Waswe, Iu Savve Mekem World Kamap Moabeta?

Waswe, Iu Savve Mekem World Kamap Moabeta?

“Politik no savve putim bak olketa important samting insaed community. Olketa nating fit for buildim moa olketa kastom biliv saed long fasin. Nomata olketa best plan no savve kasem bak olketa gudfala fasin saed long wei for fren or marit, for mekem olketa dadi lukaftarem pikinini bilong olketa, for garem moa wei for feel nogud or for feel shame abaotem olketa nogud samting . . . Law no savve finisim bigfala haf long olketa problem saed long fasin wea kasem iumi.”

WASWE, iu agree witim toktok hia bilong wanfala man wea waka bifor for gavman bilong U.S.? Sapos olsem, wanem nao ansa bilong staka problem distaem wea kamap from greedy fasin, wei wea olketa famili no garem love for each other, dirty fasin, wei for no garem savve, and olketa nara nogud samting wea savve spoelem olketa important samting insaed community? Samfala pipol tingse no eni ansa stap, so olketa go ahed for busy witim evriday living. Samfala narawan hope wanday bae wanfala leader wea kleva tumas, maet leader bilong religion, bae kam and leadim olketa long stretfala wei.

For tok stret, tu thousand year bifor, pipol laek for mekem Jesus Christ kamap king bikos olketa luksavve God nao sendem hem and hem bae barava fit for rul. Bat, taem Jesus luksavve diswan, hem kwiktaem lusim olketa. (John 6:14, 15) Hem explainim long wanfala governor bilong Rome: “Kingdom bilong mi hem no part bilong disfala world.” (John 18:36) Bat distaem, no staka followim wanem Jesus duim—nomata olketa leader bilong religion wea sei olketa follower bilong hem. Samfala trae for mekem world kamap moabeta, taem olketa trae for garem paoa ovarem olketa world ruler or olketa seleva kasem position insaed politik. Iumi savve lukim diswan taem iumi lukim wanem happen insaed olketa year bilong 1960 and 70.

Religion Trae Hard for Mekem World Kamap Moabeta

Long olketa last year bilong 1960, samfala savveman bilong religion long olketa kantri long Latin-America start for faet for olketa wea poor and wea safa from hard living. For kasem diswan, olketa mekem kamap disfala liberation theology, wea olketa sei Christ hem savior no long wei wea Bible talem nomoa bat long saed bilong politik and selen tu. Long United States, planti church leader wea wari tumas abaotem wei wea olketa gud fasin brekdaon startim wanfala organization wea olketa kolem Moral Majority. Goal bilong diswan hem for helpem pipol wea bae mekem law for strongim olketa gudfala principle insaed famili for kasem position insaed politik. Olsem tu, long planti Muslim kantri, samfala grup trae for stopem raverave fasin and wei for ova tumas taem olketa apim wei for barava followim Koran.

Waswe iu biliv world kamap moabeta from wei wea olketa hia trae hard? Olketa samting showimaot hao, evriwea, olketa stret fasin gogo daon and wei wea rich and poor difren hem go ahed for kamap big, insaed diswan tu hem olketa kantri wea followim disfala liberation theology.

From disfala sekson Moral Majority fail long goal bilong hem long United States, man wea startim, Jerry Falwell, hem finisim datfala organization long 1989. Olketa nara organization tekem position bilong hem. Nomata olsem, Paul Weyrich, first man for iusim datfala toktok “moral majority,” raet olsem insaed magasin Christianity Today: “Nomata taem mifala win long saed bilong politik, wei wea mifala win hem fail for mekem kamap olketa samting wea mifala biliv hem important.” Hem raet olsem tu: “Olketa kastom go ahed for kamap olsem wanfala drain wea kamap moa waed. Iumi pas insaed wanfala taem wea olketa kastom brekdaon wea big winim eni narataem, wei wea hem brekdaon hem big tumas olketa politik no savve stretem.”

Man for raetem buk and niuspepa Cal Thomas talemaot wanem hem tingse hem wanfala main problem witim wei for trae for mekem gud community laef thru long politik: “Really wei or change hem kam from man wanwan, no olketa wei for win long politik, bikos olketa main problem hem no saed long selen and politik bat saed bilong fasin and spiritual samting.”

Bat hao nao bae iu savve stretem olketa problem saed long fasin and spiritual saed taem iumi stap insaed world wea no garem olketa mark saed long fasin, wea pipol disaed followim wanem olketa seleva ting hem stret and rong? Sapos hem hard for olketa wea garem paoa and pipol wea garem gudfala goal—maet olketa bilong lotu or nomoa—for mekem world kamap moabeta, hu nao savve duim? Ansa hem stap long next article. Yes, ansa hem main reason why Jesus sei Kingdom bilong hem no part long disfala world.

[Olketa Piksa Credit Line long page 2]

[Olketa Piksa Credit Line long page 3]