Herem Samting wea Spirit
Need for Talem
“And ear bilong iufala seleva bae herem wanfala voice bihaen long iufala wea sei: ‘Diswan nao wei. Wakabaot long hem, iufala pipol,’ nogud iufala go long raet or nogud iufala go long left.”—ISAIAH 30:21.
1, 2. Long history hao nao Jehovah story witim olketa man?
BARAVA bigfala and strongfala radio telescope dish long world hem stap long Puerto Rico. For barava planti year nao, olketa scientist iusim diswan from olketa hope for kasem olketa message from eniwan wea stap laef aotsaed long earth. Bat olketa nating kasem olketa message olsem. Long wei wea barava difren, olketa klia message from farawe stap wea eniwan long iumi savve kasem—iumi no needim bigfala machine for diswan. Olketa hia kam from Source wea hae winim eni samting from aotsaed. Hu nao olketa message hia kam from, and hu nao kasem message? Wanem nao olketa message hia talem?
2 Bible garem samfala story abaotem olketa taem wea ear bilong man herem samfala message wea kam from God. Samtaem olketa angel nao serve olsem man for karem message for God. (Genesis 22:11, 15; Zechariah 4:4, 5; Luke 1:26-28) Thrifala taem, own voice bilong Jehovah nao pipol herem. (Matthew 3:17; 17:5; John 12:28, 29) God hem tok thru long olketa profet tu, wea planti long olketa raetem samting wea God muvim olketa for talem. Tuday, iumi garem Bible, wea garem record bilong planti long olketa message hia, witim olketa teaching bilong Jesus and olketa disaepol bilong hem. (Hebrews 1:1, 2) Tru tumas, Jehovah hem sendem information go long olketa man wea hem wakem.
3. Message bilong God hem for wanem, and wanem nao for iumi duim?
3 Evri message hia from God no story tumas abaotem physical universe. Olketa story abaotem olketa samting wea moa important, wea affectim laef bilong iumi distaem and long future. (Psalm 19:7-11; 1 Timothy 4:8) Jehovah iusim olketa for talem will bilong hem and for gaedem iumi. Hem nao wanfala wei wea olketa toktok bilong profet Isaiah hem fulfill: “Ear bilong iufala seleva bae herem wanfala voice bihaen long iufala wea sei: ‘Diswan nao wei. Wakabaot long hem, iufala pipol,’ nogud iufala go long raet or nogud iufala go long left.” (Isaiah 30:21) Jehovah no forcem iumi for lisin long “word” bilong hem. Saed bilong iumi nao for followim and wakabaot long wei bilong hem. For duim olsem Bible hem encouragem iumi for lisin long olketa message bilong Jehovah. Insaed buk bilong Revelation, disfala encouragement for “herem samting wea spirit talem” hem stap sevenfala taem.—Revelation 2:7, 11, 17, 29; 3:6, 13, 22.
4. Long taem bilong iumi, hem fitim for iumi expectim God for tok kam from heven?
4 Tuday, Jehovah no tok kam from heven long iumi. Nomata long taem bilong Bible, wei wea hem tok kam from heven hem happen samfala taem nomoa, maet wantaem insaed planti handred year. Long history, Jehovah story witim pipol bilong hem staka taem long difren wei. Olsem tu long taem bilong iumi. Letem iumi ting long thrifala wei wea Jehovah story witim iumi long hem tuday.
“Evri Scripture Kam From God”
5. Wanem nao main wei wea Jehovah story tuday, and hao nao iumi savve kasem gud samting long diswan?
5 Main wei for story midolwan God and olketa man hem Bible. Bible hem kam from God and evriting insaed long hem savve helpem iumi. (2 Timothy 3:16) Bible hem fulap witim olketa example bilong olketa really pipol wea disaed seleva sapos olketa laek for lisin long Jehovah or nomoa. Example olsem remindim iumi why hem important for lisin long wanem spirit bilong God talem. (1 Corinthians 10:11) Bible garem tu wisdom wea helpem iumi, wea givim iumi kaonsel for olketa taem wea iumi mas mekem disison long laef. Hem olsem God hem bihaenem iumi, and toktok insaed long ear bilong iumi: “Diswan nao wei. Wakabaot long hem.”
