Kamap Moa Big Long Ples wea Christian Wei Gohed Gud Bifor
ITALY, wea luk olsem wanfala boot insaed long Mediterranean Sea, hem ples wea religion and samting saed long culture affectim history bilong world. Olketa difren kaen ples, olketa spesol kaen samting wea olketa wakem, and olketa naesfala kaikai, switim plande million tourist for go long there. Hem ples wea Bible education hem barava gohed gud tu.
Maet fastaem wea trufala Christian Wei kasem Rome—kapitol taon bilong world paoa long datfala taem, hem long Pentecost 33 C.E, taem olketa Jew and olketa niu follower wea kamap Christian kam bak from Jerusalem. Fastaem wea aposol Paul visitim Italy hem samting olsem 59 C.E. Hem “faendem olketa brata” wea garem sem faith long saedsea long Puteoli.—Acts 2:5-11; 28:11-16.
Jesus and olketa aposol talem finis hao bifor end long first century, olketa apostate bae isisi lusim trufala Christian Wei. Nomata olsem, bifor disfala nogud world hem finis, olketa tru disaepol bilong Jesus leadim waka for preachim disfala gud nius evriwea long world—insaed diswan hem Italy tu.—Matthew 13:36-43; Acts 20:29, 30; 2 Thessalonians 2:3-8; 2 Peter 2:1-3.
Start wea No Mas Gud
Long 1891, hem fastaem wea Charles Taze Russell, man wea leadim preaching waka bilong Olketa Bible Student (nem bilong Olketa Jehovah Witness long datfala taem), visitim samfala taon long Italy. Hem talem stret hao samting wea kamaot from ministry bilong hem no mas gud: “Mifala no lukim eni samting for givim mifala hope saed long harvest long Italy.” Long 1910, Brata Russell go bak moa long Italy and givim wanfala Bible tok insaed wanfala building for exercise wea stap midol long Rome. Wanem nao kamaot from datwan? Brata Russell sei olsem: “Luk olsem, no staka gud samting kamaot from datfala meeting.”
Tru tumas, taem waka for preachim gud nius long Italy hem start, hem slow nomoa, wanfala reason nao hem bikos Fascist rul persecutim Olketa Jehovah’s Witness. Long datfala taem, olketa Witness bilong Jehovah long Italy no winim 150, and klosap evriwan hia lanem truth from olketa relative or olketa fren wea stap long nara kantri.
Hem Barava Muv Ahed
Bihaen long World War II, samfala missionary go long Italy. Bat olsem olketa leta wea gavman keepim showimaot, olketa wea garem hae position long Vatican askem gavman for aotem olketa missionary hia. From datwan, klosap evri missionary mas lusim kantri nao.
Nomata olketa hard samting olsem kamap, bigfala sekson long Italy start for gogo ap long “maunten” bilong worship bilong Jehovah. (Isaiah 2:2-4) Wei wea olketa Witness kamap staka hem barava narawe nao. Long year 2004, 233,527 pablisa nao talemaot gud nius, wea minim 1-fala long evri 248 pipol hem wanfala pablisa, and 433,242 kam long Memorial bilong dae bilong Christ. And tu, 3,049 kongregeson bilong Olketa Jehovah’s Witness nao hipap insaed olketa naesfala Kingdom Hall. Distaem, samfala sekson insaed community barava muv ahed.
Preach Long Staka Languis
Plande pipol wea stap long Italy kam from Africa, Asia, and Eastern Europe for luk aotem waka for selen or gud ples for stap, or samfala ranawe from samfala nogud samting wea happen. Hao nao for helpem plande million pipol hia long spiritual wei?
Plande Witness long Italy willing for laenem olketa languis wea hard tumas olsem Albanian, Amharic, Arabic, Bengali, Chinese, Punjabi, Sinhala, and Tagalog. Start long 2001, olketa languis course kamap for trainim olketa willing pablisa hia for witness long difren languis. Long thrifala year wea go finis, 3,711 Witness attendim 79-fala course wea kamap long 17 difren languis. Diswan mekem olketa fit for startim and strongim 146 kongregeson and 274 grup long 25 difren languis. From diswan, plande wea garem gudfala heart herem gud nius and start for studyim Bible. Samting wea kamaot from datwan hem barava narawe.
Wanfala Jehovah’s Witness story abaotem Bible long George, wanfala man from India wea iusim Malayalam languis. Nomata George garem bigfala problem saed long waka, hem willing for acceptim wanfala Bible study. Tu-thri day bihaen, wanfala fren bilong George, Gil, man from India wea iusim Punjabi languis, go long Kingdom Hall, and hem start for studyim Bible. Gil tekem kam David, man from India wea iusim Telugu languis, for meetim olketa Witness. David tu start for studyim Bible. Nara tufala from India, Sonny and Shubash, stap long sem haos witim David. Tufala evriwan joinim Bible study witim David.
