Jehovah—Wan wea Iusim Tumas Paoa
“From hem garem staka akson paoa, and hem iusim tumas paoa tu, no eniwan long olketa hia hem lus.”—ISAIAH 40:26.
1, 2. (a) Long wanem paoa supply nao iumi evriwan depend long hem? (b) Minim why nao Jehovah hem Source bilong evri paoa.
PAOA hem samting wea planti long iumi no ting tumas long hem. Example, iumi no tingting tumas long electric paoa wea givim iumi laet or wei wea hem isi tumas for onem electric paoa for duim planti samting. Taem paoa kat nomoa iumi luksavve hao sapos no eni paoa stap, olketa taon wea man wakem bae no waka nao. Bigfala haf long electric paoa wea iumi depend long hem kam from paoa source bilong earth—sun.a Evri second disfala solar fire hem iusim faev million ton bilong nuclear fuel, wea sendem kam paoa for laef long earth.
2 Wea nao disfala solar paoa kam from? Hu nao wakem disfala paoa station long heven? Jehovah God nao wakem. Psalm 74:16 sei olsem abaotem hem: “Iu nao redyim moon, and sun tu.” Tru nao, Jehovah hem Source bilong evri paoa, olsem hem tu Source bilong laef. (Psalm 36:9) Iumi mas no ting smol long paoa bilong hem. Thru long profet Isaiah, Jehovah talem iumi for luk go ap long olketa samting long heven, olsem sun and olketa star, and ting raonem hao nao olketa start. “Luk go ap and lukim. Hu nao creatim evri samting hia? Hem nao dat Wan wea tekem kam army bilong olketa and nambarem tu, and kolem evriwan long nem bilong olketa. From hem garem staka akson paoa, and hem iusim tumas paoa tu, no eniwan long olketa hia hem lus.”—Isaiah 40:26; Jeremiah 32:17.
3. Hao nao iumi kasem gudfala samting from olketa wei wea Jehovah showimaot paoa bilong hem?
3 From Jehovah iusim tumas paoa, iumi sure hao sun bae go ahed for givim laet and hot wea iumi needim for laef. Bat, iumi savve depend long paoa bilong God for moa samting winim samting wea body needim. Wei for baem iumi from sin and dae, hope bilong iumi for future, and trust bilong iumi long Jehovah, evri samting hia join witim wei wea hem showimaot paoa. (Psalm 28:6-9; Isaiah 50:2) Bible hem fulap witim olketa example wea pruvim paoa bilong Jehovah for creatim samting and baem bak, for sevem pipol bilong hem and distroem olketa enemy bilong hem.
Paoa Bilong God Hem Showaot Long Creation
4. (a) Taem David lukluk long skae long naet, hao nao diswan affectim hem? (b) Wanem nao olketa samting wea stap long heven showimaot abaotem paoa bilong God?
4 Aposol Paul hem explainim wei wea ‘paoa bilong Creator bilong iumi wea olowe hem showaot long olketa samting wea hem wakem.’ (Romans 1:20) Planti handred year bifor, man wea raetem psalm, David, wea olsem wanfala shepherd maet planti taem luk go ap long skae, lukim wei wea universe hem big for gud and wei wea Man Wea Wakem hem strong tumas. Hem raet olsem: “Taem mi lukim heven bilong iu, olketa samting wea iu wakem, moon and olketa star wea iu wakem, wanem nao man wea savve dae wea iu ting long hem, and son bilong man long earth wea iu kea for hem?” (Psalm 8:3, 4) Nomata hem no garem bigfala savve long olketa samting wea stap long heven, David luksavve wei wea hem smol tumas sapos hem markem hemseleva witim Creator bilong bigfala universe bilong iumi. Distaem, pipol wea studyim universe savve moa samting abaotem big bilong universe and paoa wea mekem hem go ahed. Olsem example, olketa sei evri second sun bilong iumi givimaot energy wea semsem olsem 100,000 million megaton bilong TNT wea bosta.b Barava smol haf bilong datfala energy nomoa hem kasem earth; bat hem inaf for mekem evri samting long planet bilong iumi for laef. Nomata olsem, sun bilong iumi hem smol star nomoa long heven. Insaed wanfala second nomoa samfala star givimaot energy wea sun givimaot long wanfala full day. So, tingim paoa bilong dat Wan wea creatim olketa samting hia! Elihu barava talem tru samting taem hem sei: “Disfala Almighty Wan, iumi no minim olketa samting bilong hem yet; hem garem bigfala paoa.”—Job 37:23.
