God Savve Ansarem Prea
Cornelius hem man wea laekem God for hapi long hem from hem prea olowe long hem from heart. And tu, hem iusim gud position bilong hem olsem bigman long army. Bible sei “hem givim planti present bilong mercy” long poor pipol.—Acts 10:1, 2.
LONG datfala taem, Christian kongregeson garem olketa Jew, proselyte, and Samaritan wea biliv. Cornelius hem wanfala Gentile wea no circumcise and hem no part bilong Christian kongregeson. Waswe, datwan minim prea bilong hem no kasem ansa? Nomoa. Jehovah God hem tingim Cornelius and olketa honest waka bilong hem.—Acts 10:4.
Anda long lead bilong olketa angel, Cornelius kasem Christian kongregeson. (Acts 10:30-33) From diswan, hem and famili bilong hem kasem privilege for kamap olketa first Gentile wea no circumcise for kam insaed long Christian kongregeson. Jehovah God luksavve hao experience bilong Cornelius fit for stap insaed long record bilong Bible. Iumi no daot, hem mekem planti change long laef bilong hem for barava fitim olketa mark bilong God. (Isaiah 2:2-4; John 17:16) Experience bilong Cornelius shud barava encouragem pipol from evri nation wea laekem God for acceptim olketa distaem. Lukim samfala example.
Samfala Example Long Distaem
Wanfala young woman long India hem barava needim comfort. Hem marit taem hem 21 year and garem tufala pikinini. Bat no longtaem bihaen hem bornem mek-tu pikinini, hasband bilong hem dae. Seknomoa, taem hem 24 year, hem wanfala widow woman wea garem dota wea 2 month and son wea 22 month. Dastawe hem needim comfort! Bae hem depend long hu? Wan naet, taem hem feel nogud tumas, hem prea olsem, “Dadi long heven, plis comfortim mi thru long Word bilong iu.”
Long morning, wanfala visitor hem kam. Hem wanfala Witness Bilong Jehovah. Long datfala day, haos-tu-haos ministry hem no isi bikos samfala pipol nomoa lisin long hem. From hem taed and wikdaon lelebet, hem redy for go bak long haos, bat feeling bilong hem muvim hem for visitim wanfala haos moa. Long there nao hem meetim young widow woman hia. Woman hia askem hem for kam insaed and hem acceptim wanfala buk wea storyim Bible. Hem lane abaotem promis bilong God for resurrectim pipol wea dae finis and abaotem Kingdom bilong God, wea klosap nao bae mekem earth kamap paradaes. Moa important, hem start for savve and lovem wanfala tru God, Jehovah, wea ansarem prea bilong hem.
Nora, wea stap long taon bilong George, South Africa, hem markem wanfala month for duim full-taem preaching waka. Bifor hem start, hem prea strong long Jehovah for helpem hem faendem samwan wea barava laek for studyim Bible. Insaed territory wea Nora duim hem haos bilong wanfala man wea no tok kaen long hem samfala taem bifor. Nora no fraet for visitim datfala haos moa. Hem seke tumas taem hem faendem wanfala difren woman, nem bilong Noleen, wea muv kam long datfala haos. And tu, Noleen and mami bilong hem bin prea long God for helpem tufala minim Bible. “Taem mi offerim Bible study,” Nora hem sei, “tufala hapi tumas.” Noleen and mami bilong hem muv ahed kwiktaem. Gogo, tufala start for share witim Nora long spiritual healing waka.
