Lukaotem Eniwan wea Fit Long Kenya

KENYA hem wanfala kantri wea garem planti samting wea barava luk naes tumas. Olketa forest wea grow gud, bigfala level ples, olketa desert wea hot fogud, and olketa maunten witim snow antap mekem disfala land luk naes tumas. Hem hom bilong winim wan million wildebeest and datfala rhino wea samfala nomoa stap laef distaem. Man savve lukim tu olketa bigfala grup giraffe wea muv akros long grass area.

Staka, tu, olketa bird long skae, olketa strongfala eagle, and planti thousand color bird wea sing and mekem skae fulap witim hapi singsing bilong olketa. And hard for iu no lukim olketa elephant and lion. Man bae nating forgetim olketa samting wea hem lukim and herem long Kenya.

Bat, nara saond stap tu wea pipol herem evriwea long disfala land wea luk naes tumas. Hem saond bilong planti thousand voice wea talemaot wanfala message bilong hope. (Isaiah 52:7) Pipol from winim 40 difren tribe and languis herem olketa voice hia. Long disfala wei, Kenya hem land wea barava luk naes long spiritual wei tu.

Planti pipol long Kenya garem feeling for religion and willing for story abaotem olketa spiritual samting. Nomata olsem, for faendem pipol for story witim hem wanfala challenge, bikos Kenya, olsem planti nara kantri, kasem wanfala change.

Hardfala taem saed long selen forcem planti for changem living bilong olketa. Olketa woman, wea bifor waka long haos, distaem waka long olketa office or marketem olketa frut, vegetable, fish, and hom basket long saed road. Olketa man duim kaen waka wea mekem man taed for staka hour for trae for provaed for famili bilong olketa. Nomata pikinini, witim smolfala hand wea fulap witim peanut and egg wea kuk finis, wakabaot long road for sellim diswan. From diswan, tu-thri pipol nomoa stap long haos long midol day. Kaen living olsem mekem need for olketa wea talemaot gud nius bilong Kingdom for mekem samfala change.

Olketa kongregeson bilong Olketa Jehovah’s Witness kasem advaes for targetim pipol wea no stap long haos, wea go aot for duim wanem olketa duim evriday, and tu olketa fren, relative, bisnis pipol, and olketa wakfren. And olketa brata duim diswan, olketa story witim pipol long eni ples wea olketa savve faendem. (Matthew 10:11) Waswe, eni gud samting kamaot from wei wea olketa trae hard long diswan? Yes! Lukim samfala example.

Olketa Relative—Olketa Klos Neiba Bilong Iumi

Kapitol bilong Kenya, Nairobi, garem samting olsem thri million pipol. Long east saed bilong datfala taon wanfala man stap wea bigman long army bifor, and for longfala taem hem no laekem Olketa Jehovah’s Witness, bat, long wei wea mekem hem feel sorre, son bilong hem wanfala Witness. Long wanfala month bilong February, datfala bigman long army bifor hem travel for 160 kilometer go kasem haos bilong son bilong hem long Nakuru, taon long Rift Valley. Taem hem visit, datfala son givim hem wanfala present—datfala buk Savvy Wea Lead Go long Laef Olawe.* Datfala dadi acceptim buk hia and hem go.

Taem hem kasem bak haos, disfala man givim datfala buk long waef bilong hem, wea start for readim, bat no luksavve Olketa Jehovah’s Witness nao pablisim. Isisi, Bible truth start for kasem heart bilong hem, and hem sharem datfala information witim hasband bilong hem. From hem interest for savve, hem tu start for readim datfala buk. Taem tufala faendaot hu nao pablisim buk hia, tufala luksavve hao pipol no talem tru samting long olketa abaotem Olketa Jehovah’s Witness. Tufala meetim olketa Witness wea stap klosap and startim wanfala Bible study. From samting wea olketa seleva readim long datfala buk, olketa luksavve hao hem no Christian wei for iusim or sellim tobacco. (Matthew 22:39; 2 Corinthians 7:1) Tufala no hol bak bat distroem evri smoke wea stap long stoa bilong tufala. Bihaen samfala month tufala kasem mark olsem pablisa wea no baptaes, and no longtaem bihaen, tufala baptaes long distrik convention.

Wanfala Spesol Samting Kamaot Long Rabis

Long samfala sekson long taon area, olketa vilij kamap big and planti thousand pipol stap long there. Long hia man savve lukim staka haos wea olketa wakem from mud, timba, pis metal, or kapa. Taem hem hard for faendem waka long bisnis or factory, pipol duim samting seleva for kasem selen. Olketa Jua kali (Swahili languis for “strongfala sun”) wakman waka long sun, wakem olketa sandol from tyre bilong trak or olketa kerosene lamp from tin wea pipol torowe finis. Nara pipol lukluk insaed ples wea olketa torowe and hipimap rabis for faendem eni pepa, tin, and botol for iusim moa.

