November

Olketa Christian mas no tok swear. Bat olketa mas no talem olketa nogud toktok abaotem olketa narawan tu. Olsem example, taem iumi storyim pipol wea garem difren culture, kam from difren tribe, or nara kantri, iumi shud no tok nogud abaotem olketa. Iumi no laek talem tu toktok wea bae spoelem feeling blo olketa narawan. Talem toktok wea strongim narawan. Hem gud for praisem olketa narawan winim for tok spoelem or komplenim olketa. Olketa Israelite garem staka samting for tinghae lo hem, bat olketa gohed for komplen. Sapos iumi gohed for komplen, olketa narawan tu bae duim olsem. Bible storyim hao taem tenfala spae talem wanfala nogud report, datwan mekem olketa Israelite for “tok agensim Mosis.” (Nambas 13:31–14:​4, SIPB) Bat taem iumi praisem olketa narawan, datwan savve mekem evriwan for hapi. So lukaotem chance for praisem olketa brata and sista. w22.04 8 ¶16-17

Start lo taem blo Bible kam kasem distaem, Jehovah helpem staka young wan for fren witim hem. Jehovah savve helpem pikinini blo iu tu for fren witim hem. (1 Cor. 3:​6, 7) Nomata maet hem luk olsem pikinini no laek worshipim Jehovah, Jehovah still lovem hem. (Sams 11:​4, SIPB) Sapos Jehovah lukim pikinini start for changem tingting blo hem, Jehovah bae laek for helpem hem. (Acts 13:48; Mektu Kronikols 16:​9, SIPB) Maet bae hem helpem iu for talem eni gudfala toktok wea pikinini need for herem. (Provebs 15:​23, SIPB) Or maet hem iusim wanfala brata or sista lo kongregeson for helpem pikinini blo iu. Nomata taem pikinini hem big, bat hem no insaed truth yet, Jehovah maet helpem hem for tingim samting iu teachim hem bifor. (John 14:26) Sapos iu showimaot gud example for pikinini lo toktok blo iu and wanem iu duim, Jehovah bae blessim hard waka blo iu. w22.04 21 ¶18

From Satan no savve go bak lo heven, hem againstim olketa anointed Christian wea representim Kingdom blo God lo earth and wea “duim waka for talem pipol tru samting abaotem Jesus.” (2 Cor. 5:20; Eph. 6:​19, 20) Lo 1918, eitfala brata wea lead lo waka blo organization go lo kot from olketa accusim olketa lo samting wea no tru. Kot sei olketa guilty and eitfala hia mas go lo prison for staka year. So olsem Revelation storyim, hem luk olsem olketa “killim dae” or stopem nao waka blo olketa anointed wan. (Rev. 11:​3, 7-11) Bat lo March 1919, eitfala anointed brata hia release from prison. Then lo 1920, kot cancelim olketa charge hia. Stretawe olketa brata hia startim bak datfala preaching waka. Bat datwan no stopem Satan for attakim pipol blo God. Revelation storyim “wanfala river” wea piksarem hao Satan gohed for persecutim pipol blo God start lo datfala taem. (Rev. 12:15) Dastawe Revelation sei iumi “mas no givap and mas garem faith.”—Rev. 13:10. w22.05 5-6 ¶14-16

John lukim lo wanfala vision tufala grup wea sapotim rul blo Jehovah, and olketa kasem laef olowe. Firstfala grup, 144,000 nao insaed. God chusim olketa from earth for rul witim Jesus lo wanfala gavman, or Kingdom lo heven. Olketa bae rul witim Jesus ovarem disfala earth. (Rev. 5:​9, 10; 14:​3, 4) Lo datfala vision, John lukim olketa standap witim Jesus lo Maunt Zion lo heven. (Rev. 14:1) Start lo taem blo olketa aposol, God chusim staka thousand pipol for kamap part lo datfala 144,000. (Luke 12:32; Rome 8:17) Wanfala angel talem John hao lo olketa last day wanfala smol grup blo olketa nomoa bae “stap yet” lo earth. (Rev. 12:17) Then lo taem blo bigfala trabol, disfala smol grup bae go ap lo heven for joinim olketa narawan lo datfala 144,000, wea stap finis lo heven. Olketa hia bae rul witim Jesus lo Kingdom blo God.—Matt. 24:31; Rev. 5:​9, 10. w22.05 16 ¶4-5

