Tru Christian Wei Go Ahed for Grow
MINISTRY bilong Jesus Christ start long first century. Message bilong hem givim strong, hope, and muvim man long wei wea mekem pipol sapraes. Planti wea herem hem toktok barava feel gud long wanem hem talem.—Matthew 7:28, 29.
Jesus nating fraet for rejectim wei for joinim sekson bilong religion and politik long datfala taem bat nomata olsem olketa man nating tu feel free for kam long hem. (Matthew 11:25-30) Hem talemaot stret bigfala paoa wea olketa wicked spirit garem long earth and hem showimaot paoa wea God givim ovarem olketa. (Matthew 4:2-11, 24; John 14:30) Jesus showimaot klia hao wei for safa and sin tufala join, and long loving wei hem point go long Kingdom bilong God wea bae givim gudfala living for olowe. (Mark 2:1-12; Luke 11:2, 17-23) Jesus aotem disfala rongfala tingting wea pipol garem abaotem fasin bilong Dadi bilong hem, hem talemaot nem bilong God long pipol wea laek fren witim Hem.—John 17:6, 26.
Dastawe, iumi no sapraes hao nomata pipol saed long religion and politik barava persecutim olketa disaepol bilong Jesus, message bilong Jesus wea garem paoa kasem planti ples kwiktaem. Insaed samting olsem 30 year nomoa, olketa Christian kongregeson kamap long Africa, Asia, and Europe. (Colossians 1:23) Olketa simpol truth wea Jesus teachim givim hope long pipol wea garem stret and hambol heart long taem wea Rul Bilong Rome hem go ahed.—Ephesians 1:17, 18.
Bat, hao nao evri niu disaepol wea kam from difren living, kastom, languis and religion savve garem wan mind long “wanfala faith,” olsem aposol Paul talem? (Ephesians 4:5) Wanem nao bae mekem olketa go ahed for “tok witim wan mind” mekem olketa no divaed? (1 Corinthians 1:10) From iumi lukim distaem wei for no garem wan mind hem kamap big midolwan olketa wea sei olketa Christian, hem fitim for iumi lukluk long wanem Jesus seleva teachim.
Faondeson Bilong Christian Wan Mind
Taem Jesus standap front long Pontius Pilate long kot, hem talem faondeson bilong Christian wan mind. Hem sei: “For diswan nao mi born kam, and for diswan nao mi kam insaed long world, for mi mas witness abaotem truth. Evriwan wea stap long saed bilong truth hem lisin long voice bilong mi.” (John 18:37) So, for acceptim olketa teaching bilong Jesus and full Bible, Word bilong God, diswan garem strong paoa for mekem olketa tru disaepol bilong Christ garem wan mind.—1 Corinthians 4:6; 2 Timothy 3:16, 17.
For tok stret, samfala taem olketa disaepol bilong Jesus bae garem samfala kwestin or no agree long samfala samting midolwan olketa seleva. Wanem nao savve helpem olketa? Jesus sei: “Taem [datwan] kam, spirit bilong truth, bae hem leadim iufala go insaed long full truth, from bae hem no tok followim tingting bilong hemseleva, bat samting wea hem herem bae hem talem, and bae hem talemaot long iufala evri samting wea bae kam.” (John 16:12, 13) So, holy spirit bilong God bae helpem olketa tru disaepol bilong Jesus for minim truth taem God isisi showimaot. And tu, datfala spirit bae mekem grow olketa frut olsem love, hapi, and peace, wea bae mekem wan mind kamap midolwan long olketa.—Acts 15:28; Galatians 5:22, 23.
Jesus no letem wei for divaed for kamap midolwan olketa disaepol bilong hem, and hem nating letem olketa for minim seleva olketa Bible truth for fitim kastom or religion bilong pipol wea olketa meetim. Bat, long last naet wea hem stap witim olketa, hem prea strong olsem: “Mi no ask for olketa hia nomoa, bat for olketa wea putim faith long mi thru long samting wea olketa talem; mekem olketa kamap wan, long sem wei wea iu, Dadi, iu garem wan mind witim mi and mi garem wan mind witim iu, mekem olketa tu garem wan mind witim iumi tufala, mekem world bilivim wei wea iu nao sendem mi kam.” (John 17:20, 21) So, trufala wan mind saed long spirit and truth hem wanfala main mark bilong olketa disaepol bilong Christ start from datfala taem kasem taem bilong iumi. (John 4:23, 24) Nomata olsem, olketa church distaem no garem wan mind, olketa divaed. Why nao olsem?
