Wanem Nao Happen Long Olketa Neiba?
“Community distaem no ting long eniwan olsem neiba.”—Benjamin Disraeli, bigman bilong gavman long England long mek-19 century.
OLKETA olo long Cuba garem interesting wei for apim gud living: wei for olketa neiba waka tugeta, or olsem olketa kolem, olketa grup bilong olketa grani. Olsem wanfala report long 1997 talem, samting olsem 1-fala long 5-fala olo long Cuba olketa bilong grup hia, wea kasem wei for kaban tugeta, givim saport, and help for keepim gudfala living. World-Health magasin hem sei: “Taem olketa doctor long datfala area needim help witim campaign for nilam pipol, olketa faendem disfala grup bilong olketa grani hia nao willing and fit for help.”
Bat, sorre tumas, long planti ples long world, pipol no garem nao fasin for kea long neiba. Olsem example, tingim trabol wea kasem Wolfgang Dircks, wea stap insaed wanfala bigfala building long western Europe. Samfala year bifor, The Canberra Times reportim hao nomata for longfala taem 17-fala famili wea stap long sem building witim Wolfgang no lukim hem, “no eniwan ting for go noknok long door bilong hem.” Gogo taem man wea ownim datfala building hem go insaed, “hem faendem bon nating nao sidaon front long television set.” Wanfala television program stap antap leg bilong datfala man wea garem date December 5, 1993. Wolfgang hem dae for faev year finis. Hem wanfala sorre samting wea showimaot fasin for no interest or kea midolwan olketa neiba! Dastawe wanfala man for raet talem insaed The New York Times Magazine hao pipol wea stap long area bilong hem kamap “wanfala community bilong olketa stranger,” olsem planti narawan. Waswe, hem samting wea happen long area wea iu stap tu?
Hem tru samfala community still enjoyim trufala wei for fren and samfala taon community waka hard for kea for neiba long wei wea moa big. Nomata olsem, planti pipol wea stap long taon no feel sef long area wea olketa stap. Olketa feel lonely from olketa no savve long neiba bilong olketa. Hao nao olsem?
No Savve Long Neiba
Tru nao, planti long iumi garem olketa neiba wea stap klosap. Laet from television set, olketa shadow long window wea muv, laet wea olketa onem and offem, saond bilong olketa car wea kam and go, pipol wea wakabaot go pas, olketa key wea openem and lokim door. Evri samting hia hem saen wea showimaot pipol long area still “laef.” Nomata olsem, eni really feeling for fren witim olketa neiba hem finis taem pipol wea stap long sem area no savve long each other or olketa garem barava busy living. Pipol maet feel hao no eni need stap for share witim olketa neiba or for duim eni samting for olketa. Niuspepa bilong Australia, Herald Sun hem sei: “Olketa man wanwan barava no savve long eni wan wea stap raonem olketa, and long datfala wei olketa feelim olsem olketa no garem responsibility saed long community. Distaem hem moa isi for man no tingim pipol wea hem no laek for kaban witim.”
Disfala samting no mekem iumi sapraes. Long disfala world wea pipol “lovem olketa seleva,” pipol kasem samting wea kamaot from living wea tingim seleva nomoa. (2 Timothy 3:2) From diswan pipol feel lonely and stap separate and no fren witim narawan. Wei for stap separate mekem kamap wei for no trustim eniwan, especially taem raf fasin and crime hem go ahed long datfala area. Gogo, wei for no trustim eniwan savve kwiktaem aotem fasin for kea long narawan.
Nomata wanem kaen living nao go ahed long area bilong iu, for sure iu bae agree hao wei for garem gudfala neiba hem gud samting long wanfala community. Iumi savve kasem staka gud samting taem pipol waka tugeta for kasem sem goal. Olketa gudfala neiba savve kamap wanfala blessing tu. Next article bae showimaot hao.