No Eni Reason for Heitim Iumi

“Olketa no garem eni reason for heitim mi.”—JOHN 15:25.

1, 2. (a) Why nao samfala sapraes taem pipol tok spoelem olketa Christian, bat why nao kaen toktok olsem no mekem iumi sapraes? (b) Wanem mining bilong datfala word “heit” nao bae iumi storyim long disfala article? (Lukim footnote.)

OLKETA JEHOVAH’S WITNESS traem best for garem living wea followim olketa principle insaed Word bilong God. Diswan mekem pipol long staka kantri tinghae long olketa. Nomata olsem, samfala taem pipol talem laea story abaotem olketa. Example, wanfala bigman long taon bilong St. Petersburg, long Russia sei: “Pipol talem laea story long mifala abaotem Olketa Jehovah’s Witness olsem wanfala sect wea duim samting haed and killim dae olketa seleva and pikinini tu.” Bat, bihaen hem waka witim Olketa Jehovah’s Witness long taem bilong wanfala international convention, datfala sem bigman sei: “Distaem mi savve olketa hia normal pipol wea savve smile . . . Olketa garem peace and kwaet fasin, and barava lovem each other.” Hem sei moa: “Mi barava no minim why nao pipol talem kaen laea story olsem abaotem olketa.”—1 Peter 3:16.

² Olketa servant bilong God no feel gud taem pipol laea for sei olketa wicked, bat olketa no sapraes taem pipol talem samting againstim olketa. Jesus givim disfala warning long olketa follower bilong hem: “Sapos world heitim iufala, iufala savve world hem heitim mi firstaem bifor hem heitim iufala. . . . Hem for fulfillim toktok wea stap insaed long Law bilong olketa, ‘Olketa no garem eni reason for heitim mi.’”a (John 15:18-20, 25; Psalm 35:19; 69:4) Hem sei olsem finis long olketa disaepol bilong hem: “Sapos pipol kolem man bilong haos Beelzebub, bae olketa kolem evriwan insaed haos bilong hem long sem wei tu, iaman?” (Matthew 10:25) Olketa Christian luksavve hao wei for kasem shame olsem hem part long “torture stake” wea olketa acceptim taem olketa kamap follower bilong Christ.—Matthew 16:24.

3. Hao nao pipol persecutim olketa tru worshiper?

³ Wei wea olketa tru worshiper kasem persecution hem start long taem bilong “Abel wea raeteous.” (Matthew 23:34, 35) Hem no tu-thri pipol nomoa wea heitim olketa. Jesus sei “evri pipol bae heitim” olketa follower bilong hem bikos long nem bilong hem. (Matthew 10:22) And tu, aposol Paul raet hao evri servant bilong God—each wan long iumi tu—shud expectim persecution. (2 Timothy 3:12) Why nao olsem?

Datwan wea Kosim Wei for Heit wea No Garem Eni Reason

4. Hao nao Bible showimaot datwan wea kosim heit wea no garem eni reason?

⁴ Word bilong God showimaot hao long firstaem, samwan wea iumi no lukim nao kosim evri samting hia. Tingim wei wea Abel, first man wea showimaot faith, hem dae. Bible sei brata bilong hem Cain wea killim hem dae “hem kam from datfala wicked wan.” (1 John 3:12) Cain tekem fasin bilong Satan, and datfala Devil iusim Cain for duim wicked plan bilong hem. Bible storyim part wea Satan duim tu long olketa raf attak againstim Job and Jesus Christ. (Job 1:12; 2:6, 7; John 8:37, 44; 13:27) Buk bilong Revelation showimaot klia hu nao datwan wea kosim persecution for olketa follower bilong Jesus, taem hem sei: “Devil bae go ahed for torowem samfala long iufala insaed long prison for mekem iufala kasem test evribit.” (Revelation 2:10) Tru tumas, Satan nao kosim wei for heitim pipol bilong God wea no garem eni reason.

