April

Olketa servant blo Jehovah wea Bible storyim feisim olketa challenge wea olketa no expectim. Tingim Jacob. Dadi blo hem talem hem for maritim wanfala lo olketa dota blo Laban wea hem relative blo olketa wea worshipim Jehovah, and dadi blo Jacob sei Jehovah bae barava blessim hem. (Gen. 28:​1-4) So Jacob duim stret samting taem hem followim datwan. Hem lusim Canaan and go lo Laban, wea garem tufala dota, Leah and Rachel. Jacob barava lovem Rachel wea hem second dota blo Laban and hem agree for waka for Laban for sevenfala year bifor hem maritim Rachel. (Gen. 29:18) Bat situation no happen olsem wanem Jacob tingim. Laban trikim hem and givim hem first dota blo hem, Leah. Laban agree for Jacob maritim Rachel wan week bihaen, bat hem bae letem only if Jacob waka for sevenfala year moa. (Gen. 29:​26-27) And tu, hao Laban deal witim Jacob saed lo bisnis hem barava no fair. For 20-fala year, Laban ravem Jacob!—Gen. 31:​41, 42. w23.04 15 ¶5

Taem iumi needim comfort and help, hu nao bae iumi askem? Iumi savve finis lo ansa. Iumi savve prea lo Jehovah God. Jehovah barava laekem iumi for duim datwan. Hem laekem iumi for “mas prea evritaem.” (1 Thess. 5:17) Iumi savve prea and askem hem for helpem iumi lo evri part lo laef blo iumi. (Prov. 3:​5, 6) From Jehovah hem God wea kaen tumas, hem no putim limit lo haomas taem iumi savve prea lo hem. Jesus luksavve prea hem barava important lo Jehovah. Bifor Jesus kam lo earth, hem lukim Dadi blo hem ansarem prea blo olketa faithful man and woman. For example, Jesus lukim taem Jehovah ansarem olketa prea wea Hannah, David, Elijah, and samfala moa talem from heart. (1 Sam. 1:​10, 11, 20; 1 Ki. 19:​4-6; Ps. 32:5) Dastawe, Jesus teachim olketa disaepol for prea evritaem and for no hol bak for duim datwan!—Matt. 7:​7-11. w23.05 2 ¶1, 3

Hae Priest Jehoiada fraet lo Jehovah. Datwan showaot klia taem dota blo Jezebel, Athaliah, mekem hemseleva for kamap queen lo Judah. Hem raf tumas and hangere for paoa, so hem trae for killim dae evriwan lo laen blo king, wea hem olketa granson blo hem. (2 Chron. 22:​10, 11) Jehoash, wanfala granson blo hem laef bikos waef blo Jehoiada, Jehoshabeath rescuem hem. Jehoshabeath and hasband haedem datfala pikinini and lukaftarem. From datwan, Jehoiada and Jehoshabeath help for protectim laen blo olketa king wea born lo laen blo King David. Jehoiada wea olo finis loyal lo Jehovah and nating fraetem Athaliah. Taem Jehoash seven years, Jehoiada duim nara samting wea pruvim hem loyal lo Jehovah. Hem mekem wanfala plan. If datfala plan succeed, Jehoash wea kam from laen blo David bae kamap king. Bat if datfala plan fail, for sure bae olketa killim dae Jehoiada. Jehovah blessim datfala plan and hem succeed. w23.06 17 ¶12-13

Datfala message savve mekem King Nebuchadnezzar for tingse Daniel againstim hem and king savve disaed for killim hem dae. Bat Daniel brave and talem datfala message. Wat nao maet helpem Daniel for brave for full laef blo hem? Taem Daniel young, for sure hem lane from example blo mami and dadi. (Deut. 6:​6-9) Daniel no just savve lo Ten Komandment, bat hem savve lo detail information abaotem datwan. For example, hem savve wat olketa Israelite savve kaikaim and shud no kaikaim. (Lev. 11:​4-8; Dan. 1:​8, 11-13) Daniel lanem tu history blo pipol blo God and hem savve wat hem happen lo olketa taem olketa no obeyim standard blo Jehovah. (Dan. 9:​10, 11) Olketa samting wea Daniel feisim lo laef mekem hem for barava trustim dat Jehovah and olketa paoaful angel blo Hem gohed for sapotim hem.—Dan. 2:​19-24; 10:​12, 18, 19. w23.08 3 ¶5-6

