June

Jehovah blessim olketa Christian lo first century taem olketa trae for change fitim situation wea olketa feisim. Olketa kasem persecution, and samfala taem olketa no expectim datwan. Tingim samting wea happen lo Barnabas and aposol Paul taem tufala preach lo Lystra. Firstaem pipol welkamim olketa. Bat bihaen, samfala wea againstim Paul mekem pipol for againstim hem and sutim hem lo ston and leavim hem for dae. (Acts 14:19) Nomata olsem, Barnabas and Paul gohed preach lo olketa nara ples. Wat nao kamaot from datwan? Staka pipol nao “kamap disaepol,” and toktok and example blo tufala strongim olketa brata and sista. (Acts 14:​21, 22) From Barnabas and Paul no givap for preach nomata tufala kasem persecution, staka nao kasem gud samting. Taem iumi no givap lo waka wea Jehovah askem iumi for duim, bae iumi kasem blessing. w23.04 16-17 ¶13-14

King David feisim staka dangerous enemy lo laef blo hem, and staka taem hem prea lo Jehovah for helpem hem. David sure hao Jehovah herem and ansarem olketa prea blo hem. Wat Bible storyim mekem iumi sure hao Jehovah bae duim sem samting for iumi. Olketa example wea iumi storyim lo disfala article mekem iumi sure hao Jehovah savve givim wisdom and paoa wea iumi needim for deal witim olketa hard taem wea iumi feisim. Hem maet iusim olketa brata and sista, or even iusim olketa wea no worshipim hem for helpem iumi lo samfala wei. Nomata maet Jehovah no evritaem ansarem olketa prea blo iumi lo wei wea iumi expectim, iumi savve hem bae ansarem olketa prea blo iumi. Hem bae provaedem wanem iumi needim and lo taem wea iumi barava needim. So gohed prea lo Jehovah and garem faith hao hem bae lukaftarem iumi distaem, and lo niu world, hem bae “givim lo evri samting wea laef, evri samting wea olketa laekem.”—Ps. 145:16. w23.05 8 ¶4; 13 ¶17-18

Hem gud for tingim gud samting wea bae kamap taem iu kasem goal blo iu. Wanem nao samfala gud samting wea iu savve tingim? Sapos goal blo iu hem for readim Bible or prea, ting abaotem hao datwan bae strongim frenship blo iu witim Jehovah. (Ps. 145:​18, 19) Sapos goal blo iu hem for impruvim wanfala wei blo iu, tingim hao datwan bae helpem iu for fren gud witim olketa narawan. (Col. 3:14) Hao sapos iu mekem wanfala list lo olketa reason why iu laek for kasem goal blo iu? Evritaem chekim list hia. And tu, spendem taem witim olketa wea bae encouragem iu for kasem goal. (Prov. 13:20) Samfala day iumi savve feel wikdaon for kasem goal blo iumi. Waswe, datwan minim hard for iumi kasem goal blo iumi nao? Nomoa. Iumi savve waka hard for kasem goal blo iumi nomata maet iumi no feel laek for duim datwan. Diswan maet minim iumi need for forcem iumiseleva, bat gud samting bae kamaot from datwan. w23.05 27-28 ¶5-8

From iumi luksavve iumi mas acceptim eni responsibility for eni disison wea iumi mekem, datwan savve helpem iumi for confessim sin blo iumi, stretem datwan, and no duim moa datfala mistek. Taem iumi duim olsem, iumi savve gohed ran lo reis for laef. If iu kasem nogud samting from wanfala bad disison, acceptim datfala situation. No weistim taem and energy blo iu for trae pruvim why nao iu stret, or blamem iuseleva or for blamem olketa narawan. Bat luksavve lo mistek blo iu and duim best for deal witim situation wea iu insaed. If iu feel guilty abaotem wanfala sin wea iu duim, hambol and prea lo Jehovah, talem mistek blo iu, and askem hem for forgivim iu. (Ps. 25:11; 51:​3, 4) Apologize lo olketa wea iu mekem olketa feel nogud, and if hem samting wea olketa elder need for savve, askem help from olketa. (Jas. 5:​14, 15) Lane from olketa mistek blo iu, and trae for no duim moa. Taem iu duim olsem, iu savve sure Jehovah bae showimaot mercy lo iu and provaedem help wea iu needim.—Ps. 103:​8-13. w23.08 28-29 ¶8-9