5. Why nao Satan heitim olketa tru worshiper?

⁵ Why nao Satan heitim olketa tru worshiper? Long nogud plan bilong Satan wea showimaot hem barava tinghae tumas long hemseleva, hem challengem “King bilong olowe,” Jehovah God. (1 Timothy 1:17; 3:6) Hem sei rul bilong God hem strict tumas ovarem olketa wea hem creatim, and tu, no eniwan servem Jehovah from stret samting nao muvim hem. Satan talem hao pipol servem Jehovah from selfish reason nomoa. Satan sei sapos God letem hem for testim olketa man, hem savve mekem evriwan tanawe from wei for servem God. (Genesis 3:1-6; Job 1:6-12; 2:1-7) Taem Satan tok spoelem Jehovah and sei hem raf ruler, hem savve laea, and hem fail, Satan trae for mekem hemseleva wanfala ruler wea garem sem right olsem God for rulim universe. Datwan showimaot hao samting wea muvim hem for againstim olketa servant bilong God nao from hem laekem tumas for pipol worshipim hem.—Matthew 4:8, 9.

6. (a) Hao nao iumiseleva insaed long kwestin abaotem rul bilong Jehovah? (b) Hao nao wei for minim disfala kwestin helpem iumi for go ahed for faithful? (Lukim box, page 16.)

⁶ Waswe, iu lukim hao diswan hem affectim laef bilong iu? From iu wanfala servant bilong Jehovah, iu savve hao nomata wei for duim will bilong God hem minim man mas waka hard, staka gud samting nao kamaot from datwan. Bat, wanem nao bae iu duim sapos olketa samting wea happen long laef mekem hem hard tumas long iu for go ahed followim olketa law and principle bilong Jehovah? And waswe sapos luk olsem iu no kasem eni gud samting from wei for servem Jehovah? Waswe, bae iu sei hem iusles nomoa for go ahed servem Jehovah? Or waswe, bae love for Jehovah and barava bigfala wei for tinghae long olketa nambawan fasin bilong hem muvim iu for go ahed for wakabaot followim hem? (Deuteronomy 10:12, 13) Taem Jehovah letem Satan for mekem iumi kasem samfala hard samting, hem givim chance long iumi wanwan for pruvim Satan hem laea.—Proverbs 27:11.

“Taem Pipol Tok Spoelem Iu”

7. Wanem nao wanfala wei wea Devil iusim for trae mekem iumi lusim Jehovah?

⁷ Distaem iumi bae story raonem wanfala kleva trik wea Satan iusim for trae for pruvim point bilong hem abaotem datfala kwestin—wei wea hem tok spoelem man thru long laea story. Jesus kolem Satan “dadi bilong laea.” (John 8:44) Datfala nem Devil, wea minim “Man for Tok Spoelem,” showimaot hem nao main wan for tok spoelem God, olketa toktok bilong God wea savve helpem man, and holy nem bilong hem. Devil hem savve talem samting wea mekem man garem rong tingting, accusim man rong, and barava laea taem hem challengem rul bilong Jehovah, and hem iusim olketa sem wei hia for tok spoelem olketa loyal servant bilong God. Wei wea hem mekem olketa laea story kamap abaotem olketa Witness hia, savve mekem hem moa hard for deal witim wanfala bigfala test.

8. Long wanem wei nao Satan mekem Job kasem shame, and hao nao Job feel?

⁸ Tingim samting wea kasem Job, wea nem bilong hem minim “Samting wea Pipol Heitim.” Satan mekem Job lusim olketa samting wea hem needim long living, olketa pikinini, and health bilong hem, and tu, hem mekem luk olsem God nao panisim Job from hem wanfala sinner. Job hem wanfala man wea pipol respectim, bat gogo, pipol lukdaonem hem, nomata olketa relative. (Job 19:13-19; 29:1, 2, 7-11) And tu, Satan iusim olketa wea giaman for givim comfort for ‘daonem Job witim toktok,’ firstaem long wei for sei hem luk olsem hem duim bigfala sin and then for barava accusim hem long bigfala rong. (Job 4:6-9; 19:2; 22:5-10) Datwan masbi mekem Job barava feel wikdaon!

9. Hao nao Satan mekem Jesus luk olsem wanfala sinner?

⁹ From hem nao main wan wea sapotim rul bilong Jehovah, Son bilong God kamap main wan wea Satan heitim. Taem Jesus kam long earth, Satan trae for spoelem hem long spiritual wei, olsem hem duim long Job tu, taem hem mekem hem luk olsem Jesus hem wanfala sinner. (Isaiah 53:2-4; John 9:24) Pipol kolem hem man for drunk and ova tumas long kaikai and sei hem “garem wanfala demon.” (Matthew 11:18, 19; John 7:20; 8:48; 10:20) Pipol accusim hem for talem samting againstim God. (Matthew 9:2, 3; 26:63-66; John 10:33-36) Diswan mekem Jesus feel nogud, bikos hem savve bae diswan spoelem Dadi bilong hem. (Luke 22:41-44) Last samting, olketa hangem Jesus olsem wanfala nogud criminal. (Matthew 27:38-44) Taem hem keepim faithful fasin long perfect wei, Jesus stand strong long “nogud toktok bilong olketa sinner.”—Hebrews 12:2, 3.

