Iumi Datkaen wea Garem Faith
Talemaot Kingdom Bilong God Long Olketa Island Bilong Fiji
JESUS CHRIST wantaem story abaotem tufala road. Wanfala hem big and lead go long dae. Narawan hem smol and lead go long laef. (Matthew 7:13, 14) Hem purpose bilong Jehovah God for olketa mas preachim gud nius bilong Kingdom evriwea long world, mekem pipol savve chusim stretfala road. (Matthew 24:14) Dastawe, pipol evriwea go ahed for lisin long Kingdom message, and samfala go ahed for chusim laef taem olketa kamap “datkaen wea garem faith for keepim soul laef.” (Hebrews 10:39) Mifala invaetem iu for read abaotem wei for chusim laef wea samfala pipol long Fiji and olketa narafala island bilong South Pacific mekem.
Olketa Trust Long Jehovah
Mere hem still wanfala skulgirl taem hem first herem Kingdom message long 1964. Bikos hem stap long wanfala farawe island, hem no savve meetim tumas Olketa Jehovah’s Witness. Bat bihaen, hem fit for kasem stretfala savve bilong Bible. Long datfala taem, hem maritim wanfala chief bilong vilij. From Mere hem chus for live followim olketa Bible principle, hasband bilong hem witim olketa relative bilong hem treatim hem long raf wei, and pipol long datfala vilij tu lukdaonem hem. Nomata olsem, hem baptaes long 1991.
No longtaem bihaen, hasband bilong Mere, Josua, changem wei bilong hem and hem savve sidaon tu taem Mere storyim Bible witim olketa pikinini bilong tufala. Josua hem stop for attendim Methodist Church. Bat, olsem wanfala chief, hem still lukaftarem olketa vilij meeting wea kamap evri week. Long eye bilong pipol long vilij, Josua hem no loyal, from olketa tingse Methodist Church nao hem nambawan part long living bilong pipol bilong Fiji. Dastawe, pastor encouragem Josua for go bak long religion bilong hem bifor.
Josua no fraet for talemaot hao hem and famili bilong hem chus finis and disaed strong for worshipim Jehovah “witim spirit and truth.” (John 4:24) Long nextfala vilij meeting, paramount chief disaed hao Josua and famili bilong hem mas go aot from datfala vilij olsem pipol wea brekem law. Olketa garem sevenfala day for lusim datfala island and haos bilong olketa, land, and garden—tru nao, evri samting wea olketa needim long living.
Olketa spiritual brata long narafala island helpem Josua and famili bilong hem, and givim olketa ples for stap and land for growim kaikai. Distaem Josua and big son bilong hem baptaes finis, and narafala son serve olsem wanfala wea talemaot gud nius wea no baptaes. No longtaem go nomoa, Mere kamap wanfala regular pioneer (wanfala wea full-taem for talemaot Kingdom). Wei wea olketa chus for servem Jehovah hem mekem olketa lusim position witim olketa material samting, bat olsem aposol Paul, olketa tingim diswan hem samting nating taem olketa markem witim samting wea olketa kasem bihaen.—Philippians 3:8.
Wei for Chus wea Join Witim Conscience
Wei for chus for followim conscience wea kasem training from Bible needim faith and wei for no fraet. Diswan nao samting wea happen long Suraang, wanfala young woman wea just baptaes wea stap long Tarawa, wanfala long olketa island bilong Kiribati. Suraang hem ask for no duim wanfala part long waka bilong hem olsem wanfala nurse long hospital. Olketa no acceptim, and from diswan olketa sendem hem for lukaftarem wanfala smol clinic long wanfala island wea hem farawe from olketa wea garem faith olsem hem.
Hem kastom bilong datfala island for evri niu wan wea just arrive mas mekem wanfala offering long “spirit” bilong ples. Pipol long there bilivim hao sapos eniwan fail for duim diswan hem bae dae. From Suraang nating letem olketa for duim disfala wei for worshipim idol for hem and olketa sekson bilong hem, pipol long vilij hia weit nao for spirit wea kros for skwisim nek bilong hem. Taem no eniting happen long Suraang and olketa sekson bilong hem, planti chance kamap for givim gudfala witness.
Bat olketa test bilong Suraang no finis yet. Samfala young man bilong datfala island ting hem wanfala challenge for switim olketa young woman wea visit. Nomata olsem, Suraang againstim wanem olketa trae for duim long hem and keepim faithful fasin long God. Tru nao, hem fit for serve olsem wanfala regular pioneer, nomata hem duty olsem nurse 24 hour evriday.
Bifor wanfala feast wea olketa mekem for showaot respect long Suraang taem hem redy for lusim datfala island, olketa bigman long vilij talemaot hao hem nao firstfala really missionary wea visitim olketa. From hem stand strong for olketa Bible principle, nara pipol long datfala island lisin long Kingdom message.
Olketa Physical Challenge
Wei wea samfala vilij stap farawe minim pipol bilong Jehovah mas waka hard for share long ministry and for attendim olketa Christian meeting. Tingim example bilong fofala Witness—wanfala man and thrifala woman—wea spendem staka hour for go and kam bak from olketa meeting. Thrifala river nao stap for akrosim long evri gogo hia. Taem wata hem hae, brata hia savve swim akros firstaem, and towim wanfala bigfala pot for kuki wea olketa bag, buk, and kaleko bilong olketa for meeting stap insaed. Then hem swim go bak for helpem thrifala sista hia.
Narafala smol grup, wea attendim olketa meeting long wanfala farawe island bilong Nonouti long Kiribati, feisim olketa difren challenge. Haos wea olketa hipap long hem fitim seven or eitfala pipol nomoa. Olketa narawan wea attend sidaon aotsaed and lukluk go insaed thru long chicken-wire wall bilong hem. Pipol long vilij hia savve lukluk nomoa insaed long datfala ples for meeting taem olketa wakabaot go and kam long naesfala church bilong olketa. Bat, olketa servant bilong Jehovah luksavve hao pipol nao samting wea really luk naes long eye bilong God, no olketa building. (Haggai 2:7) Only sista long disfala island wea baptaes hem olo and hard for wakabaot farawe. Nomata olsem, wanfala young woman, pablisa wea no baptaes hem savve pushim hem raon long wankaen trailer. Olketa barava showimaot wei for tinghae long truth!
Datfala winim 2,100 pablisa wea serve long olketa island bilong Fiji barava disaed strong for go ahed for talemaot gud nius bilong Kingdom bilong God. And olketa barava sure hao planti moa bae kamap “datkaen wea garem faith for keepim soul laef.”
[Map long page 8]
Australia
Fiji