May

Olketa Christian lo first century mas deal witim datfala big hangere wea “kasem evri ples.” Masbi olketa famili hed wari abaotem hao for provaed for famili. Bat waswe lo olketa young wan wea plan for duim moa samting lo ministry? Waswe, olketa ting for weit firstaem bifor olketa duim datwan? Olketa Christian hia change for fitim datfala situation. Olketa gohed duim best blo olketa lo ministry and hapi for sharem material samting wea olketa garem witim olketa nara Christian lo Judea. (Acts 11:​29, 30) Olketa wea kasem relief supply luksavve Jehovah gohed helpem olketa. (Matt. 6:​31-33) Olketa mas barava feel klos lo olketa wea kam for helpem olketa. And olketa wea givim donation and olketa wea help lo olketa narafala wei lo datfala relief waka kasem hapi from wei for give.—Acts 20:35. w23.04 16 ¶12-13

Samfala taem, Jehovah iusim pipol wea no worshipim hem for ansarem prea blo olketa wea worshipim hem. For example, hem iusim King Artaxerxes for letem Nehemiah go bak lo Jerusalem, mekem hem savve help for buildim bak datfala city. (Neh. 2:​3-6) Distaem tu, Jehovah savve iusim olketa wea no worshipim hem for helpem iumi taem iumi barava needim help. Staka taem Jehovah no ansarem olketa prea blo iumi lo spesol wei. Bat olketa ansa wea iumi kasem hem barava wat iumi needim for gohed faithful lo Jehovah. So trae for luksavve lo hao Jehovah ansarem olketa prea blo iu. So hem gud for samfala taem iu need for stop and ting raonem hao Jehovah ansarem olketa prea blo iu. (Ps. 66:​19, 20) Iumi mas showimaot faith taem iumi prea lo Jehovah, and tu, taem iumi acceptim eni wei wea hem ansarem prea blo iumi.—Heb. 11:6. w23.05 11 ¶13; 12 ¶15-16

Taem iumi dedicate lo Jehovah, iumi promis for worshipim hem and for duim will blo hem. Iumi mas keepim datfala vow. For iumi keepim datfala vow, hem no hard for iumi duim datwan. Diswan hem bikos Jehovah creatim iumi for duim will blo hem. (Rev. 4:11) Hem wakem iumi for laek savve lo hem and worshipim hem, and hem creatim iumi lo image blo hem. Dastawe, iumi fit for fren gud witim hem and hapi for duim will blo hem. And tu, taem iumi duim will blo God and followim example blo Son blo hem, datwan bae “strongim” iumi. (Matt. 11:​28-30) So strongim love blo iu for Jehovah taem iu ting raonem evri gud samting wea hem duim for iu finis, and olketa blessing wea bae iu kasem lo future wea hem promisim. Taem iu garem strongfala love for God, datwan bae mekem hem isi for iu obeyim hem. (1 John 5:3) Jesus win for duim will blo God bikos hem prea lo Jehovah for help and hem gohed focus lo reward wea bae hem kasem. (Heb. 5:7; 12:2) Olsem Jesus, prea lo Jehovah for strongim iu and gohed tingim hope for laef olowe. w23.08 27-28 ¶4-5

Iumi evriwan tinghae lo pipol wea savve patient. Why nao olsem? Bikos iumi respectim samwan wea no feel nogud, nomata hem mas weit longtaem for wanfala samting. Iumi appreciatim tu man wea patient witim iumi taem iumi mekem mistek. Iumi hapi dat Bible teacher blo iumi hem patient witim iumi taem iumi stragol for lane, acceptim, or followim wanfala Bible teaching. And iumi barava thankiu tumas lo Jehovah God bikos hem patient witim iumi! Nomata iumi tinghae lo pipol wea patient, maet iumiseleva nao faendem hard for patient samfala taem. For example, iumi maet stragol for patient taem iumi stuck lo traffic, especially taem iumi leit. Maet iumi kwiktaem for kros taem narawan mekem iumi feel nogud. And samfala taem, maet iumi faendem hard for gohed weitim niu world wea Jehovah promisim. Bat lo evri situation hia, iumi need for patient. w23.08 20 ¶1-2

