December

Waswe, datfala bigman blo Ethiopia hem redi for baptaes? Tingim, datfala man blo Ethiopia hem bin “go long [Jerusalem] for worshipim God.” (Acts 8:27) So luk olsem hem acceptim and joinim Jew religion. For sure hem lane finis abaotem Jehovah from olketa Hebrew Scripture. Nomata olsem, hem laek gohed lane moa abaotem hem. Tingim, taem Philip meetim datfala bigman lo road, Philip lukim hem gohed readim olketa profesi wea Isaiah raetem. (Acts 8:28) Hem laek for gohed lane. Hem willing for travel farawe from Ethiopia for go lo Jerusalem for worshipim Jehovah lo temple. Philip teachim datfala bigman blo Ethiopia samfala niu important teaching. Wanfala nao hem abaotem hao Jesus nao datfala Messiah. (Acts 8:​34, 35) Hem barava lovem Jehovah and Son blo hem, so hem chus for mekem datfala important disison for baptaes and kamap follower blo Jesus Christ. Philip luksavve man hia hem redi, so hem baptaesim hem. w23.03 8-9 ¶3-6

Jehovah bae no hapi sapos iumi laea. (Provebs 6:​16, 17, SIPB) Distaem pipol tingse hem normal samting for man hem laea, bat iumi mas no laea bikos Jehovah sei datwan no stret. (Sams 15:​1, 2, SIPB) Nara samting wea no fitim, hem for mekem narawan bilivim samting wea no tru from iumi no talem full story. And tu, iumi shud no gossip. (Provebs 25:​23, SIPB; 2 Thess. 3:11) Sapos iumi luksavve samwan start for gossip abaotem narawan, changem subject and storyim gud samting. Iumi stap lo world wea hem normal for pipol talem nogud toktok, so iumi mas waka hard for talem toktok wea mekem Jehovah hapi. Hem bae blessim iumi taem iumi iusim gudfala toktok lo ministry, lo taem blo meeting, and taem iumi story witim olketa narawan. Taem Jehovah finisim disfala nogud world bae iumi no herem pipol iusim nogud toktok, so bae hem isi for iumi praisem Jehovah witim toktok blo iumi.—Jude 15. w22.04 9 ¶18-20

Taem iumi luksavve hao Jehovah and Jesus barava lovem iumi, datwan mekem iumi for lovem tufala tu. (1 John 4:10) Love blo iumi for tufala kamap moa strong taem iumi luksavve Jesus dae for iumi wanwan. Aposol Paul luksavve lo datwan and hem talem hao hem tinghae lo leta wea hem raetem for olketa lo Galatia. Hem sei: “Son bilong God . . . lovem mi and [hem] dae for sevem mi.” (Gal. 2:20) Datfala ransom nao mekem Jehovah savve acceptim iu for kamap fren blo hem. (John 6:44) Taem iu savve Jehovah lukim gud samting lo heart blo iu and hem willing for peim barava hae price for mekem iu savve fren witim hem, datwan barava kasem heart blo iu. Datwan barava strongim love blo iu for Jehovah and Jesus, iaman? So hem gud for tingim diswan: ‘From mi lovem tufala, wat nao bae mi laek for duim?’ Love for God and Christ mekem iumi for laek showim love for olketa narawan.—2 Cor. 5:​14, 15; 6:​1, 2. w23.01 28 ¶6-7

Bible hem important tul wea Jehovah iusim for helpem pipol blo hem for worshipim hem witim wan mind. Jehovah helpem olketa man wea raetem Bible for raetem lo wei wea hambol pipol nomoa savve minim. (Luke 10:21) Evriwea lo world pipol readim Bible. Bat, pipol wea hambol nomoa minim and followim wat Bible talem. (2 Cor. 3:​15, 16) Wisdom blo Jehovah showaot insaed lo Bible. Jehovah iusim Bible for teachim iumi olsem wanfala grup, bat hem teachim and comfortim tu each wan lo iumi. Taem iumi readim Bible, iumi luksavve Jehovah interest lo each wan lo iumi. (Isa. 30:21) Waswe, staka taem iu faendem wat iu readim lo Bible barava fitim situation blo iu? Bat tingim hao staka million pipol nao laek for readim Bible. Nomata olsem, information insaed hem up-to-date and hem barava fitim need blo each wan lo iumi. Datwan hem olsem bikos Bible hem kam from God wea hem barava wise.—2 Tim. 3:​16, 17. w23.02 4-5 ¶8-10

