Trust Long Jehovah God wea Really Stap
Waswe, iu bin luk go ap long skae long wanfala klia naet and lukim staka handred star? Hao nao iu ting olketa kamap?
LONG kwaet naet, long tokpiksa wei olketa star tokaot long King David bilong Israel bifor, wea muvim hem for raet: “Heven talemaot glory bilong God; and full skae talemaot waka bilong hand bilong hem.” (Psalm 19:1) Tru nao, Creator and no creation hem fit “for kasem glory and honor and paoa.”—Revelation 4:11; Romans 1:25.
“Man wea wakem evri samting hem God,” Bible hem talem. (Hebrews 3:4) Tru nao, datfala trufala God, ‘wea nem bilong hem Jehovah, hem nomoa Most Hae ovarem full earth.’ (Psalm 83:18) And hem no wanfala giaman samting wea no really stap. Jesus Christ sei olsem abaotem Dadi bilong hem long heven, Jehovah: “Man wea sendem mi hem really stap.”—John 7:28.
Jehovah—Man wea Fulfillim Olketa Purpose Bilong Hem
Nem bilong God, Jehovah, kamap klosap 7,000 taem insaed olketa Hebrew Scripture. Datfala nem seleva showaot hem really stap. Nem bilong God really minim “Hem Mekem Kamap.” So Jehovah God storyim hemseleva olsem Man wea Fulfillim olketa purpose bilong hem. Taem Moses askem God nem bilong hem, Jehovah minim olsem: “Mi bae kamap wanem mi bae kamap.” (Exodus 3:14) Transleison bilong Rotherham talem stret olsem: “Mi Bae Kamap eniting mi laekem.” Jehovah kamap, or chus for kamap, eniting for fulfillim olketa raeteous purpose and promis bilong hem. Dastawe hem garem olketa difren title, olsem Creator, Father, Sovereign Lord, Shepherd, Jehovah bilong olketa army, Man wea Herem prea, Judge, Nambawan Teacher, Man for Baem Bak.—Judges 11:27; Psalm 23:1; 65:2; 73:28; 89:26; Isaiah 8:13; 30:20; 40:28; 41:14.
Trufala God nomoa fit for garem nem Jehovah, from olketa man nating savve sure sapos olketa plan bilong olketa bae win. (James 4:13, 14) Jehovah seleva savve sei: “Olsem big rain hem kamdaon, and snow, from heven and hem no go bak long datfala ples, sapos hem no barava tuwetem earth and mekem samting start for grow, and seed hem go long man wea plantim and bred long man wea kaikaim, olsem toktok bilong mi wea go aot from mouth bilong mi bae kamap tru. Hem bae no kam bak nating long mi, bat hem bae barava duim wanem mi laekem, and hem bae barava win long wanem mi sendem hem for duim.”—Isaiah 55:10, 11.
From Jehovah sure for fulfillim olketa purpose bilong hem, samting wea man no ting bae happen, hem happen finis long tingting bilong Jehovah. Longtaem bihaen Abraham, Isaac, and Jacob dae, Jesus storyim olketa and sei: “Hem [Jehovah] wanfala God, no for olketa wea dae, bat for olketa wea laef, from olketa laef long hem.” (Luke 20:37, 38) Thrifala faithful man hia dae finis, bat purpose bilong God for resurrectim olketa hem barava sure for fulfill, dastawe hem tingim olketa olsem olketa laef. Long Jehovah, for resurrectim olketa faithful servant hia hem olsem wei for creatim firstfala man from dust bilong graon.—Genesis 2:7.
Aposol Paul givim nara example bilong wei wea God mekem purpose bilong hem kamap. Insaed Bible, olketa kolem Abraham “dadi bilong planti nation.” (Romans 4:16, 17) Taem Abram no garem pikinini yet, Jehovah changem nem bilong hem for kamap Abraham, wea minim “Dadi Bilong Wanfala Crowd (Staka pipol).” Jehovah kosim mining bilong nem hia for fulfill taem, long mirakol wei, hem givim Abraham and olo waef bilong hem, Sarah, strong for garem pikinini.—Hebrews 11:11, 12.
