Willing Spirit Muvim Pipol for Kam Long Gilead
PURPOSE bilong Watchtower Bible Skul bilong Gilead hem for trainim olketa man and woman wea dedicate for duim missionary service long olketa difren kantri. Hu nao fit for kam long Gilead? Olketa wea garem willing spirit. (Psalm 110:3) Datwan hem barava showaot long graduation bilong mek-111 class long September 8, 2001.
Samfala student bin lusim finis famili, olketa fren, and hom kantri bilong olketa for serve long ples wea garem bigfala need. Long wei olsem, olketa testim olketa seleva for luksavve sapos olketa savve getius for stap long difren ples. Olsem example, Richer and Nathalie muv go long Bolivia, Todd and Michelle long Dominican Republic, and David and Monique long wanfala kantri long Asia for talemaot gud nius bilong Kingdom bilong God. Samfala nara student bin serve long Nicaragua, Ecuador, and Albania.
Christy kasem encouragement for lanem Spanish languis long hae skul, wea helpem hem for stap long Ecuador for tufala year bifor hem marit. Samfala narawan join insaed kongregeson wea iusim difren languis long hom kantri bilong olketa. Saul and Priscilla feisim difren challenge taem tufala showim willing spirit for waka hard for savve gud long English bifor tufala kam long skul.
Twenti week bilong missionary training hem go pas kwiktaem. Graduation day hem kamap, and olketa student sidaon witim olketa fren and famili and lisin long wisefala kaonsel and lastfala toktok for encouragem olketa.
Chairman bilong program hem Theodore Jaracz, graduate bilong mek-seven class bilong Gilead Skul, wea distaem hem serve olsem member bilong Governing Body bilong Olketa Jehovah’s Witness. Long introduction, hem mekhae hao olsem wanfala organization, iumi nating lusim goal for trainim olketa student long Gilead, hem nao, for preachim gud nius bilong Kingdom evriwea long earth. (Mark 13:10) Gilead skul redyim olketa student for duim disfala preaching waka long wei wea barava moa big winim bifor and long olketa ples long world wea barava needim olketa missionary wea kasem training. Brata Jaracz encouragem olketa student for iusim gud training wea olketa kasem long Gilead taem olketa joinim olketa missionary wea serve distaem long 19 kantri wea olketa kasem assignment for go long hem.
Advaes wea Fitim Olketa wea Graduate
Samfala tok kam bihaen. William Van De Wall, wanfala member bilong United States Branch Komiti, hem storyim subject “Strong for Missionary Waka—Wanfala Mark Bilong Olketa Tru Christian.” Hem mekhae long datfala assignment for “mek-disaepol,” wea stap long Matthew 28:19, 20, and hem encouragem olketa student: “Followim Jesus, wea duim missionary assignment bilong hem witim willing spirit and strong.” For helpem olketa niu missionary hia for keepim strong bilong olketa for missionary waka, hem encouragem olketa: “Followim gudfala schedule; go ahed for duim study seleva, savve gud long olketa niu theocratic samting; and no forgetim olketa reason why nao iu stap long assignment bilong iu.”
Next speaker long program hem Guy Pierce, wanfala member bilong Governing Body. Hem storyim theme “Go Ahed for Mekem Grow ‘Paoa Bilong Iufala for Ting Raonem.’ ” (Romans 12:1) Hem givim gudfala advaes long datfala class wea graduate, encouragem olketa for iusim paoa wea God givim for ting raonem samting. Hem sei: “Go ahed for ting raonem wanem Jehovah talem iu thru long Word bilong hem. Diswan bae protection iu.” (Proverbs 2:11) Brata Pierce encouragem datfala class for no saedem tingting bilong seleva, nogud datwan spoelem “paoa for ting raonem.” Tru tumas, disfala kaonsel bae barava helpem olketa wea graduate hia for serve olsem olketa missionary.
Then, chairman introducem wanfala Gilead instructor, Lawrence Bowen, wea storyim theme “Disaed for No Savve Long Eni Samting.” Hem storyim hao saed long missionary waka bilong hem long Corinth, aposol Paul hem “disaed for no savve long eni samting . . . only Jesus Christ nomoa, wea olketa nilam.” (1 Corinthians 2:2) Paul savve finis hao nambawan paoa long universe, datfala holy spirit, saportim datfala message wea showaot long full Bible: for vindicatem olmaeti rul bilong Jehovah thru long datfala promis Seed. (Genesis 3:15) Foti-eit student hia wea graduate kasem encouragement for kamap olsem Paul and Timothy and for olketa win olsem missionary, olketa mas hol strong long “datfala plan bilong healthy toktok.”—2 Timothy 1:13.
