Waswe, Iu Shud Member Bilong Wanfala Church?
‘MI NO need for member bilong wanfala church or go long church evritaem for mekem mi biliv long God!’ Planti pipol feel olsem abaotem wei for member bilong wanfala church. For tok stret, samfala sei olketa feel moa klos long God taem olketa stap long wanfala naes area and enjoyim wei for lukim creation bilong God winim wei for attendim service long church. Staka pipol distaem ting wei for joinim wanfala church hem no important for mekem man biliv long God.
Bat, nara pipol garem barava difren tingting. Olketa sei hem important for man member long wanfala church and attendim service, from diswan bae mekem God appruvim hem. Wei for joinim wanfala church or nomoa hem important samting for man wanwan tingim. Hem no just wanfala subject wea man studyim for savve long interest bilong pipol or olketa nara samting olsem saed long religion. Nomata olsem, from diswan hem affectim wei wea iumi fren witim God, bae hem followim stret tingting sapos iumi savve wanem nao tingting bilong God abaotem diswan. Wanem nao iumi savve lanem from Word bilong hem, Bible abaotem diswan?
Wei wea God Deal Witim Pipol Bifor Kam
Klosap 4,400 year bifor, wanfala barava bigfala flood kasem full earth. Pipol bae nating savve forgetim big samting olsem, and evriwea long world pipol garem olketa story abaotem datwan long history bilong olketa. Nomata olketa story hia no semsem evribit, evriwan garem samfala samting wea semsem, wanfala nao wei wea samfala man and animal nomoa laef.
Waswe, eitfala wea no dae olketa laef from olketa lucky nomoa? Story bilong Bible showimaot hao hem nating olsem. Wanfala important point hem hao taem God talem warning abaotem Flood, hem no talem long olketa man wanwan. Bat, hem talem long Noah, and hem nao warnim nara pipol abaotem Flood wea bae kam.—Genesis 6:13-16; 2 Peter 2:5.
Laef bilong olketa depend long wei for waka tugeta olsem wanfala grup and willing for acceptim direction wea God givim long Noah. Olketa animal tu laef thru long Flood bikos olketa stap witim disfala grup. God talem klia long Noah samting wea hem mas duim for mekem olketa animal stap laef.—Genesis 6:17–7:8.
Bihaen staka handred year, olketa bilong laen bilong Noah thru long son bilong hem Shem kamap slave long Egypt. Bat, purpose bilong God hem for mekem olketa kamap free and leadim olketa go long land wea hem promis for givim long laen dadi bilong olketa Abraham. Long datfala taem tu, God nating talem diswan long olketa man wanwan bat hem talem long olketa leader bilong olketa—Moses and brata bilong hem, Aaron. (Exodus 3:7-10; 4:27-31) Bihaen olketa hia wea slave long Egypt kamap free, God givim Law long olketa long Maunt Sinai and olketa kamap datfala nation bilong Israel.—Exodus 19:1-6.
Only wei for each wan long olketa Israelite kamap free hem for olketa kaban witim grup wea God markem and followim olketa leader bilong datfala grup. And tu, wei stap for olketa man wanwan bilong Egypt for join witim disfala grup wea God appruvim. Taem olketa Israelite lusim Egypt, olketa hia bilong Egypt go witim olketa, wea mekem olketa tu savve kasem blessing bilong God.—Exodus 12:37, 38.
Then, long first century, Jesus startim preaching waka, and hem hipimap pipol for kamap olketa disaepol bilong hem. Hem deal witim olketa olsem wanfala grup, bat tu long loving wei hem deal witim man wanwan fitim need bilong hem. Long 11-fala aposol wea faithful, Jesus sei: “Iufala nao olketa wea stap witim mi long olketa test bilong mi; and mi mekem wanfala covenant witim iufala, olsem Dadi bilong mi hem mekem wanfala covenant witim mi, for wanfala kingdom.” (Luke 22:28, 29) Bihaen, taem olketa stap tugeta olsem wanfala grup, olketa kasem holy spirit bilong God.—Acts 2:1-4.
Olketa example hia showimaot klia hao long taem bifor kam evritaem God deal witim pipol bilong hem olsem wanfala grup wea organize. Really, wei wea God deal witim samfala man wanwan—olsem Noah, Moses, Jesus, and samfala narawan—hem for mekem olketa talem toktok bilong Hem for wanfala grup wea kaban tugeta long klos wei. No eni reason stap for mekem iumi ting God bae no deal witim olketa servant bilong hem distaem long sem wei. Diswan mekem wanfala kwestin for kamap: Waswe, hem olraet for member long eni grup bilong religion nomoa? Iumi bae story raonem disfala important kwestin long next article.
[Piksa long page 4]
Start long taem bifor kam, God deal witim pipol bilong hem olsem wanfala grup wea organize