Wanem Religion Nao Iu Shud Chusim?
‘OLKETA religion hem olketa difren road wea lead go for sem ples. For tok stret, wanfala god nomoa stap, iaman?’ Planti wea ting olsem, sei hem important for kamap member long wanfala religion, bat eni religion hem olraet nomoa.
Maet firstaem, diskaen tingting hem here stret, from hem tru hao wanfala God nomoa stap, datfala Olmaeti Wan. (Isaiah 44:6; John 17:3; 1 Corinthians 8:5, 6) Bat, hem isi for luksavve hao staka teaching bilong olketa religion wea sei olketa servem tru God olketa difren, samfala againstim narawan tu. Olketa samting wea olketa duim, bilivim, teachim, and tu samting wea olketa member mas duim hem difren tumas from narawan. From olketa difren tumas planti taem olketa bilong wanfala religion or grup hard for minim or acceptim teaching or biliv bilong nara religion.
Bat, Jesus hem sei: “God hem wanfala Spirit, and olketa wea worshipim hem mas worship witim spirit and truth.” (John 4:24) Waswe, wei for worshipim God witim truth hem mekem wei kamap for garem staka idea wea no agree abaotem hu nao God, wanem nao olketa purpose bilong hem, and hao nao hem laekem iumi for worshipim hem? Waswe, hem stret for iumi biliv hao Olmaeti God no wari abaotem hao nao iumi worshipim hem?
Olketa Tru Christian Bifor and Distaem
Olketa Christian long first century samfala taem no garem sem tingting abaotem samfala samting. Olsem example, aposol Paul sei olsem taem hem story abaotem olketa long Corinth: “Mi herem wanfala samting from sekson bilong Chloe abaotem iufala, olketa brata bilong mi, hao iufala divaed midolwan iufala. Wanem mi minim nao, iufala savve sei: ‘Mi bilong Paul,’ ‘Bat mi bilong Apollos,’ ‘Bat mi bilong Cephas,’ ‘Bat mi bilong Christ.’ ”—1 Corinthians 1:11, 12.
Waswe, Paul ting kaen wei for divaed olsem hem nating important? Waswe, each wan long olketa hia followim wei wea olketa seleva ting bae mekem olketa kasem salvation? Barava nomoa nao! Paul talem disfala kaonsel: “Mi encouragem iufala, olketa brata, thru long nem bilong Lord bilong iumi Jesus Christ, for iufala evriwan mas tok witim wan mind, and iufala mas no divaed olobaot, bat iufala mas barava garem wan mind witim sem wei for tingting.”—1 Corinthians 1:10.
Bat, wei for forcem man no savve mekem wei for wan mind long religion kamap. Hem kamap nomoa taem each man lukluk gud long olketa samting and gogo hem minim and acceptim samting long sem wei olsem olketa narawan minim and hemseleva acceptim datwan. Dastawe, wei for studyim seleva Word bilong God and barava laek for followim datwan hem important part long wei for kasem wan mind wea Paul storyim. Waswe, kaen wei for wan mind olsem hem stap? Olsem iumi storyim finis, from bifor yet God deal witim pipol bilong hem olsem wanfala grup. Waswe, man savve luksavve long datfala grup distaem?
Gud Samting wea Kamaot From Wei for Kaban Witim Olketa wea God Appruvim
David wea raetem psalm hem ask: “O Jehovah, hu nao bae guest insaed long tent bilong iu? Hu nao bae stap insaed long holy maunten bilong iu?” Datfala kwestin barava mekem man for tingting. David ansa olsem: “Man wea wakabaot long stretfala wei and duim raeteous fasin and talem trufala toktok insaed long heart bilong hem.” (Psalm 15:1, 2) Taem man kasem stretfala savve bilong Bible hem bae fit for luksavve long datfala religion wea followim evribit wanem God talem. Then, taem man kaban witim datfala grup hem bae kasem gud samting from olketa wea worshipim God witim wan mind and “witim spirit and truth.”
Olketa Jehovah’s Witness showimaot hao pipol savve garem wan mind long olketa samting wea olketa bilivim and samting olketa duim nomata insaed long world wea divaed distaem. Olketa member bilong olketa kamaot from planti difren religion and tribe. Samfala olketa nating biliv long God or savve sapos God stap or nomoa. And samfala narawan nating tingim religion hem important. Pipol hia wea kamaot from olketa difren religion, kastom, and teaching, distaem garem wei for wan mind long religion wea no eniwan moa long world garem.