From iumi lovem Jehovah, iumi laek for duim best blo iumi lo evri samting wea iumi duim for hem. Samting wea bae helpem iumi hem for markem olketa spiritual goal, olsem for garem olketa gudfala wei, lanem hao for duim samfala samting, or tingim olketa wei for helpem narawan. Why nao iumi shud laek for markem olketa spiritual goal? Main reason hem for mekem Jehovah hapi. Hem hapi taem hem lukim iumi iusim savve blo iumi for duim waka blo hem. And tu, taem iumi kasem olketa spiritual goal bae iumi fit for helpem olketa brata and sista. (1 Thess. 4:​9, 10) Nomata iumi stap lo truth for longtaem finis, iumi savve markem olketa spiritual goal. w22.04 22 ¶1-2

Klosap nao olketa gavman bae attakim Bigfala Babylon, wea hem nao evri false religion. Diswan nao hem start lo bigfala trabol. Waswe, datfala big trabol bae mekem staka pipol for disaed for worshipim Jehovah? Nomoa. Revelation chapter 6 sei olketa gavman and olketa bisnisman olketa olsem olketa maunten, and lo datfala taem pipol wea no worshipim Jehovah bae laekem olketa hia for protectim olketa. From olketa hia no sapotim Kingdom blo God, datwan showimaot olketa againstim Jehovah. (Luke 11:23; Rev. 6:​15-17) Lo datfala big trabol, olketa wea faithful lo Jehovah bae barava difren from olketa narawan. Lo datfala barava hard taem, olketa nomoa only pipol lo earth wea worshipim Jehovah God and no sapotim “datfala wild animal.”—Rev. 13:​14-17. w22.05 16 ¶8-9

Disfala “gud nius abaotem Kingdom” hem no only message wea iumi talemaot. (Matt. 24:14) Revelation chapter 8 go kasem chapter 10 storyim hao iumi sapotim waka blo olketa angel for talemaot message abaotem olketa nogud samting wea bae kasem pipol wea rejectim Kingdom blo God. So for staka year finis iumi storyim lo pipol wanfala judgment message, wea olsem “hail and fire,” bikos hem abaotem wanem God bae duim lo olketa wea insaed lo world blo Satan. (Rev. 8:​7, 13) Pipol need for savve end hem klosap mekem olketa savve changem laef blo olketa and sev lo day blo kros blo Jehovah. (Sefenaea 2:​2, 3, SIPB) Bat staka no laek herem, so iumi need for no fraet for talemaot datfala message. Lo taem blo bigfala trabol, hem lastfala taem for iumi talemaot stret lo pipol datfala judgment message and olketa bae seke lo datwan.—Rev. 16:21. w22.05 7 ¶18-19

Tingim tufala wea marit wea redi for kamap parents. Staka taem finis, tufala herem olketa tok wea storyim hao for lukaftarem gud and trainim pikinini. Bat distaem from tufala garem pikinini, tufala need for followim olketa principle hia. Datwan hem big responsibility! Tru nao, taem laef hem change samfala Bible principle bae barava fitim iumi. Datwan nao wanfala reason why pipol blo Jehovah readim and ting raonem Bible evritaem, olsem olketa king lo Israel bifor kasem instruction for “mas ridim olowe” Law. (Diutronomi 17:​19, SIPB) Olketa dadi and mami garem nambawan privilege for teachim olketa pikinini abaotem Jehovah. Iufala laekem olketa pikinini blo iufala for savve abaotem Jehovah, bat iufala laekem olketa for lovem Jehovah tu. w22.05 26 ¶2-3

