Waswe, God wea Iu Trustim Hem Really Stap?
American Museum of Natural History hem sponsarem wanfala gogo for studyim wanfala land long Arctic wea, sevenfala year bifor, long 1906, Robert E. Peary sei hem lukim.
FROM Cape Colgate, barava north part bilong North America, Peary hem lukim samting wea luk olsem whitefala top bilong maunten long wanfala farawe land. Hem nemem diswan Crocker Land, nem bilong wanfala long olketa wea sponsarem hem. Olketa wea insaed gogo hia masbi hapi tumas taem olketa lukim front long olketa wanfala area witim olketa hill, valley, and maunten wea garem snow antap! Bat olketa faendaot no longtaem bihaen hao olketa bin lukim wanfala giaman samting wea air and laet wakem bat wea no really stap. Disfala samting giamanim Peary, and so olketa iusim taem, strong, and selen for lukaotem samting wea nating really stap.
Distaem, staka pipol givim loyal fasin and taem bilong olketa long olketa god wea olketa biliv really stap. Long taem bilong olketa aposol bilong Jesus, pipol worshipim olketa god olsem Hermes and Zeus. (Acts 14:11, 12) Distaem, olketa bilong Shinto, Hindu and narafala religion worshipim staka million god. Tru nao, olsem Bible talem, “planti ‘god’ and planti ‘lord’ olketa stap.” (1 Corinthians 8:5, 6) Waswe, evri god hia really stap?
Olketa God wea “Hard for Sevem” Pipol
Olsem example, tingim wei for iusim idol long worship. Pipol wea trustim or prea long olketa idol ting long hem olsem samting wea savve sevem pipol wea garem paoa from spirit world wea rewardim pipol or sevem olketa from danger. Bat waswe, olketa really savve sevem man? Abaotem olketa idol, man wea raetem psalm hem sing: “Olketa idol bilong olketa nation olketa silver and gold, samting wea hand bilong man nating hem wakem. Olketa garem mouth, bat no eni samting olketa savve talem; olketa garem eye, bat olketa no savve lukim eni samting; Olketa garem ear, bat no savve herem eni samting. And tu no eni laef stap long mouth bilong olketa.” Tru nao olketa god hia “hard for sevem” pipol.—Psalm 135:15-17; Isaiah 45:20.
Hem tru, olketa wea wakem idol maet sei hem garem laef and paoa. And olketa wea worshipim olketa idol putim trust long olketa. “Olketa karem [wanfala idol] antap shoulder bilong olketa,” profet Isaiah hem sei olsem, “olketa karem and putim insaed long ples bilong hem mekem hem standap wan ples.” Hem sei moa: “From ples hem standap hem no muv from. Man singaot long hem tu, bat hem no ansa; hem no sevem man from bigfala hevi bilong hem.” (Isaiah 46:7) Hem tru, wanfala idol bae go ahed for no garem laef nomata hao strong nao biliv bilong olketa wea trust long hem. Kaen karving and idol olsem olketa “iusles god.”—Habakkuk 2:18.
Wei for barava tinghae, mekhae tumas, or laekem tumas entertainment pipol, sportsman, politik system, and samfala leader saed long religion hem big tumas distaem. And tu, selen hem god bilong staka pipol. Pipol mekhae long olketa idol hia for samting wea olketa no really garem. Olketa no provaedem and kanduit provaedem evriting pipol wea biliv long olketa hope for hem. Olsem example, riches maet luk olsem hem garem ansa for staka problem, bat paoa bilong riches savve giamanim man. (Mark 4:19) Wanfala man wea duim research ask olsem: “Why nao samting staka pipol aftarem tumas, and biliv long hem olsem ansa for evri problem, taem man kasem hem kosim staka difren kaen sorre and trabol?” Tru nao, wei for aftarem riches maet forcem man for sakrifaesim samting wea hem needim, olsem gud health, famili laef wea mekem hem satisfae, klos wei for fren, or gudfala wei for fren witim Creator. God bilong hem gogo showaot olsem “giaman god” nomoa!—Jonah 2:8.
“No Eniwan Hem Ansa”
Hem krangge for sei samting wea no really stap hem stap. Olketa wea worshipim datfala god Baal long taem bilong profet Elijah lanem diswan long hardfala wei. Olketa barava biliv Baal garem paoa for mekem fire kamdaon from heven and bonem animal sakrifaes. Tru nao, “olketa go ahed for singaot long nem bilong Baal from morning go kasem midolday, and sei: ‘O Baal, ansarem mifala!’ ” Waswe, Baal garem ear wea savve herem samting and wanfala mouth wea savve toktok? Scripture go ahed for sei: “Olketa no herem eni voice, and no eniwan ansa kam.” Tru nao, “no eniwan lisin.” (1 Kings 18:26, 29) Baal no really stap, no laef, or no savve duim eniting.
Hem barava important for iumi savve and worshipim wanfala God wea really stap! Bat hu nao hem? And hao nao wei for trustim hem savve helpem iumi?
[Olketa Piksa long page 3]
Fren bilong Peary, Egingwah, lukluk farawe for land
Robert E. Peary
[Olketa Credit Line]
Egingwah: From buk The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA
[Olketa Piksa long page 4]
Samting wea world mekhae long hem giamanim staka pipol