10. Long wanem wei nao olketa anointed wan wea still stap kamap sekson wea Satan attakim long distaem?

¹⁰ Long distaem, olketa anointed follower bilong Christ wea still stap kamap pipol wea Devil heitim. Satan hem datwan wea “accusim olketa brata bilong [Christ] . . . , wea accusim olketa day and naet front long God bilong iumi.” (Revelation 12:9, 10) Start long taem wea Jesus aotem hem from heven kam daon long earth, Satan duim moa samting for mekem olketa brata bilong Christ luk olsem olketa barava nogud sekson. (1 Corinthians 4:13) Long samfala kantri, pipol kolem olketa wanfala nogud sect, olsem olketa kolem olketa Christian long first century tu. (Acts 24:5, 14; 28:22) Olsem iumi talem finis, pipol tok spoelem olketa thru long laea story. Nomata olsem, “thru long glory and shame, thru long nogud report and gud report,” olketa anointed brata bilong Christ, wea “nara sheep” sapotim olketa, hambol for ‘obeyim olketa komandment bilong God and for duim waka for witness abaotem Jesus.’—2 Corinthians 6:8; John 10:16; Revelation 12:17.

11, 12. (a) Wanem nao maet reason why pipol tok spoelem olketa Christian? (b) Hao nao wanfala Christian maet safa long wei wea no followim justice bikos long biliv bilong hem?

¹¹ Nomata olsem, wei wea pipol tok spoelem olketa servant bilong God wanwan hem no evritaem for “saed bilong raeteous fasin.” (Matthew 5:10) Samfala problem maet kamap bikos iumi no perfect. Iumi no kasem spesol reward sapos taem iumi ‘sin and olketa hitim iumi, iumi go ahed strong.’ Nomata olsem, sapos wanfala Christian ‘bikos long conscience bilong hem long God, hem stand strong long olketa hardfala samting and safa long nogud wei, diswan hem gudfala samting’ long Jehovah. (1 Peter 2:19, 20) Wanem taem nao diswan maet happen?

¹² Samfala maet kasem nogud samting bikos olketa no want for joinim olketa kastom saed long wei for berem man wea Bible no agree witim. (Deuteronomy 14:1) Pipol spoelem olketa young Witness tu bikos olketa followim olketa mark bilong Jehovah saed long fasin. (1 Peter 4:4) Pipol accusim samfala Christian parents for sei olketa “no kea” or “spoelem” pikinini bilong olketa bikos olketa luk aotem treatment for pikinini wea no iusim blood. (Acts 15:29) Olketa relative and neiba rejectim olketa Christian bikos olketa kamap servant bilong Jehovah. (Matthew 10:34-37) Olketa hia followim example bilong olketa profet and Jesus tu saed long wei for safa long wei wea no followim justice.—Matthew 5:11, 12; James 5:10; 1 Peter 2:21.

Stand Strong Nomata Pipol Tok Spoelem Iumi

13. Wanem nao savve helpem iumi for go ahed for balance long spiritual wei taem iumi feisim wei wea pipol tok spoelem iumi?

¹³ Taem pipol barava tok spoelem iumi from biliv bilong iumi, maet iumi feel wikdaon, olsem profet Jeremiah, and ting iumi no savve go ahed for servem God nao. (Jeremiah 20:7-9) Wanem nao savve helpem iumi for go ahed for balance long spiritual wei? Trae for garem tingting bilong Jehovah long diswan. Hem ting long olketa wea loyal long hem taem olketa kasem test olsem olketa wea win, no olketa wea safa. (Romans 8:37) Trae for tingim long mind bilong iu olketa wea sapotim rul bilong Jehovah nomata Devil tok daonem olketa long staka wei—olketa man olsem Abel, Job, mami bilong Jesus, Mary, and olketa nara faithful wan bilong bifor, and distaem tu. (Hebrews 11:35-37; 12:1) Ting raonem wei wea olketa stap faithful. Datfala bigfala sekson bilong olketa wea loyal invaetem iumi for stap witim olketa taem olketa kasem reward bikos long faith bilong olketa.—1 John 5:4.

