezekiel: “Stanap. Mi wande tok wetem yu.” Datfala komand and holy spirit blo God strongim Ezekiel for getap from graon. (Esikiel 2:​1, 2, SIPB) Lo full ministry blo Ezekiel God iusim holy spirit for helpem hem.—Esikiel 3:22; 8:1; 33:22; 37:1; 40:​1, SIPB. w22.11 4 ¶7-8

Profet Isaiah storyim hao Jehovah hem olsem wanfala teacher wea wakabaot bihaen olketa student blo hem, and hem teachim olketa stretfala wei for followim. So hao nao iumi herem voice blo God bihaen lo iumi distaem? Hem iusim Bible wea olketa raetem longtaem go finis. Taem iumi readim Bible, hem olsem iumi herem voice blo God bihaen lo iumi. (Isa. 51:4) Wanem nao iumi savve duim for kasem gud samting from olketa instruction wea Jehovah givim? Isaiah storyim tufala samting for ansarem disfala kwestin. First samting, “diswan nao road.” And mek-tu samting, “wakabaot followim.” Toktok hia showimaot hem no inaf for savve nomoa lo “road,” bat iumi need for “wakabaot followim.” Distaem, iumi lanem wanem Jehovah laekem bikos organization blo Jehovah helpem iumi for minim Bible. And iumi lanem tu hao for followim wanem iumi lanem. For iumi gohed hapi lo worship blo iumi for Jehovah, iumi need for duim tufala samting hia. Then iumi savve sure iumi bae kasem blessing from Jehovah. w22.11 11 ¶10-11

No longtaem bihaen staka aposol blo Jesus dae, olketa laea Christian kam insaed kongregeson. (Matt. 13:​24-27, 37-39) Olketa “talem olketa samting wea no stret for mekem olketa disaepol followim olketa.” (Acts 20:30) Wanfala lo olketa samting wea “no stret” wea olketa laea Christian hia teachim, hem hao Jesus no “dae wantaem nomoa for sin bilong plande pipol” olsem wanem Bible teachim, bat olketa sei datfala sakrifaes mas kamap staka taem. (Heb. 9:​27, 28) Distaem staka pipol bilivim datfala false teaching. Olketa go lo church each week, samfala taem each day, for duim datfala celebration wea olketa Catholic kolem “Sakrifaes blo Mass.” Olketa nara religion savve celebratem tu dae blo Jesus bat no olowe, nomata olsem staka church member blo olketa no idea lo wat nao sakrifaes blo Jesus hem minim. w23.01 21 ¶5

Lo taem wea Jesus rul for 1,000 year, bae hem resurrectim olketa wea dae and gogo evriwan bae kamap perfect. Olketa wea Jehovah sei olketa raeteous bae ‘onam lan wea hem bin promisim fo olketa, an bae olketa stap long hem olowe.’ (Sams 37:​10, 11, 29, SIPB) And iumi bae hapi bikos “dae nao hem lastfala enemy wea bae hem finisim.” (1 Cor. 15:26) Iumi fit for trustim wanem Bible talem abaotem hope blo iumi for laef olowe. Datfala hope savve helpem iumi for gohed faithful lo olketa last day. Hem tru, iumi laek for laef olowe. Bat main reason iumi laek for gohed faithful lo Jehovah and Jesus, hem from iumi lovem tufala. (2 Cor. 5:​14, 15) Datwan mekem iumi laek for followim example blo tufala and for sharem hope blo iumi lo olketa narawan. (Rome 10:​13-15) Datwan bae helpem iumi for kaen and no tingim iumiseleva, and Jehovah bae laek for fren witim iumi for olowe. w22.12 6-7 ¶15-16