Nomata samwan sorre lo sin wea hem duim, datwan hem no inaf. Hem need for duim samting tu. Samting wea helpem Jehovah for disaed sapos hem bae forgivim datfala man, hem sapos hem changem wei blo hem. Datwan minim man hia mas stop for duim olketa nogud samting, and start for duim olketa samting wea Jehovah laekem. (Isa. 55:7) Hem mas changem tingting blo hem tu mekem hem followim tingting blo Jehovah. (Rome 12:2; Eph. 4:23) So hem mas disaed strong for lusim olketa nogud tingting and wei blo hem. (Col. 3:​7-9) Jehovah bae forgivim iumi and mekem iumi klin from olketa sin blo iumi sapos iumi showimaot faith lo sakrifaes blo Christ. Bikos lo datfala sakrifaes Jehovah bae forgivim iumi taem hem lukim iumi waka hard for changem olketa nogud wei blo iumi.—1 John 1:7. w22.06 6 ¶16-17

Lo history blo iumi olketa man, pipol gohed spoelem olketa narawan. (Eklesiastes 8:​9, SIPB) For example, olketa bigman iusim paoa wea olketa garem for spoelem narawan, olketa criminal raf tumas, olketa bully lo skul tok spoelem and mekem olketa nara pikinini fraet, and samfala famili member savve raf tumas insaed famili. Dastawe pipol savve fraetem olketa narawan! Hao nao Satan iusim datwan for mekem iumi for duim wanem Jehovah no hapi lo hem? Satan hem laekem iumi for fraetem pipol mekem iumi no preach or for duim olketa nara samting wea Jehovah no laekem. Satan iusim olketa gavman for banim waka blo iumi and for persecutim iumi. (Luke 21:12) Lo world blo Satan, pipol savve laea abaotem Olketa Jehovah’s Witness. Olketa wea bilivim olketa laea hia savve tok spoelem iumi, or maet killim iumi nogud. (Matt. 10:36) Iumi no sapraes hao Satan duim olketa samting hia for mekem iumi fraet bikos hem duim olketa sem samting lo first century.—Acts 5:​27, 28, 40. w22.06 16 ¶10-11

Hu nao olketa “pipol” wea Daniel 12:3 (SIPB) storyim wea bae followim stretfala wei blo God? Hem olketa wea bae resurrect, datfala big crowd, and eni pikinini wea born insaed lo niu world. Lo end lo datfala 1,000 year, evriwan wea stap lo earth bae perfect. Iumi need for tingim hao nomata samwan kamap perfect, datwan no minim bae hem mas kasem laef olowe. Tingim Adam and Eve. Tufala perfect, bat tufala need for obeyim Jehovah God mekem tufala kasem laef olowe. Sorre samting nao, tufala no obeyim hem. (Rome 5:12) From evriwan bae kamap perfect lo end blo datfala 1,000 year, waswe, bae evriwan sapotim rul blo Jehovah for olowe? Or waswe, samfala bae olsem Adam and Eve, wea nomata tufala perfect tufala no faithful? Bae iumi need for luk lo Bible for kasem ansa for olketa kwestin hia. w22.09 22-23 ¶12-14

Taem iumi lukim olketa nogud samting wea happen lo world distaem, waswe, datwan mekem iumi wari tumas? Maet iumi lukim hao olketa famili no stap gud tugeta, pipol raf tumas and selfish, and staka faendem hem hard for trustim olketa wea garem paoa. Bat iumi shud no warim tumas olketa samting hia. Why nao olsem? Bikos wanfala Bible profesi sei bae hem nao wei blo pipol lo “olketa last day.” (2 Tim. 3:​1-5) No eniwan fit for denyim hao disfala profesi gohed for fulfill distaem, and datwan pruvim Christ Jesus hem King lo Kingdom blo God and start for rul finis. Diswan hem wanfala nomoa lo staka profesi abaotem Kingdom. Olketa profesi hia bae helpem iumi for luksavve end blo disfala nogud world hem klosap nao, olsem Jehovah promisim. Olketa profesi olsem olketa pisis insaed wanfala jigsaw puzzle game wea join tugeta for mekem wanfala full piksa. w22.07 2 ¶1-2

