October

Iumi evriwan savve tek part lo meeting taem iumi singsing from heart and givim olketa koment wea iumi preparem gud. Samfala savve shame for singsing or fraet for givim koment lo meeting. Sapos iu feel olsem, tingim wat nao olketa narawan duim wea helpem olketa for no fraet. Saed lo singsing, samting wea helpem samfala hem for sing from heart blo iumi. Main reason iumi singim olketa Kingdom song hem for praisem Jehovah. So taem iumi prepare for olketa meeting, hem gud for practicem olketa song, and trae for luksavve lo hao olketa word blo song join witim subject wea olketa bae storyim lo meeting. And tu, no warim tumas hao iumi singsing, bat tingim word blo olketa song. Samfala savve fraet tumas tu for givim koment. Wat nao savve helpem iumi for no fraet? Trae for koment lo evri meeting. Tingim hao hem olraet nomoa sapos ansa blo iumi hem short, simpol, and kasem point. Jehovah tinghae lo iumi taem iumi duim best blo iumi for givim koment lo meeting. w22.04 7-8 ¶12-15

Datfala word “helpem” hem minim samwan wea ran for helpem narawan wea singaot for help. Tingim, Jehovah bae hariap for sevem samwan wea barava needim help. Diswan mekem iumi luksavve Jehovah stanbae and barava willing for helpem iumi. Iumi sure from Jehovah helpem iumi, bae iumi no givap and gohed hapi nomata iumi kasem hard taem. Wat nao Jehovah duim for helpem iumi? Bible buk Isaiah bae helpem iumi for kasem ansa bikos staka profesi wea Isaiah raetem, hem fitim pipol blo Jehovah distaem. And tu, staka taem wea Isaiah story abaotem Jehovah hem iusim toktok wea isi for iumi minim. Wanfala example hem Isaiah chapter 30. Lo datfala chapter, Isaiah storyim hao Jehovah helpem iumi wea worshipim hem (1) from hem lisin gud and ansarem olketa prea blo iumi, (2) from hem teachim iumi, and (3) from iumi kasem olketa blessing from hem distaem and lo future tu. w22.11 8 ¶2-3

Jesus talem kongregeson lo Smyrna and Philadelphia. Hem sei olketa bae kasem persecution and olketa shud no fraet, bikos olketa bae kasem reward sapos olketa faithful. (Rev. 3:10) Iumi lanem hao bae iumi kasem persecution and iumi mas no givap. (Matt. 24:​9, 13; 2 Cor. 12:10) Bible buk Revelation storyim hao pipol blo God bae kasem persecution lo “day bilong Lord.” (Rev. 1:10) Revelation chapter 12 hem storyim hao stretawe bihaen Jesus kamap King lo Kingdom blo God, bigfala faet kamap lo heven. Michael, wea hem nara nem blo Jesus Christ, hem and olketa angel blo hem faet againstim Satan and olketa demon. (Rev. 12:​7, 8) Michael and olketa angel blo hem winim Satan and olketa demon and torowem olketa kam daon lo earth. Olketa duim staka nogud samting wea mekem pipol for safa.—Rev. 12:​9, 12. w22.05 5 ¶12-13

Olketa judgment blo Jehovah hem evritaem stret and fair. Bae hem no forgivim samwan bikos hem luk naes, hem rich, garem hae position, or from hem garem bigfala savve. (Fas Samuel 16:​7, SIPB; Jas. 2:​1-4) Pipol no savve bribem Jehovah or forcem hem for duim samting. Nomata samwan hem fren blo Jehovah or nomoa, hem no letem datwan affectim disison blo hem. (Eksodas 34:​7, SIPB) Jehovah hem best Judge bikos hem minim evri samting abaotem iumi and samting wea happen lo iumi. (Diutronomi 32:​4, SIPB) Olketa man wea raetem olketa Hebrew Scripture luksavve hao taem Jehovah forgivim samwan hem difren from hao pipol savve forgivim each other. Wanfala buk sei, lo Hebrew languis olketa iusim wanfala word wea “fitim nomoa for storyim hao God forgivim samwan wea sin, bat olketa bae no iusim datfala sem word for storyim hao samwan forgivim mistek blo narawan.” Jehovah nomoa garem raet for barava forgivim samwan wea repent. w22.06 4 ¶10-11