Jehoiada helpem King Jehoash for duim stret samting. From datwan, datfala young king laek for mekem Jehovah hapi. Bat bihaen Jehoiada dae, Jehoash lisin lo olketa prince wea kamap apostate. (2 Chron. 24:​4, 17, 18) Jehovah barava feel nogud, so hem “gohed for sendem olketa profet blo hem for helpem olketa kam bak lo hem . . . , bat olketa no laek for lisin.” Olketa les for lisin tu lo Zechariah son blo Jehoiada, wea hem profet and priest blo Jehovah and hem kasin blo Jehoash. Tru nao, King Jehoash hem killim dae Zechariah. (2 Chron. 22:11; 24:​19-22) Jehoash no gohed garem stretfala wei for fraet lo Jehovah. Jehovah talem finis: “Olketa wea nating obeyim mi, bae mi les lo olketa.” (1 Sam. 2:30) Bihaen, wanfala smol army blo Syria winim “bigfala army” blo Jehoash, and Jehoash “garekil nogud.” (2 Chron. 24:​24, 25) Olketa servant blo Jehoash killim hem dae bikos hem killim dae Zechariah. w23.06 18-19 ¶16-17

Aposol Paul hem stap lelebet longtaem lo Ephesus. Hem preach and teachim gud nius lo there. (Acts 19:​1, 8-10; 20:​20, 21) Hem lovem tumas olketa brata and sista and laek for helpem olketa for gohed faithful lo Jehovah. Bifor olketa kamap Christian, olketa lo Ephesus wea Paul raet for olketa, bilivim olketa idea blo false religion and spiritism. Pipol lo Ephesus garem barava nogud wei and olketa nating shame lo wat olketa duim. Staka taem olketa talem dirty toktok abaotem sex lo olketa theater show and even lo olketa religious celebration. (Eph. 5:3) Wei blo staka lo Ephesus hem ova tumas gogo olketa “no savve long wanem hem stret and wanem hem no stret.” Paul iusim wanfala Greek word for diswan wea minim olketa “no savve feelim eni pain nao.” (Eph. 4:​17-19) So taem olketa lo Ephesus no lanem yet wat hem stret and no stret, konsens blo olketa no pokem olketa. Dastawe Paul sei olketa stap lo darkness and “no savve minim samting and olketa farawe from datfala laef wea God promisim.” Bat samfala lo Ephesus no laek for gohed stap lo darkness. w24.03 20 ¶2, 4; 21 ¶5-6

For Gideon duim assignment blo hem, hem need for waka hard. Taem olketa Midianite ranawe lo datfala naet wea olketa faet, Gideon ronem olketa start from Jezreel Valley olowe go kasem Jordan. (Judg. 7:22) Waswe, Gideon stop lo Jordan nao? Nomoa! Nomata hem taed, hem and 300 soldia blo hem akrosim Jordan River and gohed for ronem olketa. Gogo olketa katsap lo olketa Midianite and winim olketa. (Judg. 8:​4-12) Gideon trustim hao Jehovah bae strongim hem, and hem nao wat Jehovah duim. (Judg. 6:​14, 34) Wantaem, Gideon and olketa soldia blo hem ran bihaen tufala Midianite king nomata luk olsem tufala raedem olketa camel. (Judg. 8:​12, 21) Nomata olsem, from God helpem olketa, olketa win. Olketa elder tu savve trustim Jehovah wea hem “no savve taed or kamap wik.” Jehovah bae givim strong wea olketa needim.—Isa. 40:​28, 29. w23.06 6-7 ¶14, 16