Nara example wea showim paoa bilong prea hem abaotem wanfala hasband and waef wea stap long taon bilong Johannesburg, South Africa. Long wanfala Saturday naet long 1996, marit bilong Dennis and Carol gogo for brekdaon. Olsem lastfala samting for trae stretem, tufala disaed for prea for help, and prea staka taem gogo klosap midolnaet. Long next morning, long 11 klok, tufala Witness Bilong Jehovah noknok long door. Dennis go long door and talem tufala for weit taem hem go kolem kam waef bilong hem. Then Dennis warnim Carol hao sapos hem askem tufala Witness hia for kam insaed, maet hem hard for tufala go kwiktaem. Carol talem Dennis hao tufala bin prea for help and maet diswan nao ansa bilong God for olketa prea bilong tufala. So tufala askem olketa Witness hia for kam insaed, and wanfala Bible study hem start long buk Savvy Wea Lead Go long Laef Olawe. Dennis and Carol barava hapi long wanem tufala lanem. Long datfala sem aftanun, tufala attendim first meeting long Kingdom Hall bilong Olketa Witness Bilong Jehovah. Taem Dennis and Carol followim savve wea tufala lanem from Bible, tufala kasem ansa for problem long marit bilong tufala. Distaem tufala baptaes finis and hapi for praisem Jehovah and evritaem sharem biliv bilong olketa from Bible witim neiba.
Waswe Sapos Iu Ting Iu No Fit for Prea?
Samfala honest pipol maet ting olketa no fit for prea bikos olketa garem nogud living. Jesus Christ storyim wanfala man olsem, wanfala tax kolekta wea pipol lukdaonem. Taem disfala man go insaed long courtyard bilong temple, hem ting hem no fit for kam long disfala ples bilong prea. Hem “standap farawe . . . [and] go ahed for hitim chest bilong hem, and hem sei, ‘O God, showim kaenfala fasin long mi wanfala sinner.’” (Luke 18:13) Jesus hem sei prea bilong disfala man kasem gudfala ansa. Tru nao, diswan pruvim hao Jehovah God hem kaen and want for helpem olketa sinner wea barava repent.
Tingim wanfala young man from South Africa wea nem bilong hem Paul. Taem hem pikinini, Paul attendim olketa Christian meeting witim mami bilong hem. Bat taem hem kamap teenager, hem start for kaban witim young pipol wea no followim olketa wei bilong God. Bihaen hem lusim skul, hem joinim army bilong apartheid gavman bilong South Africa bifor. Then seknomoa, girlfren bilong hem les for frenim hem moa. Diskaen living mekem Paul barava sorre. “Wan evening,” hem ting bak olsem, “mi prea long Jehovah and askem help bilong hem, nomata mi no bin prea long God for planti year.”
No longtaem bihaen hem prea, mami bilong Paul invaetem hem for attendim Memorial bilong dae bilong Christ wea kamap evri year. (Luke 22:19) Paul sapraes long wei wea mami askem hem bikos hem bin olabaot and no interest long Bible. “Mi ting long disfala invitation olsem ansa bilong Jehovah long prea bilong mi and mi feel mi mas acceptim.” Start long datfala taem, Paul attendim evri Christian meeting. Bihaen hem studyim Bible for fofala month, hem kamap fit for baptaes. And tu, hem stopem engineering study bilong hem and chusim laef waka for duim full-taem preaching. Distaem, Paul hem wanfala hapi man, hem no sorre moa long living bilong hem bifor. Long 11 year wea go pas, hem waka long branch office bilong Watch Tower Society long South Africa.
Tru tumas, Jehovah God savve ansarem olketa prea long kaenfala wei and “hem kamap man wea givim reward long olketa wea barava lukaotem hem.” (Hebrews 11:6) Klosap nao bigfala day bilong Jehovah bae kam and finisim evri wicked fasin. Long distaem, Jehovah hem ansarem prea bilong pipol bilong hem for strongim and gaedem olketa taem olketa share long strongfala wei long barava important waka for witness. Dastawe, planti million man from evri nation go ahed for kam insaed long Christian kongregeson and kasem blessing bilong savve from Bible wea lead go long laef olowe.—John 17:3.
[Piksa long page 5]
Strongfala prea bilong Cornelius lead go for aposol Peter visitim hem
[Piksa long page 6]
Prea helpem planti pipol taem olketa feel nogud
[Piksa long page 7]
Hem gud for prea for help for minim Bible
Hasband and waef savve prea for help for strongim marit bilong tufala