Samfala week bihaen, Dalip wea iusim Marathi languis, ringim olketa Witness. Hem sei: “Mi fren bilong George. Iufala savve teachim mi Bible?” Then Sumit, wea iusim Tamil languis laek for studyim Bible. Gogo, wanfala nara fren bilong George ring kam and sei hem laekem wanfala Bible study. Then George tekem kam Max, narafala young man moa long Kingdom Hall. Hem tu laek for study. Distaem sixfala Bible study gohed, and fofala moa bae start. Olketa study hia hem long English, nomata olketa iusim tu olketa pablikeson wea stap long Hindi, Malayalam, Marathi, Punjabi, Tamil, Telugu, and Urdu languis.
Olketa wea Earpas “Herem” Gud Nius
Winim 90,000 pipol wea earpas stap long Italy. Tu-thri year bihaen 1970, olketa Witness start for teachim truth from Bible long olketa. Taem olketa start, samfala Witness wea earpas teachim Italian Sign Language (ISL) long olketa nara Witness wea willing for help. Then, staka maka staka pipol wea earpas start for interest long Bible. Distaem, winim 1,400 wea iusim ISL kam long olketa Christian meeting. Olketa wea iusim ISL long olketa meeting hem 15-fala kongregeson and 52 grup.
Fastaem, wei for preach long pipol wea earpas hem depend long olketa Witness wanwan nomoa. Bat long 1978, branch office bilong Olketa Jehovah’s Witness long Italy start for organizem olketa convention for pipol wea earpas. Long May long datfala year, olketa announcem hao wanfala international convention wea bae kamap long Milan, bae garem olketa program for pipol wea earpas. Fasfala circuit assembly for olketa wea earpas hem kamap long Assembly Hall long Milan long February 1979.
Start long datfala taem branch office tingim tumas spiritual saed bilong olketa wea earpas. Hem encouragem plande long olketa wea talemaot gud nius for kamap gud long disfala languis. Start long 1995, olketa sendem olketa spesol pioneer (olketa wea full-taem for talemaot gud nius) long samfala grup for trainim olketa Witness wea earpas long ministry and for organizem olketa Christian meeting. Thrifala Assembly Hall garem niu kaen video for mekem program hem klia. And olketa Christian pablikeson tu stap long video kaset for provaedem spiritual kaikai long pipol wea earpas.
Olketa nara pipol luksavve hao olketa Witness lukaftarem gud spiritual need bilong pipol wea earpas. P@role & Segni, wanfala magasin wea Italian Deaf Society wakem hem garem disfala toktok from wanfala leta wea wanfala bigman long Catholic raetem: “Hem barava hard for man wea earpas bikos hem needim narawan for lukaftarem hem evritaem. Olsem example, hem isi for hem kam seleva long church, bat hem needim narawan for explainim olketa samting wea olketa readim, talem kam, or olketa singsing.” Datfala magasin sei moa: “Datfala bigman luksavve hao sorre samting nao church no redi yet for helpem pipol wea earpas, and hem sei olketa kasem moa help long Kingdom Hall bilong Olketa Jehovah’s Witness winim insaed church.”
Preachim Gud Nius Long Olketa Prisoner
Waswe, man savve free nomata hem stap long prison? Barava nao, bikos Word bilong God garem paoa for ‘mekem free’ olketa wea acceptim and followim datwan long laef bilong olketa. Datfala message wea Jesus talemaot “long olketa prisoner” hem freedom from sin and giaman religion. (John 8:32; Luke 4:16-19) Long Italy nambawan samting nao kamaot from wei for preach insaed olketa prison. Gavman letem klosap 400 minister bilong Olketa Jehovah’s Witness for visitim olketa prisoner for givim spiritual help. Olketa Jehovah’s Witness nao fasfala organization wea no Catholic wea ask and olketa letem for duim datwan.
Message bilong Bible maet kasem moa pipol long wei wea no eniwan expectim. Olketa prisoner storyim Bible education waka bilong Olketa Jehovah’s Witness long olketa nara prisoner. From datwan, olketa hia ask for eni minister bilong olketa Witness for kam lukim olketa. Or eniwan long famili bilong olketa prisoner wea start for studyim Bible encouragem olketa prisoner for askem olketa Witness for kam lukim olketa. Samfala wea mas stap for full laef long prison from olketa killim man dae or duim samfala barava serious samting, olketa repent and barava change. Diswan mekem olketa fit for dedicate long Jehovah God and for baptaes.