Lo full laef blo Rebekah hem wanfala wise woman wea savve mekem olketa gud disison and luksavve lo taem for duim samting. (Gen. 24:58; 27:​5-17) Nomata olsem, Rebekah showimaot respect and willing for followim instruction. (Gen. 24:​17, 18, 65) If iu hambol for sapotim arrangement blo Jehovah olsem Rebekah, iu bae kamap samwan wea garem gud influence lo famili blo iu and lo kongregeson. Evri mature Christian need for hambol and savve lo limit blo olketa. Esther hem wanfala hambol faithful servant blo God. From hem hambol and savve lo limit blo hem, hem no praod taem hem kamap queen. Hem lisin lo advaes blo kasin blo hem Mordecai and followim. (Esther 2:​10, 20, 22) Iu savve followim example blo Esther, taem iu askem narawan for gud advaes and followim. (Titus 2:​3-5) Esther showim disfala quality lo narafala wei tu. Hem young gele wea “luk naes tumas,” nomata olsem, hem no laek duim samting for kasem attention blo evriwan.—Esther 2:​7, 15. w23.12 19-20 ¶6-8

Jehovah no laekem iumi for gohed feel guilty. Hao nao bae iumi savve if iumi ova tumas for feel guilty? If iumi confessim sin blo iumi, repent, and waka hard for no duim moa datfala sin, iumi savve sure Jehovah hem forgivim iumi. (Acts 3:19) Bihaen iumi duim olketa samting hia, Jehovah no laekem iumi for gohed feel guilty. Hem savve datwan bae spoelem iumi. (Ps. 31:10) If iumi sorre tumas, maet iumi bae givap lo reis blo iumi for laef. (2 Cor. 2:7) Taem iu gohed feel guilty tumas, tingim hao God hem garem “trufala wei for forgive.” (Ps. 130:4) Taem hem forgivim olketa wea barava repent, hem promis olsem: “Mi bae no tingim moa sin blo olketa.” (Jer. 31:34) Datwan minim Jehovah bae forgetim eni sin blo iu wea hem forgivim finis. No feel nogud lo iuseleva bikos iu lusim samfala responsibility blo iu lo kongregeson. Jehovah no gohed tingim olketa sin blo iu, and iu tu shud olsem. w23.08 30-31 ¶14-15

Lo taem blo COVID-19 pandemic, Olketa Jehovah’s Witness wea lisin lo direction wea kam from organization blo Jehovah, olketa no wari olsem pipol wea lisin lo olketa false information. (Matt. 24:45) Iumi mas gohed focus lo “olketa samting wea barava important.” (Phil. 1:​9, 10) Olketa samting wea distractim iumi savve weistim staka taem and energy blo iumi. Olketa normal samting olsem kaikai, drink, entertainment, and waka for selen savve distractim iumi if iumi allowim olketa samting hia for kamap main samting lo laef blo iumi. (Luke 21:​34, 35) And tu, evriday iumi herem and read abaotem olketa protest and debate blo politik. Iumi mas mek sure olketa debate hia no distractim iumi. Nogud iumi start for sapotim wanfala grup lo mind and heart blo iumi. Aim blo Satan hem for iusim staka samting for spoelem disison blo iumi for duim stret samting. w23.07 16-17 ¶12-13

For celebratem Memorial lo dae blo Christ, hem wanfala barava important day lo year for pipol blo Jehovah. Hem only event wea Jesus komandim olketa follower blo hem for duim. (Luke 22:​19, 20) Hem remindim iumi for luksavve lo olketa samting wea iumi savve duim for showim iumi tinghae lo sakrifaes blo Jesus. (2 Cor. 5:​14, 15) And tu, hem taem wea evri brata and sista savve enjoyim wei for “strongim narawan.” (Rome 1:12) And staka wea interest tinghae lo wat olketa herem and lukim and olketa laek for studyim Bible. Iumi luk forward tu lo Memorial bikos iumi savve lo datfala day iumi wan mind witim olketa brata and sista blo iumi evriwan lo world. Evri samting hia mekem Memorial hem barava spesol samting lo iumi! w24.01 8 ¶1-3