Jehovah talem Gideon for sendem bak winim 99 percent lo olketa soldia blo hem. Gideon maet ting: ‘Waswe, diswan need for change? Hao, bae hem waka tu?’ Nomata olsem, Gideon obey nomoa. Olsem Gideon, olketa elder distaem obeyim eni change wea kamap saed lo olketa theocratic direction. (Heb. 13:17) Gideon obeyim Jehovah nomata hem fraet and assignment blo hem dangerous. (Judg. 9:17) Bihaen Gideon luksavve Jehovah gohed sapotim hem, Gideon barava sure Jehovah bae helpem hem for protectim pipol blo Hem. Olketa elder wea stap lo ples wea waka blo iumi ban, followim example blo Gideon. Olketa no fraet for lead lo olketa meeting and lo ministry nomata maet police arrestim or kwestinim olketa, lusim waka for selen, or pipol treatim olketa nogud. Lo bigfala trabol, olketa elder bae need for no fraet for obeyim instruction wea olketa kasem, nomata situation hem danger. w23.06 5-6 ¶12-13

Jehovah mek sure story blo Hae Priest Jehoiada stap lo Bible mekem iumi savve lane from datwan. (Rome 15:4) And taem Jehoiada dae hem kasem spesol privilege for olketa berem hem “lo Taon blo David witim olketa king, bikos hem duim gud samting lo Israel for tru God and for haos blo Hem.” (2 Chron. 24:​15, 16) Story blo Jehoiada savve helpem iumi evriwan for lane for fraet lo God. Olketa Christian overseer savve followim example blo Jehoiada for redi and loyal for protectim sheepsheep blo God. (Acts 20:28) Olketa olo savve lane from example blo Jehoiada dat taem olketa fraet lo Jehovah and gohed loyal, Jehovah savve iusim olketa for duim samting wea hem laekem. Olketa young wan savve lane from hao Jehovah treatim Jehoiada, and followim example blo Jehovah lo hao hem treatim olketa olo witim respect, especially olketa wea worshipim Jehovah for longtaem finis. (Prov. 16:31) Iumi laek for loyal for sapotim ‘olketa wea lead’ taem iumi obeyim olketa.—Heb. 13:17. w23.06 17 ¶14-15

Taem iumi go lo meeting, garem wei for luksavve taem iu disaedem haomas taem nao bae iu handsap for koment. If iumi handsap staka taem tumas, maet iumi putim pressure lo conductor for kolem iumi nomata olketa narawan no garem yet chance for koment. Datwan savve mekem olketa narawan discourage for apim hand blo olketa. (Eccl. 3:7) Taem staka pablisa handsap lo taem blo meeting, maet iumi no savve givim staka koment olsem iumi laekem. Samfala taem maet conductor no kolem iumi nao. Datwan savve mekem iumi discourage, bat iumi shud no feel nogud taem conductor no kolem iumi. (Eccl. 7:9) If iu laek for koment staka taem bat hem hard, hem gud for barava lisin lo olketa narawan wea koment, then bihaen meeting iu savve talem thankiu lo olketa. Taem iu duim olsem, olketa brata and sista savve kasem encouragement wea semsem olsem taem iu givim koment. w23.04 23-24 ¶14-16

Studyim Bible and ting raonem. Tree wea rut blo hem go deep insaed graon savve stand strong. Iumi tu savve stand strong if iumi garem strong faith lo toktok blo Jehovah insaed Bible. Wanfala tree wea gohed for grow, olketa rut blo hem go deep insaed graon and spred go moa. Taem iumi studyim Bible and ting raonem, iumi strongim faith blo iumi and sure olketa wei blo God hem best. (Col. 2:​6, 7) Ting raonem hao olketa instruction, advaes, and protection blo Jehovah helpem pipol blo hem bifor. For example, Ezekiel barava concentrate taem angel measurem gud temple wea hem lukim lo vision. Datfala vision strongim Ezekiel, and iumi tu lanem olketa important leson lo hao for obeyim olketa standard blo Jehovah for tru worship. (Ezek. 40:​1-4; 43:​10-12) Iumi tu savve kasem gud samting taem iumi spendem taem for studyim and ting raonem olketa deep teaching lo Bible. Iumi savve garem heart wea faithful, from iumi barava trustim Jehovah.—Ps. 112:7. w23.07 18 ¶15-16

