Iumi Needim Organization Bilong Jehovah
WASWE, enitaem iu herem samwan sei, “Mi biliv long God bat no long religion organization”? Samfala man wea bifor olketa strong for gogo long church bat bihaen olketa lusim trust from religion bilong olketa fail for provaedem spiritual need bilong olketa, talemaot semkaen tingting. Nomata olketa no hapi witim olketa religion organization, planti pipol still want for worshipim God. Bat, olketa tingse hem moabeta for worshipim hem long wei bilong olketa seleva winim wei for join witim wanfala church or organization.
Wanem nao Bible talem? Waswe, God wantem olketa Christian for joinim wanfala organization?
Olketa Firstfala Christian Kasem Gud Samting From Wei for Organize
Long Pentecost 33 C.E., Jehovah pourim holy spirit bilong hem, no antap long tu-thri man wea biliv, bat antap long olketa man and woman wea kam tugeta “long sem ples,” insaed long wanfala rum antap long taon bilong Jerusalem. (Acts 2:1) Long datfala taem, Christian kongregeson, wea kamap wanfala bigfala organization, hem start. Diswan hem kamap wanfala really blessing for olketa firstfala disaepol hia. Why nao olsem? Wan samting hem from olketa kasem wanfala important assignment—hem nao for gogo olketa preachim gud nius bilong kingdom “evriwea long earth.” (Matthew 24:14) Insaed kongregeson olketa niu disaepol savve lanem hao for duim preaching waka from nara man wea biliv wea garem gudfala savve.
Kwiktaem nomoa message bilong Kingdom hem barava go aotsaed long olketa wall bilong Jerusalem. Midolwan long 62 and 64 C.E., aposol Peter raetem firstfala leta bilong hem long olketa Christian “wea stap for lelebet taem long olketa difren ples long Pontus, Galatia, Cappadocia, Asia, and Bithynia,” olketa ples wea hem Turkey distaem. (1 Peter 1:1) Samfala wea biliv stap tu long Palestine, Lebanon, Syria, Cyprus, Greece, Crete, and Italy. Olsem Paul raetem long olketa bilong Colossae long 60-61 C.E., gud nius “olketa preachim finis evriwea anda long heven.”—Colossians 1:23.
Mek-tu help wea man kasem taem hem join witim wanfala organization hem wei wea olketa Christian savve encouragem narawan. Taem olketa kaban witim kongregeson, olketa Christian savve herem olketa tok wea muvim man, studyim olketa Holy Scripture tugeta, sharem olketa experience wea strongim faith, and prea tugeta witim nara man wea biliv. (1 Corinthians, chapter 14) And olketa mature man savve “shepherdim sheep bilong God.”—1 Peter 5:2.
Olsem member bilong kongregeson, olketa Christian mas savve long narawan and lovem narawan. Olketa firstfala Christian no feel hevi from wei for kaban witim kongregeson, bat diswan buildimap and strongim olketa.—Acts 2:42; 14:27; 1 Corinthians 14:26; Colossians 4:15, 16.
Narafala reason why iumi needim kongregeson or organization evriwea long world, hem for saportim wan mind. Olketa Christian lanem wei for “tok witim wan mind.” (1 Corinthians 1:10) Diswan hem barava important. Olketa member bilong kongregeson garem difren kaen education and living. Olketa tok long difren languis, and garem difren fasin. (Acts 2:1-11) Samfala taem, olketa garem honest tingting wea no semsem. Nomata olsem, olketa Christian kasem help for stretem eni problem olsem insaed long kongregeson.—Acts 15:1, 2; Philippians 4:2, 3.
Olketa bigfala problem wea olketa elder no savve deal witim olketa givim go long olketa mature overseer, olsem Paul. Olketa important samting saed long teaching mas go long wanfala governing body wea stap long Jerusalem. Olketa aposol bilong Jesus Christ nao firstfala member bilong governing body, bat bihaen, olketa elder bilong kongregeson long Jerusalem tu join insaed. Evri kongregeson luksavve hao God nao givim paoa long governing body and olketa man wea stand for hem for organizem ministry, markem olketa man for duim waka, and for disaedem samting saed long teaching. Taem governing body stretem finis wanfala problem, olketa kongregeson acceptim samting wea olketa disaedem and “hapi tumas long disfala encouragement.”—Acts 15:1, 2, 28, 30, 31.
Tru nao, Jehovah iusim wanfala organization long first century. Bat waswe long distaem?
Iumi Needim Wanfala Organization Distaem
Olsem olketa Christian long first century, Olketa Witness Bilong Jehovah distaem barava tinghae long waka for preachim gud nius bilong Kingdom. Wanfala wei for duim disfala waka hem for givimaot olketa Bible and olketa buk for helpem man studyim Bible, wea needim wei for organize.
Olketa mas redyim gud olketa buk long careful wei, chekim for mek sure hem stret, printim, and then sendem long olketa kongregeson. Then, evri Christian wanwan mas volunteer for tekem go olketa buk hia long olketa wea want for readim. Long wei olsem nao Kingdom message kasem planti million. Olketa pablisa bilong gud nius trae hard for duim preaching waka long wei wea followim order, for mek sure olketa no waka evritaem long wanfala haf bilong territory winim olketa narafala haf long territory. Evri samting hia needim wei for organize.
From “God no favorim eniwan,” olketa mas transleitim olketa Bible and Bible buk. (Acts 10:34) Distaem, disfala magasin hem stap long 132 languis, and Wekap! long 83 languis. Diswan needim samfala grup bilong pipol for transleit wea organize evriwea long world.
Olketa member bilong Christian kongregeson kasem encouragement taem olketa attendim olketa meeting and assembly. Long there olketa herem olketa Bible tok, studyim olketa scripture tugeta, sharem olketa experience wea buildimap man, and prea tugeta witim nara worshiper. And olsem olketa brata bilong olketa long first century, olketa hapi tumas long visit bilong olketa loving traveling overseer. So, olketa Christian distaem kamap “wanfala sekson, wanfala shepherd.”—John 10:16.
Hem tru, olsem olketa first Christian, Olketa Witness Bilong Jehovah no perfect. Nomata olsem, olketa trae hard for waka tugeta witim wan mind. From diswan, waka for preachim Kingdom hem go ahed evriwea long world.—Acts 15:36-40; Ephesians 4:13.
[Piksa long page 31]
Olketa Christian distaem kamap “wanfala sekson, wanfala shepherd”