Iu Savve Garem Trufala Faith

Taem Sarah Jayne hem 19 year, hem faendaot hem garem cancer long ovary. Bihaen hem operate, hem feel gud and start for ting gud abaotem future. Taem hem 20 year hem engage and start for planim wedding bilong hem. Datfala sem year cancer hia kamap moa, and olketa talem hem hao hem bae laef for tu-thri week nomoa. Sarah Jayne hem dae long June 2000, just bifor hem kasem 21 year.

SAMTING wea mekem olketa wea visitim Sarah Jayne barava sapraes hem strongfala trust bilong hem abaotem future, witim deep faith bilong hem long God and Word bilong hem, Bible. Nomata hem feisim barava nogud samting, hem sure long resurrection hope—hao hem bae lukim olketa fren bilong hem moa. (John 5:28, 29) Hem sei: “Mi bae lukim iufala evriwan long niu world bilong God.”

Samfala bae kolem kaen faith hia olsem wei for giamanim seleva. Ludovic Kennedy hem sei: “Laef bihaen man dae hem biliv bilong pipol wea fraet, hao, olsem long last trumpet, naesfala kaikai, drink, and music tu bae stap long naesfala green garden olsem Eden, wea olketa bae hapi witim olketa wea dae bifor and bihaen long olketa.” Long datwan, iumi mas askem wanfala kwestin. Wanem nao moa balance—for biliv hao “diswan nomoa laef iumi garem so mekius long hem,” olsem idea bilong Kennedy, or for biliv long God and promis bilong hem for wanfala resurrection? Sarah Jayne hem chusim disfala last wan. Hao nao hem kasem kaen faith olsem?

“Lukaotem God . . . and Really Faendem Hem”

For garem faith and trust long samwan, iu need for savve long hem and for lanem wei wea hem ting and duim samting. Diswan needim heart and tu, mind bilong iumi. For garem trufala faith long God hem olsem tu. Iu need for savve long hem, lane abaotem olketa fasin and wei bilong hem, for luksavve hao long evri samting wea hem talem and duim, iu fit for trust and depend long hem.—Psalm 9:10; 145:1-21.

Samfala ting diswan hard for kamap. Olketa sei God farawe, hard for man minim hem—sapos hem stap. Olketa wea daot sei, “Sapos hem really stap olsem olketa Christian olsem Sarah Jayne tingim, why nao hem no showim hemseleva long iumi evriwan?” Bat waswe, God really farawe tumas and hard for faendem? Taem hem tok for olketa savveman long Athens, aposol Paul sei hao “God wea wakem world and evri samting insaed long hem,” hem provaedem tu evriting man needim for “lukaotem [hem] . . . and really faendem hem.” Really samting, Paul sei: “Hem no farawe from iumi wanwan.”—Acts 17:24-27.

So, hao nao iu savve “lukaotem God . . . and really faendem hem”? Samfala duim diswan thru long wei for lukluk gud long universe raonem olketa. For staka pipol, diswan seleva givim inaf pruv hao wanfala Creator mas stap.a (Psalm 19:1; Isaiah 40:26; Acts 14:16, 17) Olketa garem sem feeling olsem aposol Paul, hao “olketa fasin bilong [God] wea man no savve lukim, showaot klia start kam long creation bilong world, from olketa showaot long olketa samting wea hem wakem, insaed diswan paoa bilong hem wea olowe and wei wea hem God.”—Romans 1:20; Psalm 104:24.

Iu Needim Bible

Bat, for buildim trufala faith long Creator, iu needim nara samting wea hem provaedem. Wanem nao diswan? Bible—Word bilong God, wea hem showimaot will and purpose bilong hem. (2 Timothy 3:16, 17) “Bat weit,” samfala bae sei, “hao nao iu fit for bilivim eniting Bible talem taem iu lukim olketa barava nogud samting pipol wea sei olketa followim Bible duim?” Hem tru, Christendom garem barava rabis record bilong hypocrite fasin, raf fasin, and dirty fasin. Bat eniwan wea garem balance tingting savve lukim hao Christendom hem laea for sei hem followim olketa Bible principle.—Matthew 15:8.

Bible seleva givim warning hao staka pipol bae sei olketa worshipim God bat, really, olketa “denyim tu owner wea baem olketa.” “And from diswan,” aposol Peter hem sei “pipol bae tok spoelem wei bilong truth.” (2 Peter 2:1, 2) Jesus Christ sei olketa hia olketa “man for brekem law” wea bae showaot klia thru long wicked samting olketa duim. (Matthew 7:15-23) For rejectim Word bilong God bikos long record bilong Christendom hem olsem for torowem leta bilong wanfala fren wea iu trustim, bikos man wea givim long iu hem rabis man.

