Problem Bilong Wei for Divaedem Pipol
“WEI FOR SEMSEM MAET HEM SAMTING WEA EVRIWAN FIT FOR KASEM, BAT NO ENI PAOA LONG EARTH SAVVE MEKEM DATWAN KAMAP.”
Toktok hia hem bilong Honoré de Balzac, wanfala man bilong France for raet long mek-19 century. Waswe, iu agree witim hem? Planti feel hem rong for divaedem pipol followim class. Bat, nomata long mek-21 century, olketa man divaed long staka difren class insaed community.
CALVIN COOLIDGE, president bilong United States long 1923 go kasem 1929, hem wari long problem bilong wei for divaedem pipol long olketa difren class and hem story abaotem “wei for finisim evribit olketa hae class sekson.” Nomata olsem, samting olsem 40 year bihaen Coolidge hem president, datfala Kerner Commission, wea olketa markem for studyim wei wea difren kaen pipol stap tugeta, talemaot olketa wari hao gogo United States bae kamap tufala difren community: “wanfala blak, narawan white—separate and no semsem.” Samfala ting diswan hem happen finis and “wei for divaed saed long selen and kala skin hem kakamap moa big” long datfala kantri.
Why nao hem hard tumas for kasem wei for semsem for evri pipol? Wanfala main samting hem fasin bilong man. William Randolph Hearst, man wea waka bifor long U.S. gavman hem sei: “Evri man semsem long wanfala samting, and datwan nao hem wei wea olketa laek for no semsem.” Wanem nao hem minim? Maet toktok bilong man long France for raetem olketa drama long mek-19 century, Henry Becque hem moa klia: “Samting wea mekem disfala wei for semsem hem hard for kamap hem from iumi laek for semsem witim olketa bigman nomoa.” Diswan minim, pipol want for semsem witim pipol wea hae class; bat planti no willing for lusim samfala privilege and olketa gud samting for kamap semsem witim pipol wea olketa ting olketa low class.
Long taem bifor, class iu born kam long hem depend long laen bilong iu, maet olsem low class or part bilong hae class sekson, or maet long laen bilong king. Long samfala ples olketa still olsem. Bat, klosap evri ples distaem, wei for garem selen—or no garem selen—nao markem sapos man bae low class, midol class, or hae class. Bat, samfala narakaen samting stap tu wea savve markem man long wanfala class, olsem kala skin, education, and savve. And long samfala ples, olketa savve tingim woman olsem low class.
Eni Hope Stap?
Olketa law saed long freedom help for finisim wei for divaedem pipol. Long United States olketa mekem olketa law for stopem wei for divaedem pipol. Long South Africa olketa mekem olketa law for stopem apartheid. Long planti kantri wei for olsem slave, nomata hem still stap distaem, hem againstim law. Olketa law wea olketa kot mekem, forcem pipol for luksavve hao olketa native pipol long wanfala kantri fit for ownim land, and olketa law wea againstim wei for spoelem narafala pipol helpem samfala pipol wea no garem eni gud samting.
Waswe, diswan minim wei for divaedem pipol long olketa difren class finis nao? Nomoa. Nomata samfala wei for divaedem pipol long olketa difren class no strong distaem, samfala niu wei for divaed hem start for kakamap. Wanfala buk Class Warfare in the Information Age hem sei: “Luk olsem distaem man no fit for divaedem pipol long class bilong olketa wea rich and olketa wakman, from olketa class olsem divaed and kamap olketa smolfala grup bilong pipol wea kros.”
Waswe, bae olketa difren class divaedem pipol olowe? Next article bae showimaot hao ansa stap for disfala problem.