LESON 21

Wanem Nao Bethel?

Tufala Jehovah’s Witness waka long Art Department long Bethel — Art Department, U.S.A.

Wanfala Jehovah’s Witness waka long ples for printim olketa buk long Bethel long Germany — Germany

Wanfala Jehovah’s Witness waka long laundry long Bethel long Kenya — Kenya

Olketa waiter setem olketa tebol long dining rum long Bethel long Colombia — Colombia

Bethel hem wanfala Hebrew nem wea minim “Haos bilong God.” (Genesis 28:17, 19, footnote) Datfala nem hem barava fitim for olketa building wea Olketa Jehovah’s Witness wakem evriwea long world for olketa organizem and sapotim waka for preach. Governing Body stap long world hedquarter long New York State, U.S.A., and hem lukaftarem waka wea gohed long olketa branch office wea stap long staka kantri. Evri branch office garem olketa wea waka long hem and mifala kolem olketa wanfala Bethel famili. Olketa olsem wanfala famili bikos olketa stap tugeta, waka tugeta, kaikai tugeta, and wan mind for studyim Bible tugeta.—Psalm 133:1.

Hem spesol ples wea olketa famili member hia willing tumas for duim waka. Long evri Bethel, olketa Christian man and woman stap wea barava willing for duim wanem God hem laekem and olketa duim waka for Kingdom full taem. (Matthew 6:33) No eniwan long olketa kasem pei, bat olketa kasem rum for stap, kaikai, and smol allowance for peim samting wea olketa needim. Evriwan long Bethel garem waka for duim. Samfala waka long office, or long kitchen. Samfala waka for printim olketa buk, waswas kaleko, duim klining, maintenance, or olketa nara waka.

Ples wea evriwan busy long waka for sapotim preaching. Main goal bilong evri Bethel hem for givim chance for staka pipol savve lanem tru samting wea Bible teachim. Olsem example, tingim disfala brochure. Governing Body nao lukaftarem waka for redyim disfala brochure. Olketa iusim Internet for sendem diswan go long staka handred transleison team evriwea long world wea transleitim and then sendem go moa long samfala branch office wea garem big machine wea savve kwiktaem printim staka thousand brochure olsem. Then olketa sendem olketa brochure hia go long winim 110,000 kongregeson. Olketa Bethel famili nao duim evri waka hia for sapotim barava important waka for preachim gud nius bifor end hem kam.—Mark 13:10.

Hu nao waka long Bethel, and wanem nao olketa kasem for helpem olketa duim waka bilong olketa?
Wanem important waka nao evri Bethel sapotim?