14. Hao nao wei for prea strong savve strongim iumi for go ahed faithful?

¹⁴ Sapos ‘staka tingting for wari kamap insaed long iumi,’ iumi savve prea strong long Jehovah, and hem bae comfortim and strongim iumi. (Psalm 50:15; 94:19) Hem bae givim iumi wisdom for deal witim datfala test and helpem iumi for evritaem tingim important kwestin saed long sovereign rul bilong Jehovah, wea datwan nao samting wea kosim pipol for heitim olketa servant bilong hem nomata no eni reason for duim olsem stap. (James 1:5) Jehovah savve givim iumi tu “peace bilong God wea winim evri tingting.” (Philippians 4:6, 7) Disfala peace wea God givim hem helpem iumi for no wari tumas and strong, for no letem daot or wei for fraet hem winim iumi taem iumi feisim bigfala hevi. Thru long spirit bilong hem, Jehovah savve strongim iumi for feisim eni samting wea hem letem for happen long iumi.—1 Corinthians 10:13.

15. Wanem nao savve helpem iumi for no feel kros taem iumi safa?

¹⁵ Wanem nao savve helpem iumi for no feel kros long olketa wea heitim iumi nomata no eni reason stap? Remember hao olketa main enemy bilong iumi nao Satan and olketa demon. (Ephesians 6:12) Nomata samfala man min for persecutim iumi, staka wea againstim pipol bilong God duim olsem bikos olketa no savve or nara pipol nao bossim olketa. (Daniel 6:4-16; 1 Timothy 1:12, 13) Jehovah laekem “evri difren kaen man” for kasem chance for “sev and kasem stretfala savve bilong truth.” (1 Timothy 2:4) Tru nao, samfala wea againstim iumi bifor olketa kamap Christian brata bilong iumi distaem bikos olketa luksavve long gudfala fasin bilong iumi. (1 Peter 2:12) And tu, iumi savve lane from example bilong Joseph, son bilong Jacob. Nomata olketa haf brata bilong Joseph mekem hem safa long bigfala wei, hem nating keepim feeling for heitim olketa. Why nao olsem? Bikos hem luksavve wei wea Jehovah insaed long diswan, hem letem samting for happen for fulfillim purpose bilong Hem. (Genesis 45:4-8) Long sem wei tu, taem iumi safa long samting wea no followim justice, Jehovah savve mekem diswan for kamap wei wea nem bilong hem kasem glory.—1 Peter 4:16.

16, 17. Why nao iumi shud no ova tumas for wari long samting wea olketa wea againstim iumi duim for stopem preaching waka?

¹⁶ Iumi shud no ova tumas for wari sapos for lelebet taem hem luk olsem olketa wea againstim iumi olketa win for stopem gud nius. Jehovah hem sekem olketa nation distaem thru long witness waka wea kamap evriwea long world, and olketa barava spesol samting kam insaed. (Haggai 2:7) Christ Jesus, datfala Gudfala Shepherd hem sei: “Olketa sheep bilong mi lisin long voice bilong mi, and mi savve long olketa, and olketa followim mi. And mi givim olketa laef olowe, . . . and no eniwan bae tek aotem olketa from hand bilong mi.” (John 10:27-29) Olketa holy angel tu insaed long disfala bigfala spiritual harvest. (Matthew 13:39, 41; Revelation 14:6, 7) Dastawe, no eniting wea olketa wea againstim iumi talem or duim savve stopem purpose bilong God.—Isaiah 54:17; Acts 5:38, 39.

¹⁷ Staka taem, samting wea olketa wea againstim iumi duim hem kikbak. Long wanfala area long Africa, staka laea story hem gogo raon abaotem Olketa Jehovah’s Witness, wea wanfala nao hem sei olketa Witness pipol for worshipim Devil. From diswan, evritaem olketa Witness savve visit, Grace bae ranawe and haed bihaen haos go kasem taem olketa go. Wanday, pastor long church bilong hem showim wanfala pablikeson bilong iumi and talem evriwan for no readim bikos datwan bae mekem olketa lusim religion bilong olketa. Diswan mekem Grace barava interest for savve. Long nara taem wea olketa Witness kam, hem no haed bat hem go story witim olketa and kasem wanfala copy bilong datfala pablikeson. Olketa startim wanfala Bible study witim hem, and long 1996 hem baptaes. Distaem Grace luk aotem olketa narawan wea maet herem laea story abaotem Olketa Jehovah’s Witness.