Taem iumi ting raonem datfala price wea Jehovah and Jesus peim, bae iumi understandim go moa hao tufala barava lovem each wan lo iumi. (Gal. 2:20) Jehovah peim datfala ransom bikos hem lovem iumi. Jehovah showimaot hem lovem iumi taem hem sakrifaesim spesol Son blo hem, Jesus. Jehovah letem Son blo hem for safa and dae for iumi. Olsem iumi bin storyim, Jehovah no haedem feeling blo hem, bat hem talem iumi hao hem barava lovem iumi. (Jer. 31:3) Jehovah pullim iumi kam lo hem bikos hem lovem iumi. (Comparem Deuteronomy 7:​7, 8.) No eni samting or eniwan savve separatem iumi from love blo hem. (Rome 8:​38, 39) Hao nao iu feel abaotem disfala love blo God? w24.01 28 ¶10-11

Olketa anointed Christian barava appreciatim hope wea olketa garem for go lo heven. Wanfala lo olketa, hem Brata Frederick Franz wea faithful for worshipim God for staka year. Lo 1991 hem sei: “Mifala barava sure lo hope wea mifala garem, and evriwan lo mifala blo 144,000 bae receivem wat God promisim. And bae mifala kasem reward wea barava gud winim eni samting. . . . Mifala barava tinghae lo hope wea mifala garem. . . . Taem mifala gohed for weit, datwan helpem mifala for appreciatim go moa datfala hope. Mifala willing for weitim. . . . Mi barava appreciatim datfala hope winim enitaem bifor.” Nomata bae iumi enjoyim laef olowe lo heven or lo earth, iumi garem nambawan hope wea mekem iumi hapi. And iumi savve barava sure go moa lo hope blo iumi. w23.12 9 ¶6; 10 ¶8

Wanfala copper altar hem stap aotsaed lo entrance blo tabernacle lo bifor for sakrifaesim olketa animal for Jehovah. (Ex. 27:​1, 2; 40:29) Bat olketa sakrifaes hia no mekem pipol for kasem forgiveness for sin blo olketa for olowe. (Heb. 10:​1-3) Olketa animal sakrifaes wea olketa offerim lo tabernacle, hem piksarem wanfala sakrifaes wea bae mekem pipol kasem forgiveness for sin blo olketa for olowe. Jesus savve Jehovah sendem hem kam lo earth, for givim human laef blo hem olsem ransom sakrifaes for evri pipol. (Matt. 20:28) So taem Jesus baptaes, hem givim hemseleva for duim wat Jehovah laekem. (John 6:38; Gal. 1:4) Jesus offerim laef blo hem “wantaem nomoa” mekem evriwan wea showimaot faith lo hem savve kasem forgiveness for olowe.—Heb. 10:​5-7, 10. w23.10 26-27 ¶10-11

Hem hard tumas for iumiseleva duim samting for mekem iumi free from sin and dae. (Ps. 49:​7, 8) So Jehovah and Jesus duim big samting for iumi, Jehovah arrange for Jesus givim laef blo hem for sevem iumi. Taem iumi gohed meditate abaotem wat Jehovah and Jesus duim, bae iumi barava appreciatim ransom. Taem Adam sin, hem lusim nao chance for laef olowe and evri pikinini blo hem tu. So for peim bak wat Adam lusim, Jesus mas sakrifaesim perfect laef blo hem. Taem Jesus stap lo earth, “no enitaem hem duim sin and no enitaem hem laea.” (1 Pet. 2:22) Taem Jesus dae, hem perfect olsem Adam bifor hem sin. So taem Jesus sakrifaesim laef blo hem, hem fit for peim price for perfect laef wea Adam lusim.—1 Cor. 15:45; 1 Tim. 2:6. w24.01 10 ¶5-6

Bihaen Jesus resurrect, hem go insaed Most Holy Rum lo datfala spiritual temple. So arrangement blo Jehovah for tru worship wea base lo ransom sakrifaes and wea Hae Priest Jesus Christ nao leadim, hem barava gud winim worship blo olketa Jew bifor. Hae priest lo Israel bifor savve go insaed lo Most Holy Rum, wea man nomoa wakem, for presentim blood blo olketa animal sakrifaes. Bat Jesus hem “go insaed lo heven,” wea holy tumas front lo Jehovah for presentim value lo perfect human laef blo hem on behalf lo iumi, wea hem “givim hemseleva olsem sakrifaes for finisim sin.” (Heb. 9:​24-26) Nomata iumi garem hope for laef lo heven or lo earth, iumi evriwan savve worshipim Jehovah lo spiritual temple blo hem. w23.10 28 ¶13-14