5. Wanem nao pruv bilong strong bilong Jehovah wea showaot long olketa samting wea hem wakem?
5 Sapos iumi ‘lukaotem olketa waka bilong God’ olsem David duim, bae iumi lukim pruv bilong paoa bilong hem evriwea—long wind and olketa wave, long thunder and laetning, long olketa big river and hae maunten. (Psalm 111:2; Job 26:12-14) And tu, olsem Jehovah talem long Job, olketa animal showimaot strong bilong Hem. Wanfala nao Behemoth, or hippopotamus. Jehovah talem long Job: “Paoa bilong hem long hips bilong hem . . . Olketa strongfala bone bilong hem olsem iron stik.” (Job 40:15-18) Bible story abaotem bigfala paoa bilong wild buluka planti taem, and David prea for Jehovah sevem hem from “mouth bilong lion, and from horn bilong olketa wild buluka.”—Psalm 22:21; Job 39:9-11.
6. Wanem nao buluka hem piksarem long Bible, and why? (Lukim footnote.)
6 Bikos long strong bilong buluka, Bible iusim datwan for piksarem paoa bilong Jehovah.c Vision bilong throne bilong Jehovah wea aposol John lukim hem garem fofala living creature, wea wanfala garem feis olsem buluka. (Revelation 4:6, 7) Tru nao, wanfala long fofala main fasin bilong Jehovah wea olketa angel hia piksarem hem paoa. Olketa narawan nao love, wisdom, and justice. Bikos paoa hem barava important part long fasin bilong God, wei for minim gud paoa bilong hem and hao hem iusim datwan bae mekem iumi moa klos long hem. Diswan bae helpem iumi for followim example bilong hem tu taem iumi iusim eni paoa wea iumi garem.—Ephesians 5:1.
“Jehovah Bilong Olketa Army, Datfala Barava Strong Wan”
7. Hao nao iumi sure gud saed bae winim nogud saed?
7 Bible kolem Jehovah “Almighty God,” wanfala title wea mekem iumi tingim hao iumi mas no ting smol long paoa bilong hem or daotem wei wea hem fit for distroem olketa enemy bilong hem. (Genesis 17:1; Exodus 6:3) Wicked system bilong Satan maet luk olsem hem barava strong, bat long eye bilong Jehovah “olketa nation olsem wanfala drop wata from wanfala baket; and olketa kamap olsem lelebet dust antap long scale.” (Isaiah 40:15) From paoa bilong God olsem, no eni daot stap abaotem wei wea gud saed bae winim nogud saed. Long taem wea wicked fasin hem big tumas, iumi savve kasem comfort from iumi savve “Jehovah bilong olketa army, datfala Barava Strong Wan Bilong Israel” bae aotem wicked fasin for olowe.—Isaiah 1:24; Psalm 37:9, 10.
8. Wanem army bilong heven nao stap anda long komand bilong Jehovah, and wanem nao showimaot paoa bilong olketa?
8 Datfala toktok “Jehovah bilong olketa army,” wea kamap 285 taem insaed Bible, hem nara samting wea mekem iumi tingim paoa bilong God. “Olketa army” long hia minim army bilong olketa spirit wea stap anda long komand bilong Jehovah. (Psalm 103:20, 21; 148:2) Insaed wanfala naet nomoa, wanfala long olketa angel hia killim dae 185,000 soldia bilong Assyria wea redy for spoelem Jerusalem. (2 Kings 19:35) Sapos iumi luksavve long paoa bilong olketa army bilong Jehovah long heven, bae iumi no kwiktaem fraetem olketa wea againstim iumi. Profet Elisha hem no wari taem wanfala full army wea lukaotem hem olketa raonem hem bikos, no olsem servant bilong hem, Elisha savve lukim witim eye bilong faith wanfala big sekson bilong olketa army long heven wea saportim hem.—2 Kings 6:15-17.
