Kwestin From Reader

Wea nao Daniel stap taem thrifala Hebrew kasem test front long bigfala image wea Nebuchadnezzar hem buildim long level ples bilong Dura?

Bible no talem, so no eni man distaem savve pruvim wea nao Daniel hem stap long taem bilong datfala test.

Samfala sei hae position bilong Daniel or wei wea hem kasem olketa spesol privilege wea moa hae winim olketa bilong Shadrach, Meshach, and Abednego, hem mekem Daniel no need for go long level ples bilong Dura. Hem tru, Daniel 2:49 showaot hem garem position wea moa hae winim thrifala fren bilong hem for lelebet taem. Bat iumi no savve pruvim hao diswan mekem hem free from wei for hipap witim olketa narawan front long datfala image.

Samfala moa trae for explainim why nao Daniel hem no stap long there taem olketa sei maet hem go for duim wanfala waka for gavman or maet hem sik and from diswan no savve go attend. Nomata olsem, Bible no talem datwan. Nomata wanem, samting Daniel duim mas barava stret, from sapos nomoa, olketa bigman bilong Babylon wea jealous bae iusim diswan for accusim hem. (Daniel 3:8) Bifor and bihaen disfala samting wea happen, Daniel pruvim hao hem wanfala man for keepim faithful fasin and hem loyal long God nomata wanem kaen test hem feisim. (Daniel 1:8; 5:17; 6:4, 10, 11) So nomata Bible hem no talem why nao Daniel hem no stap long level ples bilong Dura, iumi savve feel sure hem barava nating brekem faithful fasin bilong hem for Jehovah.—Ezekiel 14:14; Hebrews 11:33.