Givim Glory Long God Long Olketa Maunten Long Philippines
Sapos iu tingse Philippines hem wanfala island nation, then tingting bilong iu hem stret. Bat hem wanfala kantri wea garem olketa nambawan maunten tu. Olketa Jehovah’s Witness wea olketa duim preaching long olketa taon and olketa lowfala ples faendem hao hem bin isi and planti gud samting kamaot from datwan. Bat, long olketa maunten hem barava difren tumas.
OLKETA nambawan maunten bilong datfala kantri luk difren tumas from sandbis long saedsea, coral reef, olketa fishing vilij and olketa busy taon long olketa level ples. Hem barava bigfala challenge for preachim disfala “gud nius” bilong Kingdom bilong God long olketa maunten hia.—Matthew 24:14.
Olketa island bilong Philippines stap long wanfala ples wea tufala tectonic plate savve banga tugeta. Wei wea land long datfala area hem go ap mekem olketa sharp maunten kamap long olketa island wea moa big. Winim 7,100 island bilong Philippines stap long west saed bilong datfala Pacific Ring of Fire. Dastawe olketa island hia garem planti volcano, wea hem tu mekem datfala land garem planti maunten. Olketa steep maunten hia mekem pipol wea stap long olketa maunten for stap seleva. Hem lelebet hard for kasem olketa from no staka road wea fitim trak hem stap.
Nomata olketa problem olsem stap, Olketa Jehovah’s Witness luksavve long need for kasem “evri difren kaen man.” (1 Timothy 2:4) Dastawe, Olketa Witness long Philippines followim toktok bilong Isaiah 42:11, 12: “Letem olketa wea stap long steep maunten singaot witim hapi. Antap long olketa maunten letem pipol singaot big. Letem olketa givim glory long Jehovah, and long olketa island letem olketa talemaot praise bilong hem.”
Wei wea olketa waka hard for givim witness long pipol bilong olketa maunten hem start winim 50 year go finis. Bihaen World War II, olketa missionary help for mekem disfala waka muv ahed. Planti pipol acceptim truth bilong Bible gogo olketa tu help for sharem disfala truth long olketa vilij wea stap farawe antap olketa maunten. Planti gud samting kamaot from diswan. Olsem example, long olketa Cordillera Central maunten long north Luzon, winim 6,000 pablisa bilong gud nius stap. Klosap evriwan kam from datfala area, insaed diswan hem pipol bilong Ibaloi, Ifugao, and Kalinga.
Nomata olsem, samfala ples long maunten stap yet wea hard for kasem. Olketa no forgetim pipol wea stap long there. Hao nao olketa kasem samfala, and wanem nao happen?
Trufala Faith Changem Kastom
Long north island bilong Luzon, long olketa maunten area long province bilong Abra hem ples bilong Tinggi pipol. Disfala nem maet kam from disfala word tinggi wea minim “maunten” long languis bilong Malaysia bifor. Datwan hem barava fitim! Pipol hia savve kolem olketa seleva and languis bilong olketa Itneg. Olketa biliv long wanfala god wea olketa kolem Kabunian, and long evriday living olketa followim tumas olketa kastom biliv. Olsem example, sapos wanfala man hem plan for go long wanfala ples then hem sneeze, diswan hem wanfala nogud saen. Hem mas weit for tu-thri hour firstaem mekem datfala nogud saen finis.
Long 1572, olketa bilong Spain tekem kam Catholic religion, bat olketa fail for teachim tru Christian Wei long Tinggi pipol. Olketa wea kamap Catholic go ahed for biliv long Kabunian and followim olketa kastom bilong olketa. Stretfala savve abaotem Bible hem kasem pipol hia long olketa year bilong 1930 taem Olketa Jehovah’s Witness start for talemaot Kingdom message long olketa maunten hia. Start long datfala taem planti Tinggi pipol givim glory long Jehovah “long antap olketa maunten.”
Olsem example, bifor, Lingbaoan hem wanfala long olketa man wea pipol respectim olsem hed bilong tribe long datfala area. Hem barava followim kastom bilong Tinggi pipol. “Mi faithful for followim evri Tinggi kastom. Sapos wanfala man hem dae, mifala savve dance bihaen olketa berem hem, and bangam olketa gong. Mifala savve sakrifaesim olketa animal tu. Mifala biliv long Kabunian, and mi no savve long God bilong Bible.” Hem biliv olsem nomata hem wanfala Catholic.
