Trufala Faith Really Savve Kamap?
“Faith hem wei for trust evribit long gudfala fasin bilong God wea mekem man willing for givim laef bilong hem wan thousand taem for faith bilong hem.”—MARTIN LUTHER,1522.
“Hem luk olsem iumi insaed finis wanfala world wea Christian faith and waka hem barava lus.”—LUDOVIC KENNEDY, 1999.
OLKETA idea abaotem faith savve difren tumas. Bifor, planti pipol garem faith long God. Distaem, insaed world bilong daot and safa, trufala faith long God and long Bible hem kwiktaem gogo for lus.
Trufala Faith
Long staka, “faith” hem wei for garem biliv saed long religion nomoa or wei for worship. Bat, long wei wea Bible iusim, “faith” hem minim full trust—wea evribit, trust wea no seksek long God and olketa promis bilong hem. Hem wanfala fasin wea markem wanfala disaepol bilong Jesus Christ.
Wantaem, Jesus Christ story abaotem need for prea and for “no givap.” Taem hem duim olsem, hem mekem wanfala kwestin kamap abaotem sapos trufala faith savve stap tuday. Hem ask: “Taem Son bilong man hem kam, waswe, bae hem barava faendem [disfala] faith long earth?” Why nao hem askem kaen kwestin hia?—Luke 18:1, 8, footnote.
Lusim Faith
Staka samting savve kosim pipol for lus faith. Insaed diswan hem olketa pain and hard taem bilong evriday laef. Olsem example, Professor Michael Goulder hem wanfala priest long Manchester, England long 1958, taem staka long olketa pleia bilong Manchester United football team olketa dae taem aeroplane hem crash long Munich. Long wanfala BBC television program, announcer Joan Bakewell hem sei Goulder “feel iusles taem hem lukim bigfala sorre bilong pipol.” Wan samting wea kamaot from diswan hem wei wea hem “lusim faith bilong hem long wanfala God wea disaedem wanem bae kasem man.” Goulder sei hem bilivim “Bible hem no . . . datfala word bilong God wea kanduit fail” bat, “datfala word bilong man wea savve fail, maet witim tu-thri idea bilong God.”
Samtaem faith hem dae aot nomoa. Diswan nao wanem happen long man for raet and man for toktok long radio, Ludovic Kennedy. Hem talem hao from taem hem pikinini, “olketa daot and wei for no sure [abaotem God] kam and go and wei for no biliv kamap big long [hem].” Hem no satisfae witim eni ansa wea hem kasem for olketa kwestin bilong hem. Dae bilong dadi bilong hem long sea hem barava spoelem faith bilong hem wea barava wiki finis. Long World War II, olketa prea long God for “keepim mifala sef from olketa danger long sea and from olketa enemy” hem no kasem ansa taem warship bilong Germany bomim ship wea dadi bilong hem insaed.—All in the Mind—A Farewell to God.
Kaen wei for lus faith olsem happen staka taem. Aposol Paul sei “Faith hem no samting wea evriwan garem.” (2 Thessalonians 3:2) Hao nao iu ting? Waswe, man still fit for garem trufala faith long God and long Word bilong hem nomata insaed wanfala world wea kamap moa worse long wei for daot? Lukluk gud long wanem nextfala article talem abaotem diswan.