Long samfala prison, olketa arrangement kamap finis for givim olketa pablik tok wea story abaotem olketa subject from Bible, for celebratem Memorial bilong dae bilong Jesus, and for showim olketa video kaset wea Olketa Jehovah’s Witness wakem for storyim samting saed long Bible. Plande taem staka prisoner savve kam long olketa meeting hia.
For helpem olketa prisoner, olketa Witness givimaot olketa magasin wea storyim information wea savve helpem olketa. Wanfala, hem datfala May 8, 2001, Awake!, wea storyim datfala subject “Can Prisoners Be Reformed?” Datfala magasin bilong April 8, 2003, hem storyim “Drug Abuse in the Family—What Can You Do?” Olketa givim staka thousand long olketa magasin hia long olketa prisoner. From datwan, olketa duim plande handred Bible study. Samfala prison gard tu interest long message bilong Bible.
Olketa bigman long prison letem Costantino for go aot for baptaes insaed wanfala Kingdom Hall long San Remo, wea 138 Witness nao attend. Bihaen Costantino hem baptaes, feeling bilong hem showaot klia taem hem sei: “Mi feelim bigfala love.” Wanfala niuspepa talem toktok bilong wanfala gard: “Mifala barava hapi . . . for letem diswan. Mifala shud tingim evri samting wea savve helpem wanfala prisoner change and kamap gud saed long community, laef bilong hemseleva, and spiritual saed bilong hem.” Wei wea stretfala savve affectim laef bilong Costantino barava muvim waef and dota bilong hem and tufala sei olsem: “Mitufala barava tinghae long dadi bilong mifala from wei wea hem change. Hem kamap man wea garem peace, and wei wea hem kea for mitufala hem kakamap big. Mitufala start for trustim and respectim hem moa.” Tufala tu start for studyim Bible and kakam long olketa Christian meeting.
Sergio, wea guilty from hem steal, iusim gun for steal, tekem drug go long nara kantri, and for killim man dae, bae stap long prison go kasem 2024. Bihaen Sergio studyim Bible for thrifala year and changem staka nogud wei bilong hem, hem disaed for baptaes. Hem mek-15 prisoner wea baptaes for kamap wanfala Jehovah’s Witness long Porto Azzurro prison wea stap long Elba Island. Samfala nara prisoner stap taem hem baptaes insaed wanfala pool wea olketa putim long ples bilong olketa prisoner for plei.
Leonardo, wea bae stap long prison for 20 year, hem ask for olketa letem hem go aot for baptaes long wanfala Kingdom Hall long Parma. Taem niuspepa interviewim Leonardo, hem sei hem laek for “talem hao wei wea hem disaed for kamap wanfala Jehovah’s Witness, hem no for go aot from darkness insaed prison, bat for satisfaem spiritual need wea barava important.” Leonardo hem sei: “Mi mekem samfala bigfala mistek long laef bilong mi, bat mi no tingim datwan distaem. Mi change nao, nomata long isisi wei. Mi bae need for gohed duim stret samting.”
Salvatore stap insaed ples for keepim olketa barava nogud criminal long prison long Spoleto, from hem killim man dae. Hem baptaes insaed long prison, and datwan mekem staka sapraes. Prison gard long there hem sei: “Iumi mas encouragem disfala wei for chusim samting for mekem fasin bilong man kamap moabeta, from diswan savve helpem pipol insaed long prison and full community.” Wei wea Salvatore hem change, hem mekem waef and wanfala dota bilong hem go long olketa meeting bilong Olketa Jehovah’s Witness distaem. Wanfala prisoner wea Salvatore witness long hem, hem baptaes and kamap wanfala servant bilong Jehovah wea dedicate.
Italy hem wanfala ples wea Christian Wei kamap moa big and grow long hem bifor. (Acts 2:10; Romans 1:7) Long disfala taem bilong harvest, staka pipol kasem truth long olketa sem ples wea Paul and olketa nara Christian waka hard for preachim gud nius bifor.—Acts 23:11; 28:14-16.
[Map long page 13]
(For formatted text, lukim pablikeson)
ITALY
Rome
[Olketa Piksa long page 15]
Assembly Hall long Bitonto and wanfala Italian Sign Language kongregeson long Rome
[Piksa long page 16]
Bible truth mekem olketa prisoner ‘kamap free’
[Olketa Piksa long page 17]
Staka pipol kasem truth long olketa ples wea Christian Wei gohed gud bifor