Shaen Olsem Laet Insaed Taon Bilong Laet
Fluctuat nec mergitur, or “Olketa wave hitim hem bat hem no sink daon,” hem nao toktok wea storyim taon bilong Paris.
INSAED 2,000 year wea go pas, Paris, olsem wanfala tokpiksa ship deal witim staka cyclone long wei wea olketa pipol from difren ples kam for tekova and samfala from insaed Paris tu. Distaem Paris hem wanfala taon long world wea barava luk naes, pipol laekem tumas olketa nambawan building, olketa road wea garem planti tree, and olketa museum wea garem bignem long world. Samfala tingim Paris olsem hom bilong olketa wea raetem poetry, paintim piksa, and olketa savveman. Narafala pipol laekem stael kaleko and enjoyim barava naesfala kaikai long there.
From bifor kam, Paris hem wanfala strongfala Catholic taon. Tu handred year bifor, from important part bilong hem insaed wanfala European organization wea garem nem Enlightenment, pipol start for kolem Paris, Taon bilong Laet. Distaem, nomata pipol luksavve or nomoa, tingting bilong datfala taem nao affectim planti pipol bilong Paris winim religion.
Bat, wisdom bilong man, hem no shaenim laet long laef bilong pipol olsem olketa tingse hem bae happen. Planti distaem lukaotem laet long olketa difren wei. For samting olsem 90 year, Olketa Jehovah’s Witness “shaen olsem olketa laet” long Paris. (Philippians 2:15) Olsem olketa sailor wea savve tumas, olketa lane for change fitim eni samting wea maet affectim wei wea olketa hipimap, olsem olketa tokpiksa passenger long ship, “olketa best samting bilong evri nation.”—Haggai 2:7.
Taon wea Preaching Hem Wanfala Challenge
Long 1850, Paris garem 600,000 pipol. Namba bilong pipol distaem hem winim naen million. From hem grow olsem, Paris garem staka difren kaen pipol winim eni nara taon long France. Hem wanfala main ples long world for education, hem garem wanfala long olketa barava oldfala university long world, and samting olsem 250,000 student. Long samfala poor area long Paris, olketa problem for no garem waka and wei for brekem law showimaot nogud saed bilong Paris. Tru nao, for Olketa Jehovah’s Witness talemaot gud nius long evri difren kaen pipol long wei wea pullim interest, hem needim savve and fasin for change fitim need.—1 Timothy 4:10.
Winim 20 million tourist visitim Paris evri year. Olketa maet klaem go ap long Eiffel Tower, wakabaot saed long Seine river, or sidaon long olketa
coffee shop, for enjoyim nomoa. Bat, laef evriday for pipol bilong Paris savve busy fogud. Christian, wanfala full-taem minister hem sei, “Pipol evritaem hariap. Taem olketa kasem haos bihaen waka olketa taed fogud.” For story witim olketa busy pipol olsem hem no isi.
Bat, wanfala bigfala problem for Olketa Jehovah’s Witness long Paris, hem for meetim pipol long haos bilong olketa. Samfala building garem intercom. From criminal fasin hem kamap big, planti taem olketa building garem security system aotsaed main door, and difren man kanduit go insaed. Diswan mas wanfala reason why long samfala area, long evri 1,400 pipol, wanfala nomoa hem Witness. Dastawe, enitaem witnessing and telephone witnessing kamap big. Waswe, Olketa Jehovah’s Witness letem ‘laet bilong [olketa] shaen’ long samfala nara wei?—Matthew 5:16.
Olketa chance and ples for enitaem witnessing hem staka tumas. Martine lukim wanfala woman wea luk sorre tumas hem weitim bas. No longtaem go nomoa, only dota bilong woman hia hem dae. Martine givim hem wanfala brochure wea garem message bilong comfort from Bible abaotem resurrection hope. Then hem no lukim hem for tu-thri month. Taem Martine lukim disfala woman moa, hem startim wanfala Bible study witim hem. Nomata hasband bilong hem againstim hem, datfala woman kamap wanfala witness.
Enitaem Witnessing wea Garem Frut
Pablik transport system long Paris hem wanfala long olketa best wan long world. Datfala Metro wea planti pipol savve long hem garem 5,000,000 passenger evri day. Datfala Châtelet-Les-Halles, central train station bilong Paris wea andanit long graon, hem moa big and moa busy winim eni narawan long world. Staka chance stap for meetim pipol long there. Alexandra iusim Metro evriday for go long waka. Wanday hem story long wanfala young man wea garem disfala sik leukemia. Alexandra givim hem wanfala tract abaotem Paradaes hope. Tufala story abaotem Bible long sem taem and ples evriday for sixfala week. Then wanday datfala man no kam. No longtaem bihaen, waef bilong hem talem Alexandra long telephone for kam long hospital, bikos hasband bilong hem kamap barava nogud. Sorre tumas, taem Alexandra kasem hospital hem dae finis. Bihaen hem dae, waef bilong datfala man muv go long Bordeaux, long southwest long France, and long there olketa Witness visitim hem. Wan year bihaen, Alexandra herem nambawan nius hao datfala widow hem kamap wanfala baptaes Christian Witness bilong Jehovah, wea garem hope for lukim moa hasband bilong hem long resurrection!—John 5:28, 29.
