Gud Nius Bilong Peace Kasem Chiapas Highlands
“Long worse kill-kill wea pipol long province bilong Chiapas savve rememberim, 45-fala pipol wea no laek faet, wea insaed diswan hem 13-fala baby, dae taem wanfala grup man kam wea . . . holem samting for kill.” Hem nao report bilong niuspepa “El Universal” long wanem hem happen long Acteal, Chiapas Province, long December 22, 1997.
CHIAPAS hem lastfala province long south bilong Mexico, wea join witim Guatemala. Hem garem long history bilong poor living and wei for no garem staka samting, and long January 1994 wanfala grup bilong native Maya Indian holem samting for kill and startim wanfala faet, anda long nem Ejército Zapatista de Liberación Nacional (EZLN, National Liberation Zapatista Army). Olketa toktok for finisim faet long wei wea followim peace hem slow tumas. Olketa attak, bilong olketa rebel and gavman soldia spillim blood and killim dae planti man. Disfala trabol forcem staka wea no insaed faet long datfala area for ranawe go long sef ples.
Midolwan long nogud trabol olsem, wanfala grup bilong pipol stap wea lovem peace and no teksaed long disfala faet saed long politik. Witim strong, olketa tanem pipol long Kingdom bilong God nomoa olsem hope for finisim olketa problem wea feisim pipol long ples bilong olketa and long full world. (Daniel 2:44) Hu nao olketa? Olketa Jehovah’s Witness. Long wei wea obeyim komand bilong Jesus, olketa trae hard for tekem gud nius bilong Kingdom bilong God long farawe ples long Chiapas highlands. (Matthew 24:14) For preach long taem olsem hem hao, and wanem nao kamaot from diswan?
“Mi Wanfala Jehovah’s Witness”
Adolfo, wanfala young man wea no longtaem go nomoa hem kamap wanfala Kingdom pablisa, hem waka wanday long radio station long Ocosingo. Seknomoa, samwan noknok big long door. Wanfala grup long olketa man wea kavarem hed kwiktaem kam insaed and pointim olketa gun long hed bilong hem. Olketa ran go long rum for toktok insaed long radio, tekovarem olketa equipment long there, and mekem announcement long radio wea sei olketa talemaot war againstim gavman.
Olketa man wea holem gun tan go long Adolfo and orderim hem for joinim faet bilong olketa. Adolfo hem ansa olsem: “Mi wanfala Jehovah’s Witness,” nomata hem no baptaes yet. Hem minim hao Kingdom bilong God nomoa hope for kasem peace, and hem strong for sei no long uniform and gun wea olketa offerim long hem. From olketa luksavve hem disaed strong for no joinim olketa, olketa letem hem go. Taem hem tingim bak samting wea happen long datfala taem, Adolfo hem sei: “Datfala samting wea happen barava strongim faith bilong mi.”
Gogo olketa samting kamap gud lelebet, bat army go ahed for kontrolem datfala ples. Nomata olsem, Adolfo acceptim invitation bilong olketa elder long lokol kongregeson for waka witim wanfala grup bilong olketa Christian wea stap seleva long datfala ples. Long olketa chekpoint wea hem go thru long hem, olketa soldia showim respect long hem taem hem sei hem wanfala Jehovah’s Witness. Bihaen hem baptaes, hem kasem hapi from hem helpem datfala grup wea stap seleva for kamap wanfala kongregeson bilong Olketa Jehovah’s Witness. “Distaem from mi baptaes,” Adolfo hem sei, “mi savve sei witim strong hao mi wanfala Jehovah’s Witness!”
“Jehovah Hem Strongim Mifala”
No longtaem bihaen EZLN talemaot war againstim gavman long radio, evri pipol long taon ranawe. Francisco, wanfala full-taem minister, or pioneer, minim hao Jehovah strongim hem and waef bilong hem long samting wea kasem olketa.
“Mifala disaed for stap long wanfala ples wea man mas wakabaot thri hour for kasem. Wanfala kongregeson long there, so mifala bae stap witim olketa brata. No longtaem bihaen hem taem bilong circuit assembly bilong mifala long Palenque. Mi and waef bilong mi no laek for missim spesol meeting for olketa pioneer, bat mifala faendaot hao EZLN blokem road wea lead go long ples bilong assembly. Mifala disaed for wakabaot thru long bush, wea tekem mifala naenfala hour. Mifala kasem there long taem bilong pioneer meeting, and mifala barava enjoyim, witim full assembly program tu.
“Taem mifala kam bak, mifala faendem hao haos bilong mifala hem bone and olketa stealim evri animal bilong mifala. Only samting wea stap hem wanfala smol bag kaleko. Mifala feel sorre long evri samting wea lus, bat olketa brata long Ocosingo kaen tumas for letem mifala stap long haos bilong olketa. Olketa showim mifala tu hao for waka long samfala samting wea mifala olsem olketa farmer no bin duim bifor. Wanfala brata lanem mi hao for tek foto, narawan hao for fixim shoe. Hem nao hao mi and waef bilong mi fit for saportim mifala seleva kam kasem distaem, and no lusim pioneer service. Taem mifala ting go bak long wanem hem happen, mifala luksavve hao nomata hem no isi for mifala stand strong, Jehovah hem strongim mifala.”