Iumi savve garem heart wea faithful nomata wanem hard taem nao iumi kasem. So trustim Jehovah. Tingim hao Barak winim olketa enemy bikos hem trustim direction blo Jehovah. Nomata pipol lo Israel no garem eni shield or spia, Jehovah talem Barak for go faetem datfala Canaanite army wea garem evri weapon for faet, wea Sisera komanda lo hem. (Judg. 5:8) Profet Deborah talem Barak for go daon lo ples wea level for faetem Sisera and 900 chariot blo hem. Nomata Barak savve bae hem hard tumas for faet againstim olketa fast chariot lo level ples olsem, hem gohed for obey. Taem olketa soldia go daon from Maunt Tabor, Jehovah mekem hevi rain for foldaon. Olketa chariot blo Sisera stuck insaed mud, and Jehovah helpem Barak for win. (Judg. 4:​1-7, 10, 13-16) So Jehovah bae helpem iumi tu for win, if iumi trustim hem and direction wea iumi kasem from organization blo hem. w23.07 19 ¶17-18

Patient hem important bikos hem sevem laef blo iumi. Olsem olketa faithful servant bifor, iumi tu need for patient and weit for God fulfillim olketa promis blo hem. (Heb. 6:​11, 12) Bible comparem situation blo iumi witim wanfala farmer. (Jas. 5:​7, 8) Wanfala farmer waka hard for plantim and watarem olketa crops blo hem, bat hem no savve wat taem bae olketa grow. So hem mas patient and weit, and trustim dat hem bae harvestim crops blo hem. Olsem datfala farmer, iumi tu gohed busy lo olketa spiritual activity nomata iumi “no savve long wanem taem nao Lord bilong [iumi] bae kam.” (Matt. 24:42) Iumi patient for weit and trustim hao lo taem wea Jehovah markem bae hem fulfillim evri promis blo hem. If iumi no patient, maet gogo iumi taed for weit and start for drift from truth. And tu, maet iumi start for aftarem nomoa olketa samting wea mekem iumi hapi distaem. Bat if iumi patient, bae iumi no givap go kasem end and bae iumi sev.—Mic. 7:7. w23.08 22 ¶7

Taem iumi comparem disfala profesi lo Daniel 2:​41-43 witim olketa nara profesi lo buk blo Daniel and Revelation, iumi luksavve tufala foot hia representim England and America wea waka tugeta, and wea hem nao world paoa distaem. Daniel storyim hao “part blo [world paoa] hia bae strong and part blo hem bae wik tu.” Why nao nara part hem wik? Bikos ordinary pipol wea piksarem datfala soft clay, olketa nao mekem paoa blo hem wea strong olsem iron for wik. Iumi lanem olketa important truth from datfala image wea Daniel describem. First wan, England-America World Paoa showim hem garem bigfala paoa lo samfala samting. For example, datfala world paoa nao tekem lead for winim World War I and World War II. Nomata olsem, disfala world paoa hem wik finis and bae gohed for wik, bikos olketa citizen blo hemseleva faet againstim each other and gavman. Second wan, England-America nao hem last world paoa for rul bifor Kingdom blo God finisim evri kingdom blo man. w23.08 10-11 ¶12-13

Samfala taem, David hem wari bikos lo olketa problem and hard taem wea hem feisim. (Ps. 18:​4, 5) Bat from Jehovah lovem and kea for David, datwan strongim hem. Jehovah leadim fren blo hem David wea taed tumas lo “ples wea garem staka grass” and “for rest lo ples wea garem wata.” From datwan, David hem kasem bak strong blo hem and gohed hapi for servem Jehovah. (Ps. 18:​28-32; 23:2) Distaem tu, bikos lo loyal love wea Jehovah showim nao hem mekem iumi fit for gohed faithful taem iumi kasem olketa hard taem. (Lam. 3:22; Col. 1:11) Staka taem laef blo David stap lo danger, and hem garem staka paoaful enemy. Bat from Jehovah lovem David, hem feel sef and kasem protection. David luksavve Jehovah stap witim hem lo evri situation, and datwan strongim hem. So hem sing olsem: “[Jehovah] rescuem mi from evri samting wea mi fraetem.” (Ps. 34:4) Nomata samfala taem David barava fraet, hem ovakamim datwan bikos hem savve Jehovah lovem hem. w24.01 30 ¶15-17

