Win Long Federal Constitutional Kot
OLKETA JEHOVAH’S WITNESS long Germany win long Federal Constitutional Kot long Karlsruhe. So olketa duim important step wea mekem gavman luksavve long olketa saed long law.
Olketa Jehovah’s Witness strong for preach long Germany for winim 100 year finis. Olketa winim olketa nogud persecution from tufala raf rul bilong mek-20 century—National Socialist and Communist. Start long 1990, olketa Witness lukaotem wei for gavman registerim olketa olsem wanfala corporation long pablik law. Bihaen tufala gudfala disison wea kot mekem and wanfala disison wea olketa changem, olketa Witness appeal long Federal Constitutional Kot, wea talemaot disison bilong hem long December 19, 2000.
Disison for Olketa Jehovah’s Witness wea Evriwan Agree Long Hem
Sevenfala judge evriwan mekem disison wea saportim Olketa Witness. Olketa judge hia changem wanfala 1997 disison wea Federal Administrative Kot mekem and talem datfala kot for ting raonem moa application bilong olketa Witness.
Datfala Federal Constitutional Kot iusim taem hia for story abaotem wei for fren midolwan Gavman and olketa religion. Main position bilong wanfala religion “no showaot thru olketa biliv bilong hem, bat thru long fasin bilong hem.”
Kot talem tu hao taem olketa Witness go ahed long “Christian wei for no teksaed,” olketa no “attakim principle bilong democratic rul” and olketa “no ting for changem democratic rul witim narafala gavman.” Dastawe, iumi shud no tingim wei wea Olketa Witness no share long olketa samting bilong politik olsem reason for againstim wei wea olketa laek for register.—John 18:36; Romans 13:1.
Kot talem tu hao samfala taem wanfala man wea biliv—nomata hem Witness or samwan bilong narafala religion—savve faendem hao gavman askem samting wea againstim religion bilong hem. Sapos datfala man followim conscience for “obeyim biliv bilong religion bilong hem winim law,” gavman savve minim hem garem gud reason for duim diswan and freedom bilong religion hem insaed diswan.—Acts 5:29.
Disfala disison wea kot mekem kamap main nius. Klosap evri niuspepa long Germany mekem report abaotem disfala case. Evri bigfala television and radio station talemaot olketa report or interview. No enitaem bifor staka pipol herem disfala nem Jehovah long Germany.
[Piksa Credit Line long page 8]
AP Photo/Daniel Maurer