Sapos iu no garem hasband or hasband blo iu no insaed truth bat iu gohed helpem pikinini for worshipim Jehovah, iu savve sure gudfala example blo iu savve encouragem olketa narawan. Hao sapos hem luk olsem pikinini blo iu no interest lo olketa spiritual samting? Tingim hao hem tek taem for trainim pikinini. Taem iu plantim wanfala seed, maet iu no sure sapos datfala seed bae kamap tree wea bae garem frut. Nomata iu no sure lo datwan, bae iu gohed for watarem datfala plant mekem hem garem chance for grow. (Mark 4:​26-29) Olsem tu, maet mami no sure sapos training wea hem givim lo pikinini bae helpem hem for lovem Jehovah. Nomata iu no savve kontrolem disison blo pikinini, hem gud for iu gohed trainim hem mekem hem garem chance for fren witim Jehovah. w22.04 19-20 ¶16-17

Taem Solomon faithful yet lo Jehovah, hem no tinghae tumas lo hemseleva. From hem young hem luksavve hem no savve lo staka samting and hem askem Jehovah for wisdom. (Fas Kings 3:​7-9, SIPB) And tu, taem Solomon start for rul hem luksavve hem nogud for man hem praod. Bat gogo, Solomon no followim advaes blo hemseleva. Hem kamap praod and no followim samfala law blo God. For example, wanfala law sei Israelite king “mas no garem plande waef, bikos sapos hemi tekem plande woman, bae olketa woman ya i tanem tingting blong hem.” (Diutronomi 17:​17, SIPB) Solomon no followim datfala law and garem 700 waef and 300 concubine! (Fas Kings 11:​1-3, SIPB) Maet Solomon tingse bae evri samting olraet nomoa. Bat gogo Solomon kasem nogud samting from hem no obeyim Jehovah.—Fas Kings 11:​9-13, SIPB. w22.05 23 ¶12

Distaem pipol need for mekem wanfala important disison. Olketa mas disaed sapos olketa bae sapotim Jehovah wea hem nao garem raet for rulim full universe, or sapos olketa bae sapotim Satan, datfala enemy blo God. Olketa mas disaed hu nao for sapotim, and datfala disison bae minim olketa bae kasem laef olowe or nomoa. (Matt. 25:​31-33, 46) Lo “datfala big trabol” olketa bae kasem mark for laef or for dae. (Rev. 7:14; 14:​9-11; Esikiel 9:​4, 6, SIPB). Sapos iumi disaed for sapotim rul blo Jehovah, datwan hem wise disison. And iumi laek for helpem olketa narawan tu for duim sem samting. Pipol wea faithful for sapotim rul blo Jehovah bae kasem olketa blessing. Hem important for studyim Revelation bikos hem bae strongim iumi for disaed for gohed worshipim Jehovah. And tu, taem iumi duim datwan, iumi savve helpem olketa narawan for mekem gudfala disison and for gohed worshipim Jehovah. w22.05 15 ¶1-2

Hem gud for tingim tu hao iumi need for lisin lo Jehovah, no lo olketa enemy blo iumi. Taem Jehovah story lo Job, Job lisin gud lo hem. God helpem Job for luksavve hao hem lukim evri samting wea happen lo Job, and hem bae lukaftarem Job. Job barava tinghae lo bigfala love wea Jehovah garem for hem and sei: “Lastaem, mi herem nomoa wanem pipol i talem abaotem yu, bat distaem, mi lukim yu nao long ae blong mi seleva.” (Job 42:​5, SIPB) Taem Job talem toktok hia, luk olsem hem still sidaon lo asis, and body blo hem fulap lo soa. Nomata olsem, wanem Jehovah duim mekem Job for sure Jehovah lovem hem and hapi lo hem. (Job 42:​7, 8, SIPB) Distaem tu maet pipol tok spoelem iumi and treatim iumi nogud. Olketa maet trae for mekem pipol ting daonem iumi or organization blo Jehovah. Iumi lanem from story blo Job hao Jehovah hem sure iumi bae gohed faithful nomata iumi kasem olketa hard taem. w22.06 24 ¶15-16