Bible storyim staka gud example wea olketa young brata savve followim. Bible storyim olketa man from bifor wea lovem God and duim staka responsibility for lukaftarem pipol blo hem. Iu savve faendem gud example blo olketa mature Christian brata insaed famili blo iu and lo kongregeson tu. (Heb. 13:7) And example blo Jesus Christ tu stap wea iu savve followim. (1 Pet. 2:21) Taem iu studyim gud example blo olketa, ting raonem gudfala wei blo olketa. (Heb. 12:​1, 2) Then disaedem hao bae iu followim example blo olketa. Man wea garem wei for tingting gud raonem samting bae tingting gud firstaem, bifor hem duim samting. So waka hard for garem and gohed keepim datwan. First samting, lanem olketa Bible principle and tingim raonem why hem gud for followim. Then iusim olketa Bible principle hia for mekem olketa disison wea Jehovah bae hapi lo hem. (Sams 119:​9, SIPB) Datwan bae barava helpem iu for kamap wanfala mature Christian brata.—Prov. 2:​11, 12; Heb. 5:14. w23.12 24-25 ¶4-5

Parents savve teachim olketa pikinini lo hao for respond kaen taem olketa narawan kwestinim wat olketa bilivim. (Jas. 3:13) Samfala parents iusim taem blo famili worship for practice witim olketa pikinini. Olketa ting raonem olketa topic wea savve kamap lo skul, discussim and duim demonstration lo hao for ansa, and teachim pikinini lo hao for story kaen and for kasem heart. Olketa practice session savve helpem olketa young wan for explainim gud lo narawan why olketa bilivim wanfala Bible teaching and lo semtaem hem savve strongim biliv blo olketa seleva tu. Datfala series “Olketa Kwestin wea Young Pipol Garem” and olketa exercise for olketa teenager hem available lo jw.org. Olketa designim olketa article hia for strongim biliv blo olketa young wan, and for helpem olketa preparem ansa lo own toktok blo olketa. Taem famili studyim olketa series hia, evriwan bae lanem hao for story kaen and for kasem heart blo narawan taem iumi defendim faith blo iumi. w23.09 17 ¶10; 18 ¶15-16

Hao, enitaem iu markem wanfala spiritual goal bat iu no kasem? If olsem, ino iuseleva. For example, Philip laek for impruvim quality lo prea blo hem and haomas taem hem prea, bat hem stragol for faendem taem for duim datwan. Erika garem goal for arrive early lo olketa meeting for field service, nomata olsem, hem gohed for arrive leit. If iu garem goal wea iu no kasem yet, no feel discourage. For kasem wanfala goal hem needim taem and hard waka. Wei wea iu laek kasem goal blo iu showimaot iu tinghae lo frenship blo iu witim Jehovah and laek for givim hem best blo iu. Jehovah tinghae lo wei wea iu traem best. Hem no expectim iu for duim moa samting winim wanem iu fit for duim. (Ps. 103:14; Mic. 6:8) So goal blo iu shud fitim situation blo iu. w23.05 26-27 ¶1-2

Pipol wea brave savve fraet, bat datwan no stopem olketa for duim stret samting. Daniel hem young man wea barava brave. Daniel studyim gud wat olketa profet blo God raetem and olketa profesi blo Jeremiah. From datwan, hem luksavve olketa Jew wea prisoner lo Babylon for longtaem finis, olketa klosap for kamap free. (Dan. 9:2) From Daniel lukim toktok blo Jehovah hem kamap tru, datwan mas barava strongim trust blo hem lo Jehovah, and olketa wea garem strongfala trust lo God olketa no fraet. (Comparem Rome 8:​32, 37-39.) Barava important samting nao, Daniel prea evritaem lo Dadi blo hem lo heven. (Dan. 6:10) Hem talemaot olketa sin blo hem and storyim feeling blo hem lo Jehovah. And Daniel savve askem hem for help. (Dan. 9:​4, 5, 19) Daniel hem olsem iumi nomoa. Hem no born witim datfala wei for brave. Bat, hem lane for garem datfala wei from hem study, prea, and trustim Jehovah. w23.08 3 ¶4; 4 ¶7