Lane from bad disison wea Jehoash mekem. Bihaen Hae Priest Jehoiada dae, Jehoash chusim olketa bad frens. (2 Chron. 24:​17, 18) Hem disaed for lisin lo advaes blo olketa leader blo Judah wea no lovem Jehovah. Maet bae iu agree hao Jehoash shud avoidim olketa nogud fren hia. Bat, hem lisin nao lo nogud advaes blo olketa. And tu, taem kasin blo Jehoash, Zechariah, laek for stretem hem, Jehoash givim order for olketa killim hem dae. (2 Chron. 24:​20, 21; Matt. 23:35) Datwan hem karangge samting for duim! Firstaem, Jehoash hem wanfala faithful king, bat hem kamap apostate and killim man dae. Gogo, olketa servant blo hemseleva killim hem dae. (2 Chron. 24:​22-25) Laef blo Jehoash bae no olsem, if hem gohed for lisin lo Jehovah and olketa wea lovem Jehovah! w23.09 9 ¶6

Jesus luksavve dat aposol Peter bae gohed faithful. So Jesus talem Peter “iu no fraet.” Wei wea Jesus trustim Peter hem changem laef blo Peter. Bihaen, Peter and brata blo hem Andrew disaed for lusim fishing bisnis blo olketa and kamap full taem follower blo Messiah, and tufala kasem staka blessing. (Mark 1:​16-18) Peter garem staka naes experience taem hem followim Christ. Hem lukim Jesus healim olketa wea sik, raosem olketa demon, and resurrectim olketa wea dae. (Matt. 8:​14-17; Mark 5:​37, 41, 42) Peter lukim tu vision abaotem glory blo Jesus taem hem bae rul lo Kingdom, and datwan barava strongim hem. (Mark 9:​1-8; 2 Pet. 1:​16-18) Hem bae no lukim olketa samting hia if hem no followim Jesus. Masbi Peter hapi tumas from hem lo letem olketa negative feeling wea hem garem for winim hem and hem no miss aot lo olketa blessing hia! w23.09 21 ¶4-5

Lo first leta blo aposol Peter, hem iusim disfala toktok “barava lovem.” Kaen love olsem savve helpem iumi for “evritaem willing for forgivim narawan,” and no samfala taem nomoa. (1 Pet. 4:8) Maet Peter tingim bak leson abaotem forgiveness wea hem lanem from Jesus samfala year bifor. Datfala taem, Peter tingse hem barava kaen taem hem sei bae hem forgivim brata blo hem “sevenfala taem.” Bat Jesus teachim Peter and iumi tu, dat iumi shud forgive go kasem “seventi-seven taem,” wea minim forgiveness hem no garem eni limit. (Matt. 18:21) If hem no isi for iu followim datfala kaonsel, no discourage! Iumi evriwan wea worshipim Jehovah no perfect, samfala taem hem no isi for forgivim narawan. Important samting for iu duim distaem, hem for traem best for forgive and mek peace witim brata blo iu. w23.09 29 ¶12

Taem Jonah insaed bele blo datfala fish, hem repent and sure Jehovah bae lisin lo prea blo hem and Jehovah bae helpem hem. Gogo Jonah kasem bak drae land, and hem redi for acceptim and duim assignment blo hem. (Jonah 2:10–3:4) Taem iu kasem hard taem, waswe, iu wari tumas gogo iu no savve storyim klia feeling blo iu lo prea? Or iu feel taed tumas for study? Tingim, Jehovah savve gud lo situation blo iu. So nomata iu talem wanfala simpol prea, iu savve sure hem bae givim wat iu barava needim. (Eph. 3:20) If hem hard for iu read and study bikos iu sik, taed, or feel nogud tumas, iu savve lisin lo audio recording blo Bible or eni pablikeson blo iumi. Iu savve lisin tu lo wanfala song blo iumi or watchim eni video lo jw.org. Jehovah laek for strongim iu and hem bae duim datwan, taem iu prea and luk lo Bible and olketa nara samting wea hem provaedem for lukim hao Jehovah ansarem olketa prea blo iu. w23.10 13 ¶6; 14 ¶9