Man kanduit buildimap trufala faith sapos hem no readim Word bilong God. Hem thru long Bible nomoa Jehovah savve defendim hemseleva. Hem ansarem olketa kwestin wea evritaem kamap, olsem why nao hem letem wei for safa and feel pain go ahed and wanem nao hem bae duim for stretem diswan. (Psalm 119:105; Romans 15:4) Sarah Jayne biliv hao Bible hem Word bilong God. (1 Thessalonians 2:13; 2 Peter 1:19-21) Why? No from parents talem hem nomoa, bat bikos hem tek-taem for barava lukluk gud long evri pruv wea showaot Bible hem wanfala spesol message wea kam from God. (Romans 12:2) Olsem example, hem lukim bigfala paoa bilong Bible long living bilong olketa wea followim olketa principle bilong hem. Witim help bilong olketa pablikeson olsem The Bible—God’s Word or Man’s?,b hem studyim staka pruv insaed Bible hao God nao raetem.

“Faith Kamap Bihaen Man Herem Samting”

Nomata olsem, hem no inaf for garem Bible nomoa or for biliv hao God nao raetem. Aposol Paul raet hao “faith kamap bihaen man herem samting.” (Romans 10:17) For herem Bible, no for garem nomoa, hem nao samting wea buildimap faith. Iu “herem” wanem God talem taem iu readim and studyim Word bilong hem. Nomata young pipol savve duim diswan. Paul talem hao “from taem [Timothy] hem baby,” mami and granmami bilong hem teachim hem “olketa holy raeting.” Waswe, diswan minim tufala forcem mind bilong pikinini hia? Nomoa! No eniwan forcem or giamanim Timothy. “Olketa muvim [hem] for bilivim” wanem hem herem and readim.—2 Timothy 1:5; 3:14, 15.

Olketa muvim Sarah Jayne long sem wei tu. Olsem pipol bilong Beroea long first-century, Sarah Jayne “barava willing tumas for kasem word [from parents and olketa narawan wea teachim hem].” Taem hem pikinini, hem trustim nomoa wanem dadi and mami talem hem. Bihaen, taem hem moa big, hem no acceptim nating evri teaching hem kasem. Hem “lukluk gud long olketa Scripture evriday for pruvim evri samting hia.”—Acts 17:11.

Iu Savve Buildim Trufala Faith

Iu tu savve buildim trufala faith—datkaen faith wea aposol Paul minim long leta bilong hem long olketa Hebrew Christian. Hem sei datkaen faith hem “sure wei for expectim samting wea man hope for hem, kliafala pruv bilong really samting nomata hem no lukim yet.” (Hebrews 11:1) Taem iu garem faith olsem, iu bae barava sure hao evri hope and samting iu expectim, insaed diswan hem promis bilong God abaotem resurrection, bae kamap tru. Iu bae biliv hao kaen hope olsem kam from olketa promis wea sure for happen, no samting man laekem nomoa. Iu bae savve hao Jehovah hem nating enitaem fail for keepim olketa promis bilong hem. (Joshua 21:45; 23:14; Isaiah 55:10, 11; Hebrews 6:18) Niu world wea God promisim bae kamap really samting long iu, olsem iu stap finis long there. (2 Peter 3:13) And iu bae lukim klia witim eye bilong faith hao Jehovah God, Jesus Christ, and Kingdom bilong God olketa really samting, no just olketa idea man giamanim hemseleva witim.

Iu no need for buildim trufala faith seleva. Witim wei wea hem mekem Word bilong hem stap evriwea, Jehovah provaedem wanfala Christian kongregeson evriwea long world, wea faithful for helpem pipol witim raeteous heart for buildim faith long God. (John 17:20; Romans 10:14, 15) Acceptim evri help wea Jehovah provaedem thru long disfala organization. (Acts 8:30, 31) And bikos faith hem wanfala frut bilong holy spirit bilong God, prea evritaem for spirit bilong God helpem iu mekem grow trufala faith.—Galatians 5:22.

No letem olketa man for daot wea mekfani long eniwan wea showaot faith long God and Word bilong hem for mekem iu givap. (1 Corinthians 1:18-21; 2 Peter 3:3, 4) For tok stret, trufala faith nao bae barava strongim iu for againstim olketa attak olsem. (Ephesians 6:16) Sarah Jayne feelim diswan hem tru, and hem evritaem encouragem olketa wea visitim hem long hospital for buildim faith bilong olketa seleva. “Mekem truth hem samting bilong iuseleva,” hem savve sei. “Studyim Word bilong God. Stap klos long organization bilong God. Prea evritaem. Stap busy long service bilong Jehovah.”—James 2:17, 26.

Taem wanfala nurse bilong Sarah Jayne lukim faith bilong hem long God and long resurrection, hem sei: “Iu really bilivim diswan, yaman.” Taem olketa askem hem wanem nao mekem hem ting gud olsem nomata hem feisim nogud samting, Sarah Jayne hem sei: “Hem wei for garem faith long Jehovah. Hem wanfala trufala fren long mi, and mi barava lovem hem.”

[Olketa Footnote]

[Piksa long page 6]

“From taem [Timothy] hem baby,” mami and granmami teachim hem “olketa holy raeting”

[Piksa long page 6]

Pipol long Beroea kasem praise from olketa lukluk gud long olketa Scripture evriday

[Credit Line]

From “Photo-Drama of Creation,” 1914

[Olketa Piksa long page 7]

For buildim faith man mas herem Bible and followim, no garem nomoa

[Piksa long page 7]

“Mi bae lukim iufala evriwan long niu world bilong God”