Long wanfala train wea travel from Paris go kasem Limoges, long midol long France, wanfala olo Christian woman story long Renata. Long hom bilong hem Poland, Renata skulim religion, Hebrew, and Greek for faevfala year, bat hem lusim faith long God. Thrifala month bifor, hem prea long God. Nomata hem no barava interest long wanem disfala olo sista storyim and from hem tingse sista hia bae no meetim hem moa, Renata givim telephone namba bilong hem. Bat, datfala sista no givap, and no longtaem bihaen hem mek sure samwan visitim Renata. Taem wanfala Witness hasband and waef visitim hem, Renata hem tingting olsem, ‘Wanem nao tufala bae teachim mi?’ Nomata hem skulim religion, Renata hem hambol for acceptim truth bilong Bible. Hem sei, “Stretawe mi luksavve diswan hem truth.” Distaem hem hapi for sharem message bilong Bible witim nara pipol.
Michèle hem go long skul for lane for draevem trak. Olketa nara student long class start for story abaotem sex bifor marit. Michèle talemaot hao hem no agree witim datwan. Wan week bihaen, teacher, wea nem bilong hem Sylvie, askem hem: “Waswe, iu wanfala Jehovah’s Witness?” Sylvie hem tinghae long tingting bilong Michèle wea garem faondeson long Bible. Sylvie start for studyim Bible, and wan year bihaen hem baptaes.
From Paris garem staka park and garden, olketa hia barava naesfala ples for story witim pipol. Taem hem spel, Josette hem go long wanfala park, wea wanfala olo woman, Aline, hem wakabaot. Josette minim long hem olketa nambawan promis wea stap long Bible. Aline start for studyim Bible, and no longtaem bihaen hem baptaes. Distaem, Aline, wea 74 year, hem wanfala gudfala regular pioneer minister, wea hapi for sharem truth witim nara pipol.
Laet for Evri Kantri
Olketa Witness long Paris no need for go long olketa farawe kantri for meetim pipol from olketa difren ples. Klosap 20 percent bilong namba bilong pipol kam from nara kantri. Olketa garem olketa Christian kongregeson and grup long samting olsem 25 difren languis.
Savve and gudfala tingting planti taem help for mekem gud samting kamaot from disfala spesol preaching assignment. Wanfala Witness from Phillipines hem mekem spesol territory bilong hemseleva. Taem hem go long stoa, hem startim planti Bible study long wei for story witim nara pipol from Phillipines wea hem meetim.
Gud samting kamaot from wei for lukaotem chance for preach long nara pipol. Long December 1996, taem olketa herem wanfala circus wea staka pipol savve long hem bae kam long taon, olketa Witness long wanfala difren languis kongregeson disaed for trae meetim olketa actor. Wan evening bihaen datfala circus show, olketa kasem chance for story witim samfala actor wea go bak long hotel. From olketa mekius long chance for story, olketa offerim 28 Bible, 59 Christian buk, 131 brochure, and 290 magasin. Long end bilong thrifala week wea circus hem stap, wanfala actor ask olsem: “Hao nao mi savve kamap wanfala Jehovah’s Witness?” Narawan hem sei: “Bae mi preach long kantri bilong mi!”
Spesol Samting wea Haed Stap Yet for Faendem
Evriwea wea olketa visitor long Paris lukluk, olketa faendem olketa spesol building from taem bifor kam. Bat, olketa samting wea moa spesol stap for pipol faendem. Aniza hem kam long France witim uncle bilong hem, wanfala bigman long gavman. Aniza evritaem readim Bible long haos. Wanday, taem hem hariap for go aot, wanfala pioneer givim hem tract Why Yu Savvy Trustim Bible. Hem arrange for go bak long week bihaen, and hem startim wanfala Bible study. Famili bilong Aniza barava againstim hem. Hem muv ahed gogo hem baptaes. Hao nao hem ting long privilege bilong hem for sharem truth witim nara pipol? “Firstaem preaching waka hem hard from mi garem fasin for shame. Bat, taem mi readim Bible, hem muvim mi. Mi kanduit garem peace long mind sapos mi no preach.” Planti Witness long Paris garem sem tingting, olketa garem “planti samting for duim insaed long waka bilong Lord.”—1 Corinthians 15:58.