Hao olketa wakem insaed tabernacle and datfala temple wea olketa buildim lo Jerusalem hem barava klosap semsem. Tabernacle and temple hia garem tufala rum insaed, wea hem nao “Holy Rum” and “Most Holy Rum,” and wanfala curtain divaedem tufala rum hia. (Heb. 9:​2-5; Ex. 26:​31-33) Insaed lo Holy Rum, hem garem golden lampstand, altar for bonem incense, and tebol for showbred. Only olketa wea kasem “anointing . . . for kamap priest” allowed for go insaed lo Holy Rum for duim holy waka blo olketa. (Num. 3:​3, 7, 10) Datfala Most Holy Rum garem ark blo covenant wea representim hao Jehovah stap witim olketa. (Ex. 25:​21, 22) Evri year lo Atonement Day, only hae priest nomoa savve go insaed lo Most Holy Rum. (Lev. 16:​2, 17) Hem go insaed lo datfala rum witim blood blo olketa animal sakrifaes for offerim for olketa sin blo hemseleva and for full nation. Gogo, Jehovah showimaot klia wat nao olketa samting wea stap insaed tabernacle hem representim.—Heb. 9:​6,7. w23.10 27 ¶12

Staka taem, iumi savve lukim hao Bible sei for iumi mas “lovem iumi evriwan.” (John 15:12; Rome 13:8; 1 Thess. 4:9; 1 Pet. 1:22; 1 John 4:11) Love hem feeling insaed lo heart blo iumi, wea no eniwan savve lukim. So hao nao olketa narawan bae luksavve iumi lovem olketa? Hem bae showaot lo toktok and wat iumi duim. Staka wei stap for iumi showimaot love for olketa brata and sista. Diswan hem samfala example: “Talem tru samting lo narawan.” (Zech. 8:16) “Stap gud witim narawan.” (Mark 9:50) Iumi mas willing for “showimaot respect long narawan.” (Rome 12:10) Iumi mas “acceptim narawan.” (Rome 15:7) “Evritaem forgivim [narawan].” (Col. 3:13) “Gohed helpem narawan wea kasem hard taem.” (Gal. 6:2) “Gohed . . . comfortim iufala evriwan.” (1 Thess. 4:18) “Gohed . . . strongim narawan.” (1 Thess. 5:11) And “prea for olketa narawan.”—Jas. 5:16. w23.11 9 ¶7-8

Evriday, iumi needim strong faith for helpem iumi mekem olketa gud disison. For example, iumi need for disaedem hu for associate witim, entertainment, education, marit, pikinini, and waka for selen. Hem gud for tingim diswan: ‘Waswe, samting mi chusim showimaot dat mi luksavve disfala world klosap for finis and God bae changem witim wanfala niu world? Or waswe, samting mi chusim showimaot mi followim tingting blo pipol wea no garem eni hope?’ (Matt. 6:​19, 20; Luke 12:​16-21) Iumi bae mekem olketa gud disison if iumi garem strong faith dat niu world hem klosap for kam. Iumi need for garem strong faith tu for helpem iumi deal witim olketa hard taem. Iumi maet feisim persecution, kasem serious sik, or olketa nara samting wea mekem iumi discourage. Firstaem, maet iumi strong for deal witim datfala hard taem. Bat if datfala hard taem gohed for longtaem, iumi bae needim strong faith for deal witim mekem iumi no givap and gohed hapi for servem Jehovah.—1 Pet. 1:​6, 7. w23.04 27 ¶4-5

Jehovah laekem iumi for duim samting followim prea blo iumi. For example, maet wanfala brata askem Jehovah for helpem hem for tekem taem off from waka, mekem hem attendim convention. Hao nao maet Jehovah ansarem datfala prea? Hem maet helpem datfala brata for no fraet for go askem boss blo hem. Bat datfala brata need for go lukim boss and ask for tekem taem off. Hem maet need for go ask staka taem. Maet hem even askem nara wakaman for tufala exchange, or ask for tekem unpaid leave. Jehovah laekem iumi for prea staka taem abaotem wat hem important lo iumi. Jesus showimaot samfala samting wea iumi ask for hem bae iumi no kasem stretawe. (Luke 11:9) So no givap, bat gohed prea lo Jehovah from heart. (Luke 18:​1-7) Taem iumi duim olsem, iumi showim lo Jehovah hao datwan hem important lo iumi. And iumi showim tu dat iumi garem faith lo hao hem savve helpem iumi. w23.11 22 ¶10-11