Ting abaotem wat Jesus duim for iumi from heven bikos hem King and Hae Priest wea tingim iumi. Bikos lo Jesus, iumi savve kam lo “throne bilong God wea hem kaen tumas,” for prea and askem mercy and help from God lo “taem iumi needim.” (Heb. 4:14) Each day, iumi need for ting abaot wat Jehovah and Jesus duim finis, and wat tufala gohed duim for iumi. Iumi shud barava tinghae lo love wea tufala garem for iumi, and datfala love shud encouragem iumi for gohed strong for worshipim Jehovah. (2 Cor. 5:​14, 15) Wanfala best wei for showim iumi barava appreciatim wat tufala duim for iumi, hem for helpem olketa narawan for worshipim Jehovah and kamap disaepol blo Jesus. (Matt. 28:​19, 20) Hem nao wat aposol Paul duim. Paul luksavve hem will blo Jehovah for “evri difren kaen man mas sev and for garem stretfala savve abaotem olketa tru teaching.”—1 Tim. 2:​3, 4. w23.10 22-23 ¶13-14

Staka lo iumi iusim disfala scripture for comfortim pipol wea iumi preach lo olketa and for showim hao nao laef lo paradaes. Hao nao iumi savve helpem olketa narawan and iumiseleva tu, for trustim dat olketa blessing wea Revelation 21:​3, 4 storyim bae kamap tru? Jehovah no talem nomoa datfala promis bat hem givim olketa reason wea mekem iumi sure hem bae keepim disfala promis. Revelation 21:​5, 6 hem storyim olketa reason wea mekem iumi trustim datfala promis blo Jehovah abaotem paradaes. Hem sei: “God wea sidaon long throne hem sei: ‘Mi wakem evri niu samting.’ Hem sei tu: ‘Raetem diswan, bikos man savve trustim olketa toktok hia and hem barava tru.’ Hem sei long mi: ‘Olketa toktok hia hem kamap tru nao! Mi nao Alpha and Omega,’” wea minim hem nao start and end.—Rev. 21:​5, 6a, ftn. w23.11 3 ¶3-5

Hao wanfala young brata dressap and chusim kaleko savve showim tu if hem garem wei for tingting gud raonem samting. Staka taem, olketa wea designim and advertisem olketa latest fashion kaleko no garem eni respect for Jehovah and olketa no followim standard blo Hem. And datwan showaot lo hao olketa designim kaleko wea taet tumas or wea mekem man luk olsem woman. Wanfala young brata wea gohed for kamap mature Christian, bae followim Bible principle and gudfala example blo olketa lo kongregeson taem hem chusim kaleko. Tingim diswan: ‘Hao, olketa kaleko wea mi chusim showim mi garem gudfala tingting and showimaot respect? Waswe, hao mi dressap mekem olketa narawan luksavve mi worshipim God?’ (1 Cor. 10:​31-33) Wanfala young brata wea garem gudfala tingting bae olketa brata and sista tinghae lo hem and Jehovah tu. w23.12 26 ¶7

Lo bifor, “king blo south” persecutim pipol blo Jehovah. (Dan. 11:40) For example, datwan happen during World War I and World War II, taem olketa putim staka brata and sista lo prison bikos olketa neutral, and samfala Witness pikinini tu expel from skul for sem reason. Lo olketa year wea just go pas, olketa servant blo Jehovah wea stap anda lo rul blo datfala king, feisim samfala difren test from olketa loyal lo Kingdom blo God. Olsem example, during lo olketa election campaign, wanfala Christian savve kasem pressure for sapotim wanfala politikol party or wanfala candidate. Hem maet no vote, bat lo mind and heart blo hem, hem sapotim wanfala party or candidate. Hem important tumas for iumi gohed neutral lo mind and heart blo iumi and lo wat iumi duim!—John 15:​18, 19. w23.08 12 ¶17