Bible sei olketa lo heven bae barava hapi taem Bigfala Babylon hem distroe. Bat nara samting tu bae mekem iumi evriwan hapi tumas. (Rev. 19:​1-3) Revelation storyim hao wanfala spesol samting bae happen, wea hem nao “marit bilong datfala Pikinini Sheepsheep.” Bifor datfala war blo Armageddon hem start, evriwan blo datfala 144,000 bae stap lo heven. Bat marit bae no gohed lo datfala taem. (Rev. 21:​1, 2) Datfala marit bae happen bihaen God finisim olketa enemy blo hem lo Armageddon. (Sams 45:​3, 4, 13-17, SIPB) Wat nao datfala tokpiksa marit blo Jesus and datfala 144,000 hem minim? Tingim hao wanfala marit hem mekem boy and gele for kam tugeta. Olsem tu, datfala tokpiksa marit blo Jesus Christ, datfala King, and gele wea bae hem maritim, datfala 144,000, showimaot olketa bae kam tugeta for rul. So datfala marit hem start blo wanfala niu gavman wea bae rulim earth for 1,000 year.—Rev. 20:6. w22.05 17 ¶11-13

Jesus sei lo olketa last day, hem bae markem wanfala “wakaman wea faithful and wise” for provaedem spiritual kaikai. (Matt. 24:45) Jesus markem datfala smol grup blo olketa anointed brata for provaedem spiritual ‘kaikai lo barava taem’ for pipol blo God and for olketa wea interest. Olketa brata hia no tingse olketa boss lo iumi. (2 Cor. 1:24) Bat olketa luksavve Jesus Christ nao hem “leader and komanda” blo iumi. (Isa. 55:4) Start lo 1919 datfala faithful wakaman redyim olketa difren buk for helpem olketa wea interest for lanem truth lo Bible. Lo 1921 datfala wakaman redyim datfala buk The Harp of God, for helpem olketa wea interest for lanem olketa main teaching lo Bible. Bihaen datwan, olketa redyim samfala buk moa. Which buk nao helpem iu for savve lo God and for lovem hem? w22.07 10 ¶9-10

Jehovah barava kaen tumas. Hem bae evritaem blessim iu winim wanem iu givim lo hem. (Mark 10:​29, 30) Hem bae givim iu laef wea interesting, mekem iu satisfae, and bae iu enjoyim nomata iu stap lo disfala nogud world. Datwan hem samfala nomoa lo olketa samting wea hem bae givim. Datfala laef wea start taem iu baptaes bae no end. Iu savve gohed for worshipim Jehovah for olowe. Frenship blo iu witim Jehovah bae gohed for kamap strong, and from hem laef olowe, iu tu bae laef olowe. Dedication and baptism blo iu hem wanfala barava spesol samting wea iu givim lo Dadi blo iu, Jehovah. Hem givim iu evri gud samting wea iu savve barava enjoyim. From datwan, iu savve givim lo Jehovah wea ownim heven and earth samting wea hem no garem yet, wea hem nao for iu willing for worshipim hem for olowe. (Job 1:8; 41:11; Provebs 27:​11, SIPB) Diswan hem best samting wea iu savve duim lo laef! w23.03 6 ¶16-17

Taem iu kamap teenager maet iu start for laek frenim narawan, and samfala taem maet iu kasem pressure for duim sex. Satan laekem iu for followim feeling blo iu. Wat nao savve helpem iu for no duim datwan? (1 Thess. 4:​3, 4) Hem gud for iu prea and storyim feeling blo iu lo Jehovah, and askem hem for strongim iu. (Matt. 6:13) Tingim hao Jehovah laek for helpem iu and hem bae no judgem iu. (Sams 103:​13, 14, SIPB) Hem gud for story witim parents blo iu abaotem eni problem wea iu garem and no trae for deal witim datwan seleva. Hem tru, hem no isi for story abaotem sex witim parents, bat hem important for duim datwan. Taem iu readim Bible and ting raonem olketa principle, datwan bae helpem iu for mekem olketa gudfala disison wea Jehovah hapi lo hem. Taem iu duim datwan, iu bae luksavve iu no needim olketa rul for evri samting wea iu duim bikos iu savve lo tingting blo Jehovah abaotem olketa samting. w22.08 5 ¶10-12

