“Kam Long Mi,. . . and Mi Bae Strongim Iufala”
‘Preachim Word’ Mekem Man Strong Bak Moa
HEM wanfala perfect man wea duim wanfala important assignment. Olketa wei bilong hem for teach hem barava gud tumas gogo “olketa pipol sapraes fogud long wei bilong hem for teach.” (Matthew 7:28) And tu hem nating savve taed for preach. Taem, strong, and evri paoa bilong hem, hem iusim for preach abaotem Kingdom bilong God. Tru nao, Jesus Christ travel olsem wanfala nambawan man for preach and teach thru long full homland bilong hem.—Matthew 9:35.
Datfala important assignment bilong Jesus hem nao for preachim “datfala gud nius bilong kingdom” long olketa wea stap raonem hem and for trainim olketa disaepol bilong hem for duim sem waka evriwea long world. (Matthew 4:23; 24:14; 28:19, 20) Waswe, bae hevi bilong assignment bilong olketa for preach and wei wea hem important tumas and tu wei wea hem barava big tumas mekem olketa follower bilong hem wea no perfect and short long savve for wikdaon?
Barava nomoa nao! Bihaen hem talem olketa disaepol for prea long Jehovah God, “Masta bilong harvest,” for samfala moa wakman, Jesus sendem olketa go for teachim pipol. (Matthew 9:38; 10:1) Then hem promisim olketa hao responsibility bilong olketa olsem follower bilong hem—insaed diswan hem komand for preach—bae givim trufala comfort and bae helpem olketa. Jesus sei: “Kam long mi, . . . and mi bae strongim iufala.”—Matthew 11:28.
Mekem Hapi Kamap
Datfala invitation showimaot wei for kea, hem loving, and kaen! Hem showimaot hao Jesus garem feeling and wari for olketa follower bilong hem. Olketa disaepol bilong hem kasem wei for strong moa taem olketa fulfillim responsibility for preachim “datfala gud nius” bilong Kingdom bilong God. Diswan givim trufala hapi and wei for satisfae.—John 4:36.
Longtaem bifor Jesus stap long earth, Bible strongim hao wei for hapi hem part long holy service long God. Hem showaot klia taem man for raetem psalm sing olsem: “Singaot for win long Jehovah, olketa pipol bilong earth. Servem Jehovah witim hapi. Kam front long hem witim hapi singaot.” (Psalm 100:1, 2) Distaem, pipol bilong evri nation barava hapi long Jehovah, and toktok bilong praise hem olsem wanfala singaot bilong win bilong wanfala army. Olketa wea barava lovem God kam front long hem “witim hapi singaot.” And datwan hem barava fitim from Jehovah hem “datfala hapi God,” wea laekem olketa servant bilong hem for kasem hapi taem olketa go ahed for fulfillim dedication long hem.—1 Timothy 1:11.
Olketa Minister wea Kasem Strong Moa
Why nao hard waka long field ministry hem no mekem iumi taed bat hem mekem iumi strong moa? For Jesus, wei for duim waka bilong Jehovah hem olsem gudfala kaikai wea strongim hem. Hem sei: “Kaikai bilong mi hem for duim will bilong datwan wea sendem mi kam, and for finisim waka bilong hem.”—John 4:34.
Long sem wei tu, olketa Christian distaem wea strong for preach kasem hapi taem olketa “preachim word.” (2 Timothy 4:2) Connie, wanfala Christian woman wea olo lelebet wea savve duim winim 70 hour evri month long preaching waka, sei: “Bihaen mi duim ministry, mi feel satisfae and feel hapi, nomata mi taed long end bilong datfala day.”
Waswe sapos pipol no laek herem Kingdom message? Connie go ahed for sei: “Nomata wanem ansa pipol givim, mi no sorre enitaem yet from mi share insaed ministry. Mi savve samting wea mi duim mekem Jehovah hapi and tu mi tingim hem wanfala hapi samting for story abaotem truth bikos taem mi duim olsem, nambawan hope from Bible hem kamap moa strong insaed heart bilong mi.”
Samfala narawan lukim hao taem olketa helpem pipol for kasem stretfala savve abaotem God, hem mekem laef bilong olketa seleva garem mining. Meloney, wanfala young woman wea evritaem savve duim 50 hour evri month insaed preaching waka, hem sei: “Ministry savve strongim mi from hem mekem laef bilong mi garem mining and purpose. Olketa problem bilong miseleva and olketa hevi bilong evriday kamap no important taem mi share long service.”
Millicent, nara strongfala minister bilong Olketa Jehovah’s Witness sei olsem: “Ministry mekem evriday moa important from mi iusim for story long narawan abaotem purpose bilong God for olketa man and hao paradaes bae kam bak moa long earth. Hem mekem mi evriday tingim Jehovah olsem really man and hem givim mi peace and hapi wea man no savve kasem long eni nara wei.”
Olketa wea Kasem Strong Moa
Tru nao, olketa wea preachim Kingdom kasem strong moa from Christian ministry, and olketa wea acceptim message wea givim laef kasem comfort from datwan. Nomata wanfala skul teacher long Portugal kasem training from olketa nun and priest, hem no ting church bilong hem satisfaem spiritual need bilong hem. Olketa Bible kwestin bilong hem no kasem ansa. Taem hem study olowe witim wanfala Jehovah’s Witness, hem go ahed for grow long spiritual savve. Skul teacher hia hem hapi tumas. “Mi evritaem weit for study bilong mi long evri Wednesday,” hem sei, “from evri kwestin bilong mi kasem ansa witim pruv long Bible.” Distaem, woman hia hem wanfala servant bilong Jehovah wea dedicate, and hem tu savve strongim moa olketa narawan witim truth from Bible.
Hem klia tumas hao Olketa Jehovah’s Witness no letem wei wea preaching assignment bilong olketa hem important tumas and wei wea olketa garem bigfala territory evriwea long world for mekem olketa wikdaon. Nomata pipol no interest or againstim olketa diswan no mekem olketa wikdaon. Olketa givim full strong bilong olketa for fulfillim assignment for duim Kingdom-preaching. Olketa sharem gud nius long pipol long evri ples—long wanfala ples for olketa trak stop long hem long United States (1), long wanfala airport long Korea (2), long Andes (3), or long wanfala market long London (4). Evriwea long world olketa follower bilong Jesus distaem hapi for go ahed for duim waka bilong olketa wea givim reward. And olsem hem promisim, hem strongim moa olketa and hem iusim olketa for strongim planti narawan.—Revelation 22:17.