Wei wea God Letem Wei for Safa Hem Klosap Finis
EVRIWEA iu lukluk, wei for safa hem stap. Samfala pipol kasem diswan from olketa seleva nao kosim. Olketa kasem sik wea kamaot from dirty fasin or kasem nogud samting wea kamaot from wei for iusim drug or alcohol or wei for smoke. Or olketa feisim olketa problem long health from wei bilong olketa for kaikai. Bat, planti wei for safa hem kamaot from olketa samting wea man hard for kontrolem: war, ethnic faet, criminal fasin, poor living, hangre, sik. Samfala samting moa wea olketa man no savve kontrolem hem wei for safa wea join witim wei for olo and dae.
Bible hem remindim iumi hao “God hem love.” (1 John 4:8) So, why nao wanfala loving God letem evri wei for safa hia go ahed for planti handred year? Wanem taem nao bae hem stretem disfala problem? For ansarem olketa kwestin olsem, iumi need for lukluk gud long purpose bilong God for olketa man. Diswan bae helpem iumi for minim why nao God letem wei for safa and wanem nao hem bae duim abaotem diswan.
Present Bilong Free Will
Taem God creatim firstfala man, hem wakem moa samting winim wanfala body witim wanfala brain nomoa. And tu, God no creatim Adam and Eve for olsem machine wea no garem tingting. Hem putim fasin bilong free will insaed long tufala. And datwan hem wanfala nambawan present, from “God lukim evri samting wea hem wakem and, lukim! hem gud tumas.” (Genesis 1:31) Tru nao, “waka bilong hem perfect.” (Deuteronomy 32:4) Evriwan long iumi tinghae long disfala present bilong free will bikos iumi no wantem samwan for bossim evri tingting and akson bilong iumi mekem iumi no chusim eni samting.
Bat, waswe, wei for iusim datfala nambawan present bilong free will no garem spialaen? Insaed olketa direction for olketa Christian bifor, Word bilong God ansa olsem: “Stap olsem free pipol, bat iusim freedom bilong iufala, no olsem excuse for duim nogud fasin, bat olsem olketa slave bilong God.” (1 Peter 2:16) For helpem evriwan, olketa spialaen mas stap. So, law hem stap for saportim disfala free will. Sapos nomoa, evri samting bae olabaot.
Law Bilong Hu?
Law bilong hu nao savve givim stretfala spialaen bilong freedom? Ansa for disfala kwestin hem join witim main reason why God hem letem wei for safa. From God nao creatim olketa man, hem savve gud long wanem law nao olketa need for obeyim for helpem olketa seleva and nara pipol. Bible hem talem diswan olsem: “Mi, Jehovah, mi nao God bilong iufala, Datwan wea teachim iufala for helpem iufala seleva, Datwan wea mekem iufala followim road wea iufala mas wakabaot long hem.”—Isaiah 48:17.
Hem klia, wanfala important point hem olsem: God no wakem olketa man for independent from hem. For kasem hapi and win, olketa mas obeyim olketa raeteous law bilong hem, from hem nao wei wea hem wakem olketa. Profet bilong God Jeremiah hem sei: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem.”—Jeremiah 10:23.
God wakem olketa man for obeyim olketa physical law, olsem law bilong gravity. Long sem wei, hem wakem olketa man for obeyim olketa law bilong hem saed long fasin, wea hem wakem for bringim wan mind long community. So from gudfala reason Word bilong God encouragem iumi: “Trust long Jehovah witim full heart bilong iu and no depend long savve bilong iuseleva.”—Proverbs 3:5.
Dastawe, famili bilong olketa man no savve win for bossim olketa seleva taem olketa no stap anda long rul bilong God. From olketa trae for kamap independent from hem, pipol planim living, bisnis, politik, and religion wea againstim narawan, and ‘man hem bossim man and spoelem hem.’—Ecclesiastes 8:9.
Wanem Nao Rong?
God givim first parents bilong iumi, Adam and Eve, wanfala perfect start. Tufala garem perfect body and mind and wanfala paradaes garden olsem hom. Sapos olketa stap anda long rul bilong God, tufala bae still stap perfect and hapi. Gogo, tufala bae kamap parents bilong evri perfect, hapi famili bilong olketa man wea stap long wanfala paradaes earth. Datwan nao hem purpose bilong God for famili bilong olketa man.—Genesis 1:27-29; 2:15.
