Kwestin From Reader
Waswe, man need for go andanit wata evribit sapos hem want for baptaes long wata bat hem garem problem long body or nogud health, wea mekem hem hard for go andanit wata evribit?
Datfala word “baptaes” hem kam from Greek verb baʹpto, wea minim “for putim insaed.” (John 13:26) Insaed Bible, “for baptaes” hem sem olsem wei “for putim insaed evribit.” Abaotem baptism bilong datfala Ethiopian eunuch wea Philip duim, The Emphasised Bible, bilong Rotherham, hem sei: “Tufala evriwan nao go daon insaed wata, Philip and datfala eunuch,—and hem putim hem insaed wata evribit.” (Acts 8:38) So, olketa putim man wea baptaes andanit wata.—Matthew 3:16; Mark 1:10.
Jesus talem olketa disaepol bilong hem: “So go and mek-disaepol long pipol bilong evri nation, baptaesim olketa.” (Matthew 28:19, 20) Dastawe, Olketa Jehovah’s Witness duim olketa baptism insaed olketa pool, lake, river, or nara ples wea garem inaf wata for man go andanit long wata evribit. From Bible nao talem hao man mas baptaes and go andanit wata evribit, olketa man no garem paoa for sei samwan no need for baptaes. Dastawe, man shud baptaes nomata olketa mas duim samfala spesol samting for fitim need bilong hem. Olsem example, wei for baptaes insaed big tank wata hem helpem olketa wea olo or olketa wea barava sik tumas. Hotem lelebet datfala wata, then isisi putim man wea redy for baptaes insaed wata and, taem hem getius long wata, baptaesim hem.
Nomata pipol wea garem bigfala problem long body, olketa baptaes finis. Olsem example, olketa man wea kasem bigfala operation and, from diswan, olketa garem hol long nek bilong olketa olowe nao, or olketa wea need for iusim wanfala samting for brith, olketa baptaes tu. Bat, evri baptism olsem needim wei for prepare gud. Hem bae wise for garem wanfala nurse wea kasem training for stanbae or wanfala doctor sapos hem fitim. Bat, sapos olketa barava careful, planti taem olketa savve baptaesim hem. Dastawe, sapos man hem barava laek for baptaes and hem willing for acceptim samting wea maet kasem hem sapos hem duim datwan, hem gud for trae and duim evri samting wea fitim for man duim mekem hem bae savve baptaes.