Jesus teachim olketa follower blo hem for garem balance tingting abaotem olketa seleva. Jesus talem olketa: “[God] kaontem finis tu evri hair long hed bilong iufala.” (Matt. 10:30) Sapos iumi tingse hard for Jehovah lovem iumi, disfala toktok shud encouragem iumi bikos hem showimaot iumi barava important lo Jehovah. Jehovah laekem iumi for worshipim hem and laekem iumi for stap olowe lo niu world, so no daotem love blo hem for iumi. Wanfala Wastaoa lo 2005 encouragem iumi for garem balance tingting abaotem iumiseleva. Hem sei: “Hem nogud for iumi tinghae tumas lo iumiseleva and kamap praod, and tu, hem nogud for iumi ting daonem iumiseleva and tingse iumi iusles. Bat iumi mas garem balance tingting abaotem iumiseleva and luksavve lo olketa samting wea iumi fit for duim and no fit for duim.” w22.05 24-25 ¶14-16

Wat nao each wan lo iumi savve duim for helpem kongregeson gohed garem wan mind? Hem nao for iumi stap gud witim narawan. (Matt. 5:9; Rome 12:18) Evritaem iumi stretem problem witim wanfala brata or sista, datwan mekem kongregeson gohed for wan mind. Hem gud for tingim hao Jehovah leadim kam each wan wea stap insaed lo spiritual paradaes for worshipim hem. (John 6:44) Masbi Jehovah barava hapi taem hem lukim iumi waka hard for stap gud and gohed wan mind witim olketa brata and sista wea hem leadim kam. (Isa. 26:3; Hagae 2:​7, SIPB) Wat nao iumi savve duim for iumi kasem gud samting from olketa blessing wea Jehovah givim lo iumi? Iumi need for ting raonem wanem iumi studyim lo Bible. Datwan bae mekem iumi for garem olketa gudfala wei wea savve helpem iumi for “lovem olketa narawan” lo kongregeson.—Rome 12:10. w22.11 12-13 ¶16-18

Taem iumi luksavve Jehovah hem forgivim iumi, datwan “strongim” iumi bikos iumi bae garem peace lo mind and gudfala konsens. Datwan hem samting wea Jehovah nomoa savve givim iumi. (Acts 3:19) Taem Jehovah forgivim iumi, iumi savve fren moa witim hem, and hem olsem iumi nating duim eni sin. Bihaen Jehovah forgivim iumi, bae hem no accusim iumi or panisim iumi moa for datfala sin. (Isa. 43:25) Hem olsem Jehovah putim sin blo iumi farawe from hem, “olsem ples wea san hemi kamap hemi farawe from ples wea san hemi godaon.” (Sams 103:​12, SIPB) Diswan mekem iumi tinghae tumas lo hao Jehovah forgivim iumi. (Sams 130:​4, SIPB) Jehovah savve forgivim iumi nomata iumi duim bigfala sin. Jehovah savve disaedem sapos bae hem forgivim iumi or nomoa, bikos hem savve gud lo iumi from hem wakem iumi, givim iumi olketa law, and hem Judge blo iumi. w22.06 5 ¶12-14

