Waswe, Iu Remember?
Waswe, iu enjoyim olketa Wastaoa wea iu readim insaed olketa month wea go pas finis? Sapos olsem, trae for ansarem olketa kwestin long daon:
• Wanem nao showimaot Jesus garem olketa brata and sista?
Bible nao talem long Matthew 13:55, 56 and Mark 6:3. Greek word (adelphos) wea stap long olketa verse hia minim “wei for olsem famili saed long physical or legal wei [and] hem minim nomoa olketa really or haf brata.” (The Catholic Biblical Quarterly, January 1992)—12/15, page 3.
• Wanem difren kaen war nao hem kamap big tumas distaem, and staka taem wanem nao kosim diswan?
Insaed olketa year wea just go pas, planti war wea spoelem olketa man hem olketa civil war—olketa war wea kamap midolwan pipol bilong sem kantri. Wei for heitim difren pipol and tribe, wei for garem difren religion, samting wea no followim justice, and problem saed long politik, evriting hia savve kosim war. Nara reason for war hem nao wei for greedy for paoa and for selen.—1/1, page 3-4.
• Hao nao iumi savve Jesus no wantem olketa Christian for baeheartim toktok bilong example prea?
Jesus talem disfala example prea long Sermon bilong hem long Maunten. Winim wan year bihaen, hem talem moa olketa main point bilong datfala prea. (Matthew 6:9-13; Luke 11:1-4) Hem barava interesting hao Jesus no talem olketa sem word bilong datfala prea. Diswan showimaot hem no talem wanfala prea wea pipol mas baeheartim.—2/1, page 8.
• Bihaen long Flood, wea nao datfala kurukuru faendem olive leaf wea hem tekem kam bak long ark?
No eni man distaem savve sapos wata bilong flood hem salt, hem hot or cold. Bat olive tree hem kaen tree wea savve grow moa bihaen olketa katem. So samfala tree maet stap laef nomoa and bihaen long flood olketa garem leaf.—2/15, page 31.
• Taem Nigeria kasem datfala civil war wea olketa blokem taon bilong Biafra, hao nao Olketa Jehovah’s Witness long datfala area kasem spiritual kaikai?
Wanfala man wea waka for gavman hem kasem assignment for go waka long Europe and narawan waka long air field bilong Biafra. Tufala evriwan Witness. Tufala willing for duim danger samting for tekem spiritual kaikai go insaed long Biafra. Datwan helpem staka brata go kasem taem war finis long 1970.—3/1, page 27.
• Wanem nao kamaot from Peace Bilong Westphalia, and hao nao religion insaed long diswan?
Datfala Reformation divaedem Holy Roman Empire for kamap thrifala religion—Catholic, Lutheran, and Calvinist. Datfala Protestant Union and Catholic League kamap long start bilong mek-17 century. Then wanfala raoa bilong religion hem kamap long Bohemia and diswan kamap wanfala bigfala stragol for garem paoa midolwan olketa difren kantri. Olketa Catholic and Protestant ruler duim enikaen trik for win saed long politik and for kasem selen. Gogo, olketa peace tok kamap long Westphalia, wanfala province bilong Germany. Bihaen klosap faevfala year, olketa saenem Treaty of Westphalia long 1648, wea hem endim datfala Thirty Years’ War and hem markem start bilong Europe distaem olsem wanfala land wea garem planti kantri insaed wea rulim olketa seleva.—3/15, page 20-3.
• Wanem nao mining bilong mark or nem bilong “wild animal”—datfala namba 666?
Revelation 13:16-18 nao hem story abaotem disfala mark. Datfala wild animal hem piksarem rul bilong olketa man, and wei wea datfala wild animal garem “namba bilong man” wea minim olketa gavman showimaot wei wea olketa man no perfect. Datfala 6 plus 60 plus 600 hem showaot hao diswan hem barava no kasem olketa mark bilong God. Olketa wea garem disfala mark worshipim politik, or luk long diswan for salvation.—4/1, page 4-7.