Taem iumi ran lo reis for laef, iumi mas “ran for win and tekem datfala prize.” (1 Cor. 9:24) Jesus sei: “Wei for kaikai tumas and drink tumas witim wei for wari abaotem olketa samting wea [iumi] needim” savve mekem iumi for “no garem stretfala tingting.” (Luke 21:34) Tufala scripture hia and olketa nara scripture savve helpem iu for luksavve lo samfala adjustment wea iu maet need for mekem taem iu ran lo reis for laef. Iumi sure iumi bae winim reis for laef bikos Jehovah bae givim strong wea iumi needim. (Isa. 40:​29-31) So iumi mas no slow daon. Followim example blo aposol Paul wea waka hard for kasem prize wea God putim for hem. (Phil. 3:​13, 14) No eniwan savve ran lo disfala reis for iu. Bat witim help blo Jehovah iu savve win. Jehovah bae helpem iu for karem olketa load blo iu, and torowem olketa unnecessary load. From Jehovah stap witim iu, bae iu no givap lo reis blo iu and winim datwan! w23.08 31 ¶16-17

Taem Jesus 12 years old, parents blo hem lusim hem lo Jerusalem. (Luke 2:​46-52) Joseph and Mary shud mek sure evri pikinini stap witim grup wea olketa travel go bak lo hom afta datfala festival. Gogo taem Joseph and Mary faendem Jesus lo Jerusalem, Mary blamem Jesus for problem wea hem kosim! Jesus fit for blamem tufala for datwan. Instead, hem kaen and showimaot respect taem hem story lo tufala. Bat Joseph and Mary “nating minim samting wea hem talem.” Nomata olsem, Jesus “gohed for obeyim tufala.” Olketa young wan, hao iu faendem hem hard for obeyim dadi and mami taem olketa mekem mistek or no minim iu? Wat nao savve helpem iu? Ting abaotem hao Jehovah feel. Bible sei taem iu obeyim parents, “diswan hem mekem Lord for barava hapi.” (Col. 3:20) Jehovah savve taem wea parents blo iu no minim iu, or taem tufala mekem rul wea hem no fair. Bat taem iu obeyim parents, iu mekem Jehovah hapi. w23.10 7 ¶5-6

Maet wanfala skulmate sei Olketa Jehovah’s Witness shud changem tingting blo olketa abaotem olketa homosexual. Iumi savve talem hem dat iumi respectim hao each wan garem raet for mekem own disison blo hem. (1 Pet. 2:17) Maet iumi savve storyim hao taem iumi followim olketa standard lo Bible hem mekem iumi hapi. Taem iumi story witim samwan wea barava disagree witim biliv blo iumi, iumi shud no kwiktaem tingse iumi savve lo wat hem bilivim. For example, hao if wanfala skulmate sei hem karangge for biliv lo God? Hao, bae iu tingse hem barava biliv lo evolution and savve gud lo datwan? Really, maet hem repeatim nomoa wat hem herem. Maet iu savve givim hem wanfala link abaotem creation wea stap lo jw.org. Maet bihaen, bae hem willing for discussim eni article or video wea hem lukim lo there. Taem iumi showimaot respect, datwan maet helpem hem for laek lanem moa samting abaotem Bible. w23.09 17 ¶12-13

Iumi savve sure Jehovah bae iusim iumi and blessim iumi tu nomata iumi mekem mistek, bat iumi waka hard for stretem and gohed for trustim hem. (Prov. 28:13) Samson no perfect, bat hem no givap for duim will blo Jehovah nomata hem mekem bad disison for maritim Delilah. Jehovah forgivim Samson and iusim hem moa for duim wat hem laekem. And Jehovah ting lo Samson olsem man wea garem strong faith, and includim nem blo hem insaed lo list blo olketa faithful servant blo hem wea stap lo Hebrew chapter 11. Iumi hapi tumas for savve dat iumi worshipim Dadi blo iumi lo heven wea laekem tumas for givim strong lo iumi, especially taem iumi feisim olketa challenge! So iumi tu shud begim Jehovah olsem Samson, wea sei: “Plis tingim mi and strongim mi.”—Judg. 16:28. w23.09 7 ¶18-19

From iumi savve day blo Jehovah hem klosap, iumi laek duim best blo iumi for storyim gud nius lo narawan. Bat samfala taem, maet iumi hol bak for preach. Why? Maet hem bikos iumi fraetem man. Hem nao samting wea happen lo Peter. Lo naet wea olketa arrestim Jesus, Peter fraet for sei hem wanfala disaepol blo Jesus and hem denyim Jesus thrifala taem. (Matt. 26:​69-75) Bat gogo Peter ovakamim wei for fraetem man and hem raet olsem: “Iufala mas no fraetem samting wea olketa narawan fraetem and no wari.” (1 Pet. 3:14) Toktok blo Peter helpem iumi for luksavve hao iumi savve winim wei for fraetem man. Wat nao savve helpem iumi for winim wei for fraetem man? Peter sei: “Mas acceptim long heart bilong iufala Christ hem Lord bilong iufala.” (1 Pet. 3:15) So hem gud for tingim position and paoa wea Lord and King blo iumi Christ Jesus garem. w23.09 27-28 ¶6-8