Lo taem blo COVID-19 pandemic, iumi kasem klia direction lo hao for duim olketa meeting and preaching waka. No longtaem bihaen pandemic start, iumi start for iusim Internet for attendim olketa Christian meeting, assembly, and convention. And iumi start for duim telephone witnessing and leta raeting. Jehovah blessim hard waka blo iumi. Staka branch reportim bigfala increase lo namba blo olketa pablisa. And lo taem blo pandemic, staka brata and sista garem olketa naes experience. Samfala maet ting direction wea organization givim lo taem blo pandemic hem ova tumas. Bat evritaem iumi luksavve olketa direction hia hem helpem iumi. And taem iumi ting raonem hao Jesus hem leadim iumi gud, datwan mekem iumi sure nomata wanem bae happen lo future, Jehovah and Son blo hem bae stap witim iumi.—Heb. 13:​5, 6. w22.07 13 ¶15-16

Iumi laek for thankiu lo Jehovah for olketa nambawan samting wea hem provaedem for iumi. For example, iumi savve talem thankiu for olketa flaoa wea kala blo olketa luk naes tumas, staka difren kaikai wea teist naes, and olketa naes fren blo iumi. Jehovah nao provaedem olketa samting hia and staka nara samting for mekem iumi hapi. (Sams 104:​12-15, 24, SIPB) Hem barava important tu for thankiu lo Jehovah for staka spiritual kaikai wea hem provaedem for iumi and nambawan hope for future. Hem isi for forget for thankiu lo Jehovah for evri samting wea hem duim for iumi. For iumi no forget, iumi savve raetem list lo olketa samting wea iumi laek for askem, then bihaen chekim list hia for lukim hao Jehovah ansarem olketa prea blo iumi. Then prea lo hem for talem thankiu for datwan.—Col. 3:15. w22.07 22 ¶8-9

Iumi savve nomata hem gud for studyim Bible datwan no inaf. Iumi mas followim wanem iumi lanem tu. Datwan nomoa savve mekem iumi for hapi. (Jas. 1:25) Wat nao iumi savve duim for mek sure iumi followim olketa tru teaching lo Bible? Wanfala brata sei hem gud for chekim iumiseleva for lukim sapos iumi followim wanem iumi lanem and wanem iumi need for waka lo hem. Aposol Paul sei: “Nomata iumi kamap strong finis, iumi mas gohed for followim sem wei wea iumi followim kam kasem distaem.” (Phil. 3:16.) Tingim olketa gud samting iumi kasem taem iumi “gohed followim olketa tru teaching”! Laef blo iumi hem kamap gud, and tu, iumi mekem Jehovah and olketa brata and sista hapi. (Provebs 27:​11, SIPB; 3 John 4) So iumi garem staka reason for tinghae lo olketa tru teaching lo Bible and for gohed followim olketa teaching hia. w22.08 18-19 ¶16-18

Hao nao olketa elder showimaot olketa lovem Jehovah and Jesus? Wanfala important wei, hem for lukaftarem olketa sheepsheep blo Jesus. (1 Pet. 5:​1, 2) Jesus helpem aposol Peter for lukim klia disfala point. Bihaen Peter denyim Jesus thrifala taem, luk olsem Peter barava laek for showim lo Jesus hem barava lovem Jesus. Bihaen Jesus resurrect, hem askem Peter: “Simon, son bilong John, hao, iu lovem mi?” Iumi sure Peter barava laek duim samting for pruvim hao hem lovem Masta blo hem. Jesus sei lo Peter: “Lukaftarem olketa smol sheepsheep bilong mi.” (John 21:​15-17) And for full laef blo Peter, hem lukaftarem gud olketa sheepsheep blo Lord wea datwan pruvim Peter lovem Jesus. Olketa elder, hao nao iufala savve showimaot toktok wea Jesus talem lo Peter hem important lo iufala? Iu savve showim iu barava lovem Jehovah and Jesus taem iu evritaem duim shepherding waka and taem iu duim best for helpem olketa wea inactive for kam bak lo Jehovah.—Ezek. 34:​11, 12. w23.01 29 ¶10-11