Taem iumi obeyim olketa wea garem authority, iumiseleva kasem gud samting and olketa narawan tu. Hao nao olsem? Iumi savve avoidim panisment wea pipol wea disobeyim law olketa kasem. (Rome 13:​1, 4) Taem each wan lo iumi obeyim gavman, olketa bae luksavve Olketa Jehovah’s Witness olketa gud citizen. For example, staka year bifor lo Nigeria, olketa soldia go insaed wanfala Kingdom Hall during wanfala meeting, and lukaotem pipol wea joinim protest againstim wei for peim tax. Bat officer wea in charge lo olketa soldia talem olketa for lusim Kingdom Hall. Hem sei: “Olketa Jehovah’s Witness evritaem peim tax.” So taem iu gohed obeyim law, iu help for keepim gudfala nem wea pipol blo Jehovah garem, wea maet wanday datwan bae protectim olketa nara brata and sista. w23.10 9 ¶13

For long taem finis samfala pipol blo Jehovah weitim end for kam. Lo tingting blo iumi, maet iumi tingse God delay for fulfillim olketa promis blo hem. Jehovah savve lo datwan dastawe hem story olsem lo profet Habakkuk: “Vision hia hem for taem wea God hem markem, and hem hariap go for kasem end, and bae hem no laea. Nomata sapos hem shud delay, gohed for weitim! Bikos bae hem kam tru. Bae hem no leit!” (Hab. 2:3) Waswe, datfala toktok hem for Habakkuk nomoa? Or hem for iumi distaem tu? Holy spirit muvim aposol Paul for talem toktok wea Habakkuk raetem for olketa Christian wea weitim datfala niu world. (Heb. 10:37) Tru nao, iumi sure nomata datfala promis maet luk olsem hem delay, “bae hem kam tru. Bae hem no leit!” w23.04 30 ¶16

Olketa Israelite rejectim olketa klia evidence wea pruvim Jehovah iusim Moses for representim Hem. (Num. 14:​10, 11) Staka taem olketa no acceptim dat Jehovah iusim Moses for leadim olketa. From datwan, Jehovah no allowim datfala genereson for enter lo Promis Land. (Num. 14:30) Bat samfala Israelite obeyim direction blo Jehovah. For example, Jehovah sei: “Caleb . . . gohed obeyim mi witim full heart.” (Num. 14:24) God rewardim Caleb, and even allowim hem for chusim ples wea hem laek for stap lo Promis Land. (Josh. 14:​12-14) Next genereson blo olketa Israelite tu showim gud example, taem olketa continue for followim direction blo Jehovah. Taem Joshua kamap leader blo olketa Israelite bihaen lo Moses, “for full laef blo hem olketa barava respectim hem.” (Josh. 4:14) From datwan, Jehovah blessim olketa and givim land wea hem promisim for olketa.—Josh. 21:​43, 44. w24.02 21 ¶6-7

Taem doctor chekim pulse blo iumi, hem savve faendaot hao strong nao heart blo iumi. Lo sem wei, iumi savve faendaot hao strong nao love blo iumi for God if iumi chekim hao strong nao love blo iumi for olketa brata and sista. If iumi luksavve love blo iumi for olketa brata and sista hem katdaon, diswan maet showim love blo iumi for God hem wikdaon tu. Bat taem iumi evritaem showimaot love for olketa brata and sista, datwan hem saen wea showim love blo iumi for God hem strong. Hem barava serious samting if love blo iumi for olketa brata and sista hem katdaon. Why nao olsem? Bikos datwan showim frenship blo iumi witim Jehovah hem stap lo danger. Aposol John storyim klia datwan taem hem sei: “Sapos man no lovem brata bilong hem wea hem savve lukim, hard tumas for hem lovem God wea hem no savve lukim.” (1 John 4:20) Wat nao iumi lanem? Jehovah hapi lo iumi only if iumi “lovem iumi evriwan.”—1 John 4:​7-9, 11. w23.11 8 ¶3; 9 ¶5-6