Faondeson bilong wei for garem wan mind olsem hem Word bilong God, Bible. Olketa Jehovah’s Witness luksavve olketa no savve forcem nara pipol for duim samting. Bat olketa tinghae long privilege for encouragem nara pipol for lane from Bible mekem olketa garem strong faondeson for chusim hao olketa bae worship. Long wei olsem, staka moa pipol savve kasem olketa gud samting wea kamaot from wei for worshipim God “witim spirit and truth.”
Distaem, danger for man savve foldaon saed long olketa nogud samting and olketa samting wea switim man hem big tumas. Hem barava important for chusim gud hu nao for kaban witim. Bible sei hao “man wea wakabaot witim wise pipol bae kamap wise” and “wei for kaban witim nogud pipol hem spoelem gudfala fasin.” (Proverbs 13:20; 1 Corinthians 15:33) Wei for kaban witim olketa trufala worshiper bilong God hem protectim man. Dastawe Bible remindim iumi olsem: “Iumi mas tingim and muvim each other for showimaot love and gudfala waka, no lusim wei for hipap tugeta, olsem fasin bilong samfala, bat encouragem each other, and duim long bigfala wei moa taem iufala luksavve datfala day hem kam klosap.” (Hebrews 10:24, 25) Hem wanfala blessing taem olketa tru fren, olketa spiritual brata and sista, long loving wei helpem each other for fulfillim responsibility bilong olketa long God!
Ottmar pruvim disfala tingting. Hem growap insaed wanfala Catholic famili long Germany, bat hem gogo stop for go long church. Hem explainim olsem: “Long olketa taem mi attendim church, mi feel olsem mi no kasem eni gud samting.” Nomata olsem, hem still garem faith long God. Then hem meetim Olketa Jehovah’s Witness and gogo hem barava sure olketa nao tru servant bilong God. Hem luksavve hao hem bae gud for kaban witim olketa. Distaem hem sei: “Taem mi busy insaed organization wea stap evriwea long world, mi garem peace long mind and heart. Mi go ahed for isisi kasem stretfala savve abaotem Bible. Diswan hem barava important samting long mi.”
Invitation for Pipol wea Go Ahed for Luk Aotem Truth
Taem pipol wea garem sem tingting waka tugeta olsem wanfala grup olketa savve duim waka long gudfala wei winim olketa man wea waka seleva. Olsem example, Jesus sei olsem long olketa follower bilong hem bifor hem lusim olketa: “So go and mek disaepol long pipol bilong evri nation, baptaesim olketa long nem bilong Father and bilong Son and bilong holy spirit, teachim olketa for duim evri samting wea mi komandim long iufala.” (Matthew 28:19, 20) Hao nao man fit for duim disfala waka sapos no eniwan leadim or organizem? Hao nao man savve obeyim disfala scripture sapos hem trae for servem Jehovah separate from olketa narawan?
Last year, Olketa Jehovah’s Witness evriwea long world givim aot 91,933,280 Bible buk, buklet, and brochure, and 697,603,247 magasin. From diswan olketa fit for talemaot message from Word bilong God long planti handred million pipol long 235 kantri. Diswan barava pruvim hao wanfala grup wea wan mind and organize gud savve duim moa samting winim wanem wanfala man seleva savve duim!
Witim wei for givim aot olketa Bible buk, Olketa Jehovah’s Witness conductim olketa Bible study wea free nomoa for helpem pipol garem deep mining long wanem God laekem iumi for duim. Last year, average bilong 5,726,509 Bible study olsem kamap each week witim man wanwan or wanfala grup. Kaen wei olsem for lane from Bible helpem finis staka million pipol for garem strongfala faondeson for chusim wanem olketa laekem saed long worship. Mifala invaetem iu for lanem from Bible olketa samting wea God laekem iu for duim. Bihaen, iu savve disaedem samting wea iu bae duim.—Ephesians 4:13; Philippians 1:9; 1 Timothy 6:20; 2 Peter 3:18.
Sapos iu laek for mekem God hapi, hem important for joinim wanfala religion—bat no eni religion nomoa. Iu need for chus long wei wea followim stretfala savve from Bible, no olketa idea wea no garem pruv or toktok wea iu herem. (Proverbs 16:25) Lanem wanem olketa wea garem tru religion need for duim. Markem witim samting wea iuseleva bilivim. Then chus followim datwan.—Deuteronomy 30:19.
[Piksa long page 7]
Olketa Jehovah’s Witness garem wei for wan mind insaed world wea divaed