If iumi feisim eni challenge, no tingse no eniwan minim datwan. Kaen tingting olsem savve mekem iumi for tingse iumi no wei nao and hem hard nao for iumi winim datwan. Bat Bible sei: “Bae [God] helpem iufala for winim datwan mekem iufala no givap.” So nomata iumi stragol witim feeling for laek duim samting wea no stret, iumi savve winim datwan, bikos witim help blo Jehovah, iumi bae no duim samting wea no stret. Tingim diswan: From iumi no perfect, feeling for laek duim samting wea no stret savve kamap samfala taem. Bat taem datwan happen, iumi savve kwiktaem rejectim datfala feeling, olsem Joseph wea stretawe ranawe from waef blo Potiphar. (Gen. 39:12) Iumi no need for followim datfala feeling for duim wanem hem no stret! w23.01 12-13 ¶16-17

Wanfala wei blo Jehovah hem justice. (Deut. 32:4) Justice join witim wei for no teksaed, and Jehovah no favorim eniwan. (Acts 10:​34, 35) Wei blo hem for no favorim eniwan hem showaot lo hao olketa raetem Bible lo olketa difren languis. Jehovah promisim hao lo taem blo end, “trufala knowledge” wea stap lo Bible “bae kamap staka.” Staka pipol nao bae minim Bible. (Dan. 12:4) Wanfala wei wea datfala knowledge hem kamap staka, hem thru lo wei for transleitim, pablisim, and distributim Bible and Bible literature. Pipol blo Jehovah transleitim full Bible or part blo hem lo winim 240 languis, and eniwan savve kasem datwan and hem no need for peim. So datwan hem mekem pipol lo evri kantri savve acceptim “gud nius abaotem Kingdom” bifor end hem kam. (Matt. 24:14) God blo iumi wea hem God blo justice iusim Bible for givim chance lo staka pipol for savve lo hem. Hem duim olsem bikos hem lovem iumi tumas. w23.02 5 ¶11-12

Iumi tinghae lo olketa standard blo Jehovah. Bat from iumi no perfect, sapos iumi no careful, maet iumi start for garem tingting blo pipol lo world abaotem wanem hem stret and no stret. (Aesaea 5:​20, SIPB) Disfala toktok “raeteous” maet mekem pipol for tingim samwan wea praod, savve judgem olketa narawan, or tingse hem gud winim olketa narawan. Bat God no hapi lo pipol wea garem olketa wei olsem. For example, taem Jesus stap lo earth hem tok againstim olketa bigman lo religion from olketa act olsem olketa raeteous. (Eklesiastes 7:​16, SIPB; Luke 16:15) Samwan wea followim olketa standard blo Jehovah bae no tingse hem gud winim olketa narawan. Bible showimaot olketa standard blo Jehovah hem barava hae. w22.08 27 ¶3-5

Jesus trustim olketa disaepol, nomata olketa duim samfala mistek. (John 15:16) Taem James and John askem Jesus for kasem spesol position lo Kingdom, Jesus no daotem why tufala worshipim Jehovah or finisim tufala for no aposol blo hem. (Mark 10:​35-40) Lo naet wea olketa arrestim Jesus, evri disaepol lusim hem and ranawe. (Matt. 26:56) Nomata olsem, Jesus luksavve olketa duim mistek, and hem “gohed for lovem olketa go kasem taem hem dae.” (John 13:1) Bihaen Jesus resurrect, hem givim bigfala responsibility lo 11-fala faithful aposol for leadim waka for teachim pipol for kamap disaepol and for lukaftarem olketa sheepsheep blo hem. (Matt. 28:​19, 20; John 21:​15-17) Hem garem gud reason for trustim olketa, bikos evriwan faithful go kasem taem olketa dae then go ap lo heven. Tru nao, Jesus showimaot gudfala example for iumi savve trustim olketa man wea no perfect. w22.09 6 ¶12