Bat, first parents bilong iumi iusim free will bilong tufala long rongfala wei. Tufala rong for tingse tufala savve win nomata tufala independent from God. Followim free will bilong tufala seleva, tufala step ovarem olketa spialaen bilong olketa law bilong hem. (Genesis, chapter 3) Bikos tufala rejectim rul bilong hem, hem no saportim tufala for kamap perfect moa. ‘Olketa seleva nao duim nogud samting, olketa no stap olsem pikinini bilong hem, nogud samting hem bilong olketa seleva.’—Deuteronomy 32:5.
Start from taem tufala no obeyim God, Adam and Eve start for brekdaon long body and mind. Laef start kam from Jehovah. (Psalm 36:9) So from tufala separatem tufala seleva from Jehovah, firstfala man and woman kamap no perfect and gogo tufala dae. (Genesis 3:19) For fitim genetic law, olketa pikinini bilong tufala bae kasem nomoa samting wea parents bilong olketa garem. And wanem nao datwan? Wei for no perfect and dae. So aposol Paul hem raet olsem: “Thru long wanfala man [Adam] sin hem kam insaed long world and dae hem kam from sin, dastawe dae hem kasem evri man bikos evriwan sin.”—Romans 5:12.
Main Kwestin Hem—Hu Nao Fit for Rul?
Taem Adam and Eve go againstim God, tufala challengem olmaeti rul bilong hem, hem nao, wei wea hem fit for rul. Jehovah fit for finisim tufala evribit and wakem narafala hasband and waef moa, bat datwan bae no stretem kwestin abaotem rul bilong hu nao hem stret and best for pipol. From God givim taem for mekem living bilong olketa kamap beta followim idea bilong olketa, olketa man bae showimaot sapos wei for rul wea independent from God savve win.
Planti thousand year long history bilong olketa man showimaot wanem? Insaed olketa year hia, pipol traem planti kaen living, bisnis, politik, and religion. Nomata olsem, nogud fasin and wei for safa hem go ahed. Tru nao, ‘wicked man and man for giaman kamap worse,’ especially long taem bilong iumi.—2 Timothy 3:13.
Mek-20 century barava win saed long science and bisnis. Bat hem worse taem tu long wei for safa insaed full history bilong olketa famili bilong man. And nomata olketa garem bigfala savve saed long medical, disfala law bilong God hem still tru: Taem olketa man go difren from God—datfala man wea givim laef—olketa kasem sik, kamap olo, and dae. Hem pruvim hao olketa man no savve ‘stretem gogo bilong olketa’!
Olmaeti Rul Bilong God Showaot
For olowe, disfala sorre samting for independent from God showimaot hao rul bilong man wea separate from hem no savve win. Rul bilong God nomoa savve bringim hapi, wan mind, health, and laef. And tu, Word bilong Jehovah God, Holy Bible wea stret evribit, showimaot hao iumi stap long “olketa last day” bilong rul bilong olketa man wea independent from God. (2 Timothy 3:1-5) Wei wea Jehovah hem letem diswan and nogud fasin and wei for safa hem klosap finis.
God hem klosap duim samting for saed bilong olketa man. Bible talem iumi: “Long taem bilong olketa king hia [rul bilong olketa man wea stap distaem] God bilong heven bae startim wanfala kingdom [long heven] wea bae nating savve finis. And datfala kingdom bae no go long eni narafala pipol [olketa man bae no rulim earth moa]. Hem bae smasem and finisim evri kingdom hia [olketa rul distaem], and hemseleva nao bae stap olowe.”—Daniel 2:44.
Wei for vindicatem rul bilong Jehovah God thru long Kingdom bilong hem nao theme bilong Bible. Jesus mekem diswan olsem main teaching bilong hem. Hem sei: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:14.
Taem rul bilong God hem changem rul bilong olketa man, hu nao bae stap laef and hu nao nomoa? Proverbs 2:21, 22 hem promisim iumi: “Olketa wea raeteous [wea mekhae long rul bilong God] bae stap long earth, and olketa wea no garem blame bae stap long hem. Bat olketa wicked pipol [wea no mekhae long rul bilong God], olketa bae finis evribit from earth.” Man wea raetem psalm hem sing olsem: “Lelebet taem nomoa, and wicked wan bae finis . . . Bat olketa wea garem kwaet fasin bae kasem earth, and olketa bae hapi tumas long bigfala peace. Olketa raeteous wan seleva bae kasem earth, and olketa bae stap olowe long hem.”—Psalm 37:10, 11, 29.
Wanfala Nambawan Niu World
Anda long rul bilong Kingdom, olketa wea winim end bilong disfala system bae go insaed wanfala earth wea kamap klin from nogud fasin and wei for safa. Olketa man bae kasem instruction wea God provaedem, and gogo “earth bae fulap witim savve bilong Jehovah olsem wata hem kavarem sea.” (Isaiah 11:9) Disfala teaching wea buildimap man bae bringim living wea garem trufala peace, and wan mind. Dastawe, war, wei for killim dae man, raf fasin, rape, steal, or eni nara criminal fasin bae nomoa nao.