Olketa famili hed luksavve hem important for provaedem need blo famili. Sapos iu wanfala famili hed, maet iu wari nogud bae iu no savve provaedem kaikai or peim rent. And tu, iu maet wari sapos iu lusim waka blo iu bae hem hard for iu faendem nara waka. Or maet iu hol bak for katdaon saed lo waka, bikos iu wari nogud iu bae no garem inaf selen for peim evri samting wea iu laekem. Satan iusim olketa kaen situation olsem for spoelem staka brata and sista. Satan trae for mekem iumi tingse Jehovah no lovem iumi and bae no helpem iumi for provaedem need blo famili blo iumi. From datwan, maet iumi duim eni samting for keepim waka blo iumi, nomata datwan maet minim iumi bae duim samting wea Jehovah no hapi lo hem. w22.06 15 ¶5-6

Iumi savve Jehovah hem God wea “showimaot mercy and wea kaen tumas, no savve kros kwiktaem, garem bigfala love, and evritaem duim wanem hem talem.” (Ex. 34:6) Hem God blo justice tu. (Aesaea 61:​8, SIPB.) Hem sorre tumas taem hem lukim iumi kasem olketa nogud samting, and hem luk forward for finisim evri nogud samting hia. (Jeremaea 29:​11, SIPB) Iumi tu luk forward for datfala taem! Datwan hem wanfala reason why iumi barava lovem Jehovah! Wat nao nara reason why iumi tinghae lo olketa tru teaching? Olketa tru teaching lo Bible barava helpem iumi. Tingim wanfala example. Wanem Bible teachim hem mekem iumi garem hope. Olsem anka hem helpem boat for stedy, hope blo iumi savve helpem iumi for no wari tumas taem iumi feisim olketa problem. Lo text for tuday, Paul storyim hope wea olketa anointed Christian garem for go lo heven, bat wanem hem storyim hem fitim tu olketa Christian wea luk forward for laef olowe lo paradaes lo earth. (John 3:16) Taem iumi lane abaotem datfala hope for laef olowe, laef blo iumi hem garem mining. w22.08 14-15 ¶3-5

Taem iumi lovem olketa brata and sista datwan bae helpem iumi for trustim olketa. Wan Corinth chapter 13 storyim staka samting wea man wea garem love savve duim for helpem hem trustim narawan or for trustim narawan moa. (1 Cor. 13:​4-8) For example, verse 4 sei hem savve “patient and kaen.” Jehovah patient witim iumi nomata iumi sin againstim hem. So iumi mas patient witim olketa brata and sista taem olketa talem or duim samting wea mekem iumi feel nogud. Verse 5 sei: “[Man wea garem love] no kwiktaem for kros. Hem no tingim olowe nogud samting wea narawan duim long hem.” Iumi no laek for gohed tingim olketa samting wea olketa brata and sista duim wea mekem iumi feel nogud. Eklesiastes 7:9 (SIPB) sei hem nogud for iumi “kros kuiktaem.” Iumi need for trustim olketa brata and sista and for garem sem tingting abaotem olketa olsem Jehovah. God lovem olketa and no keepim record lo olketa sin blo olketa. Iumi tu shud duim sem samting. (Sams 130:​1-3, SIPB) Iumi shud no tingim olketa wik point, bat tingim gudfala wei blo olketa.—Matt. 7:​1-5. w22.09 3-4 ¶6-7

Bible buk Daniel hem storyim olketa samting wea bae happen lo taem blo end. For example, Daniel 12:1 (SIPB) storyim hao Michael, wea hem Jesus Christ, hem “lukaftarem olketa pipol blong [God].” Datfala part blo profesi hem kamap tru start lo 1914 taem Jesus hem King lo Kingdom blo God lo heven. Angel talem Daniel tu hao Jesus bae hem “kamap, [“standap,” NWT]” lo “taem blong trabol . . . wea hemi barava nogud tumas winim eni narafala taem bifoa.” Disfala “taem blong trabol” hem datfala “bigfala trabol” wea Matthew 24:21 storyim. So lo end blo bigfala trabol, Jesus bae standap, wea minim bae hem defendim pipol blo God lo Armageddon. Bible buk Revelation sei olketa hia hem datfala ‘big crowd wea no dae long datfala big trabol.’—Rev. 7:​9, 14. w22.09 21 ¶4-5