6. Why nao Bible hem barava winim eni nara buk?
6 For mekem iumi savve herem wanem spirit hem talem thru long olketa page bilong Bible, iumi mas readim evritaem. Bible hem no wanfala naesfala buk wea evriwan nomoa laekem, wea planti stap tuday. Bible hem kam from spirit and hem garem olketa tingting bilong God. Hebrews 4:12 hem sei: “From word bilong God hem laef and garem paoa and hem sharp winim tu-saed sword and hem savve kat go for divaedem soul and spirit, and olketa join and bone, and hem luksavve long tingting and samting wea heart want for duim.” Taem iumi readim Bible, toktok bilong hem kat go kasem tingting and feeling bilong iumi olsem wanfala sword, and hem showimaot haomas long laef bilong iumi nao hem followim will bilong God.
7. Why nao iumi mas readim Bible, and iumi kasem encouragement for duim diswan long haomas taem?
7 Taem wea go pas and olketa samting wea kasem iumi insaed long laef—gud and hard taem tu—savve changem “tingting and samting wea heart want for duim.” Sapos iumi no evritaem studyim Word bilong God, bae tingting, fasin, and feeling bilong iumi no followim moa olketa principle bilong God. Dastawe Bible encouragem iumi: “Go ahed for testim sapos iufala insaed long faith, go ahed for pruvim iufala wanem kaen man.” (2 Corinthians 13:5) For iumi go ahed for herem wanem spirit hem talem, iumi shud followim kaonsel for readim word bilong God evriday.—Psalm 1:2.
8. Wanem toktok bilong aposol Paul nao helpem iumi for lukluk long iumi seleva saed long wei for readim Bible?
8 Wanfala important reminder for olketa wea readim Bible hem diswan: Givim inaf taem for minim wanem iu readim! Taem iumi trae for followim kaonsel for readim Bible evriday, iumi shud no laek for hariap for finis readim planti page and then no minim. Nomata hem important for evritaem readim Bible, goal bilong iumi hem no for followim schedule nomoa; iumi shud garem trufala feeling for want for lane abaotem Jehovah and olketa plan bilong hem. For duim diswan, iumi savve ting raonem gud olketa toktok hia bilong aposol Paul for lukluk long iumi seleva. Taem hem raet long olketa nara Christian, hem sei: “Mi bendim knee bilong mi long Dadi, mekem hem savve givim iufala . . . for garem Christ stap thru long faith [bilong iufala] insaed long heart bilong iufala witim love; mekem iufala savve garem rut and stap strong antap long faondeson, mekem iufala bae barava fit for minim witim olketa holy wan wanem nao waed and long and hae and deep bilong samting, and for savve long love bilong Christ wea barava winim savve, mekem iufala savve fulap witim evri samting wea God givim.”—Ephesians 3:14, 16-19.
9. Hao nao iumi savve garem and strongim feeling for lane from Jehovah?
9 Hem tru, samfala long iumi no pipol wea enjoyim wei for read, long narasaed samfala narawan laekem tumas. Bat, nomata wanem feeling iumi garem, iumi savve garem and strongim feeling bilong iumi for laek for lane from Jehovah. Aposol Peter minim hao iumi shud garem feeling for barava wantem savve bilong Bible, and hem luksavve hao iumi bae need for mekem grow diskaen feeling. Hem raet: “Olsem baby wea just born, mekem grow feeling for barava wantem klinfala milk bilong datfala word, mekem thru long hem iufala savve grow for kasem salvation.” (1 Peter 2:2) Iumi mas disciplinem seleva sapos iumi laek for “mekem grow feeling for barava wantem” Bible study. Long sem wei wea iumi savve mekem grow interest for laekem wankaen kaikai bihaen iumi kaikaim tu-thri taem, feeling bilong iumi for read and study savve kamap gud sapos iumi disciplinem iumi seleva for followim schedule evritaem.
“Kaikai Long Barava Taem”
10. Hu nao insaed “faithful and wise slave,” and hao nao Jehovah iusim olketa tuday?
10 Long Matthew 24:45-47, Jesus showim nara wei wea Jehovah iusim for tok long iumi tuday. Long there hem story abaotem anointed Christian kongregeson—“faithful and wise slave” wea kasem waka for givim spiritual “kaikai long barava taem.” Wanwan, olketa bilong disfala class olsem olketa “servant” bilong Jesus. Olketa hia, witim “bigfala crowd” bilong “nara sheep,” kasem samting for encouragem and gaedem olketa. (Revelation 7:9; John 10:16) Planti kaikai long barava taem hia hem kam olsem pablikeson wea olketa raetem, olsem Wastaoa, Wekap!, and nara pablikeson. Olketa nara spiritual kaikai kam olsem tok and demonstration long olketa convention, assembly, and kongregeson meeting.