9. Olsem Jesus, why nao iumi shud garem trust long wei wea God protectim iumi?
9 Jesus tu savve olketa angel saportim hem taem hem feisim wanfala big sekson wea karem olketa sword and spia long garden bilong Gethsemane. Bihaen hem talem Peter for putim bak sword bilong hem, Jesus sei, sapos hem needim, Hem savve askem Dadi bilong hem for sendem “winim twelvfala bigfala army bilong angel.” (Matthew 26:47, 52, 53) Sapos iumi tu garem semkaen wei for tinghae long army wea God garem long heven, bae iumi trust evribit long wei wea God saportim iumi. Aposol Paul raet olsem: “Wanem nao bae iumi sei long olketa samting hia? Sapos God hem stap witim iumi, hu nao bae againstim iumi?”—Romans 8:31.
10. Jehovah iusim paoa bilong hem for hu nao?
10 So, iumi garem evri reason for trustim wei wea Jehovah protectim iumi. Hem evritaem iusim paoa bilong hem for gud samting and long wei wea fitim olketa nara fasin bilong hem—justice, wisdom, and love. (Job 37:23; Jeremiah 10:12) Planti taem olketa man wea garem paoa spoelem pipol wea poor and wea hambol for kasem samting for olketa seleva, bat Jehovah “raisim ap man wea foldaon long graon” and “fulap long paoa for sevem pipol.” (Psalm 113:5-7; Isaiah 63:1) Mary, hambol mami bilong Jesus savve long wei wea “barava strong Wan” iusim paoa bilong hem for olketa wea fraet long hem, mekem hem torowem daon olketa wea praod and apim olketa wea hambol.—Luke 1:46-53.
Jehovah Showimaot Paoa Long Olketa Servant Bilong Hem
11. Wanem nao olketa Israelite lukim long year 1513 B.C.E. wea showimaot paoa bilong God?
11 Samfala taem, Jehovah showimaot paoa bilong hem long olketa servant bilong hem. Wanfala taem hia hem long Maunt Sinai long 1513 B.C.E. Insaed long datfala year olketa Israelite lukim finis bigfala pruv bilong paoa bilong God. Tenfala trabol wea barava spoelem pipol showimaot strongfala hand bilong Jehovah and hao olketa god bilong Egypt no garem paoa olsem. No longtaem bihaen, mirakol wei for katkros long Red Sea and wei for distroem army bilong Pharaoh hem givim moa pruv long strong bilong God. Thrifala month bihaen, long botom bilong Maunt Sinai, Jehovah invaetem olketa Israelite for kamap “spesol samting bilong [hem] from midolwan long evri narafala pipol.” Olketa promis olsem: “Evri samting wea Jehovah hem talem, mifala willing for duim.” (Exodus 19:5, 8) Then Jehovah showimaot paoa bilong hem long barava kliafala wei. Witim thunder and laetning and laod saond bilong wanfala horn, smoke kamaot from Maunt Sinai and hem seksek. Olketa pipol, wea standap farawe go lelebet, olketa fraet for gud. Bat Moses sei disfala samting shud teachim olketa for fraet long God, wankaen wei for fraet wea bae muvim olketa for obeyim only tru God bilong olketa wea garem evri paoa, Jehovah.—Exodus 19:16-19; 20:18-20.
12, 13. Wanem samting nao mekem Elijah for lusim assignment bilong hem, bat hao nao Jehovah strongim hem?