Olketa nem wea stap insaed lo datfala buk blo laef, Jehovah savve tekem aot, or rabemaot. Hem olsem Jehovah raetem olketa nem hia witim pencil wea hem isi nomoa for aot. (Rev. 3:5) So iumi mas mek sure nem blo iumi no savve aot from datfala buk go kasem taem Jehovah disaed for hem stap olowe, olsem hem iusim baero for raetem. Wanfala grup wea nem blo olketa stap lo datfala buk blo laef hem olketa wea God chusim for rul witim Jesus lo heven. Paul sei lo olketa wea “waka tugeta” witim hem lo Philippi, hao nem blo olketa anointed wan wea kasem invitation for rul witim Jesus lo heven hem insaed lo buk blo laef. (Phil. 4:3) Bat olketa mas gohed faithful, mekem nem blo olketa no aot from datfala tokpiksa buk. Taem Jehovah disaedem hao olketa fit for kasem reward blo olketa lo heven, nem blo olketa bae stap lo datfala buk for olowe. Datwan savve happen bifor olketa dae or bifor bigfala trabol hem start.—Rev. 7:3. w22.09 14 ¶3; 15 ¶5-6

Tingim, samwan kukim for iu fevaret kaikai blo iu. Bat maet from iu busy or tingim nara samting, iu kaikai kwiktaem nomoa and no teistim nao datfala kaikai. Bihaen iu kaikai iu luksavve iu kaikai fast tumas, and iu wish nomoa iu isisi kaikai mekem iu enjoyim kaikai hia. Waswe, enitaem iu readim Bible kwiktaem tumas and bihaen iu no savve tingim wat iu read abaotem? Taem iu readim Bible, hem gud for tingim wanem iu bae lukim and herem sapos iu lo there, and tu, tek taem for ting raonem wanem iu readim. Taem iu duim olsem, bae iu enjoyim Bible reading blo iu. Jesus markem “datfala wakaman wea faithful and wise” for givim spiritual kaikai lo barava taem, and distaem iumi barava kaikai gud. (Matt. 24:45) Evri samting wea datfala faithful wakaman provaedem hem kam from Bible.—1 Thess. 2:13. w22.10 7-8 ¶6-8

Bible sei lo olketa last day, staka pipol bae mekfani lo olketa gudfala samting. (2 Pet. 3:​3, 4) Olketa laekem “nomoa olketa nogud samting wea olketa seleva laek duim wea God no hapi long hem.” (Jude 7, 17, 18) Wat nao iumi savve duim mekem iumi no olsem olketa wea laek for mekfani lo pipol? Wanfala wei hem for no associate witim olketa wea savve tok daonem olketa samting. (Sams 1:​1, SIPB) Diswan minim iumi mas no lisin and readim eniting wea kam from olketa apostate. Iumi mas careful nogud iumi komplenim nomoa evri samting, and no trustim Jehovah and olketa direction from organization blo hem. For iumi no duim datwan, iumi need for tingim olketa kwestin hia: ‘Waswe, mi evritaem talem negative toktok abaotem niu direction and niu wei wea iumi minim wanfala scripture? Waswe, mi laek tumas for luk for olketa mistek blo olketa brata wea lead lo kongregeson?’ If iumi laek for mekem Jehovah hapi, iumi mas kwiktaem stop for duim olketa samting olsem.—Provebs 3:​34, 35, SIPB. w22.10 20 ¶9-10

Holy spirit strongim Ezekiel for duim assignment for preach lo olketa wea ‘les for lisin’ lo hem. Jehovah talem Ezekiel: “Mi mekem yu fo kamap barava strong moa long tingting winim olketa. Bae mi mekem yu fo kamap strong fogud olsem ston wea hemi had fogud, an bae yu winim olketa nomoa. Nomata olketa i pipol hu i barava agensim mi olowe nao, bat yu mas no fraetem olketa.” (Esikiel 3:​8, 9, SIPB) Hem olsem Jehovah sei lo Ezekiel: ‘No letem olketa wea les for lisin lo iu for mekem iu discourage. Bae mi helpem iu.’ Bihaen datwan, holy spirit tekem Ezekiel go lo territory blo hem for preach. Ezekiel sei: “[Jehovah] hemi tasim mi long bikfala paoa blong hem.” Hem tekem wan week for Ezekiel ting raonem message wea hem mas talemaot lo olketa. (Esikiel 3:​14, 15, SIPB) Then Jehovah leadim Ezekiel go lo wanfala valley and hem ‘putum paoa [“holy spirit”] blong hem insaet long hem.’ (Esikiel 3:​23, 24, SIPB) Datwan mekem Ezekiel redi for preach. w22.11 4-5 ¶8-9

