Report Bilong Olketa wea Talemaot Kingdom
Hapi Famili Laef Pullim Kam Nara Pipol Long God
JEHOVAH blessim Joseph witim bigfala wisdom and fasin for luksavve. (Acts 7:10) Bikos long diswan, fasin for luksavve bilong Joseph “luk gud long eye bilong Pharaoh and evri servant bilong hem.”—Genesis 41:37.
Long sem wei distaem, Jehovah givim pipol bilong hem fasin for luksavve thru long wei wea olketa studyim Bible. (2 Timothy 3:16, 17) Taem pipol followim kaonsel from Bible, disfala wisdom and fasin for luksavve hem mekem grow gudfala frut. Planti taem gudfala fasin hem ‘luk gud long eye bilong pipol wea lukluk kam,’ olsem olketa experience hia from Zimbabwe showimaot.
• Wanfala woman garem olketa neiba wea olketa Jehovah’s Witness. Nomata hem no laekem olketa Witness, hem tinghae long fasin bilong olketa, especially living bilong olketa long haos. Hem lukim hao hasband and waef garem gudfala wei for fren, and olketa pikinini obey gud. Hem lukim tu hao disfala hasband barava lovem waef bilong hem.
Wanfala biliv long samfala ples bilong Africa sei sapos wanfala hasband lovem waef bilong hem, disfala waef iusim magic for mekem hasband bilong hem “no raf.” So disfala woman askem disfala Witness waef: “Plis iu savve givim mi magic wea iu givim long hasband bilong iu mekem hasband bilong mi savve lovem mi olsem hasband bilong iu lovem iu?” Disfala Witness sei: “Oh, yes, bae mi tekem kam long iu tumoro aftanun.”
Long next day, disfala sista visitim neiba bilong hem witim disfala “magic.” Wanem nao diswan? Hem nao Bible, witim disfala pablikeson Savvy Wea Lead Go long Laef Olawe. Bihaen tufala hia lukluk long information from Savvy buk wea garem heding “Buildim Famili Wea Honorim God,” disfala sista sei long woman hia: “Diswan nao ‘magic’ wea mitufala hasband bilong mi iusim for mekem mitufala ‘no raf,’ and dastawe mitufala garem love.” Wanfala Bible study hem start, and woman hia kwiktaem muv ahed for showimaot hem dedicate long Jehovah thru long wei for baptaes insaed wata.
• Tufala spesol pioneer wea assign long wanfala smol kongregeson klosap long northeast border bilong Zimbabwe and Mozambique nating go aot long door-tu-door ministry for tufala week. Why nao olsem? Bikos olketa pipol kakam long tufala for herem toktok bilong tufala. Wanfala long tufala pioneer storyim hao gogo diswan kamap: “Mifala savve travel for 15 kilometer for conductim hom Bible study evri week witim wanfala man wea interest. Hem no isi for mifala kasem area bilong man hia. Mifala mas wakabaot insaed long mud, and mifala mas katkros long river wea flood kasem nek bilong mifala. Diswan minim mifala mas balancem olketa kaleko and shoe bilong mifala long hed, akrosim river, and then werem kaleko long narasaed.
“Olketa neiba bilong disfala man wea interest barava sapraes long strong wea mifala showimaot. Midolwan long olketa wea lukim diswan hem leader bilong wanfala religion. Hem sei long olketa follower bilong hem: ‘Waswe, iufala laek for garem strong olsem tufala young man hia wea Jehovah’s Witness?’ Long next day, planti long olketa follower bilong hem kam long haos bilong mifala for faendaot why nao mifala no savve givap. So, long next tufala week, mifala garem planti visitor gogo nomoa eni taem for redyim kaikai bilong mifala tu!”
Wanfala long olketa wea visitim haos bilong tufala pioneer hia long datfala taem nao disfala leader bilong religion. Tingim hapi bilong olketa pioneer taem man hia acceptim wanfala hom Bible study!