Why Nao Iu Servem God?

Wanfala king wea fraet long God hem wantaem givim disfala advaes long son bilong hem: “Savve long God bilong dadi bilong iu and servem hem witim wanfala full heart and witim wanfala hapi soul.” (1 Chronicles 28:9) Hem klia hao, Jehovah wantem olketa servant bilong hem for servem hem witim heart wea barava thankiu and tinghae.

OLSEM Olketa Jehovah’s Witness, iumi kwiktaem for agree hao taem iumi firstaem herem olketa explainim olketa Bible promis, heart bilong iumi fulap witim thankiu. Evriday, iumi lanem niu samting abaotem olketa purpose bilong Jehovah. Taem iumi go ahed for lanem moa samting abaotem Jehovah, wei wea iumi want for servem hem “witim wanfala full heart and witim wanfala hapi soul,” hem kamap moa strong.

Planti wea kamap Jehovah’s Witness go ahed for servem Jehovah witim bigfala hapi for full laef bilong olketa. Nomata olsem, samfala Christian start long gudfala wei, bat gogo, olketa forgetim nao olketa barava important reason wea muvim iumi for servem God. Waswe, diswan happen long iu? Sapos olsem, no lus hope. Man savve kasem bak hapi wea hem lusim. Hao nao olsem?

Tingim Olketa Blessing Bilong Iu

First samting, ting raonem olketa blessing wea iu kasem from God evriday. Tingim olketa gudfala present wea Jehovah givim: olketa difren kaen samting wea hem creatim—wea helpem evriwan nomata olketa garem hae position long living and selen or nomoa—olketa samting hem provaedem for iu garem kaikai and drink, health bilong iu, savve wea iu garem abaotem truth long Bible, and main samting, Son bilong hem olsem wanfala present. Dae bilong hem mekem wei for iu savve servem God witim klinfala conscience. (John 3:16; James 1:17) Taem iu ting raonem gudfala fasin bilong Jehovah moa and moa, wei wea iu tinghae long hem bae grow moa and moa tu. Heart bilong iu bae muvim iu for servem hem from iu barava tinghae long evri samting wea hem duim. Bae iu start for feel moa olsem man wea raetem Psalm wea raet: “Planti samting iuseleva nao duim finis, O God bilong mi Jehovah, nomata olketa nambawan waka bilong iu and tingting bilong iu abaotem mifala; no eniwan hem olsem iu. . . . Olketa staka tumas for mi storyim.”—Psalm 40:5.

Olketa toktok hia David nao raetem, wanfala man wea laef bilong hem fulap witim olketa problem. Taem hem young man yet, planti taem hem mas ranawe go haed bikos wicked King Saul witim olketa security man bilong hem lukaotem hem for killim hem dae. (1 Samuel 23:7, 8, 19-23) David garem olketa wik point bilong hemseleva, wea hem mas deal witim tu. Hem talemaot diswan long Psalm 40: “Olketa trabol stap raonem mi gogo mi no savve nambarem olketa nao. Olketa mistek wea kasem mi kamap staka winim wanem mi luksavve long hem; namba bilong olketa kamap moa big winim namba bilong olketa hair long hed bilong mi.” (Psalm 40:12) Tru, David garem olketa trabol, bat olketa no barava winim hem evribit. Hem lukluk nomoa long olketa wei wea Jehovah hem go ahed for blessim hem, nomata hem garem olketa problem, and hem faendem hao olketa blessing hia barava winim olketa trabol bilong hem.

Taem iu feelim hao olketa problem bilong iu or olketa feeling bilong iu for tingse iu no fit, barava winim iu, hem gud for stop and for kaontem olketa blessing bilong iu, olsem David duim. Tru nao, fasin for tinghae long olketa blessing hia muvim iu for dedicatem iuseleva long Jehovah; olketa tingting olsem savve helpem iu tu for kasem bak moa hapi wea iu lusim and helpem iu for servem God from wanfala heart wea tinghae.

Olketa Meeting Bilong Kongregeson Savve Help

For join witim wei for ting raonem seleva gudfala fasin bilong Jehovah, iumi need for kaban witim olketa nara Christian. Wei for hipap evritaem witim olketa man, woman, and young pipol wea lovem God and wea disaed strong for servem hem savve encouragem iumi. Example bilong olketa savve muvim iumi for duim waka witim full-soul long service bilong Jehovah. Wei wea iumi stap long Kingdom Hall savve encouragem olketa tu.

Hem tru, taem iumi kam bak long haos bihaen iumi waka hard for full day, or taem iumi wikdaon from wanfala problem or wik point bilong iumi, maet hem no isi for ting for attendim wanfala meeting long Kingdom Hall. Long olketa taem olsem, maet iumi need for bossim iumi seleva, olsem iumi ‘whipim body bilong iumi,’ mekem iumi obeyim datfala komand for hipap witim olketa nara Christian.—1 Corinthians 9:26, 27; Hebrews 10:23-25.

Sapos iumi mas duim olsem, waswe, hem minim iumi no lovem Jehovah? Nomoa nao. Olketa mature Christian long taem bifor mas barava trae hard for duim will bilong God. (Luke 13:24) Aposol Paul hem wanfala Christian wea olsem. Hem talemaot feeling bilong hem long wei olsem: “Mi savve insaed long mi, hem nao, insaed long body bilong mi, no eni gud samting hem stap; from wei for wantem hem stap insaed long mi, bat wei for duim gudfala samting hem no stap. From gud samting wea mi wantem mi no duim, bat nogud samting wea mi no wantem hem nao wanem mi go ahed for duim.” (Romans 7:18, 19) And hem talem olketa Christian: “Sapos, mi talemaot gud nius, hem no samting for mi praod long hem, from mi barava mas duim diswan. . . . Sapos mi duim diswan long willing wei, mi garem wanfala reward; bat sapos mi duim againstim will bilong mi, nomata olsem, mi garem wanfala wei for serve wea olketa trustim mi for duim.”—1 Corinthians 9:16, 17.

Olsem planti pipol, Paul garem olketa wik point saed long sin wea holem bak wei wea hem want for duim stret samting. Nomata olsem, hem faet hard againstim olketa wik point hia, and klosap evritaem, hem win. Tru nao, Paul no duim diswan from strong bilong hemseleva. Hem raet: “Long evri samting mi kasem strong from datwan wea givim paoa long mi.” (Philippians 4:13) Jehovah, datwan wea givim strong long Paul, bae givim strong long iu for duim wanem nao hem stret sapos iu ask for help bilong hem. (Philippians 4:6, 7) So, “faet hard for disfala faith,” and Jehovah bae blessim iu.—Jude 3.

Iu no need for duim disfala faet seleva. Insaed long olketa kongregeson bilong Olketa Jehovah’s Witness, olketa mature Christian elder, wea go ahed strong long datfala “faet for disfala faith” bilong olketa seleva, stap redy for helpem iu. Sapos iu go long wanfala elder for kasem help, hem bae trae for “tok kaen” long iu. (1 Thessalonians 5:14) Goal bilong hem, hem for kamap “olsem wanfala ples for haed from wind and wanfala ples for haed from bigfala rain.”—Isaiah 32:2.

“God hem love,” and hem wantem olketa servant bilong hem for servem hem from olketa lovem hem. (1 John 4:8) Sapos wei wea iu lovem God hem need for kamap strong moa, duim olketa samting wea fitim olsem iumi storyim finis. Bae iu hapi from iu duim.