Dadi blo Jehoash dae taem hem pikinini nomoa, and Hae Priest Jehoiada lukaftarem hem and teachim hem abaotem Jehovah. Jehoash wise bikos hem lisin lo advaes blo Jehoiada. From Jehoash followim example blo Jehoiada, hem disaed for worshipim Jehovah and leadim pipol for worshipim Jehovah. Jehoash arrange tu for olketa repairim temple blo Jehovah. (2 Chron. 24:​1, 2, 4, 13, 14) If parents or narawan teachim iu for lovem Jehovah and for followim olketa standard blo hem, datwan hem barava best present wea olketa givim iu. (Provebs 2:​1, 10-12, SIPB.) Parents savve trainim iu lo staka samting. Taem iu followim advaes wea kam from Bible, parents blo iu bae hapi. Samting wea moa important, iu bae mekem God hapi and frenship blo iu witim hem bae kamap strong. (Provebs 22:6; 23:​15, 24, SIPB.) Taem iu studyim olketa gud samting wea Jehoash duim taem hem young, hem mekem iu for laek followim example blo hem. w23.09 8-9 ¶3-5

Jehovah promis for lisin lo olketa prea blo iumi. God lovem olketa wea faithful for worshipim hem so bae hem no savve ignorem prea blo olketa. (Ps. 10:17; 37:28) Bat diswan no minim bae hem givim evri samting wea iumi askem. Maet iumi need for weit go kasem niu world bifor iumi kasem samfala samting wea iumi askem lo hem. Jehovah tingim plan blo hem taem hem lisin lo olketa prea blo iumi. (Isa. 55:​8, 9) Wanfala part lo plan blo hem, hem for disfala earth fulap witim pipol wea hapi for obey and stap anda lo rul blo hem. Bat Satan sei olketa pipol bae hapi if olketa rulim olketa seleva. (Gen. 3:​1-5) For pruvim wat Satan talem hem no tru, Jehovah allowim olketa man for rulim olketa seleva. Bat, rulership blo olketa man hem kosim staka problem wea iumi kasem distaem. (Eccl. 8:9) Iumi luksavve Jehovah bae no finisim evri problem hia distaem. w23.11 21 ¶4-5

Jehovah promisim Abraham hao “staka nation” bae kasem blessing bikos lo hem. Bat, taem Abraham hem 100 years old and Sarah 90 years, tufala no garem yet pikinini wea God promisim. Lo tingting blo olketa man, maet hem hard nao for Abraham and Sarah garem wanfala pikinini. Datwan hem wanfala test for Abraham. Bat Bible sei: “Abraham garem faith and barava bilivim hem bae kamap dadi bilong pipol long plande kantri.” (Rome 4:​18, 19) And gogo, wat Abraham hope for hem kamap tru. Hem kamap dadi blo Isaac, pikinini wea hem hope for hem for long taem finis. (Rome 4:​20-22) Olsem Abraham, iumi tu savve mekem God hapi and God savve ting lo iumi olsem olketa fren blo hem wea raeteous. Hem nao wat Paul storyim taem hem sei: “Datfala toktok, ‘long tingting bilong God hem raeteous,’ hem no for Abraham nomoa bat hem for iumi tu, wea God ting long iumi olsem iumi raeteous bikos iumi biliv long hem wea hem nao mekem Lord bilong iumi Jesus for laef bak.” (Rome 4:​23, 24) Olsem Abraham, iumi tu garem faith lo Jehovah, duim olketa gud samting or waka, and barava sure hao olketa samting wea Jehovah promisim bae kamap tru. w23.12 7 ¶16-17

