Trust Hem Important for Mekem Laef Hapi
TAEM kaikai mekem man sik bae man feel nogud tumas. Man wea kasem diswan olowe hem mas lukluk gud long wanem hem kaikaim. Bat bae hem no mek sense sapos man stop evribit for kaikai bikos hem fraet nogud hem kasem sik from eni kaikai. Sapos hem duim datwan bae hem kasem moa problem. Man wea no kaikai bae dae.
Long sem wei tu, taem samwan spoelem trust bilong iumi bae iumi feel pain. Taem diswan happen planti taem, iumi maet start for lukluk gud long wanem kaen fren nao iumi chusim. Bat, for disaed for no stap witim eni pipol mekem olketa no savve spoelem iu bae no stretem diswan. Why nao olsem? Bikos wei for no trustim narawan hem spoelem hapi bilong iumiseleva. For garem laef wea mekem man satisfae, iumi needim wei for fren wea garem faondeson long wei for trustim each other.
Wanfala buk Jugend 2002 hem koment olsem: “Trust hem wanfala long olketa main samting wea iumi needim for deal witim each other insaed evriday living.” Report from datfala niuspepa Neue Zürcher Zeitung hem sei: “Evriwan barava laek for garem trust. . . . Trust hem mekem laef hem moabeta,” hem kamap samting wea “important for mekem iumi stap laef.” Datfala niuspepa go ahed for sei sapos man no garem trust, “man kanduit deal witim laef.”
From iumi garem disfala need for trustim samwan, hu nao iumi fit for trustim wea bae no spoelem trust bilong iumi?
Trustim Jehovah Witim Full Heart Bilong Iu
Bible talem iumi for “trustim Jehovah witim full heart bilong iu.” (Proverbs 3:5) Tru nao, Word bilong God evritaem talem iumi for trustim Creator bilong iumi, Jehovah God.
Why nao iumi savve trustim God? First samting, hem bikos Jehovah God hem holy. Profet Isaiah raet olsem: “Holy, holy, holy nao Jehovah.” (Isaiah 6:3) Waswe, wei for holy hem samting wea iu no laekem? Really, hem samting wea iu shud laekem bikos holy fasin bilong Jehovah hem showimaot hao hem klin, stap farawe from eni wei for duim rong samting, and iumi barava fit for trustim hem. Hem kanduit kamap nogud or spoelem man, and hem hard tumas for hem spoelem trust bilong iumi.
And tu, iumi savve trustim God bikos hem savve and hem want for saportim olketa wea servem hem. Olsem example, barava hae paoa bilong hem mekem hem fit for duim samting. Perfect justice and wisdom bilong hem directim wei wea hem duim samting. And love bilong hem wea big winim eni narawan, muvim hem for duim samting. Aposol John raet olsem:“God hem love.” (1 John 4:8) Love bilong God nao bihaenem evriting wea hem duim. Holy fasin bilong Jehovah and tu olketa nara main fasin bilong hem mekem hem barava gudfala Dadi, man wea iumi fit for trustim evribit. No eniting and no eniwan fit for kasem trust bilong iumi winim Jehovah.
Trustim Jehovah and Stap Hapi
Nara gud reason for iumi trustim Jehovah hem from hem nomoa savve minim iumi evribit. Hem savve hao man wanwan hem garem need for garem wei for fren witim Creator wea sef, stap for olowe and wea garem trust. Olketa wea garem wei for fren olsem olketa feel sef. King David hem sei olsem: “Hapi nao man wea putim trust bilong hem long Jehovah.” (Psalm 40:4) Planti million pipol distaem agree evribit witim tingting bilong David.