12 Samfala handred year bihaen, long taem bilong Elijah, narafala samting happen long Maunt Sinai wea showimaot paoa bilong God. Datfala profet lukim finis wei wea paoa bilong God hem duim samting. For thri and haf year, God “satem olketa heven” bikos long apostate fasin bilong nation bilong Israel. (2 Chronicles 7:13) Bikos long taem bilong no eni kaikai wea kamaot from diswan, olketa raven bird nao feedim Elijah long valley bilong Cherith, and bihaen, long mirakol wei, lelebet flour and oil bilong wanfala widow woman no finis and datwan go ahed for feedim hem. Jehovah givim paoa long Elijah tu for resurrectim son bilong datfala widow woman. Gogo, long bigfala test long Maunt Carmel for pruvim hu nao really God, fire kamdaon from heven and burnim sakrifaes bilong Elijah. (1 Kings 17:4-24; 18:36-40) Nomata olsem, no longtaem bihaen, Elijah hem fraet for gud and feel wikdaon taem Jezebel sei bae hem killim hem dae. (1 Kings 19:1-4) Hem ranawe from datfala kantri, and tingse waka bilong hem olsem wanfala profet hem finis nao. For encouragem and strongim hem moa, long kaenfala wei Jehovah showimaot paoa moa front long Elijah seleva.
13 Taem Elijah haed insaed wanfala cave, hem lukim barava spesol samting wea showimaot thrifala samting wea Jehovah kontrolem: wanfala strong wind, wanfala earthquake, and then wanfala fire. Nomata olsem, taem Jehovah story long Elijah, hem tok long “kaenfala, kwaet voice.” Hem givim hem moa waka and talem hem hao 7,000 faithful wan wea worshipim Jehovah stap long datfala land. (1 Kings 19:9-18) Sapos, olsem Elijah, iumi feel wikdaon from pipol no interest long ministry wea iumi duim, iumi savve askem Jehovah for “paoa wea winim wanem iumi garem”—wanfala paoa wea savve strongim iumi for go ahed preachim gud nius and no wikdaon.—2 Corinthians 4:7.
Paoa Bilong Jehovah Mek Sure Olketa Promis Bilong Hem Bae Fulfill
14. Wanem nao nem bilong Jehovah showimaot, and hao nao diswan join witim paoa bilong hem?
14 Paoa bilong Jehovah hem join long barava klos wei tu witim nem bilong hem and wei for duim will bilong hem. Datfala spesol nem Jehovah, wea minim “Hem Mekem Kamap,” showimaot hem mekem hemseleva kamap Man Wea Fulfillim olketa promis. No eni samting or eniwan savve stopem God for mekem olketa purpose bilong hem fulfill, nomata wanem tingting nao pipol wea daot tingim abaotem olketa purpose hia. Olsem Jesus talem long olketa aposol bilong hem, “long God evri samting hem isi nomoa.”—Matthew 19:26.
15. Hao nao Abraham and Sarah herem moa hao no eni samting hem hard tumas for Jehovah?
15 Wanfala example, Jehovah promisim Abraham and Sarah bae hem mekem famili laen bilong tufala kamap wanfala maeti nation. Nomata olsem, tufala no garem eni pikinini for planti year. Tufala olo tumas taem Jehovah talem tufala bae datfala promis klosap for fulfill and Sarah hem laf. Angel hem ansa olsem: “Waswe, eni samting hard tumas for Jehovah?” (Genesis 12:1-3; 17:4-8; 18:10-14) Foa handred year bihaen, taem Moses hipimap olketa wea kam from laen bilong Abraham—wea kamap bigfala nation dat taem—long Level Ples Bilong Moab, hem talem olketa for remember hao God fulfillim promis bilong hem. Moses sei: “Iu go ahed for laef, bikos [Jehovah] lovem olketa laen dadi bilong iu dastawe hem chusim seed bilong olketa wea kam bihaen and tekem iu kamaot from Egypt anda long eye bilong hem witim bigfala paoa bilong hem, for raosem olketa nation wea moa big and moa strong winim iu front long iu, for tekem iu kam, for givim iu land bilong olketa olsem wanfala samting wea iu kasem long disfala day.”—Deuteronomy 4:37, 38.