Olketa nambawan physical help bae stap redy for olketa man wea obey insaed niu world bilong God. Evri nogud samting wea kamaot from wei for againstim rul bilong God bae finis evribit. Wei for no perfect, sik, wei for olo, and dae bae kamap samting bilong bifor. Bible hem promisim iumi: “No eniwan bae sei: ‘Mi sik.’” And tu, Bible promis olsem: “Long datfala taem, eye bilong olketa wea blind bae open, and ear bilong olketa wea earpas bae no sat moa. Long datfala taem, man wea cripple bae klaemap olsem wanfala deer, and tongue bilong man wea no savve toktok bae singaot witim hapi.” (Isaiah 33:24; 35:5, 6) Hem bae bigfala hapi for enjoyim nambawan health evriday—for olowe!
Anda long loving lead bilong God, olketa wea stap long datfala niu world bae iusim strong and savve bilong olketa for mekem paradaes kamap evriwea long earth. Poor living, hangre, and wei for no garem hom bae finis evribit, from profesi bilong Isaiah sei olsem: “Olketa bae buildim haos and stap insaed; and olketa bae plantim plantation and kaikaim frut bilong hem. Olketa bae no buildim and narafala man nao stap insaed; olketa bae no plantim and narawan nao kaikaim.” (Isaiah 65:21, 22) Tru nao, “olketa bae sidaon, evriwan anda long vine bilong hem and anda long fig tree bilong hem, and no eniwan bae mekem olketa seksek.”—Micah 4:4.
Earth bae kamap gud from loving kea bilong God and olketa man wea obey. Iumi garem olketa promis hia from Bible: “Drae area and ples wea no garem wata bae singaot from olketa hapi, and olketa drae open ples bae hapi and open olsem saffron. . . . Insaed long wilderness wata bae kamaot, and bigfala wata long ples wea drae.” (Isaiah 35:1, 6) “Planti kaikai bae stap long earth; antap long olketa maunten hem bae fulap.”—Psalm 72:16.
Waswe long planti billion pipol wea dae finis? Olketa wea stap long memory bilong God bae laef bak, from “wanfala resurrection bae kamap for olketa wea raeteous and wea no raeteous.” (Acts 24:15) Tru nao, olketa wea dae finis bae laef bak moa. Olketa bae kasem teaching bilong nambawan truth abaotem rul bilong God and kasem chance for stap olowe long Paradaes.—John 5:28, 29.
Thru long olketa samting hia, Jehovah God bae finisim barava nogud problem bilong wei for safa, sik, and dae wea olketa man slave long hem for planti thousand year. No eni sik! No eni cripple! No eni dae! God “bae aotem evri wata from eye bilong olketa, and dae bae nomoa, sorre and krae and pain bae nomoa tu. Evri samting bifor hem [bae] finis nao.”—Revelation 21:3, 4.
Hem nao hao God bae finisim wei for safa. Hem bae finisim evribit disfala nogud world and mekem kamap wanfala niu system wea “raeteous fasin bae stap.” (2 Peter 3:13) Diswan hem barava gudfala nius! Iumi needim tumas disfala niu world. And iumi bae no need for weit longtaem for lukim diswan. From wei wea olketa profesi bilong Bible fulfill, iumi savve hao niu world hem klosap tumas, and wei wea God letem wei for safa hem klosap finis.—Matthew 24:3-14.
[Box long page 8]
Wei wea Rul Bilong Olketa Man Fail
Abaotem rul bilong olketa man, Chief minister bilong Germany bifor, Helmut Schmidt hem sei: “Iumi olketa man . . . evritaem rulim world long hafhaf wei nomoa, and planti taem long barava nogud wei. . . . Iumi nating rulim long peace evribit.” Human Development Report 1999 hem sei: “Evri kantri reportim living bilong olketa hem go ahed for kamap nogud, fulap witim raoa, moa criminal fasin, moa raf fasin long hom. . . . Olketa danger samting wea savve spoelem world hem kamap big, hem big tumas for world deal witim olketa, and hem fast winim wei wea world duim samting.”
[Olketa Piksa long page 8]
“Olketa bae hapi tumas long bigfala peace.”—Psalm 37:11
[Olketa Piksa Credit Line long page 5]
Mek-thri from antap, mami and pikinini: FAO photo/B. Imevbore; botom, explosion: U.S. National Archives photo