Jehovah promisim fren blo hem Abraham dat bae hem garem wanfala pikinini and evri nation lo earth bae kasem blessing bikos lo hem. (Gen. 15:5; 22:18) From Abraham garem strong faith lo God, hem trustim hao datfala promis bae kamap tru. Bat, taem Abraham hem100 years old and waef blo hem 90 years, datfala faithful couple no garem yet eni son. (Gen. 21:​1-7) Bat Bible sei: “Abraham garem faith and barava bilivim hem bae kamap dadi bilong pipol long plande kantri, nomata luk olsem diswan hem hard tumas. Diswan hem bikos hem bilivim disfala toktok.” (Rome 4:18) Gogo, wat Abraham hope for hem kamap tru. Hem kamap dadi blo Isaac, son wea hem hope for hem. Why nao Abraham trustim Jehovah bae fulfillim promis blo hem? Bikos Abraham fren klos witim Jehovah, hem “barava bilivim God savve duim samting wea hem promisim.” (Rome 4:21) Jehovah hapi lo Abraham and ting lo Abraham olsem hem raeteous bikos lo faith blo hem.—Jas. 2:23. w23.12 8 ¶1-2

Wanfala young brata wea kamap samwan wea olketa narawan trustim, hem duim gud evri responsibility blo hem. Tingim example blo Jesus. Hem waka hard and hem responsible. Hem duim evri assignment wea Jehovah givim lo hem, nomata samfala taem hem no isi. Hem lovem pipol, especially olketa disaepol blo hem and hem willing for dae for olketa. (John 13:1) So olsem Jesus, waka hard for duim eni assignment wea iu kasem. If iu no savve hao for duim, mas hambol and ask for help from olketa mature brata. Trae for duim gud assignment wea iu kasem. (Rome 12:11) And completim gud assignment blo iu, “duim datwan olsem iufala waka for Jehovah and no for olketa man.” (Col. 3:23) Hem tru, iu no perfect, so mas hambol and ask for help taem iu mekem eni mistek lo assignment blo iu.—Prov. 11:2. w23.12 26 ¶8

Hem hapi samting taem iumi baptaes and kamap part lo famili blo Jehovah. Hem privilege for garem klos wei for fren witim Jehovah. Iumi agree witim toktok blo David wea raetem disfala psalm, wea sei: “Man wea iu [Jehovah] chusim and tekem kam klosap for stap lo olketa courtyard blo iu hem hapi.” (Ps. 65:4) Jehovah no letem eniwan nomoa for kam insaed courtyard blo hem. Jehovah chusim olketa wea duim samting for showimaot olketa laek for fren klos witim hem. (Jas. 4:8) Taem iu dedicate lo Jehovah and baptaes, iu savve sure hao bihaen iu baptaes, Jehovah bae gohed ‘pourim blessing lo iu go kasem taem iu bae no short lo eni samting.’ (Mal. 3:10; Jer. 17:8) Baptism hem start lo service blo iu for Jehovah. Iu bae laek for duim best for keepim dedication vow blo iu, nomata iu kasem olketa temptation or feisim olketa hard taem wea testim faith blo iu. (Eccl. 5:​4, 5) From iu disaepol blo Jesus, iu bae followim example blo hem and barava followim gud olketa komand blo hem.—Matt. 28:​19, 20; 1 Pet. 2:21. w24.03 8 ¶1-3

Hao sapos iu and partner no hapi for spendem taem tugeta? Sapos olsem, wat nao iutufala savve duim? Tingim example abaotem fire. Taem iu startim fire, hem no bone big lo semtaem. Iu bae need for isisi putim olketa big pis fire wood insaed. Lo sem wei tu, hao sapos iutufala start for spendem moa taem tugeta each day? Duim samting tugeta wea iutufala evriwan enjoyim. (Jas. 3:18) Taem iutufala isisi duim samting tugeta, bae love blo iutufala start for strong bak moa. Respect hem barava important insaed marit. Hem olsem air wea fire needim for gohed bone big. Sapos no eni air, bae kwiktaem nomoa fire dae nao. Lo sem wei tu, if wanfala couple no showimaot respect lo each other, bae love blo tufala kwiktaem cold daon. Bat couple wea duim best for showimaot respect lo each other, tufala waka hard for gohed strongim love blo tufala. Tingim diswan, maet iuseleva tingse iu showimaot respect lo partner blo iu, bat samting wea important hem for partner blo iu savve dat iu respectim hem. w23.05 22 ¶9; 23-24 ¶14-15