Jehovah givim nambawan hope for evriwan wea lovem hem. Klosap nao bae hem finisim sik and dae, and iumi bae no sorre moa. (Rev. 21:​3, 4) Hem bae helpem olketa wea “hambol” and wea hope lo hem for mekem earth kamap paradaes. (Sams 37:​9-11, SIPB) And lo datfala taem, iumi bae fit for fren gud go moa witim Jehovah. Datwan hem barava nambawan hope! Iumi sure God bae duim wanem hem promisim, bikos hem evritaem duim wanem hem talem. So iumi garem gud reason for “hope lo Jehovah.” (Ps. 27:14) Iumi showimaot iumi hope lo Jehovah taem iumi gohed hapi and patient for weitim God for mekem olketa promis blo hem kamap tru. (Aesaea 55:​10, 11, SIPB) Iumi tu laek for gohed faithful lo Jehovah from iumi sure hem bae blessim “olketa wea barava lukaotem hem.” w22.06 20 ¶1; 25 ¶18

From Jehovah nao hed lo famili blo iumi, iumi sure bae hem duim wanem hem talem lo olketa famili hed lo 1 Timothy 5:8. Sapos iumi sure Jehovah lovem iumi and famili blo iumi, iumi savve trustim hao bae iumi garem evri samting iumi needim. (Matt. 6:​31-33) From Jehovah lovem iumi hem laek for provaedem staka samting for iumi! Taem hem creatim earth, hem provaedem olketa samting wea iumi needim for gohed laef and staka nara samting wea iumi savve enjoyim. (Jenesis 2:​9, SIPB) Nomata distaem iumi garem nomoa wanem iumi needim, hem gud for tingim Jehovah nao provaedem olketa samting hia and iumi savve gohed laef. (Matt. 6:11) Iumi need for tingim hao sapos iumi no garem staka material samting from iumi duim moa samting for Jehovah, hem bae mek sure iumi garem evri samting wea iumi needim distaem and lo future.—Aesaea 65:​21, 22, SIPB. w22.06 15 ¶7-8

Pipol wea interest lo truth, and iumi tu, need for savve gud lo Jehovah and lo Bible. Aposol Paul sei sapos iumi followim wanem iumi lanem from Bible, datwan bae helpem iumi “for luksavve long wanem hem stret and wanem hem no stret.” Distaem, maet hem no isi for followim olketa standard blo Jehovah bikos wei blo pipol hem nogud tumas. Bat Jesus mek sure iumi bae lanem olketa samting wea bae strongim faith blo iumi. Olketa spiritual kaikai hia hem kam from Bible. Olsem Jesus, iumi Olketa Jehovah’s Witness showimaot iumi barava respectim nem blo God. (John 17:​6, 26) For example, lo 1931, iumi start for iusim datfala nem Olketa Jehovah Witness. Datwan showimaot iumi tinghae lo nem blo God and iumi praod for garem datfala nem. (Aesaea 43:​10-12, SIPB) And tu, lo New World Translation of the Holy Scriptures olketa putim bak nem blo God lo evri ples wea hem shud stap. w22.07 11 ¶11-12

Bible storyim datfala gud nius abaotem Kingdom blo God. Jesus markem Kingdom witim wanfala treasure wea stap haed. Lo Matthew 13:44 Jesus sei: “Kingdom bilong God hem olsem wanfala expensive samting wea stap haed long wanfala pis land, wea wanfala man faendem datwan and hem haedem moa. Then, from hem hapi tumas hem go salem evri samting wea hem garem and baem datfala pis land.” Datfala man hem no lukaotem datfala treasure, bat taem hem faendem, hem salem evri samting wea hem garem for baem datfala pis land mekem hem ownim datfala treasure. Why nao hem duim olsem? Bikos hem savve datfala treasure hem expensive samting. Iumi luksavve for worshipim Jehovah distaem, and hope wea iumi garem for laef olowe anda lo Kingdom blo God, hem gud winim eni samting lo world. Iumi garem privilege for fren witim Jehovah and datwan hem winim eni sakrifaes wea iumi mekem. Taem iumi “mekem hem hapi,” datwan mekem iumi hapi tumas.—Col. 1:10. w22.08 15 ¶8-9; 17 ¶12

