Waswe, Community wea No Garem Difren Class Savve Kamap?
JOHN ADAMS, wea kamap mek-tu president bilong United States, hem wanfala long olketa wea saenem datfala Declaration of Independence, wea garem toktok hia insaed: “Mifala biliv olketa tru samting hia showaot klia seleva, hao God creatim evri man semsem.” Nomata olsem, luk olsem John Adams daotem lelebet hao pipol really semsem, from hem raet olsem: “God Olmaeti hem wakem man long wei wea hem born kam for no semsem long Mind and Body, and from diswan bae no eni kleva plan or wei savve mekem olketa kamap semsem.” Long difren wei, man long Britain for raetem history H. G. Wells tingim hao wanfala community wea evri pipol semsem hem savve kamap wea garem faondeson long thrifala samting: wanfala klin religion for full world, education for evriwan, and no eni army.
Kam kasem distaem, history nating mekem wanfala world wea evriwan semsem olsem wanem Wells hem tingim. Olketa man barava nating semsem, and wei for divaedem pipol long olketa difren class hem big yet insaed community. Waswe, kaen wei for divaedem pipol long difren class hem givim eni gud samting for evri community? Nomoa. Kaen wei for garem olketa difren class mekem pipol divaed, wea mekem fasin for jealous, heit, sorre, and wei for killim dae man kamap. Long bifor, long Africa, Australia, and North America, kaen tingting for sei white man hem gud winim eni nara man givim bigfala sorre for olketa wea no white—insaed diswan hem wei wea olketa killim dae evri Aborigine long Van Diemen’s Land (wea distaem hem Tasmania). Long Europe, wei for tingim olketa Jew olsem low class hem start bilong datfala Holocaust. Wei wea olketa hae class pipol garem staka selen and wei wea low class pipol nating satisfae hem startim datfala French Revolution long mek-18 century and datfala Bolshevik Revolution long Russia long mek-20 century.
Wanfala wise man long bifor hem raet olsem: “Man hem bossim man and spoelem hem.” (Ecclesiastes 8:9) Toktok bilong hem tru, nomata sapos man wanwan spoelem narawan or olketa class nao spoelem. Bigfala sorre and wei for safa nao kamaot from wei wea wanfala grup pipol apim olketa seleva winim narawan.
Evriwan Semsem Front Long God
Waswe, samfala grup pipol born kam for hae winim olketa nara grup? God no ting olsem. Bible sei: “[God] hem mekem evri nation bilong man from wanfala man, for stap long full earth.” (Acts 17:26) And tu, Creator “no saedem olketa prince and hem no tingim bigman moa winim man nating, bikos tufala evriwan waka bilong hand bilong hem.” (Job 34:19) Evri man olketa relative nomoa, and front long God evriwan born kam semsem.
Tingim tu, hao taem wanfala man hem dae, evri wei for tingim hemseleva olsem hae winim narawan hem finis. Olketa bilong Egypt bifor no bilivim diswan. Taem wanfala Pharaoh dae, olketa savve putim olketa samting wea garem hae price insaed grev bilong hem mekem hem savve enjoyim taem hem go ahed for garem hae position long laef wea go ahed bihaen dae. Waswe hem tru? Nomoa. Klosap evri samting hia wea garem hae price, olketa man for steal long olketa grev nao tekem, and planti samting wea olketa no stealim hem stap long olketa museum distaem.
From hem dae finis, datfala Pharaoh nating savve iusim evri samting hia wea garem hae price. Long dae no eni hae class and low class, no eni rich and no eni poor. Bible sei: “Olketa wise man mas dae; olketa stupid man, olketa raf man, evriwan finis. From olketa man olsem ox wea laef bilong hem no savve stap longtaem olketa olsem buluka wea taem bilong olketa short.” (Psalm 49:10, 12, The New English Bible) Nomata iumi king or slave, toktok hia from God hem fitim iumi evriwan: “Olketa wea dae finis, olketa nating savve long eni samting, and olketa no savve kasem pei moa . . . Nomoa eni waka or plan or savve or wisdom stap long Sheol, ples wea iu bae go long hem.”—Ecclesiastes 9:5, 10.
Long tingting bilong God iumi evriwan born kam semsem, and long dae iumi evriwan semsem. So hem barava iusles for apim wanfala grup pipol hae winim narawan insaed shortfala taem wea iumi laef!
World wea No Garem Difren Class—Hao Nao Bae Hem Kamap?
Bat waswe, eni hope for wanfala world wea wei for divaedem pipol long difren class bae no important? Yes, hope hem stap. Klosap 2,000 year go finis taem Jesus stap long earth, faondeson for kaen community olsem hem start. Jesus givim laef bilong hem olsem wanfala ransom sakrifaes for evri man wea biliv mekem “evriwan wea showimaot faith long hem no need for dae bat kasem laef olowe.”—John 3:16.
For showimaot hao olketa follower bilong hem mas no apim olketa seleva winim narawan wea biliv, Jesus sei: “Iufala, no letem eniwan kolem iufala Rabbi, from wanfala nomoa hem teacher bilong iufala, bat iufala evriwan olketa brata. And tu, no kolem eniwan father bilong iufala long earth, from wanfala nomoa hem Father bilong iufala, Datwan long heven. And olketa mas no kolem iufala ‘leader,’ from Leader bilong iufala hem wanfala, hem nao Christ. Bat man wea nambawan midolwan long iufala mas kamap servant bilong iufala. Eniwan wea mekem hemseleva hae, bae kamap hambol.” (Matthew 23:8-12) Long tingting bilong God, evri tru disaepol bilong Jesus olketa semsem long datfala faith.