Olketa Frut Bilong Preaching Waka
Olketa Witness long Chiapas Province no letem hard samting and danger stopem olketa for join insaed long wanfala spesol waka for tekem gud nius long pipol long area. Olsem example, long April and May 1995, olketa join witim olketa Christian raonem world wea garem sem biliv long wanfala waka for givimaot Kingdom Nius No. 34, wea garem title wea barava fit Why Nao Laef Fulap Withim Planti Problem?
Midolwan long waka hia—long wanfala ples wea nem bilong hem Pueblo Nuevo—Ciro, wanfala regular pioneer, faendem wanfala famili wea showimaot interest. Hem go bak bihaen long thrifala day and startim wanfala Bible study witim olketa. Bat taem Ciro witim nara fren go bak for go ahed long study witim famili, dadi no stap long haos. Bat, wanfala grup wea werem mask stap wea weitim hem for killim hem. Olketa askem Ciro and fren bilong hem wanem nao tufala kam for and olketa sei for killim dae tufala. Bihaen tufala prea kwaet long Jehovah, tufala Christian hia no fraet for minim hao tufala kam for teachim Bible long famili. From diswan olketa man wea werem mask letem tufala go. Iumi no savve why, bat datfala man long haos nating kam long haos long datfala day.
Wanday klosap thri year bihaen, Ciro sapraes taem wanfala man kam long haos bilong hem. Ciro barava hapi for faendaot hao full famili hia baptaes finis and waka witim wanfala kongregeson long Guatemala! Wanfala girl bilong olketa serve olsem regular pioneer tu.
Tinghae Long Spiritual Kaikai
Nomata long olketa hardfala taem wea go ahed long Chiapas, wanfala distrik overseer reportim hao olketa Witness long ples hia barava tinghae long wei wea hem important for hipap tugeta. (Hebrews 10:24, 25) Hem storyim samting wea happen no longtaem go nomoa long wanfala spesol assembly day, wea shud start long early morning mekem olketa wea kam savve go bak long haos taem hem day yet and sef lelebet. Nomata planti long olketa need for wakabaot insaed long bush for winim thri hour for kasem ples bilong assembly, evriwan sidaon redy bifor 7:00 a.m. Insaed long audience sixfala member bilong EZLN grup stap, olketa lisin and klap hand, from luk olsem olketa enjoyim program. Olketa tu wakabaot thrifala hour for kam long assembly. Twenti long olketa kam tu long Memorial bilong dae bilong Christ, wea kamap long lokol Kingdom Hall.
Wanfala nara young man wea joinim EZLN kasem waka from olketa bigman bilong hem for gardim wanfala part long bush. Taem hem kasem datfala ples, hem faendem hao olketa wea stap long there, wea big haf long olketa nao Jehovah’s Witness, ranawe finis. So hem stap insaed long wanfala emti haos. From hem no garem tumas samting for duim, hem holem samfala buk wea hem faendem long haos and hem start for readim. Olketa buk hia hem olketa buk bilong Watch Tower wea olketa Witness leavim stap. Taem hem stap seleva olsem, disfala young man garem taem for ting raonem samting wea hem readim. Hem disaed for hem mas changem laef bilong hem and no iusim gun bilong hem. No longtaem bihaen, hem faendem olketa Witness and startim Bible study. Insaed sixfala month, hem start for storyim gud nius long narafala pipol. Hem and thrifala member long famili bilong hem wea bifor olketa agree witim EZLN distaem olketa baptaes Christian.
Lukim Gudfala Saed
Nomata evriwan kasem hardfala taem, gud samting kamaot from disfala faet long wei wea tingting bilong pipol long preaching waka hem change and kamap gud. Wanfala elder long taon wea faet hia hem start, talem olsem: “Samting olsem faevfala day bihaen faet hia hem start, mifala organizem preaching waka insaed long taon area and aotsaed tu. Pipol willing tumas for lisin long mifala. Mifala offerim staka Bible literature and startim samfala Bible study. Long wanfala area, planti againstim truth bifor, bat from trabol hia, distaem olketa lisin, studyim Bible, and kam long olketa meeting and assembly.”
Olketa brata hapi long wei wea olketa fit for go ahed long evri theocratic waka nomata staka nogud samting happen raonem olketa. Army bilong gavman and EZLN savve olketa brata go ahed witim assembly bilong olketa, wea strongim olketa long spiritual wei. Olketa visit bilong traveling overseer barava strongim olketa for go ahed long preaching waka. Hem interesting hao samfala wea insaed long faet planti taem encouragem olketa Witness for go ahed long preaching waka bilong olketa.
Nomata olketa test and hardfala taem wea pipol long Chiapas mas feisim hem katdaon bihaen samfala year, hem no finis yet. Nomata wanem, wan samting hem sure—Olketa Jehovah’s Witness strong for no stop for go ahed long waka bilong olketa for tekem gud nius bilong peace from Word bilong God, Bible, long olketa pipol. (Acts 10:34-36; Ephesians 6:15) Olketa luksavve, olsem profet Jeremiah talem, hao “wei bilong man hem no bilong hem. Hem no bilong man wea wakabaot for disaedem gogo bilong hem.” (Jeremiah 10:23) Only Kingdom bilong God long hand bilong Son bilong hem, Jesus Christ, savve finisim evri samting wea no followim justice and poor living long disfala world. —Matthew 6:10.
[Map long page 9]
Gulf of Mexico
CHIAPAS
GUATEMALA
Pacific Ocean
[Credit Line]
Mountain High Maps® Copyright © 1997 Digital Wisdom, Inc.
[Piksa long page 9]
Olketa Witness go aot long ministry long Chiapas highlands