Samting olsem tu handred year bihaen datwan, olketa Israelite kasem Law blo Moses wea sei “iu mas no duim adultery.” So hao nao Joseph savve adultery hem “ravis samting” lo eye blo God? (Ex. 20:14) From Joseph savve lo Jehovah, hem luksavve bae Jehovah no hapi sapos hem duim adultery. For example, masbi Joseph savve taem Jehovah startim marit hem for wanfala man maritim wanfala woman nomoa. And masbi hem savve hao Jehovah protectim granmami blo hem Sarah taem tufala difren king laek tekem hem from hasband blo hem. (Jenesis 2:24; 12:​14-20; 20:​2-7, SIPB) From Joseph ting raonem olketa samting hia, hem luksavve samting wea stret and no stret lo eye blo God. From Joseph lovem God and tinghae lo olketa raeteous standard blo hem, Joseph disaed strong for duim wanem hem stret. w22.08 26 ¶1-2

Disfala profesi sei staka pipol wea dae finis bae laef bak. Bifor mifala savve sei diswan hem minim wanfala spiritual or tokpiksa resurrection wea happen lo olketa last day. Bat distaem mifala luksavve profesi hia storyim olketa wea bae laef bak lo niu world. Why nao iumi sei olsem? Datfala toktok “graon” wea stap lo Daniel 12:2 hem stap tu lo Job 17:16 and hem minim nomoa “Grev.” So diswan showimaot Daniel 12:2 hem storyim olketa wea bae laef bak bihaen olketa last day hem finis and bihaen lo Armageddon. Taem Daniel 12:2 sei samfala wea laef bak bae kasem “laef olowe,” wat nao datwan minim? Hem minim olketa wea laef bak wea lane, or gohed for lane, and obeyim Jehovah and Jesus insaed lo datfala 1,000 year, gogo bae olketa kasem laef olowe.—John 17:3. w22.09 21-22 ¶6-7

Datfala toktok no minim Jehovah expectim iumi for trustim olketa wea duim samting wea no stret, bat hem expectim iumi for trustim olketa wea traem best for duim stret samting. Hem tek taem for trustim samwan. Wat nao savve helpem iumi for trustim olketa brata and sista? Trae for savve gud lo olketa, story witim olketa lo meeting, and waka witim olketa lo ministry. From iumi spendem taem witim olketa, isisi bae iumi luksavve iumi savve trustim olketa. Firstaem, iumi bae no storyim feeling blo iumi lo samwan. Bat gogo, taem iumi savve gud lo hem, maet bae iumi feel free for storyim feeling blo iumi lo hem. (Luke 16:10) Bat wat nao iumi savve duim sapos wanfala brata or sista duim samting wea mekem iumi for no trustim hem? Iumi shud no givap lo olketa, bat, letem samfala taem for go pas. And no letem wanem samfala duim for mekem iumi no trustim evriwan. w22.09 4 ¶7-8

Wanfala elder wea nem blo hem Miqueas ting samfala elder barava treatim hem nogud. Nomata olsem, hem gohed garem gudfala tingting and kontrolem hemseleva. Hem prea staka taem and askem holy spirit blo Jehovah for strongim hem for deal witim datwan. And tu, hem faendem olketa information lo olketa pablikeson blo iumi wea savve helpem hem. Wat nao iumi lanem? If wanfala brata or sista treatim iumi nogud, trae for no wari tumas and for garem stretfala tingting. Maet iumi no savve wat nao mekem hem for talem or duim datwan. So prea lo Jehovah, and askem hem for helpem iumi for minim datfala brata or sista. No kwiktaem judgem hem and iumi savve forgivim hem. (Provebs 19:​11, SIPB) Tingim, Jehovah luksavve lo situation blo iumi and hem bae strongim iumi for deal witim datwan.—Eklesiastes 5:​8, SIPB. w22.11 21 ¶5