Why Olketa Church Divaed
Main reason why olketa wea sei olketa Christian garem planti difren biliv and wei, hem bikos olketa nating followim olketa teaching bilong Jesus. Wanfala man for raet sei: “Olsem long taem bifor, olketa niu Christian distaem acceptim nomoa samting long Bible wea fitim olketa, and rejectim eniting wea no fitim kastom long religion bilong olketa.” Hem nao barava samting wea Jesus and olketa aposol bilong hem talem bae happen.
For example, from holy spirit nao muvim hem, aposol Paul raet olsem long Timothy: “Wanfala taem bae kam wea olketa bae no acceptim healthy teaching, bat, for fitim wanem olketa laekem, olketa bae hipimap olketa teacher for switim ear bilong olketa; and olketa bae tanem ear bilong olketa awe from truth, for lisin long olketa laea story.” Waswe, evri Christian nao bae go difren? Nomoa. Paul go ahed for sei: “Bat iu nao, iusim gudfala tingting long evri samting, stand strong taem iu safa, duim waka for talemaot gud nius, duim evribit ministry bilong iu.” (2 Timothy 4:3-5; Luke 21:8; Acts 20:29, 30; 2 Peter 2:1-3) Timothy and olketa nara faithful Christian live followim olketa kaonsel hia wea kam from God.
Olketa Tru Christian Garem Wan Mind Yet
Olsem Timothy, olketa tru Christian distaem go ahed for keepim gudfala tingting taem olketa rejectim idea bilong olketa man and acceptim Bible nomoa olsem faondeson for olketa biliv bilong olketa. (Colossians 2:8; 1 John 4:1) From olketa followim olketa Christian long first century, Olketa Jehovah’s Witness duim ministry bilong olketa long winim 230 kantri. Olketa tekem message bilong Jesus, hem nao gud nius bilong Kingdom, long pipol evriwea. Tingim fofala important wei hao olketa wan mind for followim Jesus and tru Christian Wei nomata wea nao olketa stap.
Biliv bilong olketa kam from Word bilong God. (John 17:17) Wanfala priest long Belgium raet abaotem olketa olsem: “Wanfala samting wea iumi savve lanem from olketa [Olketa Jehovah’s Witness] nao hem willing fasin bilong olketa for lisin long Word bilong God and fasin bilong olketa for no fraet for witness abaotem.”
Olketa luk long Kingdom bilong God for stretem olketa problem long world. (Luke 8:1) Long Barranquilla, Colombia, wanfala Witness story witim Antonio wea hem wanfala strong sapota bilong wanfala muvment saed long politik. Disfala Witness nating teksaed witim hem and hem no apim eni nara idea bilong politik. Bat, hem offerim free Bible study long Antonio and olketa sista bilong hem. No longtaem Antonio luksavve hao Kingdom bilong God nomoa hope for poor pipol long Columbia and full world.
Olketa honorim nem bilong God. (Matthew 6:9) Taem Olketa Jehovah’s Witness firstaem meetim Maria, wanfala strong Catholic wea stap long Australia, hem letem olketa Witness for showim hem nem bilong God insaed Bible. Wanem nao hem tingim? “Firstaem mi lukim nem bilong God insaed Bible, mi krae. Mi hapi tumas for savve hao mi fit for savve and iusim nem bilong God.” Maria go ahed for studyim Bible, and for firstaem long laef bilong hem, hem savve gud long olketa fasin bilong Jehovah and hem startim wei for fren witim Jehovah for olowe.
Love joinim olketa tugeta. (John 13:34, 35) Wanfala niuspepa long Canada, The Ladysmith-Chemainus Chronicle, sei: “Nomata sapos iu garem religion or nomoa, iu mas tinghae long 4,500 Jehovah’s Witness wea waka hard insaed wan and haf week wea go pas for buildim wanfala Assembly Hall long Cassidy wea big bilong hem 2,300-square-meter. . . For duim disfala waka and no argue or no luk aotem wei for apim seleva hem mark bilong tru Christian Wei.”
So tingim disfala pruv. Tru Christian Wei hem go ahed for kamap evriwea long world nomata olketa savveman bilong Christendom, olketa missionary, and olketa wea go long church feisim enikaen problem insaed olketa church bilong olketa. Tru nao, olketa tru Christian go ahed for duim ministry bilong olketa for preachim and teachim Word bilong God. (Matthew 24:14; 28:19, 20) Sapos iu stap midolwan olketa wea ‘feel nogud and krae’ from olketa barava nogud samting wea go ahed for happen distaem and iu wari long wei wea olketa religion bilong Christendom no garem wan mind, mifala invaetem iu for joinim Olketa Jehovah’s Witness for worshipim only tru God, Jehovah, witim wan mind.—Ezekiel 9:4; Isaiah 2:2-4.