Planti Kwestin—No Staka Ansa wea Mekem Man Satisfae
TAEM planti pipol lotu long morning bilong November 1, 1755, long All Saints’ Day, wanfala strongfala earthquake hem sekem taon bilong Lisbon. Planti thousand building foldaon and staka thousand pipol dae.
No longtaem bihaen datfala trabol, Voltaire, wanfala man from France for raet hem pablisim wanfala poem wea garem nem Poème sur le désastre de Lisbonne (Poem Abaotem Disaster Long Lisbon), wea storyim hao hem rong for man tingse God nao kosim datfala disaster for panisim pipol hia from olketa sin. Voltaire tingse man no fit for minim or explainim kaen disaster olsem taem hem raet olsem:
Nature no savve toktok, hem iusles for iumi kwestinim hem;
Iumi needim wanfala God wea savve toktok long olketa man.
Tru nao, Voltaire, hem no first wan for askem olketa kwestin abaotem God. Insaed history bilong man, olketa sorre samting and disaster mekem pipol garem planti kwestin. Samting olsem 3,600 year go finis, no longtaem bihaen olketa pikinini bilong hem dae and taem hem kasem nogud sik, datfala man Job ask olsem: “Why nao [God] givim laet for man wea kasem trabol, and laef for man wea soul bilong hem feel nogud?” (Job 3:20) Distaem, planti konfius long why nao wanfala God wea gud and garem love luk olsem hem nating duim eni samting, nomata wei for safa and no followim justice hem big tumas.
From olketa feisim samting wea kamap from bigfala hangre, war, sik, and dae, planti pipol rejectim evribit tingting for sei wanfala Creator wea kea abaotem iumi hem stap. Wanfala savveman wea no biliv long God sei: “No eniting savve aotem blame from God from wei wea hem letem wanfala pikinini for safa, . . . only samting hem sapos no eni God stap.” Olketa bigfala sorre samting wea happen, olsem datfala Holocaust long World War II, hem mekem samfala narawan for ting olsem tu. Lukim disfala toktok wea wanfala man for raet wea hem wanfala Jew talem: “Only simpol wei for explainim samting wea happen long Auschwitz hem nao for sei no eni God stap for helpem olketa man.” Long France, wea main religion hem Catholic, olketa duim wanfala survey long 1997 wea showimaot hao samting olsem 40 percent long pipol daotem wei wea God stap bikos long olketa wei for killkill, olsem datwan wea happen long Rwanda long 1994.
Hem Blokem Faith?
Why nao God no duim samting for stopem olketa nogud samting hia for happen? Wanfala Catholic man for raetem history hem sei hao disfala kwestin hem “wanfala main samting wea blokem faith” bilong planti pipol. Hem ask olsem: “Waswe, man fit for biliv long wanfala God wea stap and lukluk nomoa taem pipol wea no garem blame olketa dae and lukim hao pipol killim dae olketa full tribe insaed wanfala kantri and hem nating duim eniting for stopem diswan?”
Wanfala toktok insaed Catholic niuspepa La Croix sei olsem: “Nomata sapos hem sorre samting wea happen insaed history, or from wei wea world muv ahed saed long technology, olketa natural disaster, olketa organization bilong olketa criminal, or taem samwan wea man lovem hem dae, taem each samting hia happen, pipol seke and luk go long God for explainim diswan. Wea nao God? Olketa want for kasem ansa. Bat, hem nao Datwan wea No Garem Feeling for Pipol, Datwan wea Nating Kea.”
Pope John-Paul II storyim abaotem kwestin hia insaed datfala Salvifici Doloris, leta bilong hem long 1984. Hem raet olsem: “From disfala world stap pipol biliv hao God stap, hao hem garem wisdom, paoa and hem nambawan, bat wicked fasin and wei for safa hem haedem olketa fasin hia bilong God, samfala taem long barava bigfala wei, especially taem wei for safa wea man no fit for kasem hem happen and planti nogud samting happen bat olketa wea duim no kasem panis.”
Waswe, hem mek sense for sei wanfala God wea garem love evribit and garem paoa evribit, olsem wanem Bible storyim, hem really stap, taem iumi lukim wei wea staka man safa long world distaem? Waswe, hem duim samting for stopem olketa trabol wea happen long man wanwan and long evri pipol? Waswe, hem duim eniting for iumi distaem? Olsem samting wea Voltaire talem, waswe, eni “God wea savve toktok long olketa man” hem stap for ansarem olketa kwestin hia? Plis readim next article for kasem ansa.
[Olketa Piksa long page 3]
Disaster long Lisbon long 1755 muvim Voltaire for sei man no fit for minim why samting olsem hem happen
[Olketa Credit Line]
Voltaire: From the book Great Men and Famous Women; Lisbon: J.P. Le Bas, Praça da Patriarcal depois do terramoto de 1755. Foto: Museu da Cidade/Lisboa
[Piksa long page 4]
Pipol daotem wei wea God stap bikos long wei for killkill, olsem datwan long Rwanda
[Credit Line]
AFP PHOTO
[Piksa Credit Line long page 2]
COVER, children: USHMM, courtesy of Main Commission for the Prosecution of the Crimes against the Polish Nation