From profet Habakkuk kasem staka hard taem, gogo hem tingse Jehovah nating tingim hem. So hem prea and storyim feeling blo hem lo Jehovah. Hao nao Jehovah ansarem prea blo Habakkuk? (Habakuk 2:​2, 3, SIPB) Taem Habakkuk ting raonem hao Jehovah sevem pipol blo hem bifor, datwan mekem hem hapi moa. Hem luksavve hao Jehovah tingim hem and bae helpem hem for deal witim eni hard taem. (Habakuk 3:​17-19, SIPB) Wat nao iumi lanem? Taem iumi kasem hard taem, prea lo Jehovah and storyim feeling blo iumi lo hem. Then depend lo hem for helpem iumi. If iumi duim olsem, iumi savve sure Jehovah bae strongim iumi for deal witim hard taem wea kasem iumi. And taem iumi luksavve hem helpem iumi, datwan bae strongim faith blo iumi. If iumi gohed duim olketa spiritual samting evritaem, bae iumi no savve letem eni hard situation and wei for daot separatem iumi from Jehovah.—1 Tim. 6:​6-8. w22.11 15 ¶6-7

Jesus and tufala criminal lo saed lo hem, olketa safa and gogo for dae. (Luke 23:​32, 33) Tufala criminal hia bin tok spoelem Jesus. (Matt. 27:44; Mark 15:32) Bat wanfala criminal changem tingting blo hem abaotem Jesus. Hem sei: “Jesus, plis, iu tingim mi taem iu King.” Then Jesus talem lo hem toktok wea stap lo text blo tuday. (Luke 23:​39-42) Wanem Jesus talem lo datfala criminal shud mekem iumi for ting abaotem laef lo Paradaes. Iumi savve lane abaotem Paradaes from wanem Bible storyim abaotem laef blo pipol wea stap anda lo rul blo King Solomon. And iumi savve expectim laef blo pipol lo paradaes anda lo rul blo Jesus and 144,000 for winim datwan. (Matt. 12:42) So, iumi “olketa nara sheepsheep” shud interest for savve lo wanem iumi need for duim for kasem laef olowe lo Paradaes.—John 10:16. w22.12 8 ¶1; 9 ¶4

Isaiah helpem iumi for luksavve hao Jehovah bae lisin gud taem iumi askem hem for help and bae stretawe ansarem olketa prea blo iumi. Isaiah sei: “Hem bae ansarem iu lo semtaem wea hem herem.” Olketa toktok hia mekem iumi sure hao Jehovah barava laek for helpem olketa wea askem hem for help. From iumi savve lo datwan, bae iumi no givap nomata iumi kasem hard taem. Jehovah lisin gud lo prea blo each wan lo iumi. Hao nao iumi savve lo datwan? Lo first part blo Isaiah chapter 30, Jehovah story lo evri Jew. Bat lo verse 19 hem story for each wan lo olketa. Isaiah sei: “Iu bae no krae moa,” “hem bae barava kaen lo iu,” and “hem bae ansarem iu.” Jehovah hem wanfala Dadi wea lovem each wan lo iumi and lisin gud lo evri prea blo iumi.—Sams 116:​1, SIPB; Isa. 57:15. w22.11 9 ¶5-6