Olketa minister bilong Olketa Jehovah’s Witness go for preach long datfala area. Olketa meetim Lingbaoan and encouragem hem for readim Bible. Hem ting bak olsem: “Bible nao barava mekem mi biliv hao Jehovah hem trufala God.” Then wanfala Witness studyim Bible witim hem, and gogo Lingbaoan hem disaed for servem trufala God. Hem lusim olketa wei bilong hem bifor, witim position bilong hem olsem wanfala leader bilong tribe, wea mekem olketa priest long there and olketa fren bilong Lingbaoan bifor barava kros. Bat, Lingbaoan, disaed strong for followim olketa tru samting wea hem lanem long Bible. Distaem hem wanfala elder long kongregeson.
Sevenfala Day and Sixfala Naet
Nomata samfala part bilong Abra kasem gud nius olowe, samfala nara part hem farawe and only samfala taem nomoa bae olketa kasem gud nius. Wanfala taem, olketa trae hard for go kasem wanfala long olketa area hia. Wanfala grup bilong 35 Witness nao go for preach long territory bilong Tineg, long Abra, ples wea olketa no visitim for 27 year.
Disfala gogo hem for sevenfala day and olketa mas wakabaot. Tingim hao olketa mas katkros olketa bridge wea olketa wakem from rope wea hange and olketa deep river and for wakabaot and karekare for planti hour akros long olketa hae maunten—evri samting hia olketa duim for preachim gud nius long olketa wea no garem planti chance for herem! Fofala long sixfala naet bilong datfala gogo olketa sleep aotsaed nomoa.
Nomata olketa strongfala Witness hia karem samfala kaikai, hem hard for olketa karem inaf kaikai for full gogo hia. Bat diswan no wanfala problem bikos pipol hapi for exchangem kaikai for olketa Bible pablikeson. Pipol givim olketa Witness kaikai from farm, fish, and meat bilong deer. Nomata samfala samting hem hard, datfala grup sei: “Mifala willing for mekem olketa sakrifaes hia bikos long bigfala hapi wea mifala kasem.”
Insaed sevenfala day, olketa minister hia givim witness long tenfala vilij, givim 60 buk, 186 magasin, 50 brochure, and staka tract. Olketa showim hao for studyim Bible long 74 grup pipol. From samfala bigman and man wea garem hae position long taon bilong Tineg askem olketa, olketa arrangem wanfala kongregeson meeting and 78 nao attend. Staka long olketa wea kam hem olketa teacher and policeman. Iumi hope for planti moa Tinggi pipol joinim olketa wea ‘singaot’ and praisem Jehovah antap olketa maunten.
Samting wea Moabeta Winim Gold
Long south bilong Philippines samfala island stap wea bifor pipol bilong Spain faendem gold long there. Dastawe, datfala ples garem nem Mindoro, wea kam from toktok bilong olketa long Spain mina de oro, wea minim “gold mine.” Bat, distaem olketa savve faendem samting wea moabeta winim gold long olketa island hia—pipol wea want for servem trufala God, Jehovah.
Samting olsem 125,000 pipol wea olketa kolem olketa Mangyan stap long midol bush bilong Mindoro. Olketa garem simpol laef, olketa no meetim planti difren pipol, and olketa garem languis bilong olketa seleva. Planti biliv long olketa spirit and wei for worshipim planti god, and olketa biliv tu hao samfala spirit stap insaed nature.
Samfala taem from olketa no garem inaf kaikai or samfala nara samting, samfala man wanwan savve kam daon long olketa area long saedsea for lukaotem waka. Hem nao samting wea happen long Pailing, wea kam from wanfala sekson bilong olketa Mangyan wea olketa kolem Batangan. Hem growap midolwan pipol bilong hem wea stap long bush long maunten, and hem followim olketa biliv and kastom bilong olketa Batangan pipol. Kaleko bilong olketa hem kabilato nomoa. For mek sure olketa harvestim planti kaikai, hem kastom bilong Batangan pipol for olketa worshiper mas killim dae wanfala kokorako and taem olketa prea olketa mekem blood bilong hem isisi foldaon long wata.