Bible storyim samfala faithful man bifor wea sei samfala taem olketa barava fraet bikos lo olketa enemy or from pressure wea olketa kasem. (Ps. 18:4; 55:​1, 5) Iumi tu maet kasem opposition lo skul, waka, from famili, or from gavman. Maet iumi fraet nogud iumi dae bikos iumi sik. Lo taem olsem, maet iumi feel olsem wanfala smol pikinini wea no savve duim eni samting. Hao nao Jehovah savve helpem iumi lo taem olsem? Hem comfortim and helpem iumi. So evritaem hem gud for spendem taem witim Jehovah lo wei for prea and readim Bible. (Ps. 77:​1, 12-14) If iu garem disfala habit, first samting wea iu savve duim taem iu stress, hem for luk lo Dadi blo iu lo heven for helpem iu. Storyim lo Jehovah wat iu fraetem and wari abaotem. Then lisin lo hem taem iu readim Bible and bae iu lukim hao hem comfortim iu.—Ps. 119:28. w24.01 24-25 ¶14-16

Hem important for man garem feeling for barava laek kasem spiritual goal blo hem. Datwan nao savve muvim man for duim best blo hem. And if iumi barava laek for kasem goal blo iumi, bae iumi duim samting for kasem datwan. So wat nao iu savve duim for strongim feeling for laek kasem goal blo iu? Prea for strongim feeling for barava laek kasem goal. Jehovah iusim holy spirit for helpem iumi garem feeling for laek kasem goal. Samfala taem iumi markem goal bikos iumi savve hem nao wat iumi shud duim, and datwan hem gud. Bat maet iumi no really laek for kasem datfala goal. Ting raonem wanem Jehovah duim for iu finis. (Ps. 143:5) Aposol Paul ting raonem hao Jehovah barava kaen lo hem, and datwan muvim hem for waka hard for Jehovah. (1 Cor. 15:​9, 10; 1 Tim. 1:​12-14) Lo sem wei tu, taem iu gohed ting raonem wanem Jehovah duim for iu, bae datwan strongim go moa feeling for laek kasem goal blo iu.—Ps. 116:12. w23.05 27 ¶3-5

Iumi mekem Dadi blo iumi lo heven hapi taem iumi praisem nem blo hem. (Ps. 119:108) Hao, diswan minim olmaeti God hem olsem olketa imperfect human wea needim narawan for praisem olketa from olketa needim encouragement? Nomoa. Taem iumi praisem Dadi blo iumi lo heven, iumi help for pruvim nara laea wea Satan talem abaotem iumi wea no tru. Satan sei no eniwan bae loyal for defendim nem blo God, and no eniwan bae faithful taem hem kasem test. Hem sei iumi evriwan bae stop for worshipim God if iumi tingse bae iumi benefit from datwan. (Job 1:​9-11; 2:4) Bat Job gohed faithful lo God and pruvim Satan hem laea. Waswe lo iu? Each wan lo iumi savve chus for defendim nem blo Dadi blo iumi and mekem hem hapi taem iumi gohed faithful lo hem. (Prov. 27:11) Hem barava spesol privilege for duim datwan. w24.02 8-9 ¶3-5