11. Hao nao iumi showimaot iumi acceptim wanem spirit hem talem thru long “faithful and wise slave”?
11 Olketa raetem information wea “faithful and wise slave” givim long wei for strongim faith bilong iumi and for trainim wei bilong iumi for luksavve. (Hebrews 5:14) Datfala kaonsel hem for fitim evrikaen man mekem man wanwan savve followim long wei wea fitim hemseleva. Samfala taem iumi kasem kaonsel wea tok abaotem wankaen fasin bilong iumi. Wanem kaen wei for ting nao iumi shud garem sapos iumi barava lisin long wanem spirit hem talem thru long slave class? Aposol Paul hem ansa: “Obeyim olketa wea lead long iufala and stap anda long olketa.” (Hebrews 13:17) Tru, evri man wea no perfect nao insaed long diswan. Nomata olsem, Jehovah hem hapi for iusim olketa servant bilong hem, nomata olketa no perfect, for gaedem iumi long disfala taem bilong end.
Gaedens wea Kam From Conscience Bilong Iumi
12, 13. (a) Wanem nara samting nao Jehovah givim for gaedem iumi? (b) Wanem gudfala samting nao disfala conscience savve duim long olketa wea no garem stretfala savve abaotem Word bilong God?
12 Jehovah givim iumi nara samting for gaedem iumi—conscience bilong iumi. Hem wakem man witim feeling for luksavve long raet and rong. Datwan hem part long iumi nao. Long leta bilong hem for olketa Roman, aposol Paul explainim olsem: “Taem pipol bilong nation wea no garem law duim seleva samting wea fitim law, pipol hia, nomata olketa no garem law, olketa kamap olsem law long olketa seleva. Olketa seleva nao showimaot law hem stap insaed long heart bilong olketa, taem conscience bilong olketa muvim olketa and, long tingting bilong olketa seleva, hem againstim olketa or mekem excuse for olketa.”—Romans 2:14, 15.
13 Planti wea no savve long Jehovah, long samfala wei, savve mekem tingting and fasin bilong olketa for followim olketa principle bilong God saed long samting wea raet and rong. Hem olsem olketa herem wanfala smol voice insaed olketa hem gaedem olketa long stretfala wei. Sapos diswan savve happen long man wea no garem stretfala savve abaotem Word bilong God, haomas moa nao bae datfala voice insaed hem tok long olketa trufala Christian! Iumi barava sure hao wanfala Christian conscience, wea stretfala savve long Word bilong God hem stretem and wea waka followim holy spirit bilong Jehovah, savve givim gaed wea iumi fit for trustim.—Romans 9:1.
14. Hao nao conscience wea Bible trainim savve helpem iumi for followim gaed bilong spirit bilong Jehovah?
14 Wanfala gudfala conscience, wea Bible trainim, savve remindim iumi long olketa wei wea spirit hem wantem iumi for wakabaot. Maet samtaem iumi insaed hevi wea Bible and olketa nara Bible pablikeson no barava story abaotem. Nomata olsem, conscience bilong iumi maet talem wanfala warning, for no duim samting wea savve spoelem iumi. Long taem olsem, wei for ting nating long samting wea conscience talem savve olsem iumi no want for herem wanem spirit bilong Jehovah hem talem. Long narasaed, sapos iumi lane for depend long Christian conscience wea iumi trainim, iumi savve disaed gud nomata taem no eni klia gaed hem stap. Bat, hem barava important for tingim hao taem no eni principle, rul, or law hem stap wea kam from God, hem bae rong for pushim tingting bilong conscience bilong iu long nara Christian long olketa samting wea man seleva savve disaedem.—Romans 14:1-4; Galatians 6:5.
15, 16. Wanem nao savve kosim conscience bilong iumi for no waka stret, and hao nao iumi savve mek sure diswan no happen?
15 Wanfala klin conscience wea Bible trainim hem gudfala present from God. (James 1:17) Bat iumi mas protectim disfala present from olketa samting wea savve spoelem mekem hem savve waka gud olsem wanfala samting for gaedem fasin bilong iumi. Olketa kastom, wei, and fasin wea againstim olketa mark bilong God savve, sapos iumi followim, kosim conscience bilong iumi for no waka stret and fail for leadim iumi long stretfala wei. Maet bae iumi no savve disaed stret long olketa samting and maet laea tu long iumi seleva for bilivim hao samting wea nogud hem gud nomoa.—Markem John 16:2.
