Waswe, Eni Hope Stap for Sevem Olketa Church?
STEPHEN Tirwomwe, wanfala bigman bilong church from Uganda sei: “Pipol long Britain still biliv long God bat no laek for promisim eniting long Christ.” Samting olsem 20 year bifor, Stephen Tirwomwe stap laef thru long taem church bilong hem kasem barava hard taem long Uganda. Distaem hem preach for ten-minute long olketa club for olketa man long Leeds, England, bifor olketa plei bingo.
Long America, disfala Anglican Mission in America hem garem semkaen problem long spiritual saed. Web site bilong disfala mission sei: “Namba bilong pipol long United States wea iusim English languis bat wea olobaot long spiritual wei hem big winim eni nara ples long world. Iumi kamap ples wea needim missionary.” Pipol insaed disfala mission givap long wei wea church bilong olketa no savve change, so disfala niufala mission join witim olketa leader from Asia and Africa for startim “wanfala missionary outreach long United States.”
Bat why nao olketa missionary from Africa, Asia and Latin America go ahed for ‘sevem olketa laef’ long ples olsem Europe and North America wea pipol sei olketa Christian finis?
Hu Nao Sevem Hu?
For winim foa handred year, planti missionary from Europe followim go olketa wea go for kontrolem olketa ples long Africa, Asia, Pacific, and South America. Goal bilong olketa nao for tekem go religion bilong olketa long olketa heathen pipol long olketa kantri hia. Gogo, olketa kantri wea America kontrolem, wea olketa startim long wanem olketa sei olketa Christian principle, joinim and start for winim olketa missionary from Europe taem olketa go ahed for mekem olketa mission bilong olketa kamap evriwea long world. Distaem evriting difren.
Andrew Walls, man wea startim Centre for the Study of Christianity in the Non-Western World, hem sei: “Olketa part long world wea pipol live
followim Christian Wei hem change distaem.” Long 1900, 80 percent bilong olketa wea sei olketa Christian kam from Europe or North America. Bat distaem, 60 percent bilong olketa wea sei olketa Christian stap long Africa, Asia, and Latin America. Wanfala report sei: “Olketa Catholic church long Europe depend long olketa priest from Philippines and India,” and “wanfala long sixfala priest wea waka long olketa Catholic parish long America kam from ovasea.” Olketa missionary from Africa wea stap long Netherlands, wea planti long olketa kam from Ghana, ting long olketa seleva olsem “wanfala missionary church wea stap long kantri wea no interest long religion.” And distaem olketa missionary from Brazil preach long olketa difren part long Britain. Wanfala man for raet sei: “Distaem ples wea kasem olketa missionary bifor, hem nao sendem go olketa missionary.”
Trabol wea Kakamap
Luk olsem olketa kantri bilong Europe and North America wea no interest long religion, garem need for olketa missionary. Wanfala niuspepa sei: “Long Scotland no kasem 10 percent long olketa Christian savve go long church evritaem.” Namba long France and Germany hem smol go moa. Narafala report from wanfala survey talem hao “samting olsem 40 percent long pipol long America and 20 percent long olketa bilong Canada sei olketa savve go long church evritaem.” Long wei wea difren, klosap 70 percent nao attendim church long Philippines, and diswan hem klosap semsem witim olketa nara poor kantri.
And tu, olketa wea attendim church long Southern Hemisphere olketa followim rul bilong church winim olketa long Northern Hemisphere. For example, insaed olketa survey olketa Catholic long United States and Europe talemaot evritaem hao olketa nating trustim olketa bigman long church and olketa laekem church for iusim olketa man nating and tu, for olketa woman mas semsem olsem olketa man. Bat, olketa Catholic long Southern Hemisphere, barava sapotim disison bilong church from bifor kam. From staka long south part bilong world go ahed for showimaot sapot for church, diswan mekem wei savve kamap for trabol long future. Philip Jenkins, wanfala savveman saed long history and religion, sei: “Luk olsem insaed next 10 go kasem 20 year pipol wea member bilong olketa difren church long wansaed long world bae no luksavve long olketa wea sem religion witim olketa long narasaed bilong world.”
From olketa samting olsem happen, Walls hem sei wanfala kwestin nao “hao nao olketa Christian from Africa, Asia, Latin America, North America and Europe savve stap tugeta long sem church and talemaot olketa bilivim sem samting?” Wanem nao tingting bilong iu? Olketa church savve go ahed olsem long world wea divaed? Wanem nao faondeson bilong trufala Christian wan mind? Next article bae storyim ansa from Bible, and givim klia pruv hao wanfala grup bilong olketa Christian wea garem wan mind go ahed for grow distaem evriwea long world.
[Piksa long page 4]
Diswan hem church bifor bat distaem hem ples for kaikai and music
[Credit Line]
AP Photo/Nancy Palmieri