Tingim samfala example. Doris bin stap long Dominican Republic, Germany, Greece, and United States. Hem sei: “Mi hapi tumas for putim trust bilong mi long Jehovah. Hem savve hao for lukaftarem mi long physical wei, spiritual wei, and saed long feeling. Hem nao best fren wea man fit for garem.” Wolfgang, wea waka saed long law sei: “Hem mekem man feel gud tumas for depend long samwan wea ting for duim best samting for iu, samwan wea fit for duim—and wea bae duim—best samting for helpem iumi!” Ham, wea born long Asia bat distaem stap long Europe sei: “Mi feel sure Jehovah hem kontrolem evri samting, and hem no savve duim eni mistek, so mi hapi for depend long hem.”
Hem tru, each wan long iumi need for trust no long Creator nomoa bat long pipol tu. Dastawe, Jehovah, from hem wisefala fren wea garem savve evribit, hem givim iumi advaes abaotem wanem kaen man nao iumi shud trustim. Sapos iumi readim gud Bible, iumi bae lukim kaonsel abaotem diswan.
Pipol wea Iumi Savve Trustim
Man for raetem psalm hem raet olsem: “No putim trust bilong iufala long olketa bigman, or son bilong man long earth, wea no savve givim salvation.” (Psalm 146:3) Disfala toktok wea kam from God hem helpem iumi for luksavve hao planti man no fit for kasem trust bilong iumi. Nomata sapos hem “bigman” wea pipol long disfala world tinghae long hem, olsem olketa savveman, diswan hem no minim iumi fit for trustim olketa. Planti taem samting wea olketa teachim hem leadim man rong, and sapos iumi trustim olketa “bigman” olsem, hem bae isi for spoelem trust bilong iumi.
Diswan hem shud no mekem iumi for no trustim eniwan. Bat, hem klia hao iumi need for lukluk gud firstaem bifor iumi trustim man. Wanem nao savve helpem iumi lukluk gud? Wanfala example from nation bilong Israel bifor bae helpem iumi for savve. Taem Moses mas chusim samfala man for garem bigfala responsibility long Israel, hem kasem advaes for “chusim aot from evri pipol olketa man wea fit, wea fraet long God, wea fit for trustim, wea heitim wei for kasem selen long rongfala wei.” (Exodus 18:21) Wanem nao iumi savve lanem from diswan?
Olketa man hia showimaot olketa fasin wea followim God bifor olketa kasem appointment for garem position wea olketa bae garem trust bilong pipol. Olketa pruvim finis hao olketa fraet long God; olketa garem gudfala wei for respectim Creator and fraet for duim eniting for mekem hem feel nogud. Evriwan isi for luksavve hao olketa man hia duim best bilong olketa for keepim olketa standard bilong God. Wei wea olketa heitim wei for kasem selen long rong wei, showimaot olketa garem strong fasin wea bae protectim olketa from paoa wea olketa kasem wea savve spoelem man. Olketa bae no spoelem trust for mekem olketa seleva or olketa fren and relative kasem gud samting.
Waswe, hem no wise samting for iumi distaem tingim sem samting taem iumi chusim olketa wea iumi bae trustim? Waswe, iumi savve long samfala pipol wea fasin bilong olketa showimaot olketa fraet long God? Waswe, olketa disaed strong for keepim olketa standard bilong hem saed long fasin? Waswe, olketa garem faithful fasin mekem olketa hol bak for duim samting wea no stret? Waswe, olketa garem honest fasin mekem olketa no mekius long wanfala samting wea kamap for kasem gud samting for olketa seleva or for mekem samting followim tingting bilong olketa? For sure, fitim iumi for trustim olketa man and woman wea garem olketa nambawan fasin olsem.
No Wikdaon Sapos Samfala Taem Samwan Spoelem Trust
Taem iumi disaed hu nao bae iumi trustim, iumi mas patient, from trust hem samting wea isisi for kamap. Wise samting for duim nao hem for trustim samwan, step-bae-step. Long wanem wei? Maet iumi savve lukluk firstaem long fasin bilong man, lukim wanem nao hem savve duim taem samfala samting hem happen. Waswe, disfala man fit for kasem trust bilong iu nomata long smol samting? Olsem example, waswe, hem followim promis bilong hem for givim bak samting hem tekem? And waswe, hem savve kam long barava taem wea iufala markem for wanfala samting? Sapos olsem, then iumi savve feel sure iumi savve trustim hem long samfala samting wea moa serious. Diswan fitim disfala principle: “Man wea faithful long smol samting hem faithful long big samting tu.” (Luke 16:10) Taem iumi chus gud and patient hem bae helpem iumi for missim wei for feel nogud taem samwan spoelem trust bilong iumi.