Waswe, wanfala spesol samting savve kamaot long rabis? Yes! Wanfala brata ting go bak: “Wanfala man wea luk raf, strong, and no klin, karem wanfala big plastic bag fulap witim olketa olo niuspepa and magasin and wakabaot kam long area bilong Assembly Hall bilong mifala. Bihaen hem talem mi nem bilong hem William, hem ask: ‘Iu garem eni niufala Wastaoa magasin?’ Mi fraet lelebet, from mi no sure wanem nao idea bilong man hia. Taem mi showim hem faevfala magasin, hem lukluk long evriwan wanwan and sei: ‘Bae mi tekem evriwan.’ Mi sapraes, and go bak long rum bilong mi and tekem kam datfala buk You Savvy Stop All-the-way long Paradise long Earth.a Mi showim hem datfala piksa bilong Paradaes and minim hao mifala studyim Bible witim pipol for no kost. Then mi talem idea: ‘William, waswe sapos iu kam tumoro, and iumi start for study?’ And hem duim datwan!

“Wanfala Sunday hem firstaem for hem kam long meeting. Mi nao givim pablik tok long datfala day. Taem William kam insaed, hem kwiktaem lukluk long audience, lukim mi long stage, and hem ran go aot. Bihaen mi askem hem why nao hem duim datwan. Hem ansa witim shame: ‘Olketa pipol klin fogud. Hem mekem mi seksek.’

“Taem William muv ahed long study bilong hem, Bible truth start for changem laef bilong hem. Hem swim, katem hair bilong hem, werem kaleko wea klin and luk gud, and no longtaem bihaen hem evritaem kam long olketa meeting. Taem olketa releasem datfala buk Savvy Wea Lead Go long Laef Olawe, mitufala start for studyim. Long semtaem, hem givim finis tufala tok long Theocratic Ministry Skul and kamap pablisa wea no baptaes. Mi barava hapi for welkamim hem olsem spiritual brata bilong mi taem hem baptaes long spesol assembly day.”

Long wea nao William start for luksavve hao Wastaoa magasin hem barava spesol samting? “Mi faendem samfala midol long olketa pepa wea olketa torowe long rabis.” Yes, hem faendem wanfala spesol samting long ples wea iumi no expectim!

Givim Witness Long Ples for Waka

Waswe, iumi evritaem redy for eni chance for givim enitaem witness long ples wea iumi waka? James, wanfala elder long wanfala kongregeson long Nairobi kasem truth long disfala wei. Gogo, hem tu garem savve for iusim disfala wei for kasem nara pipol. Olsem example, wantaem James lukim wanfala man wea waka witim hem kam long office and hem werem wanfala badge wea garem toktok “Jesus Sevem.” Followim samting wea Philip, datfala man for talemaot gud nius, hem duim, James askem datfala wakfren: “Waswe, iu minim datfala toktok?” (Acts 8:30) Datfala kwestin mekem gudfala story kamap. Wanfala Bible study hem start, and bihaen, datfala man baptaes. Waswe, James win witim olketa narawan tu? Letem hem minim:

“Mitufala Tom waka long sem company. Planti taem mifala go tugeta long company bas. Wan morning, mifala sidaon tugeta. Mi readim wanfala buk bilong iumi, and mi holem long wei for mek sure Tom isi for lukim. Followim samting wea mi hope for hem, diswan kasholem interest bilong hem, and mi hapi tumas for letem hem iusim buk bilong mi. Hem laekem tumas samting wea hem readim and acceptim wanfala Bible study. Distaem hem and waef bilong hem kamap servant bilong Jehovah wea baptaes.”

James sei moa: “Planti taem long lunch spell long company, samfala barava interesting story kamap. Long tufala taem olsem, mi meetim Ephraim and Walter. Tufala evriwan savve mi wanfala Witness. Ephraim interest for minim why nao planti pipol againstim Olketa Jehovah’s Witness. Walter garem olketa kwestin abaotem wanem nao difren midolwan olketa Witness and olketa nara religion. Tufala evriwan barava satisfae witim olketa ansa from Bible wea mi givim and agree for study. Ephraim muv ahed kwiktaem. Gogo hem and waef bilong hem dedicatem laef bilong tufala long Jehovah. Distaem hem serve olsem wanfala elder and waef bilong hem regular pioneer. Bat from pipol strong for againstim Walter, hem torowem study buk bilong hem. Gogo, from mi no givap long hem, hem start moa for study. Hem tu enjoyim privilege distaem for serve olsem wanfala elder.” Total bilong 11-fala pipol kamap olketa trufala Christian from James kasholem chance for witness long olketa wea hem waka witim.