Taem iumi sure Jehovah lovem iumi and hem stap witim iumi, datwan savve helpem iumi for no fraet for againstim Satan. For example, man wea raetem Sams 118 hem feisim samfala hard samting. Hem garem staka enemy, and samfala lo olketa, hem olketa bigman tu (verse 9, 10). Samfala taem pipol againstim hem (verse 13). And hem kasem strong discipline from Jehovah (verse 18). Nomata olsem, datfala man wea raetem psalm hem sei: “Bae mi no save fraet.” Nomata Jehovah disciplinem hem, hem savve Jehovah barava lovem hem. Hem sure nomata wanem hard samting nao hem feisim, Jehovah bae evritaem helpem hem. (Sams 118:​29, SIPB) Iumi need for sure Jehovah lovem iumi bikos datwan bae helpem iumi for no warim or fraet lo thrifala samting hia, (1) wari abaotem need blo famili, (2) fraet lo man, and (3) fraetem dae. w22.06 15 ¶3-4

Iumi mas mek sure worship blo iumi for Jehovah hem main samting lo laef blo iumi. From Jehovah nao Creator, iumi shud worshipim hem. (Rev. 4:11; 14:​6, 7) So hem important for worshipim hem lo stretfala wei, wea minim for “worshipim hem followim holy spirit and followim samting wea tru.” (John 4:​23, 24) Iumi laekem holy spirit for helpem iumi for worshipim Jehovah followim olketa tru teaching lo Bible. Worship blo iumi mas main samting lo laef, nomata iumi stap lo ples wea gavman banim waka blo iumi. Distaem, winim 100 brata and sista stap lo prison bikos olketa Jehovah’s Witness. Bat olketa hapi from olketa duim best blo olketa for gohed prea, study, and talem olketa narawan abaotem God and Kingdom blo hem. Nomata pipol tok spoelem iumi or persecutim iumi, iumi savve hapi from iumi savve Jehovah hem stap witim iumi and bae hem rewardim iumi.—1 Pet. 4:14 w22.10 9 ¶13

Insaed Bible buk Proverbs, Jehovah givim staka wise advaes wea savve evritaem helpem iumi. Tingim tufala example lo olketa wise advaes hia. First wan, satisfae witim wanem iumi garem. Provebs 23:​4, 5 (SIPB) sei: “Nogud yu hadwaka tumas fo kamap risman. . . . Risis blong yu . . . bae hemi flae go olsem bed.” Bat staka wea rich and wea poor wari tumas abaotem selen. Gogo, olketa savve duim olketa samting wea spoelem nem, famili, frens, and health blo olketa. (Provebs 28:​20, SIPB; 1 Tim. 6:​9, 10) Mek-tu advaes, tingting gud bifor iumi toktok. If iumi no careful, toktok blo iumi savve mekem narawan feel nogud. Proverbs 12:18 sei: “Toktok blo man wea no tingting gud firstaem hem olsem sword wea katem man, bat tongue blo olketa man wea wise savve healim man.” Iumi bae stap gud witim olketa narawan if iumi no gossip abaotem olketa.—Provebs 20:​19, SIPB. w22.10 21 ¶14; 22 ¶16-17

Ezekiel need for minim gud message wea hem bae talemaot. Hem mas barava bilivim datfala message mekem hem no fraet for talemaot. Then wanfala sapraesing samting hem happen. Ezekiel sei datfala scroll hem “suit fogud olsem hani.” (Esikiel 3:​3, SIPB) Hao nao olsem? Bikos for Ezekiel, hem wanfala naes privilege for representim Jehovah. (Sams 19:​8-11, SIPB) Hem tinghae lo hao Jehovah chusim hem for kamap profet. Bihaen datwan Jehovah sei lo Ezekiel: “Ting raonem gud and lisin lo evri toktok wea mi talem lo iu.” (Ezek. 3:10) Jehovah talem Ezekiel for memorizim toktok insaed lo scroll and for ting raonem. Datwan barava strongim faith blo Ezekiel. And tu, datwan mekem hem redi for talemaot datfala strong judgment message lo olketa Jew. (Esikiel 3:​11, SIPB) Taem Ezekiel minim gud and barava bilivim datfala message, hem redi nao for duim datfala assignment. w22.11 6 ¶12-14