Bat, waswe sapos samwan spoelem trust bilong iu? Olketa wea studyim Bible savve rememberim hao long naet wea olketa arrestim Jesus Christ olketa aposol no saportim hem long taem hem needim olketa. Judas Iscariot givim hem go long enemy, and from olketa narawan fraet, olketa ranawe. Peter tu denyim Jesus thrifala taem. Bat Jesus luksavve hao Judas nomoa min for againstim hem. Nomata olketa no saportim hem long datfala barava hardfala taem, Jesus no letem diswan stopem hem for talemaot moa hao hem trustim 11-fala aposol bilong hem tu-thri week bihaen. (Matthew 26:45-47, 56, 69-75; 28:16-20) Long sem wei tu, sapos iumi feel samwan spoelem trust wea iumi garem long olketa, hem gud for iumi tingim hao maet diswan no showimaot hem man wea iumi no fit for trustim, bat maet hem from wik point bilong hem nomoa.
Waswe, Man Fit for Trustim Mi?
Samwan wea disaed for chus gud bifor hem trustim narawan mas honest and askem hemseleva: ‘Waswe, man fit for trustim mi? Wanem standard nao mi fit for expectim miseleva and olketa narawan for followim saed long wei for trust?’
For sure man wea fit for kasem trust hem mas man for talem tru samting. (Ephesians 4:25) Hem bae no changem toktok bilong hem for fitim pipol wea lisin long hem for mekem hemseleva kasem gud samting. And sapos hem promisim samting, man wea fit for kasem trust hem bae duim best bilong hem for followim toktok bilong hem. (Matthew 5:37) Sapos samwan hem talem secret samting long hem, man wea fit for kasem trust bae keepim datfala toktok and no gossip. Wanfala man wea fit for kasem trust bae hem faithful long marit partner bilong hem. Hem bae no lukluk long olketa dirty piksa, hem bae no garem rongfala tingting abaotem sex, and hem bae no plei witim feeling bilong narawan. (Matthew 5:27, 28) Samwan wea fit for kasem trust hem man wea waka hard for kasem selen for hemseleva and famili bilong hem and hem bae no luk aotem wei for kasem selen thru long wei for mekius long narawan. (1 Timothy 5:8) Taem iumi tingim olketa gudfala standard olsem wea kam from Bible hem bae helpem iumi for luksavve long pipol wea iumi fit for trustim. And tu, wei for iumi followim olketa sem standard hia bae helpem each wan long iumi for kamap man wea fit for kasem trust.
Hem bae naes tumas for stap insaed wanfala world wea iumi fit for trustim evri pipol and wei for feel nogud from samwan spoelem trust bilong iumi hem bae nomoa nao! Waswe, diswan hem wanfala dream nomoa? No for pipol wea ting strong long olketa promis bilong Bible, from Word bilong God hem talem iumi finis hao insaed datfala naesfala “niu earth” bae no eni giaman fasin, laea, and wei for spoelem man and no eni sorre, sik, and dae tu! (2 Peter 3:13; Psalm 37:11, 29; Revelation 21:3-5) Waswe, iu interest for faendaot moa samting abaotem diswan? Olketa Jehovah’s Witness bae hapi for provaedem moa information abaotem diswan and tu olketa nara important topic.
[Piksa long page 4]
Taem iumi no garem trust iumi bae no hapi
[Piksa long page 5]
Winim evriwan, Jehovah nao fit for kasem trust bilong iumi
[Olketa Piksa long page 7]
Iumi evriwan need for garem wei for fren wea garem faondeson long trust