Taem iumi preach lo pipol and teachim olketa nomata olketa narawan againstim iumi, iumi savve hapi and garem peace. Taem olketa bigman blo olketa Jew stopem olketa aposol for no preach, olketa faithful man hia obeyim God and gohed for preach. And datwan mekem olketa hapi tumas. (Acts 5:​27-29, 41, 42) Bat taem gavman banim waka blo iumi, iumi mas careful taem iumi preach. If iumi duim best blo iumi, bae iumi garem peace bikos iumi mekem Jehovah hapi and iumi talemaot message wea savve sevem laef blo pipol. Iumi savve sure hao nomata iumi feisim barava hard taem, iumi savve garem peace. Iumi needim peace blo God lo olketa taem olsem, and Jehovah nomoa savve givim iumi datfala peace. So trustim Jehovah lo taem blo aotbrek blo wanfala sik, taem iumi feisim natural disaster, or persecution. Gohed followim direction wea iumi kasem from organization blo hem. And luk forward for nambawan laef wea iumi bae kasem lo future. Taem iumi duim olsem, “God wea givim peace” bae stap witim iumi.—Phil. 4:9. w22.12 21 ¶17-18

Diswan minim iumi mas duim samting. Iumi mas waka hard for changem samfala nogud wei blo iumi olsem for feel nogud, laek pei bak, and for kros. (Eph. 4:​31, 32) Diswan hem no isi bikos iumi evriwan savve faendem hem barava hard for changem samfala nogud wei blo iumi. For example, Bible sei samfala pipol olketa “man fo kros.” (Provebs 29:​22, SIPB) Samfala wea garem olketa wei olsem bae need for gohed traem best blo olketa for change nomata bihaen olketa baptaes. (Rome 7:​21-23) Prea lo Jehovah abaotem eni nogud wei wea iumi stragol for lusim, and iumi sure Jehovah bae herem and helpem iumi. (1 John 5:​14, 15) Jehovah bae no duim mirakol for iumi, bat bae hem strongim iumi for no foldaon moa lo wanfala old wei blo iumi. (1 Pet. 5:10) So duim samting followim prea blo iumi and stay aot from eni samting wea bae mekem iumi foldaon moa lo datfala old wei. And no tingting abaotem olketa samting wea no stret.—Phil. 4:8; Col. 3:2. w23.01 10 ¶7, 9-10

Wanfala wei iumi savve duim datwan, hem for strong for duim preaching waka. Iumi story lo evriwan wea iumi meetim. Iumi no les lo eniwan bikos lo baekgraon, kala skin, tribe, or sapos hem rich or poor. Taem iumi duim olsem, iumi followim wanem Jehovah laekem, wea hem nao for “evri difren kaen man mas sev and for garem stretfala savve abaotem olketa tru teaching.” (1 Tim. 2:4) Iumi showimaot tu iumi lovem God and Christ taem iumi duim samting wea showim iumi lovem olketa brata and sista. Iumi givim wanem olketa needim and sapotim olketa taem olketa deal witim eni hard taem. Iumi comfortim olketa taem loved wan blo olketa dae, visitim olketa taem olketa sik, and duim best for encouragem olketa taem olketa feel discourage. (2 Cor. 1:​3-7; 1 Thess. 5:​11, 14) Iumi gohed prea for olketa bikos iumi savve dat “prea bilong man wea raeteous hem garem paoa.”—Jas. 5:16. w23.01 28-29 ¶7-8

Samwan wea duim construction waka bae duim staka samting for kamap gud lo datfala waka. Olsem tu, iumi savve duim staka samting for strongim narawan. Iumi savve storyim example blo olketa lo bifor wea no givap. (Heb. 11:​32-35; 12:1) Iumi savve keepim peace taem iumi storyim olketa gudfala wei blo narawan, iumi mas keepim peace witim olketa wea no agree witim iumi, and iumi shud mek peace witim eniwan wea iumi raoa witim lo kongregeson. (Eph. 4:3) And iumi savve strongim faith blo olketa brata and sista taem iumi iusim Bible for encouragem olketa, duim olketa gudfala samting for helpem olketa, and helpem olketa taem faith blo olketa wikdaon. Iumi tu savve hapi and satisfae taem iumi duim datfala waka for strongim olketa brata and sista lo kongregeson. Gogo, wanfala building savve kamap nogud, bat taem iumi helpem samwan datwan savve helpem hem for olowe! w22.08 22 ¶6; 25 ¶17-18