Nambawan Samting wea Happen

Long wanfala smol vilij long saed sea long Lake Victoria, olketa fren and relative hipap for wanfala dae. Midolwan long olketa wanfala olo Witness stap. Hem go story witim wanfala skul teacher wea nem bilong hem Dolly and minim long hem hao nao man wea dae and purpose bilong Jehovah for finisim dae for olowe. Taem hem luksavve teacher hia interest, hem promis olsem: “Taem iu kasem bak taon bilong iu, wanfala missionary bilong mifala bae kam long iu for teachim iu Bible.”

Taon wea Dolly stap hem mek-thri long olketa bigfala taon long Kenya. Fofala Witness missionary nomoa serve long there long datfala taem. Datfala olo brata hem no talem eni missionary long datfala taon for visitim Dolly. Hem feel sure nomoa diswan bae happen. And hem olsem! Shortfala taem bihaen, wanfala missionary sista meetim Dolly and startim wanfala study witim hem. Dolly hem baptaes distaem, young dota bilong hem joinim Theocratic Ministry Skul, and tufala son bilong hem baptaes. Hem hapi tu for attendim Pioneer Service Skul.

Lukaftarem Namba wea Grow

Wei for mekhae long enitaem witnessing helpem samfala thousand moa for herem gud nius long Kenya. Winim 15,000 pablisa busy distaem long disfala important waka, and winim 41,000 attendim datfala Memorial bilong dae bilong Christ last year. Long full Kenya, planti taem namba wea attendim meeting hem tufala taem winim namba bilong olketa pablisa. Diswan mekem bigfala need kamap for olketa Kingdom Hall.

Olketa wakem olketa Kingdom Hall long olketa bigfala taon and olketa farawe ples tu. Wanfala long olketa hem long wanfala farawe taon long Samburu distrik, samting olsem 320 kilometer northeast from Nairobi. Long 1934, olketa nemem datfala taon Maralal, wea minim “shaen” long Samburu languis, bikos firstfala kapa ruf long there hem barava shaen long sun. Sixti-tu year bihaen nara building kamap wea garem kapa ruf long Maralal. Hem “shaen” tu long really wei and long spiritual wei bikos hem nao ples for trufala worship long datfala area.

Long disfala farawe area long Kenya 15-fala pablisa duim nambawan waka for buildim first Kingdom Hall. Olketa short long selen so olketa brata depend long olketa bush material. Olketa wakem olketa wall from red graon wea olketa tuwetem and pushim midolwan long olketa post. Bihaen olketa gagem siti bilong buluka witim asis and smoothim long wall, wea savve stap gud for longfala taem.

For tekem olketa post for datfala building, olketa brata kasem permission for katem olketa tree. Bat olketa mas go tenfala kilometer long bush for katem. Olketa brata and sista mas wakabaot kasem bush, katem olketa tree, katem branch, and karem olketa post kam long construction ples. Wantaem, taem olketa wakabaot kam from bush, olketa police stopem olketa brata, and sei olketa no garem stretfala permission. Olketa police talem wanfala spesol pioneer hao olketa arrestim hem bikos hem katem olketa tree. Wanfala sista, wea olketa police and planti long datfala community savve long hem, talemaot: “Sapos iu arrestim brata bilong mifala, iufala mas arrestim mifala evriwan, bikos mifala evriwan nao katem olketa tree!” Then datfala policeman letem evriwan go.

From olketa wild animal stap long bush, hem danger ples for wakabaot. Wanday wanfala sista katem daon wanfala tree. Taem tree hia foldaon, hem lukim wanfala animal jamp and ranawe. From hem lukim lelebet brown color hem tingse hem wanfala impala nomoa, bat bihaen taem hem lukim olketa footprint hem luksavve hem wanfala lion! Nomata danger olsem stap, olketa brata wakem finis datfala hall, and hem stap olsem samting wea “shaen” for praisem Jehovah.

February 1, 1963, hem wanfala important day long theocratic history bilong Kenya. Long datfala day first branch office hem open, wea garem wanfala rum nomoa wea 7.4 square meter. October 25, 1997, hem nara barava important taem long theocratic history bilong Kenya—day for dedicatem wanfala niu Bethel wea 7,800 square meter! Disfala project hem barava nambawan end long thrifala year bilong loyal waka. Olketa volunteer from 25 difren kantri changem wanfala pis land wea 3.2 hectare and fulap witim mud and olketa rabis grass, for kamap wanfala naesfala garden wea fitim for niu branch office, wea garem rum for 80 member bilong datfala Bethel famili.

Iumi garem evri reason for hapi long samting wea Jehovah duim for pipol bilong hem. Iumi thankiu long hem for muvim heart bilong olketa servant bilong hem for kamap moa waed and strong for lukaotem eniwan wea fit long Kenya, mekem hem kamap land wea barava luk naes long spiritual wei.

[Footnote]