Taem iu feisim wanfala hard taem wea mekem iu fraet, tingim Jehovah lukim hard taem wea iu kasem and hao iu feel. For example, Jehovah savve lo nogud treatment wea olketa Israelite kasem lo Egypt and hem “minim pain wea kasem olketa” tu. (Ex. 3:7) If iu feisim wanfala hard taem wea mekem iu barava fraet, maet iu no lukim hao Jehovah helpem iu. Wat nao iu savve duim? Askem hem for helpem iu for lukim hao hem duim datwan. (2 Ki. 6:​15-17) Then tingim diswan: Hao, wanfala tok or koment lo kongregeson meeting hem strongim iu? Hao, eni pablikeson, video, or original song hem encouragem iu? Hao, eniwan talem toktok or showim scripture wea encouragem iu? Maet hem isi for iumi forgetim love wea olketa brata and sista showim lo iumi and encouragement wea iumi kasem from Bible wea helpem iumi. Bat olketa samting hia hem spesol present from Jehovah. (Isa. 65:13; Mark 10:​29, 30) Hem pruvim hao Jehovah kea for iu. (Isa. 49:​14-16) And olketa samting hia showim hem tinghae lo wei wea iu trustim hem. w24.01 4-5 ¶9-10

Just bifor Jesus go ap lo heven, hem remindim olketa disaepol abaotem assignment blo olketa for witness abaotem hem lo ‘Jerusalem, lo evri ples lo Judea and lo Samaria, and lo evri farawe ples lo earth.’ (Acts 1:8; Luke 24:​46-48) No longtaem bihaen, olketa bigman blo Jew religion arrestim aposol Peter and John and tekem tufala front lo Sanhedrin. Olketa tok strong lo olketa faithful man hia and demandim olketa for stop for preach. (Acts 4:​18, 21) Peter and John sei: “Hem saed bilong iufala sapos iufala tingse hem stret long tingting bilong God for mifala obeyim iufala and no obeyim God. Bat hard tumas for mifala no storyim olketa samting wea mifala lukim and herem.” (Acts 4:​19, 20) Taem Peter and John release, olketa disaepol prea abaotem will blo Jehovah and askem hem for helpem olketa for duim datwan. Jehovah ansarem prea hia wea olketa talem from heart.—Acts 4:31. w23.05 5 ¶11-12

Jehovah and Son blo hem bin stap tugeta for long taem winim eniwan. During staka billion year wea tufala stap tugeta lo heven, tufala barava klos and gohed strongim love blo tufala for each other. Olsem iumi readim lo text blo tuday, iumi savve lukim klia hao Jehovah lovem Jesus. Jehovah savve sei, ‘Mi hapi lo disfala man.’ Bat from hem laekem iumi for savve hao hem barava lovem Jesus, hem kolem hem “Son bilong mi wea mi lovem.” Jehovah barava hapi lo Jesus, especially from hem willing for givim laef blo hem. (Eph. 1:7) And Jesus no daotem hao Dadi blo hem lovem hem. Jesus barava feel sure lo love blo Dadi blo hem. Staka taem Jesus talem hao Dadi blo hem lovem hem.—John 3:35; 10:17; 17:24. w24.01 28 ¶8

Imaginim samwan wea iu lovem, hem talem barava nogud samting abaotem iu. Iu savve hem laea, bat samfala pipol bilivim datwan. And worse samting, olketa spredim datfala laea, and staka narawan bilivim tu. Hao nao bae iu feel? Luk olsem datfala laea bae mekem iu feel nogud, iaman? Disfala example helpem iumi for understandim feeling blo Jehovah taem wanfala spirit son blo hem lo heven spoelem reputation blo hem. Datfala son laea abaotem Jehovah lo first woman, Eve. Eve bilivim datfala laea. Datfala laea mekem first parents blo iumi for againstim Jehovah. From datwan, evri human being kasem sin and gogo olketa dae. (Gen. 3:​1-6; Rome 5:12) Evri problem wea iumi lukim lo world distaem olsem dae, war, pipol safa hem kamap bikos lo datfala laea wea Satan talem. Hao, Jehovah feel nogud bikos lo kaen laea olsem and olketa problem wea kamaot from datwan? Yes. Nomata olsem, Jehovah no gohed for kros bat Bible storyim hao hem wanfala “hapi God.”—1 Tim. 1:11. w24.02 8 ¶1-2