Strongim Faith Bilong Iu Distaem

18. Why nao iumi need for strongim faith bilong iumi bifor iumi kasem olketa bigfala test, and hao nao iumi savve duim datwan?

¹⁸ From Satan savve attakim iumi enitaem witim bigfala heit wea no eni reason for hem showimaot datwan, hem important tumas for iumi strongim faith bilong iumi distaem. Hao nao iumi savve duim olsem? Wanfala report from wanfala kantri wea pipol bilong Jehovah kasem persecution hem sei: “Wanfala samting hem showaot klia tumas: Olketa wea garem gudfala spiritual fasin and tinghae tumas long truth bilong Bible no garem eni problem saed long wei for stand strong taem olketa kasem test. Bat olketa wea missim olketa meeting, no go aot evritaem long field service, and brekem faith long olketa smol samting long taem wea no eni trabol kamap, olketa staka taem foldaon taem olketa kasem ‘bigfala’ test.” (2 Timothy 4:2) Sapos iu lukim olketa wei wea iu need for kamap moabeta distaem, trae hard for duim olsem kwiktaem.—Psalm 119:60.

19. Wanem nao faithful fasin bilong olketa servant bilong God showimaot taem olketa kasem attak wea no eni reason stap for kaen attak olsem?

¹⁹ Faithful fasin wea olketa tru worshiper showimaot nomata Satan attakim olketa hem barava showimaot hao sovereign rul bilong Jehovah hem stret, fitim, and raeteous. Faithful fasin bilong olketa mekem heart bilong God hapi. Nomata olketa man tok spoelem olketa, datwan wea haefala position bilong hem winim earth and heven hem “hapi long olketa, for olketa kolem hem God bilong olketa.” Tru tumas, saed long olketa loyal wan olsem, disfala toktok barava fitim olketa: “World no fitim olketa.”—Hebrews 11:16, 38.

[Footnote]

Waswe, Iu Savve Explainim?

• Wanem nao kosim pipol for heitim olketa tru worshiper nomata olketa no garem gud reason for duim datwan?

• Hao nao Satan iusim wei for tok spoelem man for trae spoelem faithful fasin bilong Job and Jesus?

• Hao nao Jehovah strongim iumi for stand strong taem iumi feisim olketa samting wea Satan duim for againstim iumi?

[Box/Piksa long page 16]

Olketa Luksavve Long Important Kwestin

Wanfala Jehovah’s Witness long Ukraine, ples wea gavman tambuim waka for preach abaotem Kingdom for winim 50 year, hem sei: “Hem no stret for ting long samting wea kasem Olketa Jehovah’s Witness olsem samting saed long wei wea pipol deal witim nara pipol nomoa. . . . Staka long olketa bigman hia duim nomoa waka bilong olketa. Taem gavman hem change, olketa bigman hia changem tingting tu, bat mifala stap semsem nomoa. Mifala luksavve hao Bible nao storyim datwan wea barava kosim trabol for mifala.

“Wei wea mifala ting long diswan, hem no just wei wea pipol deal long nogud wei long mifala nomata mifala no garem blame. Samting wea helpem mifala for stand strong hem klia wei for minim kwestin wea kamap long garden bilong Eden—kwestin abaotem wei wea God garem right for rul or nomoa. . . . Mifala saed witim wanfala kwestin wea no affectim olketa man wanwan nomoa, bat wea affectim tu Sovereign bilong universe. Mifala savve gud long olketa really kwestin wea insaed long diswan. Savve hia mekem mifala strong and fit for stap faithful nomata mifala insaed barava hard samting.”

[Piksa]

Victor Popovych, wea olketa arrestim long 1970

[Piksa long page 13]

Hu nao bihaenem wei for tok spoelem Jesus?

[Olketa Piksa long page 15]

Job, Mary, and olketa servant bilong God distaem, olsem Stanley Jones, sapotim rul bilong Jehovah