If organization mekem samfala change and iu faendem hem hard for followim, wat nao iu shud duim? Barava sapotim datfala change wea organization duim. Lo wilderness, olketa Kohathite karem ark blo covenant and go first lo evri pipol. (Num. 3:​29, 31; 10:33; Josh. 3:​2-4) Datwan hem nambawan privilege! Bat datwan change taem olketa stap lo Promis Land. Olketa no need for muvim datfala Ark. So olketa Kohathite kasem samfala nara assignment. (1 Chron. 6:​31-33; 26:​1, 24) Bible no storyim hao olketa Kohathite komplen or tingse olketa shud duim eni important waka from olketa duim datwan bifor. Wat nao iumi lanem? Hapi for followim eni change wea kamap lo organization blo Jehovah, nomata datwan maet affectim assignment blo iumi. Hapi lo eni assignment wea iumi kasem. And tingim hao Jehovah lovem iumi from iumi obeyim hem and no bikos lo assignment blo iumi. w22.11 23 ¶10-11.

Onesiphorus go lukaotem aposol Paul, and taem hem faendem hem lo prison, hem duim olketa samting for helpem hem, nomata datwan mekem laef blo hem stap lo danger. Wat nao iumi lanem? Iumi mas no fraetem man and letem datwan stopem iumi for sapotim olketa brata and sista wea kasem persecution. Bat iumi laek for sapotim olketa and duim best blo iumi for helpem olketa. (Provebs 17:​17, SIPB) Olketa needim love and sapot blo iumi. Tingim hao olketa brata and sista lo Russia helpem and sapotim olketa nara brata and sista wea stap lo prison. Taem samfala go lo kot, staka brata and sista go for sapotim olketa. Wat nao iumi lanem? Iumi mas no fraet taem olketa accusim olketa brata wea lead, arrestim, or persecutim olketa. Prea for olketa, lukaftarem famili blo olketa, and duim olketa nara samting for helpem and sapotim olketa.—Acts 12:5; 2 Cor. 1:​10, 11. w22.11 17 ¶11-12

Hem responsibility blo olketa elder for encouragem and strongim spiritual saed blo olketa brata and sista. (1 Pet. 5:2) Taem disaster happen, first samting olketa elder shud duim hem for mek sure olketa brata and sista stap sef, garem kaikai, kaleko, and ples for stap. Bat bihaen datwan, olketa pablisa hia maet bae olketa still needim encouragement. (John 21:15) Harold wanfala Branch Komiti member wea visitim staka brata and sista wea disaster affectim olketa, hem sei: “Hem savve tek taem for laef hem kam bak normal. Nomata maet laef kam bak normal, olketa no savve forgetim samwan wea olketa lovem wea dae, eni spesol samting wea olketa inheritim wea disaster spoelem, or eni danger samting wea olketa feisim. Staka taem datwan savve mekem olketa sorre tumas. Diswan hem normal feeling nomoa, and hem no minim olketa no garem strongfala faith.” Olketa elder, followim disfala kaonsel: “Taem pipol krae, iufala mas krae witim olketa.”—Rome 12:15. w22.12 22 ¶1; 24-25 ¶10-11

Jehovah givim holy spirit blo hem for strongim iumi for duim stret samting. Taem iumi studyim Bible, iumi letem holy spirit for leadim iumi. Taem iumi attendim meeting, iumi savve kasem holy spirit, and iumi savve associate witim olketa brata and sista wea waka hard tu for duim stret samting. Datwan savve barava encouragem iumi. (Heb. 10:​24, 25; 13:7) Taem iumi prea lo Jehovah from heart for helpem iumi witim wanfala wik point, hem bae givim holy spirit for strongim iumi for no givap. Hem tru, feeling for laek duim samting wea no stret bae no finis, bat for studyim Bible, attendim meeting and for prea savve helpem iumi for faet againstim olketa feeling hia. If iumi garem wanfala schedule for duim olketa spiritual samting, hem important for gohed followim datfala schedule and strong for duim stret samting. w23.01 11 ¶13-14

