Kwestin From Reader

Why nao Jesus wea laef bak moa talem Thomas for tasim hem bat long firstaem hem no letem Mary Magdalene for duim datwan?

Samfala Bible transleison bifor mekem hem luk olsem Jesus talem Mary Magdalene for no tasim hem. King James Version transleitim toktok bilong Jesus olsem: “No tasim mi from mi no go ap long Dadi bilong mi yet.” (John 20:17) Bat, Greek word wea olketa transleitim “tasim,” planti taem, hem minim for “hol strong and kasholem.” Hem stret for sei Jesus no stopem Mary Magdalene for tasim hem, from no longtaem bihaen hem letem olketa nara woman wea go long grev for “holem leg bilong hem.”—Matthew 28:9.

Staka Bible transleison wea iusim English languis bilong distaem helpem iumi for savve wanem nao Jesus minim taem hem sei: “No hol strong long mi.” Samfala transleison hia nao New World Translation of the Holy Scriptures, The New Jerusalem Bible, and The New English Bible. So why nao Jesus tok olsem long gud fren bilong hem, Mary Magdalene?—Luke 8:1-3.

Luk olsem Mary Magdalene tingse Jesus klosap lusim olketa and go long heven. From hem laekem tumas for stap witim Lord bilong hem, hem hol strong long Jesus, and no laek letem hem go. For mekem Mary savve hao hem bae no go yet, Jesus talem hem for no hol strong long hem bat go talem olketa disaepol hao hem laef bak nao.—John 20:17.

Story midolwan Jesus and Thomas hem difren. Thomas no stap taem Jesus showim hemseleva long samfala disaepol. So Thomas no biliv Jesus laef bak moa. Hem sei hem bae biliv nomoa sapos hem lukim ples wea olketa nilam hand bilong Jesus and tasim ples wea olketa spiarim hem. Bihaen eitfala day, Jesus showim hemseleva moa long olketa disaepol. Long datfala taem Thomas stap witim olketa, so Jesus talem hem for tasim ples olketa nilam and spiarim.—John 20:24-27.

So, saed long Mary Magdalene, Jesus deal witim tingting for no letem hem go wea hem no stret. Bat saed long Thomas, Jesus helpem hem for biliv hao hem laef bak nao. Saed long Mary and Thomas, Jesus garem gudfala reason for duim wanem hem duim.