Chusim olketa fren wea lovem Jehovah. Olketa fren wea iu chusim savve helpem iu for kamap mature Christian. (Provebs 13:​20, SIPB) Julien, wea hem elder distaem sei: “Taem mi young, preaching waka helpem mi for garem olketa gudfala fren. Olketa fren hia strong lo ministry and olketa helpem mi for enjoyim datwan. . . . And mi luksavve tu from mi laek fren nomoa witim olketa wea mifala sem age, mi bin misstim chance for garem olketa gud and interesting fren.” Wat nao iu shud duim sapos iu luksavve samwan lo kongregeson bae spoelem wei wea iu fren witim Jehovah? Paul luksavve samfala lo kongregeson lo first century no garem spiritual tingting, so hem warnim Timothy for no associate witim olketa. (2 Tim. 2:​20-22) Hem barava spesol for fren witim Jehovah. Iu barava waka hard for fren gud witim Jehovah, so iu shud no garem olketa fren wea bae spoelem datwan. w22.08 5-6 ¶13-15

Iumi no laek for olsem olketa wea les lo advaes blo God, bat iumi laek for gohed followim olketa wei blo God and olketa raeteous standard blo hem. For helpem iumi duim datwan, iumi savve comparem wat hem happen lo olketa wea obey and olketa wea no obey. Iumi lukim hao karangge pipol kasem staka problem bikos olketa no followim wise advaes blo Jehovah. Bat iu luksavve laef blo iu hem gud bikos iu obeyim God. (Sams 32:​8, 10, SIPB) Jehovah mek sure evriwan savve kasem wisdom blo hem, bat hem no forcem for eniwan. Nomata olsem, hem storyim wat hem happen lo pipol wea no lisin lo wisdom blo hem. (Provebs 1:​29-32, SIPB) Olketa bae “kaikaim frut blong ravis wei” blo olketa. Olketa bae kasem trabol, safa bikos lo wanem olketa chus for duim, and gogo God bae finisim olketa. Bat olketa wea obeyim olketa wise advaes blo Jehovah kasem gud samting. Bible sei: ‘Olketa wea lisin long mi, bae olketa stap gud olowe. Ya, bae olketa no fraetem enisamting.’—Provebs 1:​33, SIPB. w22.10 21 ¶11-13

From iumi respectim Jehovah, iumi no laek for duim eni samting wea bae mekem hem no hapi. (Provebs 16:​6, SIPB) So iumi laek gohed tinghae lo wanem God sei hem stret and no stret wea Bible storyim. (2 Cor. 7:1) Taem iumi duim wanem Jehovah hapi lo hem and no duim olketa samting wea hem heitim, datwan bae helpem iumi for hapi. (Sams 37:27; 97:​10, SIPB; Rome 12:9.) Samwan maet savve Jehovah garem raet for disaedem wanem hem stret and no stret, bat hem mas disaed for followim olketa standard blo God tu. (Rome 12:2) So wanem iumi duim bae showimaot iumi sure hao best samting, hem for followim olketa standard blo Jehovah. (Provebs 12:​28, SIPB) David garem datfala tingting bikos hem sei olsem abaotem Jehovah: “Yu bin som mi olketa wei fo kasem tru laef, an taem yu stap wetem mi, bae yu mekem mi hapi fogud.”—Sams 16:​11, SIPB. w22.10 8 ¶9-10

Jesus no tinghae lo hemseleva, bat hem hambol. Bifor Jesus kam lo earth hem duim staka nambawan samting for Jehovah. Jehovah iusim Jesus “for wakem evri nara samting long heven and long earth.” (Col. 1:16) Taem Jesus hem baptaes, luk olsem hem ting go bak lo olketa samting wea hem duim taem hem stap witim Dadi blo hem lo heven. (Matt. 3:16; John 17:5) Bat datwan no mekem Jesus for praod, and hem no tingse hem gud winim narawan. Hem talem olketa disaepol hao hem ‘no kam lo earth for olketa narawan mas waka for helpem hem, bat hem kam for helpem olketa, and for givim laef blo hem for baem bak staka pipol.’ (Matt. 20:28) Jesus sei tu, hem no savve duim eni samting followim tingting blo hemseleva. Jesus hem barava hambol! Hem showimaot nambawan example for iumi. w22.05 24 ¶13