16 Sapos iumi go ahed for ting nating long olketa warning bilong conscience bilong iumi, voice bilong hem bae kamap wik and wik gogo iumi no kea or garem feeling saed long fasin. Man wea raetem Psalm raet abaotem kaen pipol olsem taem hem sei: “Heart bilong olketa hem lusim feeling olsem gris nomoa.” (Psalms 119:70) Samfala wea ting nating long toktok bilong conscience bilong olketa lusim wei for ting stret. Olketa finis for followim olketa principle bilong God and no savve mekem gudfala disison. For mekem diswan no kamap, iumi shud lisin long lead bilong Christian conscience bilong iumi nomata olketa samting iumi mas disaedem hem luk smol nomoa.—Luke 16:10.
Hapi Nao Olketa wea Lisin and Obey
17. Wanem blessing nao bae iumi kasem taem iumi lisin long ‘datfala voice bihaen iumi’ and followim olketa reminder bilong conscience bilong iumi wea Bible trainim?
17 Taem iumi mekem grow fasin for lisin long datfala ‘voice bihaen iumi’—olsem hem kam thru long Bible and faithful and wise slave—and taem iumi followim olketa reminder bilong conscience bilong iumi wea Bible trainim, Jehovah bae blessim iumi witim spirit bilong hem. Then holy spirit bae apim savve bilong iumi for kasem and minim wanem Jehovah hem talem iumi.
18, 19. Hao nao gaed bilong Jehovah savve helpem iumi long ministry and long laef bilong iumi wanwan?
18 Spirit bilong Jehovah bae strongim iumi tu for feisim olketa hardfala taem witim wisdom and strong. Olsem hem happen long olketa aposol, spirit bilong God savve muvim paoa bilong tingting and helpem iumi for evritaem duim and talem samting fitim olketa Bible principle. (Matthew 10:18-20; John 14:26; Acts 4:5-8, 13, 31; 15:28) Waka bilong spirit bilong Jehovah tugeta witim hard waka bilong iumi bae mekem iumi win taem iumi mas mekem olketa important disison long laef, givim iumi strong for followim olketa disison bilong iumi. Olsem example, maet iu tingting for changem living bilong iu for garem moa taem for spiritual samting. Or maet iu feisim olketa important disison wea bae changem laef bilong iu, olsem wei for chusim wanfala partner, for disaed long wanem kaen waka for duim, or for baem wanfala haos. Winim wei for letem feeling bilong iumi olsem only reason for mekem disison, iumi shud lisin long wanem spirit bilong Jehovah savve talem and duim samting followim gaed bilong hem.
19 Iumi tinghae tumas long olketa kaenfala reminder and kaonsel wea iumi kasem from olketa nara Christian, witim olketa elder tu. Bat, iumi no need for evritaem weitim olketa nara pipol for talem reminder long iumi. Sapos iumi savve long wanfala wisefala wei for followim and long wanem iumi need for changem for mekem wei and fasin bilong iumi for mekem God hapi, letem iumi duim samting. Jesus sei: “Sapos iufala savve long olketa samting hia, bae iufala hapi sapos iufala duim olketa.”—John 13:17.
20. Wanem blessing nao bae kam long olketa wea lisin long ‘toktok bihaen olketa’?
20 Hem klia hao for mekem God hapi, olketa Christian no need for herem wanfala really voice from heven, and no need for angel visitim olketa. Olketa hapi tumas from olketa garem Word bilong God and gudfala gaed bilong anointed class long earth. Sapos olketa followim gud disfala ‘voice bihaen olketa’ and followim gaed bilong conscience bilong olketa wea Bible trainim, olketa bae win for duim will bilong God. Then olketa bae barava lukim promis bilong aposol John hem kamap tru: “Man wea duim will bilong God bae stap olowe.”—1 John 2:17.
Shortfala Review
• Why nao Jehovah tok witim olketa man wea hem wakem?
• Hao nao iumi savve kasem gudfala samting from program for readim Bible evritaem?
• Hao nao iumi shud ansa taem slave class directim iumi?
• Why nao iumi shud no ting nating long olketa toktok bilong conscience wea Bible trainim?
[Piksa long page 13]
Man no needim bigfala machine for kasem message from God
[Credit Line]
Courtesy Arecibo Observatory/David Parker/Science Photo Library
[Piksa long page 15]
Jehovah tok long iumi thru long Bible and thru long “faithful and wise slave”