Staka year bihaen taem wea Moses and Joshua laef, Jehovah appointim olketa judge for leadim pipol blo hem. Then lo taem blo olketa king, Jehovah appointim olketa profet for leadim pipol blo hem. Olketa faithful king followim advaes blo olketa profet. For example, King David hambol for acceptim kaonsel from profet Nathan. (2 Sam. 12:​7, 13; 1 Chron. 17:​3, 4) King Jehoshaphat followim direction wea hem kasem from profet Jahaziel and encouragem pipol blo Judah for ‘garem faith lo olketa profet blo God.’ (2 Chron. 20:​14, 15) Taem King Hezekiah barava wari tumas, hem go askem help from profet Isaiah. (Isa. 37:​1-6) Each taem wea olketa king obeyim direction blo Jehovah, Jehovah blessim olketa and protectim datfala nation. (2 Chron. 20:​29, 30; 32:22) Evriwan shud lukim klia nomoa dat Jehovah iusim olketa profet for leadim pipol blo hem. w24.02 21 ¶8

Satan laekem iumi for associate witim pipol wea bae mekem hem isi for iumi no followim olketa standard blo Jehovah. Hem gud for tingim hao wei for associate hem no minim for spendem taem witim pipol wea iumi meetim in person nomoa. Bat hem minim tu olketa lo social media. Iumi mas faet againstim tingting blo world wea acceptim nomoa olketa nogud wei. Iumi luksavve datwan no stret. (Eph. 4:​19, 20) Hem gud for askem iumiseleva: ‘Waswe, mi avoidim olketa unnecessary association witim olketa workmate, classmate, or olketa narawan wea no respectim olketa raeteous standard blo Jehovah? Waswe, mi no fraet for followim standard blo Jehovah nomata samfala sei mi ova tumas?’ Olsem 2 Timothy 2:​20-22 storyim, insaed kongregeson tu iumi need for careful taem iumi chusim hu nao for associate witim. Iumi need for tingim hao samfala maet no helpem iumi for gohed faithful for servem Jehovah. w24.03 22-23 ¶11-12

Hao, enitaem iu trae for imaginim lukluk blo Jehovah? Iumi no savve lukim Jehovah, bat Bible describem lukluk blo hem. Bible kolem Jehovah olsem “wanfala sun and shield,” and “wanfala fire wea savve bonem evri samting.” (Ps. 84:11; Heb. 12:29) Lo wanfala vision, Ezekiel describem hao Jehovah hem luk olsem wanfala metal wea shaen for gud, sidaon lo wanfala sapphire throne, and wanfala rainbow shaen raonem hem. (Ezek. 1:​26-28) From iumi no savve lukim Jehovah, maet iumi faendem hem no isi for bilivim hem lovem iumi. Or maet hem hard for bilivim dat Jehovah bae lovem iumi bikos lo olketa nogud samting wea happen lo iumi bifor. Jehovah understandim why iumi savve feel olsem and why iumi tingse hem hard for iumi fren klos witim hem. For helpem iumi, hem storyim olketa naes quality blo hem insaed Bible. Wanfala best word for describem Jehovah hem love. Bible sei: “God hem love.” (1 John 4:8) Evri samting wea Jehovah duim, hem bikos lo love. Love blo God hem barava big and strong tumas, dastawe hem showim datwan lo olketa wea no lovem hem tu.—Matt. 5:​44, 45. w24.01 26 ¶1-3

Jehovah appointim Moses for leadim olketa Israelite for go aot from Egypt and hem klia evidence wea pruvim Jehovah iusim wanfala cloud lo daytaem for leadim olketa and lo naet cloud hia luk olsem fire mekem olketa savve followim laet blo hem. (Ex. 13:21) Moses followim datfala cloud wea leadim hem and olketa Israelite go lo Red Sea. Bat taem army blo Egypt ran bihaenem olketa, olketa Israelite barava panic bikos olketa tingse datfala army bae killim olketa dae. Bat Moses no mekem mistek. Jehovah nao iusim hem for leadim pipol blo hem go lo there. (Ex. 14:2) Then God sevem olketa lo barava spesol wei wea olketa no expectim. (Ex. 14:​26-28) For 40 years bihaen datwan, Moses gohed depend lo datfala cloud for leadim pipol blo God lo wilderness. (Ex. 33:​7, 9, 10) Jehovah story kam lo datfala cloud for Moses, then Moses storyim evri instruction blo Jehovah lo olketa pipol. Olketa Israelite savve lukim olketa klia evidence wea pruvim Jehovah iusim Moses for leadim olketa. w24.02 21 ¶4-5