Taem Jehovah disaed for forgivim samwan hem bae tingim sapos samwan wea duim sin hem min for duim datwan or nomoa. Jesus helpem iumi for minim datwan lo Luke 12:​47, 48. Scripture hia showimaot samwan wea min for duim samting wea Jehovah no hapi lo hem, datwan hem bigfala sin and maet Jehovah bae no forgivim hem. (Mark 3:29; John 9:41) Waswe, eni chance stap for Jehovah forgivim hem? Maet hem savve forgivim hem bikos hem bae tingim nara samting moa saed lo datwan. Jehovah savve tingim tu sapos datfala man wea hem sin hem barava repent. Taem samwan repent hem minim “hem changem tingting, plan, or wei blo hem.” Hem minim tu hem barava sorre lo olketa nogud samting wea hem duim, and hem sorre tu from hem no duim stret samting wea hem shud duim. And tu, samwan wea repent hem sorre from hem luksavve hem wik lo spiritual wei, dastawe gogo hem duim samting wea no stret. w22.06 5-6 ¶15-17

Olketa wea againstim iumi savve talem olketa laea samting abaotem olketa brata wea garem responsibility lo organization blo Jehovah. (Sams 31:​13, SIPB) Olketa arrestim samfala brata and sei olketa criminal. Olketa Christian lo first century tu feisim semkaen situation taem samfala talem laea samting abaotem aposol Paul and arrestim hem. Samfala Christian stop for sapotim aposol Paul taem hem stap lo prison lo Rome. (2 Tim. 1:​8, 15; 2:​8, 9) Tingim, hao nao feeling blo Paul taem samfala duim olsem? Hem bin kasem staka hard taem and laef blo hem stap lo danger for helpem olketa. (Acts 20:​18-21; 2 Cor. 1:8) Iumi no laek for olsem olketa Christian hia wea lusim Paul lo taem wea hem barava needim olketa! So iumi shud no sapraes taem Satan attakim olketa brata wea lead. Hem laekem olketa brata hia for no faithful lo Jehovah and hem laekem tu for mekem iumi fraet. (1 Pet. 5:8) Gohed for sapotim olketa brata and sista and no lusim olketa.—2 Tim. 1:​16-18. w22.11 16-17 ¶8-11

Luk olsem datfala criminal lo post saed lo Jesus wea repent, hem wanfala Jew. Olketa Jew worshipim wanfala God nomoa, bat pipol wea no Jew worshipim staka god. (Ex. 20:​2, 3; 1 Cor. 8:​5, 6) Sapos datfala criminal no Jew, maet bae hem askem kwestin lo text blo tuday olsem, “Hao, iu nating fraet long olketa god nomoa?” Nara samting tu, God no sendem Jesus lo olketa pipol wea no Jew, bat God sendem hem lo “pipol bilong Israel nomoa, wea olsem olketa sheepsheep wea lus.” (Matt. 15:24) God talem olketa Israelite hao bae hem resurrectim pipol wea dae finis. Masbi datfala criminal wea repent savve abaotem diswan, and wanem hem sei lo Jesus showimaot hem luksavve Jehovah bae resurrectim Jesus for rul lo Kingdom blo hem. Luk olsem hem hope for God resurrectim hem tu. From datfala criminal wea repent hem wanfala Jew, bae hem mas savve abaotem Adam and Eve. So maet datfala criminal tingim hao Paradaes wea Jesus storyim lo Luke 23:43 bae hem wanfala naes garden hia lo earth.—Gen. 2:15. w22.12 8-9 ¶2-3

