Wei wea Kastom Biliv Kontrolem Pipol
IU SEKE for meetim samwan taem iu lusim haos bilong iu. Iu bangam toe bilong iu long wanfala ston. Iu herem krae bilong wankaen bird long naet. Iu dream abaotem sem samting olowe. Olketa hia samting nating nomoa long planti pipol. Bat for samfala pipol long West Africa, olketa samting hia hem olsem olketa saen, omen, or message from spirit world. Olketa expectim maet gud samting or trabol, wea depend long saen hia and mining bilong hem.
Bat no long Africa nomoa kastom biliv hem strong. Nomata olketa stap anda long wei for no bilivim God for planti year finis, staka pipol long China and long olketa republic bilong Soviet Union bifor still hol strong long kastom biliv. Long olketa rich kantri planti pipol luk long horoscope for showimaot wanem nao bae happen long olketa, olketa fraetem sapos wanfala day long month hem Friday 13th, and trae for stap klia from olketa blak puskat. Samfala pipol long North Saed bilong earth ting long wankaen laet long skae wea saen long naet olsem wanfala saen bilong war and sik. Long India, olketa trak draeva wea bilivim hao olketa need for duim sex mekem olketa no feel hot long hotfala day go ahed for spreadim AIDS. Long Japan, olketa wea waka long tunnel bilivim hao hem bad luck for wanfala woman go insaed tunnel bifor olketa finisim. Kastom biliv hem kamap big tu saed long sport. Wanfala man for plei volleyball tingse hem win olowe from hem werem blak socks and no white wan. Olketa samting olsem staka tumas.
Waswe long iu? Waswe, iu garem wanfala secret samting mekem iu fraet, wea iu hard for explainim? Waswe, wanfala “biliv, haf-biliv, or kastom wea luk olsem hard for explainim” hem affectim iu? Maet ansa bilong iu showimaot sapos kastom biliv kontrolem laef bilong iu, from hem nao hao wanfala buk hem talemaot mining bilong kastom biliv.
Man wea letem kastom biliv for affectim disison bilong hem and samting wea hem duim evriday hem letem samting wea hem no really minim for bossim hem. Waswe, diswan hem wise? Waswe, fitim iumi for mekem iumiseleva stap anda long paoa olsem wea no klia and nogud? Waswe, kastom biliv hem samting nating nomoa or hem wanfala danger samting?