Last wan long olketa firstfala tok garem theme “Tinghae Long Privilege Bilong Iu, Wanfala Present From God.” Wallace Liverance, registrar bilong Gilead Skul, helpem olketa wea graduate for minim hao olketa privilege bilong service kam from kaenfala fasin bilong God wea man no fit for kasem, no from samting wea olketa fit for kasem or olsem reward for waka olketa duim. Brata Liverance iusim example bilong aposol Paul, taem hem sei: “Jehovah no chusim Paul for kamap aposol long olketa nation from waka bilong hem, wea maet mekem hem luk olsem Paul duim samting for kasem datfala assignment, or olsem hem garem raet for kasem. Hem no depend long age or savve. From tingting bilong olketa man, maet hem luk olsem Barnabas nao best wan for chusim. Savve bilong man hem no important samting; luk olsem Apollos savve tumas for toktok winim Paul. Paul kasem assignment from kaenfala fasin bilong God wea man no fit for kasem.” (Ephesians 3:7, 8) Brother Liverance encouragem olketa wea graduate for iusim present, or privilege for serve, for helpem nara pipol for kamap olketa fren bilong God and for kasem “present wea God givim . . . , laef olowe thru long Christ Jesus Lord bilong iumi.”—Romans 6:23.
Bihaen diswan, Mark Noumair, nara Gilead instructor, story witim samfala student long theme “Gud Samting Kamaot From Wei for Prepare.” (Proverbs 21:5) Olketa experience hia showimaot hao taem wanfala minister hem prepare gud for duim ministry, especially long wei for redyim heart bilong hem, hem bae barava interest long pipol. Bae hem evritaem savve wanem for talem. Bae hem talem and duim samting for helpem olketa long spiritual wei. “Hem nao key for win olsem missionary,” Brata Noumair hem sei, taem hem iusim experience bilong hemseleva olsem missionary long Africa.
Missionary Service—Laef Waka wea Mekem Man Satisfae
Ralph Walls and Charles Woody interviewim samfala missionary wea garem savve wea stap tu long Patterson Educational Center for spesol training. Olketa interview hia mekhae hao hem love for pipol wea givim hapi insaed missionary service. Olketa student and famili and fren bilong olketa long audience kasem encouragement taem olketa missionary hia explainim why nao missionary waka hem mekem man satisfae.
John E. Barr, wea serve long Governing Body, givim main tok bilong datfala day, wea garem title “Singim Wanfala Niu Song Long Jehovah.” (Isaiah 42:10) Brata Barr talem hao datfala toktok “wanfala niu song” hem kamap naenfala taem insaed long Bible. Hem askem disfala kwestin, “Disfala niu song hem abaotem wanem?” Then hem ansa: “Olketa verse wea stap raonem showimaot hao olketa singim wanfala niu song bikos long olketa niu samting wea kamap saed long olmaeti rul bilong Jehovah.” Hem encouragem olketa student for go ahed for sing for praisem Kingdom bilong God wea win long hand bilong Messiah King, Christ Jesus. Brata Barr talem hao training wea olketa kasem long Gilead hem helpem olketa for minim long deep wei winim bifor olketa difren saed bilong disfala “niu song.” “Disfala skul hem strongim need bilong iufala for ‘singim’ praise long Jehovah witim olketa brata and sista bilong iu long eni ples wea iu go; evritaem waka for garem wan mind witim olketa narawan long assignment bilong iu.”
Bihaen olketa student kasem diploma bilong olketa, wanfala class member readim wanfala leta for barava talemaot thankiu bilong datfala class for training wea olketa kasem long Gilead.
Waswe, iu fit for mekem service bilong iu for God moa big and garem moa frut? Sapos olsem, waka hard olsem olketa student hia wea graduate. Datwan nao helpem olketa for kasem mark for duim missionary waka. Man savve kasem bigfala hapi taem hem hapi and willing for givim hemseleva for waka long service bilong God.—Isaiah 6:8.
[Box long page 25]
INFORMATION ABAOTEM CLASS
Haomas kantri olketa kam from: 10
Haomas kantri olketa bae go long hem: 19
Haomas student: 48
Average age: 33.2
Average year insaed truth: 16.8
Average year insaed full-taem ministry: 12.6
[Piksa long page 26]
Mek-111 Class Bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet bilong each laen.
(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.