Witim bigfala paoa and position wea hem kasem, Jesus storyim olketa tru samting witim tingting wea moa hae winim olketa man. Nomata klos fren bilong hem Lazarus hem dae, Jesus talem olketa disaepol bilong hem: “Fren bilong iumi Lazarus hem go for rest, bat mi go long there for wekapem hem from sleep.” (John 11:11) Why nao Jesus storyim man wea dae finis olsem hem sleep nomoa?
Taem Jesus kasem homtaon bilong Lazarus, Bethany, hem go long grev and givim order for olketa tekem awe ston wea satem door bilong grev. Bihaen hem prea big, hem givim komand: “Lazarus, kamaot!” And taem olketa wea lukluk luk go long grev, “disfala man wea dae finis, hem kamaot nao witim olketa kaleko wea olketa pasolem long leg and hand bilong hem, and wanfala kaleko wea raonem feis bilong hem.” Then Jesus hem sei: “Aotem olketa kaleko and letem hem go.” (John 11:43, 44) Jesus resurrectim Lazarus—givim bak laef long man wea bin dae for fofala day! Christ hem no talem laea idea taem hem sei fren bilong hem sleep. Long tingting bilong Jehovah and Jesus, Lazarus wea dae hem sleep nomoa. Yes, Jesus and Dadi bilong hem long heven interest long olketa samting wea really happen.
Jehovah Savve Mekem Hope Bilong Iumi Kamap Really Samting
Olketa giaman idol barava difren from datfala God wea really stap! Olketa wea worshipim idol rong for sei idol wea olketa worshipim garem bigfala paoa. Bat, nomata haomas worship olketa givim, olketa idol hia hard for duim mirakol. Long narasaed, Jehovah God fit for storyim olketa servant bilong hem wea dae finis olsem olketa laef yet, bikos hem savve givim olketa laef moa. “Jehovah nao hem really God,” and hem nating giamanim pipol bilong hem.—Jeremiah 10:10.
Hem barava comfortim iumi for savve hao, long taem wea Jehovah markem, olketa wea dae finis wea stap long memory bilong hem bae resurrect—laef bak moa! (Acts 24:15) Yes, taem man hem resurrect hem kasem bak moa olketa wei bilong hem. For rememberim laef bilong olketa wea dae finis and resurrectim olketa hem no hard for Creator, wea garem barava bigfala wisdom and paoa. (Job 12:13; Isaiah 40:26) From Jehovah garem bigfala love, hem bae iusim perfect memory bilong hem for resurrectim olketa wea dae finis long wanfala paradaes earth witim fasin wea olketa garem bifor olketa dae.—1 John 4:8.
Taem world bilong Satan klosap nao for kasem end, future hem barava braet for olketa wea trust long God. (Proverbs 2:21, 22; Daniel 2:44; 1 John 5:19) Man wea raetem psalm hem promisim iumi: “Lelebet taem nomoa, and wicked wan bae finis; . . . bat olketa wea garem kwaet fasin bae kasem earth, and olketa bae hapi tumas long bigfala peace.” (Psalm 37:10, 11) Criminal fasin and raf fasin bae samting bilong bifor. Justice bae win, and hard taem saed long selen bae finis. (Psalm 37:6; 72:12, 13; Isaiah 65:21-23) Wei for daonem nara pipol saed long kala skin, tribe, and kantri bae finis evribit. (Acts 10:34, 35) Olketa war and tul for faet bae finis. (Psalm 46:9) Long datfala taem “no eniwan bae sei: ‘Mi sik.’” (Isaiah 33:24) Evriwan bae enjoyim perfect and gud health. (Revelation 21:3, 4) Paradaes long earth hem klosap kamap really samting. Hem purpose bilong Jehovah!
Yes, evri hope from Bible klosap nao for fulfill. Why nao iumi shud letem samting wea world lovem tumas for giamanim iumi taem iumi savve putim full trust bilong iumi long Jehovah? Hem will bilong hem for “evri difren kaen man mas sev and kasem stretfala savve bilong truth.” (1 Timothy 2:3, 4) Winim wei for iusim taem and strong bilong iumi long olketa giaman samting bilong disfala system and olketa god bilong hem, letem iumi grow long savve abaotem disfala God wea hem really stap and trust long hem witim full heart bilong iumi.—Proverbs 3:1-6; John 17:3.
[Piksa long page 6]
Long tingting bilong Jehovah and Jesus, Lazarus hem sleep nomoa
[Olketa Piksa long page 7]
Paradaes long earth klosap for kamap really samting