“Jehovah Nao Man wea Helpem Mi”

Singol and Hapi for Servem Jehovah

WANFALA Christian woman long Spain sei: “Staka long mifala hapi nomata mifala no marit.” Why nao hem hapi? “Mifala enjoyim wei wea mifala free from wari wea marit pipol savve kasem, mekem mifala savve servem God bilong mifala Jehovah, long bigfala wei moa.”

Hem olsem samting wea word bilong God talem abaotem wei for singol. Taem aposol Paul story abaotem marit, hem talem toktok hia wea kam from God: “Mi talem olketa wea no marit and olketa widow woman hao hem gud for olketa gohed for stap olsem mi.” Paul tu hem no marit. So wanem nao reason bilong hem for encouragem olketa Christian for stap singol? Hem sei man wea marit warim staka samting, bat man or woman wea no marit “warim olketa samting bilong Lord” nomoa. (1 Corinthians 7:8, 32-34) Wei for servem Jehovah hem main samting wea mekem singol man hem hapi.

Nambawan Reason for Singol

Pipol wea ting hem barava important for marit and garem famili, maet konfius long toktok bilong Paul. Nomata olsem, Jesus Christ wea hem no marit bat hem hapi, hem talem wanfala nambawan reason for olketa Christian for stap singol. Hem sei: “Samfala kamap eunuch from olketa seleva nao laekem for saed bilong kingdom long heven. Sapos man hem willing, hem gud nomoa.”—Matthew 19:12.

Olsem datfala scripture talem, staka lukim hao wei for singol helpem olketa for servem God and olketa no garem wari wea marit pipol savve kasem. (1 Corinthians 7:35) Staka thousand Christian hapi for worshipim Jehovah nomata olketa no marit, and olketa hapi for busy for helpem olketa narawan.a

Staka Christian wea no marit luksavve hao no olketa wea marit nomoa olketa hapi, and tu, for no hapi hem no for olketa wea singol nomoa. Nomata olketa wea marit or singol, samfala taem olketa hapi and sorre tu. Bible talem stret hao marit mekem man kasem “trabol long body.”—1 Corinthians 7:28.

Olketa wea No Chus for Singol

Staka singol nomata olketa no chus for olsem. Olketa maet laekem love and wei for fren wea kamap insaed marit. Bat for samfala, maet selen, or olketa nara samting nao stopem olketa for marit. Samfala Christian stap singol from olketa disaed for obeyim kaonsel long Bible for maritim nomoa “wanfala Christian”—staka hem olketa spiritual sista bilong iumi. (1 Corinthians 7:39) Olketa loyal for luk aotem samwan for maritim midolwan olketa wea worshipim Jehovah, wea dedicate and baptaes finis.

Samfala taem, samfala long olketa feel lonely. Bihaen wanfala Christian wea singol talem hem feel olsem, hem sei: “Mifala wea singol savve long law bilong Jehovah and mifala nating laek duim eni samting wea bae mekem Jehovah for no hapi. Maet mifala laekem wei for fren wea kamap insaed marit, bat nomata haomas taem pipol long world trae for faendem partner for mifala, mifala disaed strong for stap singol. Mifala nating laek tu for kaban witim olketa man and woman wea no worshipim Jehovah.” Olketa Christian olsem shud kasem praise, from olketa followim Bible kaonsel for keepim hae standard saed long fasin for mekem Jehovah hapi, nomata samfala taem hem no isi.

Bigfala Help From Jehovah

Jehovah loyal long olketa wea showimaot loyal fasin long hem saed long wei for no maritim samwan wea no servem hem. From samting wea King David kasem, hem fit for sei: “Long man wea loyal, iu [Jehovah] bae duim samting long loyal wei.” (Psalm 18:25) And God promisim olketa wea faithful for obeyim hem: “Mi bae nating lusim iu and bae nating forgetim iu.” (Hebrews 13:5) Iumi savve followim example bilong Jehovah long wei for praisem evri Christian wea singol wea faithful for followim Word bilong God. Iumi savve prea long Jehovah tu for strongim olketa for deal witim olketa hard samting wea olketa kasem.—Judges 11:30-40.

Staka Christian wea singol savve hao wei for busy evribit long waka for teachim Bible hem mekem olketa hapi. Olsem example, tingim Patricia, wanfala gele wea winim 30 year and no marit wea hem wanfala pioneer, wea minim hem talemaot gud nius full taem. Hem sei: “Nomata wei for singol garem staka hard samting, hem givim mi chance for regular pioneer. From mi singol, hem isi for mi changem schedule, wea mekem mi garem staka taem for study. Mi lane tu for barava depend long Jehovah, especially taem mi kasem hard taem.”

Datwan barava fitim disfala promis from Bible wea savve encouragem man: “Letem Jehovah leadim gogo bilong iu, and depend long hem, and hem nao bae duim samting.” (Psalm 37:5) Tru tumas, evriwan wea faithful for worshipim Jehovah, nomata olketa wea marit or singol savve kasem comfort and strong from toktok hia wea kam from God: “Jehovah nao man wea helpem mi.”—Psalm 121:2.

[Footnote]

[Blurb long page 9]

“Man wea no marit hem warim olketa samting bilong Lord, hao hem savve mekem Lord hapi.”—1 CORINTHIANS 7:32

[Box long page 8]

HAO FOR SINGOL AND WIN

Jesus, wea no marit sei: “Kaikai bilong mi hem for duim will bilong datwan wea sendem mi kam, and for finisim waka bilong hem.”—John 4:34.

Fofala dota bilong Philip wea no marit busy for “talemaot profesi.”—Acts 21:8, 9.

Olketa singol Christian sista wea talemaot message bilong Kingdom olketa part long ‘bigfala army bilong olketa woman wea talemaot gud nius.’—Psalm 68:11.