Iumi mas gohed for faet againstim wei for involve insaed “olketa iusles samting wea join witim darkness.” (Eph. 5:11) Olketa experience showimaot taem samwan hem lukluk, lisin, or storyim olketa dirty samting, datwan bae mekem hem isi for hem duim samting wea no stret. (Gen. 3:6; 1:​14, 15) World blo Satan trae for laea lo iumi and mekem iumi tingse wat Jehovah sei hem no stret and no klin, hem olraet nomoa. (2 Pet. 2:19) Wanfala lo olketa teknik wea Devil iusim for longtaem finis hem for konfiusim pipol mekem olketa no luksavve lo wat hem stret and wat hem rong. (Isa. 5:20; 2 Cor. 4:4) Dastawe staka movie, television show, and website promotim olketa idea wea againstim olketa raeteous standard blo Jehovah! Satan trae for laea lo iumi for mekem iumi tingse olketa nogud wei and laef stael blo disfala world bae no spoelem iumi.—Eph. 5:6. w24.03 22 ¶8-10

Datfala tabernacle hem luk olsem tent. Olketa Israelite savve karem datfala tent taem olketa muv from ples tu ples. Olketa iusim for klosap 500 year go kasem taem olketa buildim temple lo Jerusalem. (Ex. 25:​8, 9; Num. 9:22) Datfala tabernacle hem main ples for olketa Israelite worship and for offerim olketa sakrifaes. (Ex. 29:​43-46) Bat datfala tabernacle hem representim tu samting wea barava gud go moa. Hem “shadow” blo “olketa samting long heven,” and hem piksarem nambawan spiritual temple blo Jehovah. Aposol Paul storyim “datfala tent [or, tabernacle] hem piksarem olketa samting wea happen distaem.” (Heb. 9:9) So taem Paul raet for olketa Hebrew Christian, spiritual temple hem exist finis. Hem start for exist lo 29 C.E. Lo datfala year Jesus baptaes and hem kamap “nambawan hae priest” blo Jehovah lo spiritual temple.—Heb. 4:14; Acts 10:​37, 38. w23.10 25-26 ¶6-7

For gohed gud lo spiritual wei, olketa Christian mas flexible and redi for bend. Hao nao for flexible? Iumi mas flexible taem situation lo laef hem change and for respectim tingting and disison blo olketa narawan. Iumi olketa servant blo Jehovah iumi laek for flexible. And tu, iumi laek for hambol and tingim narawan. Bible sei Jehovah hem “Rock” bikos hem evritaem strong and stedy. (Deut. 32:4) Nomata olsem, hem flexible tu. Taem olketa samting lo disfala world gohed change, Jehovah gohed change tu mekem evri plan blo hem kamap tru. Jehovah creatim olketa human being lo image blo hem wea minim olketa savve change tu fitim eni situation. Hem provaedem olketa klia Bible principle wea savve helpem iumi for mekem olketa wise disison nomata iumi deal witim eni challenge. Example blo Jehovah and olketa Bible principle helpem iumi for luksavve hao nomata Jehovah hem “Rock,” hem flexible tu. w23.07 20 ¶1-3

Insaed Bible, Jehovah comparem hemseleva witim wanfala mami wea lovem pikinini blo hem. (Isa. 66:​12, 13) Imaginim wanfala mami wea barava kea for smol baby blo hem and mami mek sure hem kasem wat hem needim. Taem iumi kasem hard taem, iumi sure Jehovah lovem iumi. Hem no givap lo iumi nomata taem iumi duim samting wea rong. (Ps. 103:8) Staka taem nao nation blo Israel duim samting wea mekem Jehovah feel nogud. Nomata olsem, taem olketa repent, hem assurem olketa lo loyal love blo hem. For example, hem talem olketa: “Iu kamap samting wea spesol lo eye blo mi, Iu kasem honor, and mi lovem iu.” (Isa. 43:​4, 5) Love blo Jehovah hem no change. Nomata iumi duim wanfala serious mistek, taem iumi repent and kam bak lo Jehovah, iumi bae still experiencem love blo hem. Hem promis hao “hem bae barava forgivim” iumi. (Isa. 55:7) Bible sei taem Jehovah forgivim iumi, bae iumi “strong” bak moa.—Acts 3:19. w24.01 27 ¶4-5