Iumi barava needim holy spirit blo God for helpem iumi for duim preaching waka. Why nao olsem? Bikos Satan faetem iumi mekem iumi stop for duim preaching waka. (Rev. 12:17) Maet iumi tingse from Satan hem strong tumas, iumi no savve winim hem. Bat taem iumi gohed for preach, datwan showimaot iumi winim hem! (Rev. 12:​9-11) Hao nao olsem? Evritaem iumi preach, iumi showimaot iumi no fraetem Satan, so iumi winim hem nao. So iumi luksavve iumi fit for gohed preach bikos holy spirit blo God helpem iumi and Jehovah hapi lo iumi. (Matt. 5:​10-12; 1 Pet. 4:14) Holy spirit savve helpem iumi for deal witim eni hard taem wea maet iumi feisim lo ministry. (2 Cor. 4:​7-9) So wat nao iumi savve duim for kasem holy spirit blo God? Iumi need for prea lo Jehovah evritaem, and iumi sure hem bae herem olketa prea blo iumi. w22.11 5 ¶10-11

Iumi lovem olketa brata and sista taem iumi waka hard for keepim peace witim olketa. Iumi traem best for followim example blo Jehovah for forgivim narawan. Jehovah willing for letem Son blo hem dae for olketa sin blo iumi, so iumi tu shud willing for forgivim olketa brata and sista wea sin againstim iumi. Iumi no laek for olsem wakaman wea Jesus storyim lo wanfala tokpiksa blo hem. Nomata boss willing for aotem big kaon blo datfala wakaman, wakaman hia no willing for forgivim nara man wea kaonem smol selen lo hem. (Matt. 18:​23-35) If iu garem problem witim samwan lo kongregeson, waswe, iu savve duim samting for mek peace bifor iu attendim Memorial? (Matt. 5:​23, 24) Taem iu duim olsem, hem showim iu barava lovem Jehovah and Jesus. w23.01 29 ¶8-9

Hem gud for olketa elder faendaot lo wanem nao olketa brata and sista needim. (Provebs 20:​5, SIPB) Hao, olketa garem inaf kaikai, medicine, and olketa nara samting wea olketa needim? Waswe, maet bae olketa lusim waka, or haos blo olketa from olketa no garem inaf selen? Hao, olketa needim help for requestim help from gavman? Jehovah laekem iumi evriwan for encouragem and helpem olketa brata and sista. (Gal. 6:10) Nomata iumi duim smol samting for helpem samwan wea sik datwan savve encouragem hem. For example, pikinini savve go witim dadi taem hem visitim eni brata wea sik. Maet wanfala young wan savve duim shopping or olketa nara samting for eni sista wea sik. Samfala lo kongregeson savve kukim kaikai for samwan wea sik. Samfala pablisa raetem card for sei thankiu lo olketa elder wea busy tumas for helpem olketa brata and sista lo taem blo outbreak blo wanfala sik. Iumi hapi tumas taem iumi “gohed for encouragem and strongim narawan”!—1 Thess. 5:11. w22.12 22 ¶2; 23 ¶5-6

Olketa Sadducee savve gud lo first faevfala buk blo olketa Hebrew Scripture, bat olketa no acceptim olketa important truth insaed olketa buk hia. For example, tingim ansa blo Jesus taem olketa Sadducee kwestinim resurrection hope. Hem askem olketa: “Hao, iufala no read abaotem datfala tree wea fire gohed bonem insaed buk wea Moses raetem? God . . . sei long Moses: ‘Mi nao God bilong Abraham and God bilong Isaac and God bilong Jacob.’” (Mark 12:​18, 26) Nomata olketa Sadducee readim datfala story staka taem, kwestin wea Jesus askem showim hao olketa no acceptim wanfala important truth, wea hem nao teaching abaotem resurrection. (Luke 20:38) Wat nao leson? Taem iumi read, iumi laek ting raonem gud evri information insaed wanfala verse or wanfala story lo Bible, mekem iumi savve lanem samting from datwan. Iumi no just laek for luk nomoa for olketa main teaching, bat luk tu for olketa important truth and principle wea no isi for lukim. w23.02 11 ¶9-10

