Persecution Saed Long Religion—Why?
WASWE, iu ting pipol shud kasem persecution bikos long religion bilong olketa? Maet nomoa—especially sapos hem no spoelem freedom bilong eniwan. Bat, wei for persecutim pipol bikos long religion bilong olketa hem samting wea happen from bifor kam and hem still happen distaem. Olsem example, insaed mek-20 century, Olketa Jehovah’s Witness long Europe and olketa difren part bilong world lusim freedom bilong olketa saed long religion and kasem nogud treatment.
Insaed datfala taem, Olketa Jehovah’s Witness kasem persecution wea raf, wea olketa organizem, and wea go ahed for longtaem, from National Socialist and Communist rul long Europe. Wanem nao experience bilong olketa Witness hia teachim iumi abaotem wei for kasem persecution saed long religion? And wanem nao iumi savve lanem from wei wea olketa deal witim wei for safa?
“No Part Bilong World”
Olketa Jehovah’s Witness waka hard for obeyim law, no mek trabol, and for stap klin saed long fasin. Olketa no againstim or luk aotem wei for againstim gavman, and olketa no aftarem persecution for mekem olketa dae for faith bilong olketa. Olketa Christian hia no teksaed long politik. Diswan hem followim toktok bilong Jesus: “[Olketa follower bilong mi] no part bilong world, olsem mi tu no part bilong world.” (John 17:16) Staka gavman acceptim wei wea olketa Witness no teksaed long politik. Bat olketa totalitarian ruler no tinghevi long mark bilong Bible for olketa Christian no part bilong world.
Reason why olketa olsem hem showaot insaed wanfala meeting wea kamap long University of Heidelberg, Germany, long November 2000. Datfala meeting garem theme, “Repression and Self-Assertion: Jehovah’s Witnesses Under the National Socialist and Communist Dictatorships.” Dr. Clemens Vollnhals bilong Hannah-Arendt-Institute for Research Into Totalitarianism hem sei: “Totalitarian rul hem no saed long politik nomoa. Hem mas bossim full laef bilong man.”
Olketa tru Christian kanduit givim go “full laef” bilong olketa long wanfala gavman bilong man, from olketa promis finis for loyal evribit long Jehovah God nomoa. Olketa Witness wea stap anda long olketa totalitarian rul faendem hao samting gavman talem olketa for duim hem samfala taem againstim faith bilong olketa. Wanem nao olketa duim taem tufala saed hia no agree? Olketa Jehovah’s Witness from taem bifor kam evritaem followim principle wea olketa disaepol bilong Jesus Christ talem: “Mifala mas obeyim God olsem ruler and no olketa man.”—Acts 5:29.
Staka thousand Witness stap loyal for faith bilong olketa and olketa nating teksaed long politik, nomata olketa kasem barava raf persecution. Hao nao olketa fit for stand strong? From wea nao olketa kasem strong for duim diswan? Bae iumi letem olketa Witness ansarem seleva. And bae iumi evriwan, olketa Witness and olketa wea no Witness, savve lane from experience bilong olketa.
[Blurb long page 4]
Olketa Jehovah’s Witness long Germany kasem barava raf persecution wea go ahed for longtaem anda long tufala totalitarian rul bilong mek-20 century
[Blurb long page 4]
“Totalitarian rul hem no saed long politik nomoa. Hem mas bossim full laef bilong man.”—Dr. Clemens Vollnhals
[Piksa long page 4]
Kusserow famili go long prison from olketa no willing for lusim faith bilong olketa
[Piksa long page 4]
Olketa killim dae Johannes Harms insaed wanfala Nazi concentration camp bikos long biliv bilong hem