Hao nao iu savve followim example blo Joseph and rejectim temptation? Iu savve disaedem distaem, wat bae iu duim if eni temptation kamap. Lane for stretawe sei no lo olketa samting wea Jehovah heitim, and no even ting abaotem tu. (Ps. 97:10; 119:165) Datwan bae helpem iu for no foldaon lo eni temptation. Maet iu savve finis dat iu faendem truth and iu laek for servem Jehovah witim full heart blo iu, bat samting mekem iu for hol bak for dedicate and baptaes. Hem gud for followim example blo King David. Iu savve askem Jehovah olsem: “O God, lukluk gud lo mi, and savve lo heart blo mi. Chekim mi gud, and savve lo tingting blo mi wea mekem mi wari. Lukim sapos eni nogud wei stap lo mi, and leadim mi followim road wea no savve finis.” (Ps. 139:​23, 24) Jehovah bae blessim olketa wea “barava lukaotem hem.” Taem iu gohed waka hard for kasem goal blo iu for dedicate and baptaes, hem showim lo Jehovah iu barava lukaotem hem.—Heb. 11:6. w24.03 6 ¶13-15

Hae priest nao savve representim pipol front lo God. Jehovah appointim first hae priest blo Israel, Aaron, taem olketa dedicatem tabernacle. Bat aposol Paul storyim hao “staka man mas kamap priest for changem olketa priest wea dae.” (Heb. 7:​23-26) And from olketa no perfect, olketa hae priest hia mas offerim sakrifaes for sin blo olketa seleva. Diswan mekem olketa hae priest lo Israel barava difren from nambawan Hae Priest, Jesus Christ. Jesus Christ wea hem Hae Priest blo iumi hem “wakaman . . . bilong datfala tru tent wea Jehovah nao wakem, no man.” (Heb. 8:​1, 2) Paul explainim hao “from [Jesus] bae laef olowe, hem bae priest for olowe and no eniwan bae changem hem.” Paul sei tu hao Jesus hem “holy, hem barava no olsem olketa wea sin” and hem no olsem olketa hae priest lo Israel bikos hem no need for “mekem sakrifaes evriday” for sin blo hemseleva. w23.10 26 ¶8-9

“Skae . . . wea stap bifor” hem minim olketa gavman, wea Satan and olketa demon influencim. (Matt. 4:​8, 9; 1 John 5:19) Lo Bible, datfala toktok “earth” hem minim pipol lo earth. (Gen. 11:1; Ps. 96:1) So “earth wea stap bifor” hem minim olketa nogud pipol. Jehovah bae no impruvim nomoa datfala “skae” and “earth” wea stap distaem, bat hem bae distroem olketa. Hem bae replacim datfala skae and earth witim “wanfala niu skae and wanfala niu earth,” wea minim wanfala niu gavman and pipol lo earth wea Jehovah acceptim olketa. Jehovah bae mekem earth and olketa pipol for kamap perfect, wea minim olketa kamap niu. Olsem Isaiah storyim, Jehovah bae mekem full earth for kamap wanfala beautiful ples olsem garden blo Eden. And hem bae mekem iumi kamap niu, taem hem healim each wan lo iumi. Hem bae healim pipol wea kripol, blind, and deaf, and hem bae resurrectim tu olketa wea dae.—Isa. 25:8; 35:​1-7. w23.11 4 ¶9-10

“Bigfala trabol” bae seknomoa hem start. (Matt. 24:21) Nomata olsem, iumi savve finis datfala big trabol bae happen, no olsem olketa nara disaster wea iumi no expectim. Samting olsem 2,000 year go finis, Jesus warnim olketa follower blo hem for redi for datfala day. If iumi redi, bae hem isi for iumi deal witim datfala hard taem and for helpem olketa narawan for duim sem samting. (Luke 21:36) Iumi need for no givap mekem iumi obeyim Jehovah, and trustim hao hem bae protectim iumi. If olketa brata and sista lusim samfala or evri material samting, wat nao bae iumi duim? (Hab. 3:​17, 18) Iumi need for sorre lo olketa mekem iumi helpem olketa witim wat olketa needim. Taem olketa nation join tugeta for attakim iumi and iumi mas stay tugeta witim olketa brata and sista, wat nao bae iumi duim? (Ezek. 38:​10-12) Iumi need for garem strongfala love for olketa mekem iumi savve deal witim datfala hard taem. w23.07 2 ¶2-3

