Waswe, Iumi Fit for Trustim Eniwan?

BIHAEN olketa brekem daon Berlin Wall long 1989, samfala secret wea bin haed hem kamaot klia. Olsem example, Lydiaa hem faendaot hao taem olketa Socialist rulim East Germany, Stasi, wea hem nao State Security Service, hem mekem wanfala record abaotem evri samting wea hem duim. Lydia hem sapraes for savve long diswan, bat hem barava seke tumas for faendaot hao hasband bilong hem nao givim disfala information long datfala Stasi. Man wea hem shud fit for trustim evribit nao givim go olketa information hia.

Robert hem wanfala olo man wea ting long doctor long datfala area witim “bigfala respect, wei for tinghae and trust,” hem nao wanem The Times bilong London hem talem. Pipol sei datfala doctor garem “kaenfala fasin and wei for tingim feeling bilong narawan.” Then seknomoa Robert hem dae. Waswe, hem dae from heart attak or wanfala stroke? Nomoa. Olketa police sei datfala doctor hem visitim Robert long haos bilong hem and, long wei wea Robert and famili bilong hem no savve, hem nilam hem witim medicine for killim hem dae. Luk olsem man wea Robert trustim evribit nao killim hem dae.

Samwan hem spoelem trust bilong Lydia and Robert, and barava serious samting nao kamaot from datwan. Samfala taem samting wea kamap from wei for spoelem trust hem no serious olsem. Nomata olsem, wei for feel nogud from samwan spoelem trust bilong iumi hem samting wea happen planti taem. Wanfala report bilong wanfala organization long Germany for duim survey, Allensbacher Jahrbuch der Demoskopie 1998-2002, hem showimaot hao 86 percent long pipol wea olketa askem talem hao samwan wea olketa trustim hem spoelem trust bilong olketa. Maet samting olsem hem kasem iu tu. Dastawe, iumi no sapraes hao datfala niuspepa bilong Switzerland Neue Zürcher Zeitung report long 2002 hao long olketa kantri wea garem olketa bigfala bisnis, “wei for garem trust hem go ahed for katdaon insaed olketa year wea go pas.”

Isisi for Kamap, Kwiktaem for Finis

Wanem nao trust? Wanfala dictionary explainim wei for trustim narawan olsem wei for biliv hao man hia bae honest and tru and hao hem bae no min for duim eniting for spoelem iu. Trust hem isisi nomoa for kamap bat hem kwiktaem for finis. From planti pipol feelim wei wea samwan spoelem trust bilong olketa, iumi no sapraes hao pipol no willing for trustim narawan. Long wanfala survey wea olketa pablisim long Germany long 2002, “winim 2-fala long evri 3-fala young wan no trustim pipol.”

Maet iumi askem iumiseleva: ‘Waswe, iumi savve really trustim eniwan? Waswe, fitim for iumi trustim samwan nomata gogo maet hem spoelem datfala trust?’

[Footnote]

[Blurb long page 3]

Wanfala survey showimaot hao 86 percent long pipol wea olketa askem talem hao samwan wea olketa trustim spoelem trust bilong olketa