Report Bilong Olketa wea Talemaot Kingdom

India​—“Wan Mind Midolwan Difren Samting”

“WAN MIND Midolwan Difren Samting” hem toktok wea planti iusim for minim hao full kantri long India waka tugeta. For kasem wan mind long disfala big kantri wea fulap witim olketa difren kastom, languis, religion, tribe, kaleko, and kaikai hem no isi tumas. Bat, iumi savve lukim kaen wan mind olsem long office bilong Olketa Jehovah’s Witness long India, nomata olketa volunteer wea stap and waka long there kam from planti state and union territory and toktok long planti difren languis.

• Meetim Rajrani—wanfala young woman from Punjab, long barava northwest bilong India. Taem Rajrani long skul, wanfala class fren bilong hem start for studyim Bible witim Olketa Jehovah’s Witness. Young girl hia trae for mekem Rajrani interest long Bible. From disfala class fren no savve gud long English and Wastaoa hem no stap long Punjabi languis long datfala taem, hem askem Rajrani for helpem hem for transleitim story bilong magasin. Samting wea Rajrani readim long Wastaoa start for muvim hem long bigfala wei wea gogo nomata dadi and mami bilong hem againstim hem, hem muv ahed go kasem taem wea hem dedicatem laef bilong hem long Jehovah God. Long distaem hem waka long India Bethel, and hem duim sem samting wea openem eye bilong hem long truth. Hem transleitim olketa Christian pablikeson long Punjabi languis!

• Tingim tu Bijoe, wea kam from difren part bilong India—disfala southwestern state bilong Kerala. Olketa aotem Bijoe from hae skul from hem no teksaed insaed long olketa celebration wea mekhae long kantri. Bihaen long wanfala longfala kot case wea end ap long wanfala nambawan win for trufala worship, Bijoe go bak moa long skul.a Hem go tu long college bihaen. Bat, nogud fasin long there affectim conscience bilong hem, so hem finis insaed long first term bilong hem. Distaem bihaen hem stap long Bethel for tenfala year, hem feel olsem hem kasem moa gud samting from hem wanfala member bilong Bethel famili wea garem wan mind nomata evriwan difren, winim sapos hem bin aftarem education wea moa hae.

• Norma and Lily tufala winim 70 year and stap olsem widow for planti year. Each wan finisim winim 40 year long full-taem service. Lily waka long branch for samting olsem 20 year olsem wanfala wea transleit long Tamil languis. Norma stap long Bethel for 13 year finis bihaen hasband bilong hem dae. Antap long nambawan example saed long wei for waka gud, tufala barava helpem wan mind bilong full Bethel famili. Tufala hapi tumas for garem visitor, and tufala enjoyim wei for kaban witim olketa young wan long famili, for sharem olketa hapi bilong staka year bilong Christian living. Olketa young wan tu invaetem tufala for kam kaban long rum bilong olketa, and olketa givim help wea tufala needim. Tru tumas tufala nambawan example!

From olketa winim olketa difren samting wea savve kosim trabol and wei for divaed long planti ples, olketa volunteer hia hapi for waka tugeta for servem narafala pipol olsem member bilong Bethel famili long India.—Psalm 133:1.

[Footnote]

[Piksa Credit Line long page 8]

Background: Mountain High Maps® Copyright © 1997 Digital Wisdom, Inc.