Truth bilong Bible hem shaen tu long samfala niu area aotsaed long Paris, and, showimaot olketa nara “spesol samting.” From hem laek for kasem samfala kaset, Bruce go for visitim fren bilong hem wea just kamap wanfala Jehovah’s Witness. Taem hem kasem haos, Bruce lukim fren bilong hem and samfala narawan storyim Bible, so hem lisin. Hem acceptim offer for studyim Bible bat hem garem samfala problem. “Staka pipol savve long mi long datfala area. Big brata bilong mi hem evritaem insaed faet, and mi arrangem olketa dance party wea laod tumas. Hao nao bae nara pipol ting long wei wea mi study for kamap wanfala Witness?” Nomata olketa evritaem askem hem for arrangem olketa party, Bruce finis for duim datwan. Wan month bihaen hem start for preach: “Evriwan long area laek for savve why nao mi kamap wanfala Witness.” No longtaem bihaen hem baptaes. Gogo, hem kasem privilege for attendim Ministerial Training Skul.
For lukaotem olketa spesol samting needim bigfala waka. Bat, hem givim bigfala hapi taem gud samting kamaot from datwan! Jacky, Bruno, and Damien thrifala man for beikem bred long Paris. Jacky talem hao “hem hard tumas for eniwan meetim mifala from mifala waka olowe and nating stap long haos.” Patrick, wanfala regular pioneer, lukim samfala smol rum antap long wanfala building, and hem tingse samwan maet stap insaed wanfala rum hia. Wan aftanun gud samting kamaot from wei wea hem no givap for trae meetim olketa wea stap, taem hem meetim Jacky. Wanem nao happen? Thrifala fren hia kamap olketa Witness and faendem difren waka wea mekem olketa fit for share long bigfala wei long theocratic waka.
Mekem Wanfala Cyclone Kwaet.
No longtaem go finis, samfala television, radio and niuspepa long France storyim Olketa Jehovah’s Witness olsem wanfala danger sect. Long 1996, olketa Witness waka hard for givimaot winim naen million copy bilong wanfala spesol information tract wea garem title Jehovah’s Witnesses—What You Need to Know. Samting wea kamaot from diswan hem gud tumas.
Olketa trae hard for kasem evriwan. Planti bigman talemaot thankiu for olketa Witness. Wanfala bigman long gavman hem raet olsem: “Wei wea Olketa Jehovah’s Witness givimaot disfala tract hem gud samting. Hem stretem evri laea toktok.” Wanfala doctor hem sei: “Mi weitim information olsem for longtaem finis!” Wanfala man from Paris area hem raet olsem: “Mi readim Jehovah’s Witnesses—What You Need to Know. Mi laek for lanem moa samting and acceptim offer bilong free hom Bible study.” Narawan hem raet: “Thankiu for honest fasin bilong iufala.” Wanfala Catholic woman talem olketa Witness: “Hem gud tumas! Iufala ansarem olketa laea toktok!”
Wanfala spesol hapi samting for planti young Witness long Paris area hem datfala preaching waka wea olketa duim long olketa Catholic World Youth Day long 1997. Nomata hem hotfala day wea winim 35°celsius, samting olsem 2,500 Witness tekpart. Insaed long tu-thri day nomoa, olketa givimaot 18,000 copy bilong brochure A Book for All People long olketa young pipol from raonem full world. And for join witim wei for givim gudfala witness long nem bilong Jehovah and for plantim olketa seed bilong truth, disfala waka strongim olketa young Witness tu. Wanfala young sista, wea kam bak early from holiday bilong hem for share evribit insaed disfala spesol waka, hem raet: “Jehovah garem hapi pipol long earth wea iusim strong bilong olketa for praisem nem bilong hem. Tufala day hia, wea busy and givim planti gud samting, barava winim eni holiday! (Psalm 84:10)”
February 28, 1998, hem 65 year anniversary bilong wanfala order from Hitler wea tambuim Olketa Jehovah’s Witness long Germany. Olketa Witness long France iusim datfala date for rentim samfala building for showim long pablik datfala video Jehovah’s Witnesses Stand Firm Against Nazi Assault, wea showimaot klia persecution wea pipol bilong Jehovah kasem. Winim seven million invitation go aot. Story bilong olketa man for raetem history and olketa wea prisoner bifor barava muvim audience. Long Paris area, klosap 5,000 attendim, and insaed diswan bigfala namba wea no Witness.
Planti long Paris barava tinghae long spiritual laet, and olketa hapi long olketa Kingdom pablisa wea shaen braet olsem olketa laet. Hem olsem Jesus talemaot: “Harvest hem big, bat olketa wakman no staka.” (Matthew 9:37) Wei wea Olketa Jehovah’s Witness disaed strong for winim olketa challenge for preach long disfala taon mekem Paris wanfala Taon bilong Laet long wanfala spesol wei, wea praisem Jehovah.
[Piksa long page 9]
City Hall
[Piksa long page 9]
Louvre Museum
[Piksa long page 9]
Opera Garnier
[Olketa Piksa long page 10]
Sharem message bilong Bible long busy pipol long eni ples olketa stap