16. Why nao olketa Sadducee foldaon long rong tingting for denyim resurrection bilong olketa wea dae finis?
16 Planti handred year bihaen, Jesus tok againstim olketa Sadducee, wea no biliv long resurrection. Why nao olketa no willing for biliv long promis bilong God hao hem bae mekem man wea dae finis for laef bak? Jesus talem olketa: “Iufala nating savve long olketa Scripture or paoa bilong God.” (Matthew 22:29) Bible promisim iumi hao ‘evriwan wea stap long olketa memory grev bae herem voice bilong Son bilong man and kamaot.’ (John 5:27-29) Sapos iumi savve wanem Bible talem abaotem resurrection, trust bilong iumi long paoa bilong God bae mekem iumi biliv strong hao olketa wea dae finis bae laef bak moa. God “bae finisim dae evribit, . . . from Jehovah seleva hem talem diswan.”—Isaiah 25:8.
17. Long wanem taem long future nao bae hem important tumas for trustim Jehovah long spesol wei?
17 Klosap nao, wanfala taem bae kam wea iumi evriwan bae need for trust long spesol wei long paoa bilong God for sevem man. Devil Satan bae attakim pipol bilong God, wea bae luk olsem no eniwan protectim olketa. (Ezekiel 38:14-16) Then God bae showimaot bigfala paoa bilong hem for saed bilong iumi, and evriwan mas savve hem nao Jehovah. (Ezekiel 38:21-23) Distaem nao hem taem for buildim faith and trust bilong iumi long God Almighty mekem iumi no seksek long datfala barava important taem.
18. (a) Wanem nao olketa gud samting wea kamaot from wei for ting raonem paoa bilong Jehovah? (b) Wanem kwestin nao iumi bae lukluk long hem long next article?
18 Tru nao, planti reason stap for ting raonem paoa bilong Jehovah. Taem iumi tingting strong long olketa waka bilong hem, diswan muvim iumi for praisem Barava Nambawan Creator bilong iumi and sei thankiu from hem iusim paoa bilong hem long wise and loving wei olsem. No eniwan bae mekem iumi fraet sapos iumi trustim Jehovah bilong olketa army. Faith bilong iumi long olketa promis bilong hem bae no seksek. Bat tingim, God creatim iumi long image bilong hem. So, iumi garem paoa tu—nomata hem lelebet nomoa. Hao nao iumi savve followim Creator bilong iumi taem iumi iusim paoa bilong iumi? Bae next article storyim diswan.
[Olketa Footnote]
a Planti pipol biliv hao olketa fossil fuel olsem oil and coal—main samting for givim paoa long olketa paoa station—tekem energy bilong olketa from sun.
b Long narasaed, barava strongfala nuclear bomb wea olketa man testim hem garem paoa wea semsem olsem 57 megaton bilong TNT wea bosta.
c Wild buluka wea Bible storyim maet hem aurochs (Latin urus). Tu thousand year bifor, olketa animal hia stap long Gaul (wea distaem hem France), and Julius Caesar raet olsem abaotem olketa: “Olketa uri hia klosap big olsem elephant, bat fasin, color, and shape bilong olketa olsem buluka. Olketa strong and speed fogud: olketa no savve sorre long man or animal taem olketa lukim.”
Iu Savve Ansarem Olketa Kwestin Hia?
• Hao nao creation givim witness abaotem paoa bilong Jehovah?
• Wanem army nao Jehovah savve iusim for saportim pipol bilong hem?
• Wanem nao samfala taem wea Jehovah showimaot paoa bilong hem?
• Wanem promis nao iumi garem abaotem wei wea Jehovah bae fulfillim olketa promis bilong hem?
[Piksa long page 10]
“Luk go ap and lukim. Hu nao creatim evri samting hia?”
[Credit Line]
Foto from Malin, © IAC/RGO 1991
[Piksa long page 13]
Wei for ting raonem olketa samting wea showimaot paoa bilong Jehovah buildim faith long olketa promis bilong hem