Taem iumi kasem persecution, staka samting savve spoelem peace blo iumi. Datwan savve mekem iumi fraet and warim wat nao maet happen lo iumi. And hem normal for feel olsem. Nomata olsem, iumi mas careful. Wanem Jesus talem showimaot persecution savve mekem iumi for lusim hem. (John 16:​1, 2) Jesus sei bae iumi kasem persecution, bat hem sei tu iumi savve gohed faithful. (John 15:20; 16:33)Taem gavman banim waka blo iumi, maet iumi savve kasem samfala instruction from branch office and olketa elder. Diswan hem for protectim iumi, for mek sure iumi kasem spiritual kaikai, and for helpem iumi gohed duim preaching waka. Hem important for obeyim direction wea iumi kasem. (Jas. 3:17) And tu, iumi mas no givim eni information abaotem olketa brata and sista, lo olketa wea no garem raet for kasem.—Eklesiastes 3:​7, SIPB. w22.12 20-21 ¶14-16

Distaem, Jesus gohed for leadim olketa disaepol blo hem for preach abaotem Kingdom blo God evriwea lo earth. Hem duim wanem hem promisim. Lo olketa meeting and pablikeson blo iumi, Jesus teachim iumi hao for preachim gud nius. And tu, hem givim evri samting wea iumi needim for duim disfala waka. (Matt. 28:​18-20) Iumi obeyim Jesus taem iumi waka hard for preach and teachim narawan, and for gohed lukaot taem iumi weit lo Jehovah for finisim disfala nogud world. Taem iumi followim kaonsel lo Hebrew 6:​11, 12, iumi bae biliv strong lo hope blo iumi “go kasem end.” Jehovah hem disaedem finis day and taem wea hem bae finisim disfala world blo Satan. Lo datfala day, Jehovah bae fulfillim evri profesi abaotem niu world wea stap lo Bible. Samfala taem maet iumi tingse end blo disfala world hem delay. Bat day blo Jehovah “bae hemi mas hapen long raet taem blong hem.” (Habakuk 2:​3, SIPB) So iumi laek for disaed strong for “gohed for lukluk and weit lo Jehovah,” and “patient for weitim God wea bae sevem [iumi].”—Mic. 7:7. w23.02 19 ¶15-16

Goal blo samwan wea savve klaemapem olketa maunten hem for kasem top lo maunten. Bat hem savve stop lo samfala ples followim datfala maunten for enjoyim olketa samting wea hem lukim. Olsem tu, hem gud for stop samfala taem and ting raonem wanem Jehovah gohed duim for helpem iumi taem iumi feisim hard taem. Lo end blo each day, hem gud for tingim: ‘Hao nao Jehovah blessim mi tuday? Hao nao Jehovah gohed for helpem mi nomata hard taem hia hem no finis?’ Trae for luksavve lo wanfala samting wea Jehovah duim for helpem iu. Hem tru, maet iumi prea for olketa hard taem blo iumi for finis. (Phil. 4:6) Bat iumi shud luksavve tu lo olketa blessing wea iumi kasem distaem. Tingim, Jehovah promis for strongim iumi and for helpem iumi for no givap. So gohed tinghae lo olketa samting wea Jehovah duim for helpem iumi. Then, iumi bae luksavve hao Jehovah gohed for helpem iumi lo olketa hard taem wea iumi feisim.—Gen. 41:​51, 52. w23.01 19 ¶17-18

Hem gud for each wan lo iumi tingim olketa kwestin hia: ‘Waswe, laef blo mi showimaot mi luksavve hao end blo disfala world hem klosap? Waswe, disison blo mi abaotem waka for selen or for go lo university showimaot worship blo mi for Jehovah nao barava important lo laef blo mi? Waswe, mi trustim Jehovah for provaedem need blo mi and famili blo mi? Tingim, Jehovah hapi tumas taem iumi traem best for duim evri samting wea fitim wanem hem laekem. (Matt. 6:​25-27, 33; Phil. 4:​12, 13) Iumi need for chekim evritaem tingting blo iumi mekem iumi luksavve sapos iumi need for changem samting lo laef blo iumi. Paul sei: “Gohed for lukluk gud long iufala seleva for savve sapos iufala followim yet olketa tru teaching.” (2 Cor. 13:5) So for gohed changem tingting blo iumi, iumi need for readim Bible for savve hao Jehovah ting abaotem samting, and then traem best blo iumi for duim samting wea hem hapi lo hem.—1 Cor. 2:​14-16. w23.01 9-10 ¶5-6