Waswe, olketa firstfala Christian ting olketa semsem? Olketa wea minim teaching bilong Jesus ting olsem. Olketa tingim each other olsem semsem long datfala faith and showimaot diswan taem olketa kolem each other “brata.” (Philemon 1, 7, 20) No eniwan kasem encouragement for tingim hemseleva olsem gud winim narawan. Tingim olsem example, hambol wei wea Peter story abaotem hemseleva insaed mek-tu leta bilong hem: “Simon Peter, wanfala slave and aposol bilong Jesus Christ, for olketa wea kasem wanfala faith, wea olketa garem sem privilege olsem bilong mifala.” (2 Peter 1:1) Peter kasem teaching from Jesus and from hem wanfala aposol, hem garem important position bilong responsibility. Nomata olsem, hem tingim hemseleva olsem slave and luksavve hao olketa nara Christian garem olketa privilege wea semsem olsem bilong hem saed long truth.
Samfala maet sei idea bilong wei for semsem hem difren tumas from wei wea God mekem Israel kamap spesol nation long taem bifor olketa Christian. (Exodus 19:5, 6) Olketa maet sei diswan hem example bilong wei wea wan nation hem hae winim narawan, bat diswan no tru. Hem tru hao olketa Israelite, wea from laen bilong Abraham, enjoyim spesol wei for fren witim God and olketa toktok from God kam thru long olketa. (Romans 3:1, 2) Bat purpose bilong diswan hem no for mekem olketa kamap hae winim narawan. Bat for mekem ‘evri nation kasem blessing.’—Genesis 22:18; Galatians 3:8.
For tok stret, klosap evriwan bilong Israel nating followim faith bilong laen dadi bilong olketa, Abraham. Olketa no faithful and rejectim Jesus olsem Messiah. From datwan, God rejectim olketa. (Matthew 21:43) Bat olketa hambol wan no missim datfala blessing wea hem promisim. Long Pentecost 33 C.E., Christian kongregeson hem start. Olketa kolem datfala organization bilong olketa Christian wea kasem anointing from holy spirit, “Israel bilong God,” and olketa blessing bae kamap thru long olketa.—Galatians 6:16.
Samfala member bilong datfala kongregeson need for lane abaotem wei for semsem. Olsem example, disaepol James kaonselem olketa wea givim moa honor long olketa rich Christian winim olketa wea poor. (James 2:1-4) Datwan hem no stret. Aposol Paul showim hao olketa Gentile Christian olketa no low winim olketa Jew Christian, and olketa Christian woman no low winim olketa man. Hem raet olsem: “Tru nao, iufala evriwan, olketa son bilong God from faith bilong iufala long Jesus Christ. From evriwan long iufala baptaes long Christ werem finis Christ. No eni Jew or Greek stap, no eni slave or man wea free, no eni man or woman; from iufala evriwan wanfala man wea wan mind witim Christ Jesus.”—Galatians 3:26-28.
Pipol wea No Garem Difren Class Distaem
Olketa Jehovah’s Witness distaem trae for live followim olketa principle bilong Bible. Olketa luksavve hao wei for divaedem pipol long difren class no important long God. Dastawe, olketa no garem olketa bigman bilong church, and olketa no separatem pipol followim kala skin or haomas selen man garem. Nomata samfala long olketa rich, olketa no mekhae long “wei for show-off witim samting wea man garem,” from olketa luksavve hao olketa samting hia hem for lelebet taem nomoa. (1 John 2:15-17) Winim datwan, wei wea evriwan worshipim Sovereign bilong Universe, Jehovah God, hem mekem olketa garem wan mind.
Evriwan long olketa acceptim responsibility for join insaed waka for preachim disfala gud nius bilong Kingdom long olketa nara man. Olsem Jesus, olketa honorim olketa wea kasem sorre and pipol wea no eniwan interest long olketa, taem olketa visitim haos bilong olketa and offer for teachim olketa abaotem Word bilong God. Olketa wea low class waka tugeta witim olketa wea samfala maet tingim olsem hae class. Olketa spiritual fasin nao important, no difren class long community. Olsem olketa long first century, evriwan olketa brata and sista insaed datfala faith.
Insaed Wei for Semsem Staka Difren Kaen Wei Stap
Bat, for semsem hem no minim evriwan bae semsem evribit. Olketa man and woman, olo and young wan, evriwan hia stap insaed long Christian organization wea garem pipol from staka difren kala skin, languis, nation and living. Olsem man wanwan, olketa garem difren wei for tingting and duim samting. Bat olketa difren wei olsem no mekem samfala hae and narawan low. Winim datwan, kaen wei for difren olsem hem mekem planti naesfala difren wei for kamap. Olketa Christian luksavve hao savve wea olketa garem hem present from God and no samting wea fit for mekem olketa feel hae winim narawan.
Wei for divaed long difren class hem samting wea kamaot from wei wea man laek for rul seleva winim wei for followim direction bilong God. Klosap, Kingdom bilong God bae tekova for rul ovarem disfala earth, and samting wea kamaot from diswan hem end bilong diskaen wei for divaedem pipol long difren class wea man nao mekem kamap, and evri nara samting wea kosim wei for safa kamap. Then, long really wei, ‘olketa wea garem kwaet fasin bae kasem earth.’ (Psalm 37:11) Evri tingting for sei wanfala man hem hae winim narawan bae nomoa nao. No enitaem moa wei for divaed long olketa difren class bae stap for divaedem bigfala famili bilong man evriwea long world.
[Blurb long page 5]
Creator “no tingim bigman moa winim man nating, bikos tufala evriwan waka bilong hand bilong hem.”—Job 34:19.
[Piksa long page 6]
Olketa Jehovah’s Witness givim honor long neiba bilong olketa
[Olketa Piksa long page 7]
Olketa spiritual fasin nao important long olketa tru Christian