Jesus storyim wanfala important wei for iumi garem mekem iumi minim gud Bible. Hem nao wei for luksavve. (Matt. 24:15) Wat nao hem minim for luksavve lo samting? Hem minim for luksavve hao wanfala idea join witim nara idea, and hao wanfala idea difren from narawan, and for luksavve lo wanfala point wea maet lo firstaem hem no mas klia. And tu, Jesus sei iumi needim disfala wei mekem iumi luksavve lo olketa samting wea fulfillim Bible profesi. Iumi needim tu disfala wei bikos hem helpem iumi for kasem gud samting from wat iumi readim lo Bible. Jehovah savve givim wei for luksavve lo pipol blo hem. So prea lo hem for helpem iu garem datfala wei. Hao nao iu savve duim samting followim prea blo iu? Ting raonem gud wat iu readim, and lukim hao hem join witim olketa samting wea iu savve finis. Trae for faendem mining blo olketa scripture and lukim hao iu savve followim lo laef. (Heb. 5:14) Taem iu read witim wei for luksavve, datwan bae increasim savve blo iu abaotem Bible. w23.02 10 ¶7-8

Imaginim diswan: Fren blo iu hem givim iu wanfala haos wea samfala part lo hem needim paint and hem leak. Nomata olsem, value blo datfala haos hem staka million dollar. Masbi iu barava tinghae lo datfala haos and laek for lukaftarem gud. Olsem tu, Jehovah givim iumi laef, wea value blo hem hae tumas. Jehovah showimaot hao hem barava tinghae lo laef blo iumi taem hem sendem kam Son blo hem for dae for iumi. (John 3:16) Laef hem kam from Jehovah. (Sams 36:​9, SIPB) Aposol Paul bilivim datwan and hem sei: “[God] nao mekem iumi laef and savve wakabaot and duim samting.” (Acts 17:​25, 28) So hem fitim for iumi sei laef hem present from God. From hem lovem iumi, hem provaedem evri samting wea iumi needim for stap laef. (Acts 14:​15-17) Jehovah no duim mirakol distaem for sevem laef blo iumi. Bat hem laekem iumi for duim best blo iumi for stap healthy and for gohed worshipim hem.—2 Cor. 7:1. w23.02 20 ¶1-2

Iumi thankiu tumas lo Jehovah God bikos hem givim iumi Bible. Hem iusim Bible for teachim iumi olketa wise kaonsel wea savve helpem iumi deal witim olketa problem wea iumi feisim distaem. Hem givim iumi tu nambawan hope for future. And important samting, Jehovah iusim Bible for teachim iumi abaotem hem. Taem iumi ting raonem olketa nambawan wei blo hem, datwan tasim heart blo iumi and muvim iumi for kam klos lo God and laek for kamap fren blo hem. (Sams 25:​14, SIPB) Jehovah laekem pipol for savve lo hem. Lo bifor, hem iusim olketa angel, dream, and vision for teachim pipol abaotem hem. (Num. 12:6; Acts 10:​3, 4) Bat hao nao bae iumi savve lo olketa message from olketa angel, dream, and olketa vision hia sapos olketa no raetem daon? Dastawe Jehovah iusim olketa man for raetem “insaed lo wanfala buk” evri samting wea hem laekem iumi for savve. From ‘wei blo God barava stret fogud,’ iumi trustim hao Bible nao hem best wei wea hem iusim for story lo iumi and for helpem iumi.—Sams 18:​30, SIPB. w23.02 2 ¶1-2

Markem olketa goal. Markem olketa goal wea bae strongim faith blo iu and helpem iu for kamap mature Christian. (Eph. 3:16) For example, maet iu disaed for kamap gud lo personal study and Bible reading. (Sams 1:​2, 3, SIPB) Or maet iu trae for prea evritaem and for prea from heart. Maet iu need for careful lo hapitaem wea iu chusim and hao iu iusim taem blo iu. (Eph. 5:​15, 16) Taem iu helpem olketa narawan, datwan bae helpem iu kamap mature Christian. For example, iu savve markem goal for helpem olketa olo and olketa wea sik insaed lo kongregeson. Maet iu savve go peim samting for olketa, or helpem olketa for iusim mobile or tablet blo olketa. Iu savve showim love lo pipol tu, taem iu sharem gud nius abaotem Kingdom witim olketa. (Matt. 9:​36, 37) Sapos fitim, markem goal for duim eni samting lo full-taem service. w22.08 6 ¶16-17