Distaem Pailing no followim olketa kastom olsem. Why nao olsem? Taem hem go daon long olketa low ples, hem kasem waka witim samfala famili wea olketa Jehovah’s Witness. Wanfala famili hia iusim datfala chance for showim truth from Bible long Pailing. Hem barava laekem and tinghae long samting wea hem lanem abaotem purpose bilong Jehovah for olketa man and disfala earth. Olketa arrange for hem go joinim primary skul, and for hem studyim Bible. Pailing baptaes olsem wanfala Jehovah’s Witness taem age bilong hem 24. Taem hem kasem 30 year, hem form tu long secondary skul, and hem mekem skul kamap preaching territory bilong hem. Distaem olketa savve kolem hem Rolando (wanfala nem bilong olketa long low ples).
Sapos iu meetim Rolando, bae iu lukim hao hem wanfala hapi minister wea werem naes kaleko and wea serve olsem man for preach full taem and ministerial servant long wanfala kongregeson long Mindoro. No longtaem go nomoa Rolando go bak long olketa maunten no for join insaed kastom bilong Batangan pipol bat for sharem truth bilong Bible wea savve givim laef witim olketa long there.
Barava Wantem Wanfala Kingdom Hall
Province bilong Bukidnon—wea minim “Pipol bilong olketa Maunten” long Cebuano languis—hem stap long Mindanao island long south. Disfala ples garem olketa maunten, deep valley, valley wea garem river, and olketa flat ples. From graon hem gud tumas olketa growim olketa pineapple, corn, coffee, rice, and banana plantation. Olketa maunten tribe bilong Talaandig and Higaonon stap long there. Olketa pipol hia need for lane abaotem Jehovah tu. No longtaem go nomoa, klosap long taon bilong Talakag wanfala chance kamap long barava interesting wei.
Olketa Witness wea go ap long olketa maunten feelim hao datfala ples hem cold lelebet bat pipol barava welkamim olketa. Pipol long there sei olketa biliv long olmaeti God, datfala Father, bat olketa no savve long nem bilong hem. From olketa stap olowe long bush, diswan hem firstaem for olketa meetim Olketa Jehovah’s Witness. Olketa Witness storyim nem bilong God, and tu nambawan purpose bilong hem wea join witim Kingdom. Olketa pipol barava hapi, so olketa Witness disaed for mas visitim moa olketa long vilij hia.
Bihaen datfala taem olketa visit samfala taem moa. From diswan, pipol long there givim wanfala area for “haos” bilong Olketa Jehovah’s Witness. Olketa Witness hapi for acceptim datwan. Area hia stap antap long hill wea moa hae winim olketa narawan, and hem feis kam long road. Olketa wakem datfala haos witim timba, bambu and leaf bilong palm. Olketa buildim insaed thrifala month and tenfala day. Saen wea garem toktok “Kingdom Hall bilong Olketa Jehovah’s Witness” hem isi for lukim long front bilong datfala haos. Tingim datwan, wanfala Kingdom Hall standap finis nomata no eni kongregeson stap yet!
Gogo, wanfala kongregeson elder wea hem full-taem minister hem go stap long there, and tu wanfala ministerial servant. Witim samfala Witness from olketa area wea stap klosap, olketa waka tugeta for mekem wanfala kongregeson kamap. And long August 1998 diswan hem happen. Distaem wanfala smol kongregeson iusim disfala Kingdom Hall, hem helpem pipol wea stap long olketa maunten for lanem truth bilong Bible.
Tru nao, Jehovah barava iusim olketa willing servant bilong hem long Philippines for sharem Kingdom truth nomata long olketa maunten wea hard for kasem. Diswan mekem iumi tingim Isaiah 52:7, wea sei: “Samting wea luk naes tumas long olketa maunten nao hem leg bilong dat wan wea tekem kam gud nius.”
[Olketa Map long page 11]
(For formatted text, lukim pablikeson)
ABRA
MINDORO
BUKIDNON
[Credit Line]
Globe: Mountain High Maps® Copyright © 1997 Digital Wisdom, Inc.
[Piksa long page 10]
For go preaching long olketa maunten man mas wakabaot for planti hour insaed bush
[Piksa long page 10]
Baptism long wanfala smol wata long maunten