Jehovah savve helpem iumi taem iumi feisim wanfala hard situation. For example, taem iumi askem boss for taem off for attendim convention, or for adjustim taem blo iumi for waka mekem iumi savve attendim evri meeting, datwan givim chance for iumi lukim hand blo Jehovah lo laef blo iumi. Maet iumi bae sapraes for lukim hao Jehovah blessim datwan. Then, trust blo iumi lo Jehovah bae strong go moa. Ezra hambol for prea lo Jehovah for help. Taem Ezra wari tumas abaotem olketa responsibility blo hem, hem hambol for prea lo Jehovah. (Ezra 8:​21-23; 9:​3-5) Attitude blo Ezra encouragem olketa narawan for sapotim hem and followim faith blo hem. (Ezra 10:​1-4) So taem iumi wari tumas abaotem need or safety blo famili blo iumi, iumi mas barava trustim Jehovah and prea lo hem. w23.11 18 ¶15-17

Jehovah no sei for iumi duim olketa sem samting wea Abraham duim for hem sei iumi raeteous. Staka samting stap for iumi duim for showimaot iumi garem faith. Iumi savve welkamim olketa niu wan wea kam lo kongregeson, helpem olketa brata and sista wea garem need, and duim gud samting for famili blo iumi. Taem iumi duim olketa samting hia, God bae hapi and blessim. (Rome 15:7; 1 Tim. 5:​4, 8; 1 John 3:18) Wanfala important samting wea iumi savve duim for showimaot iumi garem faith, hem for gohed strong for preachim gud nius. (1 Tim. 4:16) Wanem iumi duim savve showimaot iumi garem faith dat olketa promis blo Jehovah bae kamap tru and wei blo hem nao best. And if iumi duim datwan, iumi savve barava sure hao God bae sei iumi raeteous and kolem iumi olketa fren blo hem. w23.12 3 ¶3; 6 ¶15

Taem King David klosap for dae, hem talem Solomon olketa toktok lo text for tuday. (1 Ki. 2:​1, 3) Diswan hem gud advaes for evri Christian brata followim. For olketa duim datwan, olketa mas lane for obeyim law blo God and followim olketa Bible principle lo evri samting wea olketa duim. (Luke 2:52) Why nao hem important for olketa young brata kamap mature Christian? Wanfala Christian brata garem staka important responsibility insaed famili and lo kongregeson. For sure, iufala olketa young brata bin tingting abaotem olketa responsibility wea iu bae garem lo future. Maet iu garem aim for duim full-taem service, ministerial servant, and bihaen kamap elder lo kongregeson. And tu, maet iu laek for marit and garem pikinini. (Eph. 6:4; 1 Tim. 3:1) For kasem olketa aim hia and duim gud, iu need for kamap mature Christian. w23.12 24 ¶1-2

Jehovah givim waka lo olketa elder for lukaftarem olketa sheepsheep blo hem wea hem lovem. Olketa faithful man hia tinghae lo privilege blo olketa for kea for olketa brata and sista, and traem best for kamap “shepherd wea bae barava lukaftarem” gud olketa sheep. (Jer. 23:4; 1 Pet. 5:2) Iumi hapi tumas for garem olketa brata olsem insaed kongregeson blo iumi! Olketa elder savve lane from example blo Judge Gideon. (Heb. 6:12) Hem protectim and shepherdim pipol blo God. (Judg. 2:16; 1 Chron. 17:6) Olsem Gideon, olketa elder kasem appointment for lukaftarem pipol blo God lo disfala challenging taem. (Acts 20:28; 2 Tim. 3:1) Iumi evriwan savve lane from example blo Gideon wea luksavve lo limit blo hem lo wat hem fit for duim, hem hambol, and obey. Taem hem duim assignment blo hem, hem feisim olketa test for gohed faithful. Nomata iumi elder or nomoa, hem gud for iumi lane for appreciatim olketa elder blo iumi, and sapotim olketa spiritual brata hia.—Heb. 13:17. w23.06 2 ¶1; 3 ¶3