Evri witness wea Paul storyim lo text for tuday kasem olketa hard taem, bat olketa gohed faithful lo Jehovah. (Heb. 11:​36-40) Waswe, olketa hard waka nating nomoa? Nomoa! Nomata taem olketa laef olketa no lukim hao evri promis blo God kamap tru, olketa gohed hope lo Jehovah. And from olketa sure Jehovah hapi lo olketa, olketa savve sure hao lo future bae olketa lukim olketa promis hia kamap tru. (Heb. 11:​4, 5) Example blo olketa savve strongim iumi for gohed hope lo Jehovah. Iumi stap lo world wea evri samting hem gohed for kamap worse. (2 Tim. 3:13) Satan hem no givap for trae for spoelem pipol blo God. Nomata maet iumi feisim samfala hard taem lo future, iumi laek for gohed waka hard for Jehovah from iumi sure “iumi hope long God wea laef.”—1 Tim. 4:10. w22.06 25 ¶17-18

Wanfala reason why iumi shud trae for stap healthy hem for iumi worshipim Jehovah witim best blo iumi. (Mark 12:30) So iumi no laek for duim olketa samting wea bae spoelem health blo iumi. (Rome 12:1) Nomata iumi duim best blo iumi, samfala taem iumi savve sik. Bat iumi laek for duim best blo iumi for stap healthy, for showim lo Jehovah hao iumi tinghae lo laef wea hem givim lo iumi. Sapos iumi sik or olo, datwan maet mekem iumi no fit for duim wanem iumi savve duim bifor. From datwan, maet iumi feel nogud and sorre. Nomata olsem, iumi shud duim best for lukaftarem health blo iumi. Iumi laek for duim olsem bikos nomata iumi olo or sik, iumi still savve praisem Jehovah olsem King David. Iumi barava hapi for savve hao God tinghae lo iumi nomata iumi sik or olo! (Matt. 10:​29-31) And nomata iumi dae, God laekem tumas for resurrectim iumi. (Job 14:​14, 15) So taem iumi laef, iumi laek for duim best blo iumi for lukaftarem gud health and laef blo iumi. w23.02 20-21 ¶3-5

Waswe, bae nem blo olketa lo datfala big crowd still insaed lo buk blo laef taem olketa insaed niu world bihaen Armageddon? Yes. (Rev. 7:14) Jesus sei olketa hia bae “kasem laef olowe.” (Matt 25:46) Bat olketa bae no stretawe kasem laef olowe. Lo datfala Wan Thousand Year Rul, Jesus “bae leadim olketa go long olketa springwata wea savve mekem man laef.” Olketa wea obeyim Jesus and wea Jehovah sei olketa faithful, nem blo olketa bae stap for olowe lo buk blo laef. (Rev. 7:​16, 17) Bat olketa goat bae finis lo Armageddon. Jesus sei olketa “bae dae and no laef moa.” (Matt. 25:46) Aposol Paul storyim tu hao “Lord bilong iumi bae judgem olketa hia. Panis bilong olketa nao hem for olketa mas finis for olowe.”—2 Thess. 1:9; 2 Pet. 2:9. w22.09 16 ¶7-8

Taem famili enjoyim creation blo Jehovah tugeta, olketa savve relax and hapi, and datwan savve mekem famili barava lovem each other. Jehovah creatim olketa naes ples lo earth for iumi duim olketa samting wea iumi enjoyim. Staka famili savve enjoy for go wakabaot lo bush and lo olketa maunten, or lo olketa island or saed sea. Lo niu world, parents and olketa pikinini bae enjoyim creation blo Jehovah winim enitaem bifor. Lo datfala taem, bae iumi no fraetem olketa animal, and olketa tu bae no fraetem iumi. (Isa. 11:​6-9) Iumi bae enjoyim creation blo Jehovah for olowe. (Sams 22:​26, SIPB) Bat parents, iufala no weit go kasem datfala taem for helpem pikinini for enjoyim creation. Taem iufala iusim creation for teachim pikinini blo iufala abaotem Jehovah, maet olketa bae agree witim King David wea sei: “[Jehovah], no eni narafala god . . . save duim olketa gudfala waka olsem yu.”—Sams 86:​8, SIPB. w23.03 25 ¶16-17