Bible hem no buk abaotem health or diet, bat hem storyim tingting blo Jehovah abaotem olketa samting hia. For example, Bible sei for iumi “avoidim eni samting wea savve kosim problem” lo body blo iumi. (Eccl. 11:10) Bible sei for iumi shud no ova tumas lo kaikai and alcohol, bikos diswan savve spoelem health and killim iumi dae tu. (Provebs 23:​20, SIPB) Jehovah laekem iumi for kontrolem iumiseleva taem iumi disaedem wanem and haomas for iumi kaikaim and drinkim. (1 Cor. 9:25) Iumi savve mekem olketa disison wea showim iumi barava tinghae lo laef taem iumi iusim gudfala tingting. (Sams 119:​99, 100; Provebs 2:​11, SIBP) For example, iumi bae tingting gud abaotem wanem iumi bae kaikaim. If iumi laekem wanfala kaen kaikai bat iumi savve hem bae mekem iumi sik, iumi mek sure iumi no kaikaim datwan. And tu, iumi iusim gudfala tingting taem iumi sleep early, exercise evritaem, gohed keepim gud body, and keepim klin insaed and aotsaed haos blo iumi. w23.02 21 ¶6-7

Hao nao iu savve faendem olketa spiritual treasure taem iu readim Bible? Tingim wat 2 Timothy 3:​16, 17 storyim. Hem sei: “Evri toktok insaed long olketa Holy Raeting . . . hem savve” (1) teachim pipol, (2) showim samting wea no stret, (3) stretem evri samting, and (4) stretem tingting blo pipol. Fofala point hia savve helpem iu taem iu readim wanfala Bible buk wea iu no iusim staka taem. Ting raonem hao datfala story teachim iu abaotem Jehovah, plan blo hem, or abaotem olketa principle blo hem. Ting raonem hao datfala story showim samting wea hem no stret. For duim lo diswan, tingim hao olketa verse hia helpem iu for luksavve and rejectim eni rong tingting or eni nogud wei, and hao hem helpem iu for gohed faithful lo Jehovah. Lukim hao iu savve iusim datfala story for stretem eni rong idea wea maet iu herem lo ministry. And luk for eni point from olketa verse hia wea stretem tingting blo iu for iu garem sem tingting blo Jehovah abaotem samting. Taem iu duim 4-fala samting hia, bae iu faendem olketa spiritual treasure wea helpem iu for kasem gud samting from Bible reading blo iu. w23.02 11 ¶11

Wanfala profesi lo Daniel storyim taem wea Jesus bae start for rul lo Kingdom and hem sei datwan bae happen lo end blo sevenfala year. (Daniel 4:​10-17, SIPB) Datfala “sevenfala yia, [“seven taems,” NWT]” hem stand for 2,520 year. Datfala 2,520 year hem start lo 607 B.C.E., taem Babylon aotem last king wea sidaon lo throne blo Jehovah lo Jerusalem. And hem finis lo 1914 C.E. taem Jesus, datfala “man wea [Jehovah] siusim,” hem kamap King lo Kingdom blo God. (Esikiel 21:​25-27, SIPB) Wat nao disfala profesi helpem iumi for luksavve lo hem? Disfala profesi abaotem “sevenfala yia” helpem iumi for trustim hao Jehovah fulfillim olketa promis blo hem lo barava taem. Profesi hia showimaot Jehovah markem taem for Jesus hem kamap King, and datwan hem happen nao. So iumi savve sure olketa nara profesi tu bae kamap tru lo taem wea Jehovah markem. Tru nao, day blo Jehovah bae kam lo “raet taem” wea hem markem!—Habakuk 2:​3, SIPB. w22.07 3 ¶3-5