Olketa marit couple savve lane from example blo Aquila and Priscilla. Staka Christian lo bifor barava tinghae lo tufala. (Rome 16:​3, 4) Tufala savve waka tugeta, preach tugeta, and helpem olketa narawan tugeta. (Acts 18:​2, 3, 24-26) And taem Bible storyim Aquila and Priscilla, hem mas evritaem talem nem blo tufala tugeta. Hao nao olketa couple savve followim example blo tufala? Ting abaotem olketa samting wea iu and partner blo iu need for duim. Waswe, iutufala savve duim samfala waka tugeta winim wei for duim seleva? For example, Aquila and Priscilla preach tugeta. Waswe sapos iutufala markem taem for duim sem samting? Aquila and Priscilla waka tugeta tu. Maet iutufala no waka lo sem ples, bat hao sapos iutufala waka tugeta lo haos? (Eccl. 4:9) Taem iutufala duim tugeta wanfala waka, bae iutufala feel olsem iutufala lo wan team and bae iutufala garem chance for story tugeta. w23.05 22-23 ¶10-12

Iumi evriwan savve feel fraet samfala taem. For example, taem King Saul lukaotem David for killim hem dae, David disaed for ranawe lo Gath, wanfala city blo Philistine. Then nomoa King Achish blo Gath faendaot hao David nao datfala maeti warrior wea olketa sing abaotem hem killim dae “ten thousand” blo olketa Philistine. Datwan mekem David ‘fraet tumas.’ (1 Sam. 21:​10-12) Hem warim wat nao bae King Achish duim lo hem. Wat nao helpem David for no fraet? Lo Psalm 56, David storyim feeling blo hem taem hem lo Gath. Lo datfala Psalm, David explainim klia why hem fraet, and wat helpem hem for no fraet. Taem David fraet, hem trustim Jehovah. (Ps. 56:​1-3, 11) David garem gud reason for trustim Jehovah. Witim help blo Jehovah, David plan for duim samting wea barava strange. Hem pretend for mentol and plan hia hem waka! Achish no laek for killim dae David, bat laekem hem for mas lusim datfala ples. So David escape nao.—1 Sam. 21:13–22:1. w24.01 2 ¶1-3

Hu nao olketa wea text for tuday storyim? Hem olketa anointed wan wea resurrect! So taem last wan lo olketa anointed wan go ap lo heven klosap lo end blo datfala big trabol, wanfala lo olketa first assignment blo olketa hem for faet. Afta olketa go ap lo heven, olketa bae joinim Christ and olketa holy angel for faet lo datfala last war againstim olketa enemy blo God. Tingim diswan! Samfala anointed Christian wea stap yet lo earth olketa olo, and even no strong nao. Bat taem olketa resurrect and go lo heven, olketa bae strong and kamap olketa spirit wea no savve dae, and kasem assignment for joinim Jesus Christ, wea hem Warrior-King blo olketa. Afta olketa faet lo war blo Armageddon, olketa bae waka witim Jesus for helpem olketa man for kamap perfect. Iumi sure taem olketa lo heven, olketa bae fit for helpem olketa brata and sista blo olketa lo earth witim staka samting moa, winim taem wea olketa no perfect and stap yet lo earth! w24.02 6-7 ¶15-16

Nomata samfala redi finis for dedicate and baptaes, olketa still hol bak. Olketa maet ting, ‘Hao sapos bihaen mi baptaes mi duim wanfala big sin and mi disfellowship?’ If iu feel olsem, trustim dat Jehovah bae provaedem help wea iu needim for duim samting wea mekem hem hapi. (Col. 1:10) Jehovah bae givim iu tu strong for duim samting wea hem stret. Hao Jehovah strongim olketa narawan, hem pruvim dat hem bae strongim iu tu. (1 Cor. 10:13) Datwan hem wanfala reason why staka insaed kongregeson no disfellowship. Jehovah helpem pipol blo hem for gohed faithful. Iumi evriwan wea no perfect savve laek for duim samting wea no stret. (Jas. 1:14) Bat, iuseleva nao savve disaed if iu bae duim stret samting or nomoa. Tru samting nao, iuseleva garem kontrol lo wat iu savve duim lo laef blo iu. Nomata samfala maet talem opposite samting, iu savve lane for kontrolem feeling blo iu. w24.03 5 ¶11-12